ألين ولا أنكسر ٢

بسم الله خالق الكون ومصرّف الأقدار حملنا الهم فخفّ وإن ثقل...ورفعنا بعونه ظلما فتكأكأ الظلمة علينا يتقاذفونا فلم نجزع...ثبتنا أقدامنا ورفعنا أكفّنا إلى مصرّف الأقدار ومقلب القلوب ودعوناه فهدانا للصمت فامتثلنا...لم نكلّ...ولا لغيره نشكوا

أنا التي وطئني العالم سبع مرات بنعله وفي كل مرة انتصبت واقفة بأمر ربّي...كنخلة كلّما انثنت ألقت ثمارها متخففة حتى إن أفلتوها عادت لتثمر...ألين ولا أنكسر...فإن وطئني العالم لثامنة لأقامني كفّ الرحمن فإنكم لا تعجزونه...لي رب قادر أمره كان مفعولا

وحدي...بلا سند تعرفونه...اتكيء على ما لا تعلمون ليقيم ظهري...للكون رب

بلا روح

مالك وآخرة دقة في قلبي؟ أتهمك حقا إلى هذا الحد؟ احملها وامضِ ولن أسألك إلى أين تأخذها..أيعنيك قلبي أيضا؟ هو لك...افعل به ماشئت...فأمره هو الآخر لا يعنيني...خذ كل شيء...حتى ابتسامتي ان راقت لك...خذها...خذ كل شيء...عن طيب خاطر...فما فائدة أي مما تأخذ إن كانت روحي قد انسحبت إلى زاوية العالم وتكورت على نفسها؟ لا شيء يا عزيزي...لم يعد هناك قيمة لشيء منذ أن أدارت الروح وجهها عن كل شيء والتزمت الصمت...تجلس على حافة العالم ترقب كل شيء بشفة مقلوبه وتركت للعقل زمام كل أمر وكأن شأنها لم يعد يعنيها

لم يعد هناك مكان لأي شيء...فلا تسألني عن ابتسامة غائبة ولا عن دمع محبوس خلف المقلتين...كل ما تبحث عنه يا صديقي ليس له الآن وجود..لم يتبقى لي سوى نفس مثقلة بهموم لا تدركها وعقل يسحق كافة تفاصيلي بيغير اكتراث وكأن الروح قبل ان تنزوي عدّلت ضبطه على وضع التدمير الذاتي

لست أملك شيء...فجدران القلب عارية من كل ذكرى...ولم يعد بإمكاني أن أملأ حجرات القلب بالحلوى والياسمين وعناقيد العنب كسابق عهدي...نفد كل شيء ولم يترك لك أحد هناك بقايا مما كان...لماذا تهتم على كل حال؟ أهي الشفقة أم العطف؟ صدّقني يا عزيزي لم احتمل أي منهما قبل ذلك ولن أقبلهما اليوم فدعنا نكف عن المراوغه: أنت لا ترغب في اكتشاف شيء...وأنا لا أهتم بكشف أكثر مما اكتبه هنا للعابرين...هو فقط ذلك الفضول تجاه ما يكمن خلف هذا الوجه..فدعني أختصر عليك الطريق وأخبرك بما تريد أن تعرف: ليس هناك شيء خلف هذا الوجه سوى العدم

باثني في بوئي!

"بَدَأَ الإِسْلامُ غَرِيبًا ، وَسَيَعُودُ كَمَا بَدَأَ غَرِيبًا ، فَطُوبَى لِلْغُرَبَاءِ"

"إِنَّ النَّاسَ دَخَلُوا فِي دِينِ اللَّهِ أَفْوَاجًا ، وَسَيَخْرُجُونَ مِنْهُ أَفْوَاجًا"

 

"يأتي على الناس زمان القابض على دينه كالقابض على الجمر"

لما كنت بسمع الأحاديث دي وأنا صغيره كنت بندهش جدا إزاي ده يحصل! إزاي أفواج من المسلمين يكفروا..وماكنتش بفهم إزاي المسلمين هيبقوا قليلين واحنا دلوقت كتير أوي! وإزاي هتبقى حاجة صعبه أوي أوي إن الواحد يفضل مسلم! كنت دايما بتخيل إن دي حاجات هتحصل بعد أنا ما أموت بتلتوميت ولا ربعوميت سنه...عمره ما جه في بالي إني هعيش لحد ماشوف بداية التحولات!

بقى ملحوظ جدا بالنسبالي ان مصر فيها ٣ نسخ من الإسلام:

- إسلام الناس اللي بيقولوا إحنا مسلمين ومابيزودوش عليها حاجة

- إسلام الإخوان المسلمين

- إسلام السلفيين

أنا والحمد لله مسلمة...من المسلمين اللي بيقولوا إحنا مسلمين بدون زيادة أي تفريعات من أي نوع...مابفهمش التفريعات اللي من الصنف ده في الدين...ومابفهمش التشيّع لفكر أو إنسان...في العموم يعني مابتوائمش مع المبالغه في أي حاجة...ولسه فاكره لما أخويا اللي فوقيا حب فجأة يصلي السنن كلها مره واحده الواجبه والغير واجبه بابا قاله حديث: مايشاد هذا الدين أحدا إلا غلبه فأوغلوا فيه برفق...قاله التزم بالسنن الواجبه واحده واحده مش كلهم مره واحده وكل ماتلاقي عندي طاقه لزياده ابقى زوّد لحد ما تتم السنن كلها إذا قدرت...وقعد يفهمه إنه مايغاليش في العبادات...والمغالاه في العباده هو الانقطاع ليها على حساب كسب القوت وصلة الرحم على سبيل المثال...أو إن الإنسان يلزم نفسه بعبادات وطاعات وقته وطاقته مايسمحولوش يفضل مواظب عليها...وقاله كمان إن المغالاه أول سكّة التطرف...دي حاجة بابا شافها بعينه مع ناس يعرفهم...وأنا وأخويا شفنا ده بعد كده مع ناس نعرفهم

دي طبيعة الإسلام اللي اعرفه وآمنت بيه: " ربنا مش طالب مني غير اللي أقدر عليه...ولا بيبتليني بحاجة انا ماقدرش استحملها

"لا يكلّف الله نفسا إلا وسعها"

لكن النسخ الجديدة من الإسلام اللي ظهرت عالوش دلوقت دي أنا ماعرفهاش ولا بفهمها....مابفهمش يعني إيه نكره المسيحيين...ولا بفهم يعني إيه نكره أي كافر بالإسلام لمجرد إنه كافر بالإسلام...حتى "الكفّار" لو اعتدوا عليا أرد العدوان وأدافع عن نفسي بس ماقاليش أكرههم!

وأعجوبة الأعاجيب بالنسبالي حاليا الإخوان المسلمين اللي بينزلوا يضربوا (ويقتلوا ساعات) أي حد يتظاهر تحت مقارهم بحجة إنهم بيشتموهم في بيتهم!

طب مبدئيا كده خلينا مع بعض واحده واحده...أولا العرف مصدر من مصادر التشريع...وبناخد من العرف ما لا يتعارض مع الدين...يعني لو العرف بيقول شرب الخمره بييس يا ماو أنا كمسلمة ماتبقاش الخمره حلال بالنسبالي لأنها متحرّمه بنَصّ...نيجي بقى للحاجات اللي مش بتتعارض مع الدين...العرف عندك بيقول لو واحد شتمك جوا بيتك ماتردش عليه وتستحمله لحد ما ياخد بعضه ويغور في ستين داهيه...واخدين بالكوا من جوا بيتك دي؟ مش تحت باب عمارتكوا ماشي؟!

ده أولا...ثانيا بقى شرعا نشوف ياسيدي الرسول والصحابة كانوا بيتصرفوا إزاي في المواقف اللي زي دي...طبعا كلنا خدنا في المدرسة الحكايه بتاعه الراجل اليهودي اللي كان بيشتم سيدنا النبي في الرايحة والجاية ويرمي زبالته قصاد بيته....إلخ...النبي ماردش عليه الشتيمه...ولا رد الأذى بأذى من أي نوع مع إن الأذى اتوجه لدينه وشخصه مش واحده فيهم بس!

تقولهم كده يقولك لأ هو النبي مايردّش عن نفسه وبتاع...طب هو يابن الحلال مش النبي ده ربنا بعتهولنا عشان نعمل زيه على أد مانقدر؟ يقولك بس دول بيشتمونا بألفاظ تحت بيتنا! يحسسك إن الراجل اليهودي دهوّن كان بيروح يغني أناشيد مديح في الرسول من بتوع يس التهامي مثلا :D وربنا كان بيشتمه :D

طب حبيب ماما أولا مقرات الجماعه دي مش بيتك! ثانيا يا ضنايا ماحدّش فيهم شتمك...يقولك انا بهب لنصرة أخي في الإسلام (يقصدوا الثلاثي المرح: بديع وخيرت ومرسي...ماحدش بيتشتم عند المقرّات غيرهم تقريبا) :D

تقوله طب يا قلب أمك دا واحد رايح أعزل وبيشتم...تضربه ليه؟ مش ربنا قال "من اعتدى عليكم فاعتدوا عليه بمثل ماعتدى عليكم"؟ دا غير انه اصلا ماعتداش عليك وخيرت ومرسي وبديع عندهم حرسهم الخاص أساسا مش مستنينك يا عم الأمور تنزل تضرب حد عشانهم!...يبدأ بقى خياله في التمدد والانكماش في مجموعه من التقلصات العنيفه ويبهرك في الآخر بمجموعة إبقاق مسخرة من نوعية: دول كفّار...دول بيسبوا الإسلام...وتنويعات مختلفه على مقولة خالتي أطاطا: باثني في بوئى!

تقوله طيب يا عم الحاج نرجع للسيره بمناسبة أخوك في الإسلام....هو اليهودي لما كان بيشتم النبي والإسلام في الرايحة والجاية مش كان في مسلمين؟ حد منهم ياعم راح هوّب ناحية الراجل ولا جه جنبه؟ لما النبي العيال حدّفته بالطوب في الطائف لحد ما قعد يدعي ويعيّط من "هواني على الناس" حد من اللي كانوا معاه عملوا حاجة غير انهم حاولوا يحوشوا الطوب عنه بأجسادهم؟ يقولك أصلهم كانوا قلّة ومستضعفين ولسه الإسلام ماقويش....إلخ

طيب لما الإسلام بقى قوي والمسلمين تمكنوا وبقوا يعملوا غزوات وحروب وسرايا وعندهم جيش وبتاع سمعناش مثلا عن غزوه انتقاميه بعد كده على الطائف بدون مناسبه تحت عنوان: "غزوة نصرة رسول الله" ولا "غزوة نصرة الإسلام"!!!!!

ودي بقى بتكون اللحظة اللي يا إما بيقعد يحسبن عليك عشان هو افترض إنك كافر...يا إما بيدعيلك ربنا يهديك عشان انت حمار قديم لسه مش فاهم دينك كويس...ده إن مكانش مسكك ضربك قبلها أصلا :D ... وربنا ماعرف اللي هم بيعملوه ده النبي ولا الصحابة عملوه فين ولا ربنا أمرنا بيه في المصحف! 

وبكده يا ولاد نكون فهمنا إزاي الناس هتخرج من دينها وإزاي المسلمين هيبقوا قليلين وهيروحوا يستخبوا من البشريه عشان مش عارفين يعيشوا وسطيهم بأخلاق إسلامهم


وأختم أنا بقي بجملتهم الشهيرة لما بيتزنقوا: الله يفصل بيننا يوم القيامة :D 

ملحوظة: لو حد منهم شايف إن مكتب الإرشاد ولا أي مقر من مقرات الجماعه يبقى بيته ياريت يندهلي أمه عشان أقولها إنها ماعرفتش تربي

أعاجيب الزمان

فَذَكِّرْ إِنَّمَا أَنتَ مُذَكِّرٌ، لَّسْتَ عَلَيْهِم بِمُصَيْطِرٍ، إِلاَّ مَن تَوَلَّى وَكَفَرَ، فَيُعَذِّبُهُ اللَّهُ الْعَذَابَ الأَكْبَرَ، إِنَّ إِلَيْنَا إِيَابَهُمْ، ثُمَّ إِنَّ عَلَيْنَا حِسَابَهُمْ

دول آخر ٦ آيات من سورة الغاشية...مالقيتش فيهم الصراحة فين دور الإخوان والسلفيين في موضوع حساب الناس في الدنيا أو الآخره...يعني ربنا قال للنبي اللي كفر في الدنيا سيبه انت مالكش سيطره عليه وانا هحاسبه يوم الدين...مش عارفه الحقيقه إيه اللي مفهّم الإخوان والسلفيين إن هم موكل إليهم ما لم يوكل للنبي نفسه!

اعتبرهم كفّار يا أخي

انا مش لاقيه في المصحف ربنا قال فين "نكره" الكفار...ومش لاقيه في المصحف ربنا قال فين "نضرب الكفار اللي عايشين وسطينا"...ومش لاقيه في سيرة الرسول والصحابه حد منهم امتى اعتدى على أبو لهب ولا مراته حمّالة الحطب

 

لو افترضنا ان كل اللي الإخوان ضربوهم من يوم ما مرسي مسك الحكم للنهارده كفّار: والنبي تقلولولي يا إخوان يا "مسلمين" ربنا قالكوا فين تعملوا كده عشان النسخة اللي عندي من الإسلام مافيهاش الكلام ده...تكونش مقصوصه؟

فضفضة

من يوم وفاة جدي وانا عندي ١٢ سنه ماعيطتش لحد لما دخلت الجامعه مره واحده...كانت لحظة حسيت فيها بقهر فاق احتمالي...ولما عيطت ساعتها ماسكتش غير بقرص مهديء ونوم...وبكيت مره تانيه في ٥ سنين دراسة جامعية...برده كنت حاسه فيها بقهر فاق احتمالي...وبرده ماسكتنيش غير قرص مهديء ونوم...من ساعتها لحد الثوره بكيت ٣ مرات...مرتين يوم وفاة خالي الأكبر وخالي الأوسط...ومره بعد ما استقليت بحياتي عن أهلي بحوالي شهر...بكيت يومها بهدوء...كانت دموعي بتتزحلق على خدي في سكينه شديده...كانت دموع راحة من قهر كتير عديت بيه ونزلت وقت ما تجاوزت عن الشعور السلبي اللي كان ملازمني حوالي ١٦ سنه من حياتي...دموع التجاوز دي أريح شيء في الوجود

وقت ال ١٨ يوم عيطت كتير وانا ببتسم...يوم ٢٨ وانا شايفه اول واحد بينزل من علي كوبري والمسيره مالياه وانا على آخره ولسه ورايا ناس...بكيت من السعاده وانا بشد في دراع فضل صديقي وبتنطط: "الناس نزلت يا فضل الناس نزلت"...المسيره دي بدأت من امبابه بأقل من ١٠٠ فرد...وكنت بعيط وانا مبتسمه كل مره سمعت فيها اغنيه وطنيه خلال ال ١٨ يوم...مابكيتش خالص يوم موقعة الجمل ولا يوم ٢٨ يناير علي الناس اللي اتعورت وماتت....من بعدها مابكيتش غير بعد ماظهرت جثة زياد بكير (أخو صديقه ليا من أيام الكلية)...ومرة يوم جنازته...ومره يوم وداع شهيد تاني ماعرفوش مشيت في جنازته من القصر العيني وصلينا عليه في التحرير...مكنتش بعيط عليهم...مش فاهمه فعلا يعني ايه اعيط على شهيد...كنت بعيّط على المرمطه اللي اهلهم اتمرمطوها...أهل زياد فضل يجيلهم تليفونات تهديد لحد يوم ماتدفن بإنه لسه حي ولو اتكلموا مش هيشوفوه تاني...والولد التاني كان بيصرف على أهله...كان في عز شبابه وراح من أمه مش فاكره كان مين قتله...اللي قتلونا كتير

من بعد الولد ده مابكيتش تاني غير في جنازة الشيخ عماد عفّت...ماكنتش اعرف الشيخ عماد...مشيت في جنازته وانا مبتسمه وبسبح وبدعي ربنا يحسن خاتمتي...أكبر جنازة شوفتها في حياتي وكنت بستعجب: "عملت إيه يا مولانا عشان تنول البركه دي؟ علّك ولي واحنا مانعرفش"...لحد ماوصلنا المدافن...كان بيني وبين التربه لما اتفحت ناس كتير فمكنتش شايفاها...بس فجأة شميت ريحة جميله اوي ماشميتهاش غير في حلم حلمته بجدي الله يرحمه جوا الكعبة...لما الناس ابتدت تنصرف فضلت اتتبع الريحة...لقيتها طالعه من التربه اللي بيدفنوا فيها الشيخ عماد...سألت الناس مالقيتش حد شاممها غير نواره..قالتلي دي ريحة مسك

طلعت يومها قابلت ناس زمايلي عشان اروح معاهم...واحنا مستنيين تاكسي اتفحت في العياط...مش حزن على شهيد إطلاقا...بس كنت هتجنن...ربنا بيسيبنا عايشين طول ما حياتنا نفع...وبيقبض ارواحنا لما بيشوف ان دورنا انتهى أو بتكون وفاتنا عبره لناس عايشه...السؤال اللي كان مجنني وقتها: أنا دوري إيه؟ إيه اللي مطلوب مني أعمله وعشانه ربنا سايبني عايشه؟...مش متضايقه اني عايشه...ولا عاوزه انتحر...بس كان نفسي أفهم انا مطلوب مني اعمل إيه عشان أعمله؟...تميم البرغوتي كان واقف ورايا وانا بعيط فجأة لقيته بيقولي اكتبي...سألته أكتب إيه؟ قالي ماعرفش اكتبي يمكن كتابتك على البلوج دي هي دورك اللي مفروض تقومي بيه

 

 كتير بحاول أكتب ومابعرفش...اللي متابع البلوج من زمان عارف ان ده شيء غريب اني بقيت أكتب قليل...من بعد الثورة وانا بفقد بالتدريج القدره على الكلام والبكا والكتابه...نزل عليا سهم الله...مخي ماعادش قادر يتعامل مع اللي شافه...لأن كل حاجة مهببة شوفتها ومريت فيها في الفترة دي مكانش بيبقى عندي وقت احس بحاجة او حتى أبكي...واحد وقع...شدي نفسك وخشي الحقي حد تاني جوا وابقي عيطي بعدين...وبعدين ده مجاش بقاله سنه...مخي فرمت نفسه...مسح كل حاجة كأن لم تكن...مابقاش عندي ذكريات متعلقة بأي أحداث...ناس بتقابلني تقولي اتقابلنا وقت ضرب في شالرع...ويحكولي مواقف حصلت بينا...وانا مش فاكره أي حاجة...مخي كبت كل شيء بما فيهم تفاصيلي انا الشخصيه...بقيت زي كائن فضائي هبط عالأرض اول امبارح ماعندوش فكره عن أي حاجة ولا حتى حياته في كوكبه السابق...زي ماكون وقعت في ثقب زمني...المخ مسح مخزون الذكريات والمشاعر فمبقاش في حاجة يسترجعها

بقالي مده بحاول استعيد كل الذكريات ومش عارفه...وطول مانا مش عارفه مش هعرف اكتب...عارفه ان دي فتره وهتعدي طول مانا بحاول أعديها...المحزن أكتر إن ليا صحاب كتير حواليا كده وانا مش عارفه اساعدهم..لأني مش عارفه أعمل كتالوج للخروج من أزمه انا لسه في نصها...شعور غبي بالعجز...ورغبة قوية اني افتكر كل الذكريات المؤلمة عشان أقدر اتعامل معاها وأقدر أكمل حياتي بشكل طبيعي...ولسه مالقيتش سكه واضحة اطلع منها واشاور لصحابي عليها 

في الفتره دي...وتحديدا بعد استشهاد الشيخ عماد أدركت حاجة مهمة جدا...الشهدا حقهم عمره ما هييجي دلوقت...القصاص مش حق الشهدا...القصاص ده حق الناس اللي عايشه واتضرت باستشهاد حبايبهم...لكن الشهدا حقهم هيجي عند الله يوم الحساب مش هنا خالص...وده بالنسبالي مش معناه التقصير في تحقيق القصاص...بالعكس...ده سبب أدعى لتحقيق القصاص: لناس اللي عايشه بتتعذب كل يوم دي ترتاح شويه

اللي قوي الفكره دي كان حلم حلمته بشهيد عمري ماقابلته: أحمد بسيوني...كنت في حلم معديه من حته عمري ماشوفتها في حياتي...سهل كبير مقسوم نصين...نص زرع اخضر والنص التاني اللي كان فيه بسيوني ارض رمليه واسعه اوي...وهو نايم تحت ضليله...مستلقي على الأرض ونايم...عينيه مقفلين بس مفتحين...وجسمه كله سليم...اختلفت انا والناس اللي حواليا...أقولهم نايم...يقولولي مات...وصوت يجيلي من يميني من حد مش شايفاه يقولي عايش...أقول للناس اللي قاعده علي شمالي بتشرب شاي أقولهم عايش ونايم..يقولولي مات...الصوت يجيلي تاني من يميني يقولي عايش...هزيه يمكن يصحى...لقيته مبتسم وبيبصلي وعينيه مقفلين بس انا شايفه نني عينه...جيت أصحية قومت انا من النوم وعلى لساني بقول مع الصوت اللي كان في الحلم: ولا تحسبن الذين قتلوا في سبيل الله أمواتا بل أحياء عند ربهم يرزقون...الحلم ده تعبني فتره في تفسيره...كل اللي قدرت افهمه منه لوحدي بدون مساعده ان الشهيد عايش ومبسوط...لحد اما حد اعرفه نبهني لحاجة مهمه...إن بسيوني كان بيقولي انه في مكان افضل وإن جسمه اللي اتصاب في الدنيا دلوقت سليم بس احنا مش شايفينه وهو شايفنا

من أول يوم لغاية النهارده مابكيتش شهيد...ولا هبكي شهيد...انا ببكي العايشين..الإنسان عمره قصير..ومسيرنا هنحصلهم..قريب أو بعيد مش مهم...المهم اننا هنتقابل 

امبارح اكتشفت ان واحد من اللي راحوا في مجلس الوزرا كنت اعرفه بس ماعرف شاسمه...كنت بقابله وسط صحاب في الميدان...اتقهرت...وبرده ماعرفتش ابكي...هي دمعه واحده يتيمه نزلت من عيني اليمين وانا بقول: بل أحياء عند ربهم يرزقون

حسيت ساعتها ان الدنيا دي سخيفه...سخيفه أوي..مالقيتش حاجة اعملها غير اني اكتب البوست ده...يمكن حد يلاقي فيه تنفيس عن شيء...يكمله حته ناقصه..أو يزيح عنه هم...أو حتى يحسسه إنه مش لوحده...إحنا كتير...وكلنا رايحين...ماحدش قاعد فيها للأبد...وأهي دمعه خدتلها سنه عشان تنزل...يمكن ربنا يفرجها بحبة عياط قريبين يشيلوا عن صدري شوية هم متراكم

الصعيدي الذكي

كان في زمان نكته عن واحد صعيدي سألوه ليه كاتب على برطمان السكر: ملح؟ قالهم عشان النمل ماياخدش باله

بم بارابارم بم بم

غبي أوي صح؟...المفاجأة أيها الأخوة المواطنون أن الصعيدي ده طلع معاه حق...ومن غير ماتسألني ليه انا هقولك...ده بالزبط اللي بيتعمل معنا واحنا بنصدق زي أي مستعمرة نمل هبله...مع إن النمل نبيه بس إحنا أي خره بيتعبالنا في إزازه ويتكتبلنا عليه ملبس بناكله بدون تفكير وبنتعامل معاه على إنه ملبس...ومن غير ماتسألني إزاي انا برده هقولك

لما نقول احنا عاوزين ضرايب تصاعديه يقوموا قايلينلنا هنطبق الضريبه التصاعديه بإن أي حد بيقبض أكتر من ٩٠٠٠ جنيه في السنه (٧٥٠ ج في الشهر) هنطبق عليه ضريبه ١٠٪...وإحنا نصدق إن دي فعلا الضريبه التصاعديه يبقى إحنا صدقنا إن برطمان السكر فيه ملح

لما يقولولونا إن تعدد الزوجات "سنه" عن الرسول عليه أفضل الصلاه والسلام وإحنا نصدق إنها سنه فعلا مش مجرد رخصه تبيح الفعل يبقى إحنا صدقنا ان برطمان السكر فيه ملح

لما يقولولنا إن زواج الطفلات في سن ٩ سنين قشطه شرعا وإحنا نصدق إن ده فعل مباح مش مرض اسمه بيدوفيليا يبقى إحنا صدقنا ان برطمان السكر فيه ملح

 

لما يقولولنا إن الفوائد على القروض الدولية مش ربا وأحنا نصدق يبقى إحنا صدقنا ان برطمان السكر فيه ملح

 

لما رئيس الوزرا يقولنا إنه شم غاز مسيل للدموع عند السفارة الأمريكية وإن الغاز غير ضار بالصحة ونتجاهل اللي شوفناه بيحصل لينا ولغيرنا من جراء التعرض للغاز المسيل للدموع ونصدقه يبقى إحنا صدقنا ان برطمان السكر فيه ملح

 

ولما يقولولنا إن الجيش ماسحلش حد ولا قتل حد وإحنا نتجاهل اللي شوفناه بعينينا ونصدق يبقى إحنا صدقنا ان برطمان السكر فيه ملح

 

لما يقولولنا ان هيبة الدوله تعني إن الداخليه تعذب الناس في الأقسام وتهدد ذويهم وتضربهم في الشوارع وإحنا نصدق يبقى إحنا صدقنا ان برطمان السكر فيه ملح

 

لما يقولولنا إن الجيش عمل عملية عسكرية لتمشيط سيناء والقبض على الإرهابيين وبعدها بشهر يرجع الوضع كما هو عليه وبرده نصدق يبقى إحنا صدقنا ان برطمان السكر فيه ملح

 

لما يقولولنا مش قادرين يطبقوا الحد الأدنى والأعلى للأجور وإحنا نصدقهم يبقى إحنا صدقنا ان برطمان السكر فيه ملح

 

قِس على ذلك مئات الأمثلة يا عزيزي المواطن ... السؤال اللي بيطرح ذاته يا عزيزي: هتفضل لحد امتى مصدق إن برطمان السكر فيه ملح؟؟؟؟؟؟؟

أختااااااااااااااه

هي ايه حكاية انتفاضه النسوان دي؟ هننتفض نعمل إيه يعني ولامؤاخذه؟ نقلع ملط ونجري في الشوارع يعني عشان نبقى كده حرائر؟ كام مره هقولكوا حقي بدراعي؟

في مصر هنا الإحصائيات بتقول ان حوالي ٣٠٪ من الأسر المصريه عائلها الوحيد واحده ست...وحوالي ٣٠٪ من الأسر المرأه فيها بتشارك في الإعاله...يفضل ٤٠٪ هيخربولنا دماغنا عشان عاوزين يلبسوا مايوهات ويلبسوا قصير من غير ما يتعاكسوا! ما تلبسوا اللي تلبسوه وحاربكوا معاركوا بنفسكوا! وسيلف دفينسيك في جيبي يا أبلتي! ال ٦٠٪ الباقية مشاكلهم أكبر من كده بكتير! ذكورية إيه اللي الستات تشتكي منها وهي اللي بتربي العيال؟ انتوا هتجننوني! مانتوا اللي بتربوا ولادكوا على كده! 

قولولي حتى انتفاضه ضد العنف الأسري...النسوان اللي بتصرف على البيوت وبتتلطش من منطلق أهو غلاسه كده! 

عزيزتي المرأه: عاوزه تلبسي ولا تقلعي وأمك مش راضيه منك ليها تصطفلوا...اللي محتاجين مني تضامن الستات اللي بتنضرب بصورة شبه يوميه لحد ماتطرش دم...الستات اللي بتسف تراب  ومابتاخدش مرتبات حق مجهودها لمجرد إنها ست...الستات اللي مش عاوزه تشتغل أصلا بس مضطره عشان تلبي الاحتياجات الأساسية لأسرتها...والستات اللي حقوقها في الميراث الشرعي بتسلب رغم أنف الشرع والقانون...مش البنات اللي أهاليهم غاصبينهم يلبسوا الحجاب...ولا الستات اللي مش عارفه تشتغل قاضي!

وعلى رأي الراجل العجوز اللي قال: بلا مرأة بلا خره! شوفولنا مشكلة الأوتوبيس!

حلمت امبارح انى بغنى على مسرح.. وصوتى كان وحش اوى.. والنا س منبهره وتقولى الله ياست

الناس بقت زباله! بينافقوا في الأحلام!

فلتلعنك الارض والسماء.. وليتحلل حيا من اعطاك مفتاح حديقتى خلسة لتزرع ياسمينة وترحل... الا تعلم ايها الملعون ان الياسمين ذكرى لا يمكن التخلص منها!

عجبت لمن يعلم ان الله حق
والموت حق
والقيامة حق
والحساب حق
والنار حق
ثم يظلم

لا تجي اليوم..ولا تجي بكره

أعود بعد انقطاع لأكتب...

 

إليك: أرجوك ألا تأت اليوم ولا غد..فالروح تعبة والنفس مثقلة..فليس لمثلك أرتضي نفس بحال نفسي...ليس اليوم وقد صار قلبي مزبلة..صدقني، لم يعد لدي طاقة أبذلها في عقد مقارنات قد تراها ظالمة..ولنكتفي بالواقع على قسوته ونقبل الحقائق مهما كانت مؤلمة..فأنت خفيف كريشة وقلبي ملعون كسيزف: كلما بلغ المنتهى، عاد من حيث بدأ..تلك الحلقة المفرغة التي سقط فيها مذ أن استقرت أول رصاصة أدفع ثمنها من جيبي في صدر عابر سبيل..ليتضح لاحقا أنه ليس بعابر سبيل..أترى كم هي معقدة الأمور؟ كل ماليس له صلة يتضح في النهاية أنه أقرب إلينا مما نتخيل..فلا تنتظر مني أن أعطيك ما لم أعد أملك..فقد سلبوا مني كل شيء..ماذا أعطيك وأنا لم أعد حتى أمتلك راحة بالي

 

مجيئك لم يعد فكرة مبهجة..ولم يعد من الحكمة بشيء..فماذا أنت فاعل إن أتيت! ليس هناك ثقوب في روحي فترتقها..ولا جراح بقلبي فتشفيها..ليس هناك شيء على الإطلاق..فاليوم أنا عاجزة كخيال مآته ثابت لا يتزعزع لكنه لا يقوى حتى على الصراخ..فكيف أقول أحبك وقد سقط من حنجرتي حرف الحاء فلم يبقَ من الكلمة سوى: أبك! فكيف أطلب ممن له ابتسامة شهية كهذه أن ينخرط في البكاء! كيف أهبك قلب شكّلته المعارك..أصقله الفقد..ذبح ألف مرة..وبعث ألف مره..وفي المرة الألف: بعث مشلولا..فأرجوك ألّا تمسك بكفي الدامي..لا تنظر إلى بعينيك..لا تخبرني بأن العمر مازال فيه متسع لمزيد من الذكريات الطيبه..فتلك هي المشكلة: العمر الباقي..الذكريات..عيناك

صدقني...لا فائدة ترجى من محبة ذلك الخراب الذي هو أنا..لا نفع..لا ضرر..لا شيء

أرجوك: لا تأت..لا ترحل..لا تفعل شيء..أي شيء..وأشح بوجهك عني كلما تيسر فلم يعد في صدري من متسع لاحتمال كل هذا النور..خذ ما شئت وكف عن الابتسام..وضم كفك عند الحضور وقبل الغياب..خبيء كتفك..وربما يمكنك أن تخفي صدرك أيضا...وعينيك...أترى؟ لا استطيع رؤيتك بغير كفن..لم يعد في الذاكرة غير الأكفان..الدماء..فمازالت أذني تطن بصراخ رهيب...هتافات..أصوات القنابل..صوت ارتطام الخراطيش بالأجساد..وأصوات ارتطام الأجساد بالأرض

كن لي كما أنت: عابر سبيل..ولا تكن لي أبدا كما أشتهي..فلا فائدة من عودة النبض لجسد أكله الأسفلت فصار سراب

لا تأت

لا ترحل

فأنا لم أعد هنا..فلم تعد الحياة تقبلني..ولم أعد أقبل الحياة..فأرجوك ألا تبعثني اليوم بين كل هذا الموت..ولا غد بين الأكفان..إن أمكنك...فلتنتظر قليلا..ليوم يمكنك أن تبعثني فيه بابتسامه فأختبيء في صدرك وأبكي

*العنوان: من أغنية لفيروز

لعنات محمد محمود...اللعنة التاسعة

امبارح مسحوا الجرافيتي اللي في محمد محمود للمره الكتير أوي...بس بقالهم مده ماعملوهاش..وده خلاني أكتشف لعنة جديدة...إحنا اتلبسنا بالشارع ده..والشارع ده اتلبس بينا

اكتشفت اني مش الوحيدة اللي أحلامي اتحاصرت في محمد محمود...من قبل أحداث مسرح البالون (محمد محمود١) وانا بحلم كتير بالشارع ده...والأحلام دي لغاية دلوقت ماوقفتش...بحلم بيه قبل كل مصيبه عامه أو خاصه...وساعات بعدي هناك في الحلم بدون سبب...وانا بنتقل من مكان لمكان في الحلم بعدي من هناك...دايما موجود في أغلب الأحلام بدون سبب

فقدنا كتير في محمد محمود...شهدا ودم وعيون وأعضاء...وجزء من إنسانيتنا...كل واحد دخل الشارع ده في معركه دفن حته من إنسانيته هناك...يمكن عشان كده دايما موجود في أحلامي...حته مني لسه هناك..وحته منه لسه فيا...بقيت فعليا وانا ماشيه في الشارع ده بحس اني ماشيه في طرقة بيتنا...والموضوع أكبر من مجرد ذكريات

بيني وبين محمد محمود ناس ماتت...وناس عايشه..وحته مني...وحته منه...الشارع بقى ليه روح بتتنفس..وبالرغم من كل اللي شوفناه هناك إلا إن الشارع ده بقى صديق...جمعني بيه الغاز والخرطوش والدم...ودي علاقه ماتنفصمش بمسح جرافيتي من على الحيطان لوشوش ناس ابتساماتهم مابتتنسيش بالأساس

آخر حلم روحت فيه الشارع ده من حوالي اسبوعين...كان في اشتباك..الدنيا ليل...دخلت لابسه لبس نينجا وبعض قطع من لبس لعيبة الشيش وشايله شنطه على ضهري...الناس وسعتلي وفضلت أقرب لحد ما بقى وشي في وش عساكر الأمن المركزي...حطيت الشنطه جنب شجره وطلعت منها حاجات مش عارفه هي إيه...وقفت في مواجهة عساكر الأمن المركزي وابتديت ارقص باليه...سولو كنت حافظاه وانا طفله من باليه بحيرة البجع..كل حركة بعدها وقفه قصيره بيطلع فيها من جسمي حاجات مش شايفاها بتخبط في العساكر تموتهم مكانهم...المزيكا كانت مسموعه في الشارع كله مكانتش في دماغي...والناس واقفه تتفرج...خلص السولو مع آخر عسكري وقع على الأرض...حييتهم زي أي باليرينا الجمهور بيسقفلها بعد مابتخلص السولو بتاعها..ولميت حاجتي واتدورت ومشيت في صمت

وخلص الحلم

مافيش تعلب…عمل مقلب؟

المشكله اللتي نواجهها منذ مده أننا اكتشفنا تدريجيا (كلٌ حسب وعيه وقدرته على قراءة الواقع وقابليته لتصديق الحقائق): إننا اتعمل فينا مقلب كبير اسمه تنحي مبارك  وتسليم سلطه إدارة البلاد للمجلس الأعلى للقوات المسلحة..لكن للأسف ليس هناك بديل متاح. إذا نظرنا إلى العام ونصف العام الماضيين سنكتشف أن الشعب المصري أوشك على التمرد الكامل على الإنقياد لنظرية عدم الاتساق المعرفي…بالرغم من أنه لم يستطع بعد الإطاحة بنظام مبارك…لكنها نقطه تحسب للشعب وخطوه جيده في الوصول بالثوره لبر الأمان…يمكن المحاولات المستميته للتغلب على فخ عدم الاتساق المعرفي
Cognitive Dissonance
 هي اللي فعلا مخليانا قادرين نصمد لحد دلوقت.

نظرية عدم الاتساق المعرفي هي طريقه لتشكيل وعي الجماهير/الجموع/الشعب…ببساطه النظريه بتقول ان الإنسان عنده ميل طبيعي لبلوغ حالة اتساق معرفي..بمعنى إن رد فعله لما يحدث حوله يكون متسق مع مبادئه. عدم الاتساق المعرفي بيحصل لما مبدأ من ضمن قناعاته بيخالف الواقع نتيجة حاجة حصلت…يعني مثلا: الجيش وظيفته حماية الدوله…"معلومه" لن يختلف عليها اثنين من سكان أرض الكوكب…ثم يحدث أن يتورط أفراد الجيش ومركباتهم في قتل متظاهرين…دي اللحظه اللي بيحصل فيها عدم اتساق معرفي…المعلومه الأصليه "الجيش بيحمي المواطنين" بتتصارع مع الموقف اللي حصل "الجيش بيعتدي على المواطنين"..في المواقف المماثله من يتحكم في الإعلام يحاول السيطره على رد فعل الجماهير..الإنسان مابيكونش عنده حلول كتير للوصول لحالة الاتزان/الاتساق المعرفي
- الإنكار: ده ماحصلش أصلا…الجيش مستحيل يعمل كده…دول إخوان وحماس وكائنات فضائيه لابسين جيش --->الطرفين مجني عليهم
- تبرير الفعل/ مهاجمة الضحية: إيه اللي وداها هناك؟ أكيد المتظاهرين اعتدوا على الجيش الأول---> يستاهلوا
- تعديل القناعات الشخصيه: الجيش اللي بيحمي المواطنين اعتدي عليهم ---> ثم قرار برد فعل ما

أول ما بيحصل موقف زي ده وسائل الإعلام المملوكه للدوله كلها بتتجه نحو مساعده المواطن في إنكار الحدث…ولو فشلوا (بظهور أدله دامغه زي الفيديوهات والصور…الخ)…ساعتها بتبدأ تساعد المواطن علي خداع نفسه بمهاجمة الضحية: تبرير الفعل…وطبعا بيضاف عليهم مجهود مستميت من كل من له مصلحة من السلطه القائمه إنه يتبع نفس المنهج إما الإنكار أو لوم الضحية لتجنب تعديل المواطن لقناعاته مما يستلزم رد فعل (التظاهر أو الاعتصام أو ممارسه العنف بشكل من الأشكال---> ردود فعل ثورية).

ده بالزبط اللي بيحصل من أول يوم…وده بالزبط اللي نجحنا في تجاوزه إلى حد كبير ومابقيناش بننخدع بيه أو على الأقل بنكتشف الخدعة بسرعة…وده أهم مكسب من مكاسب الثوره: السلطه فقدت جزء كبير من قدرتها على تشكيل وعي المواطن وبالتالي فقدت جزء كبير من القدره على التحكم في رد فعله.


يوم ٢٥ يناير ٢٠١٢ بعد عام من الخداع الجمعي بإن: الشعب كره الثوره خلاص وقابل العسكر في سدة الحكم. فوجئنا بكافة المحافظات التي انتفضت ضد مبارك بتهتف في وقت واحد: يسقط يسقط حكم العسكر. من ضمن المحافظات اللي قام فيها مظاهرات حاشده اليوم ده ٤ محافظات لم تتحرك طوال الـ ١٨ يوم، أذكر منهم المنيا وأسيوط.


وبالرغم من أن الكتله الثوريه فقدت جزء كبير من قدرتها على الحشد الجماهيري إلا أن الجماهير أثبتت إنها قادرة على اتخاذ رد الفعل بشكل غير مفهوم: التظاهرات العظيمه في العديد من المحافظات عقب إعلان الحكم التافه ضد مبارك وبراءة مساعدي وزير الداخلية. يومها تظاهر المواطنون في الشوارع دون حاجة إلى الحشد في حين أنه لم يحرك ساكنا عند حل مجلس الشعب الذي فقد ثقة ناخبيه. وظهر فقدان الثقه في الإسلاميين المسيطرين على أغلبية مجلس الشعب في انتخابات الرئاسه حيث فقد الإخوان المسلمون حوالي ٤٠٪ من قدرتهم على الحشد الجماهيري الانتخابي.


والنهارده وإحنا خلاص علي وشك استقبال رئيس جديد بنكتشف إن الشعب قابل علي مضض مرشحي الجولة الثانية. فنسبة كبيرة من الناخبين لا أعرف قدرها ولكني أعلم أنها نسبة يعتد بها: عاصرين على نفسهم ليمون في اختيار أحدهم كرهاً للآخر وليس عن قناعه بمن ينتخبه. والنتيجة إن المواطنين البسطاء بيتناقشوا في صلاحيات الرئيس ومتبرمين من صدور إعلان دستوري مكمل يأتيهم بطرطور في سدة الحكم عوضا عن رئيس خصمت تكاليف الانتخابات اللتي أتت به من جيوبهم.


المحصلة النهائية: الشعب المصري مدرك تماما أن الثورة قامت ضد الحكم العسكري لمصر وليس شخص مبارك ولكنه لم يوفق لإيجاد بديل بعد لأنه يرفض استبدال ثعالب العسكر بثعالب تتحدث بإسم الله أو ثعالب تتحدث بإسم الدولة المدنيه. ولحين إيجاد البديل المناسب سيظل الشعب يكافح بطريقته الثعالب الموجوده على الساحة مهما غيرت أثوابها.


*عنوان المقال مقتبس من أغنيه لفؤاد المهندس من فيلم العتبه جزاز متقمصا شخصية فرافيرو المنقذ يغنينا: مافيش كارثه؟ مافيش نايبه؟ مافيش تعلب..عمل مقلب؟ دانا خالي شغل بقالي يومين.

ضحك السنين

نحن نصنع الآلهة ونعلمهم كيف يعاملوننا كالعبيد      -قالها واحد مش فاكره اسمه

مش مدهش بالنسبالي اني اتشتم عشان شتمت البرادعي أو غيره..وبالأخص البرادعي...أكبرحملات انفولو وريبورت سبام شنيتها علي تويتر كانت بسبب عبيد البرادعي...أقدر أفهم التعصب الشديد لمحمد حسان أو حازم صلاح أبو اسماعيل...لأن دول المتعصب ليهم بيعاملهم على إنهم أنبياء هذا الزمان...وأقدر أفهم برده المتشيعين لحمدين صباحي عشان الأمميه والقوميه والحركات بتاعة عبد الناصر دي...فيتيش متوارث وفهمناه من زمان من أيام عبد الناصر...الناس بتحب طق الحنك...لكن الحقيقه عمري مافهمت المتعصبين للبرادعي

المفروض إنهم دعاة ليبراليه...بس بيتضح ليك من الكلام معاهم إنهم لا فاهمين يعني إيه ليبراليه ولا  عارفين حاجة عن البرادعي...معظمهم مايعرفش إن الوظيفه الدوليه للبرادعي كانت وظيفه إداريه...انا كنت برحب بالبرادعي رئيس وزرا وكان ممكن أسد مناخيري وأقبله رئيس عشان خبراته الإداريه لا أكثر ولا أقل...مع إنه إصلاحي...بس كان ممكن الضغط عليه عشان ياخد قرارات ثوريه أو يعمل تغييرات متماشي مع الرغبات الثوريه...كنت مرحبه بيه من منطلق إنه نوايه تسند الزير لحد مانشوف حد عدل...

عشان كده بس كنت شايفه البرادعي مناسب وكان عندي استعداد أقبل بيه ريّس...لكن لما خذلنا مافرقش معاياعادي بيس جبان وحقه...ماقدرش أطلب من واحد مش ثورجي إنه يكون ثورجي...اللي "بيحبوا" البرادعي...حمدين...أبو الفتوح...أبو اسماعيل...للأسف متعصبين...لأنهم "بيحبوهم" مش "مقتنعين بصلاحيتهم للمنصب"..أيا كان المنصب...فهم تشيعوا للفرد ونسيوا إنه بني آدم يصيب ويخطيء وإنه ممكن يتشتم...

ظاهرة التعصب للبرادعي بتفكرني بظاهرة التشيع لعمرو خالد...عمرو خالد كان أشهر داعيه "مودرن"...وكان بيسطح الدنيا عشان كده ناس كتير من الطبقه الراقيه أقتنعت بيه..النصيبه بقي إنهم اعتبروا اللي بيقول نهاية المطاف ومش عاوزين يعرفوا أكتر من كده...وبمرور الوقت ماخدوش بالهم إنه بيتاجر بيهم...زي بالزبط المتشيعين لأبو اسماعيل ما أخدوش بالهم إنه بيتاجر بيهم...ولا المتشيعين للبرادعي قدروا ياخدوا بالهم إنه جبان...التشيع بيعمي وبيوصل بالواحد لدرجة التعصب...

أكبر حملات ريبورت سبام عملتها علي تويتر كانت بسبب اني شتمت البرادعي فدخلت ناس تشتمني بأقذع الألفاظ...مع إني لما بقول نفس الشتايم على حد تاني بيعملولها ريتويت...ودول ناس انا ملاحظاهم كأفراد عشان ساعات بتكلم معاهم فواخده بالي منهم وباخد بالي لما بيعملوا ريتويت...الموضوع مالوش علاقه بالنسبالهم بالأخلاقيات...بالمقارنه بنفس الشتيمه لما وجهتها لأبو الفتوح...ماحدش دخل شتمني! ناس قليله جدا...وفي المقابل لما وجهت نفسه الشتيمه لحمدين اشتمت بقدر موازي...بس عدد المرات اللي اتكرر فيها الموقف مع البرادعي أكتر...حقيقي مش قادره أفهم تشيع الناس دي للبرادعي...لحد ما من شويه بفرّ في بروفايلات الناس اللي بتتكلم على الموضوع لقيت واحده كاتبه بقين موتوني من الضحك..مفاد كلامها انها واحده مكانتش تعرفح اجة عن السياسه وكان مدى أحلامها ييجي جمال بدل حسني وجه البرادعي إداها أمل-------------> عمرو خالد بتاع السياسه :D 

حقيقي ماعنديش استعداد اخش في جدليه: البرادعي مفجر الثوره........عشان كل مابسمع الكلمه دي بموت من الضحك والله...الناس اللي بتقول البق ده مكانتش عايشه في البلد ولا يه يا جدعان؟ برادعك مين اللي فجر الثوره! البرادعي أصلا باع كل حاجة اشترك فيها حتى الجمعيه للوطنيه للتغير :D كل مايتزنق يركب الطياره ويكتّ...ولو ناسيين أفكركوا إنه كان في فيينا ومارجعش إلا عشان المجلس الرئاسي المدني...

وعلى كل البرادعي في حد ذاته مش ضروري يكون موضوعنا...الأهم بقى أنا عاوزه فعلا أفهم ليه أصلا الناس لازم تتهوس بحد؟؟؟؟ ليه لازم يبقي في حد في حياتك فوق النقد وكبير عالشتيمه؟؟؟؟؟ الناس اللي عندها موقف أخلاقي معارض للشتيمه على عيني وراسي من فوق مش هجادل معاهم أصلا...بس دول دايما بيعترضوا وبيدوني كلمتين في جنابي لما بشتم أي حد مش لما بشتم حد بعينه!

حقيقي إحنا محتاجين حد يحللنا ظاهره الهوس بالبشر دي ويقولنا ليه النزعه الغريبه لتقديس الأشخاص! ونرجع نقول الحمد لله إن البرادعي وحمدين وأبو اسماعيل مامسكوش مناصب عشان مانلاقيش نفسنا بنحج لأصنام تتحط في ميدان التحرير كمان عشر سنين!

هولاكو ابن المحظوظه

حقيقي ابن محظوظه...لما بعت المندوب بتاعه وقت ما كرسي الحكم كان فاضى وسأل المماليك: يعني أكلم مين لما أحب أخاطب شعب مصر.......مالقاش حد يعبّره غير قطز...والباقيين قالوله آمين كلم قطظ..وجم حاربوا الجيش وقطز هزمه وخلصت الليله

لو كان جه اليومين دول بقى كان هيضطر يقعد مع المجلس...والمخابرات...والإخوان...والسلفيين...وشيخ الأزهر...وبابا الكنيسه...ورؤساء الأحزاب...ومرشحين الرئاسه واحد واحد...ورشأت حجازي..وإئتلاف شباب الثوره...وشيوخ السلفيين واحد واحد...ورجال الأعمال...ورئيس المخابرات الأمريكيه...وملك السعودية ومن ينوب عنه...ورئيس جهاز مخابرات قطر السرّي...ورئيس مجلس الشعب...ويعمل مع كل دول صفقات ويكع فلوس ويوعد بمناصب عشان ياخد موافقتهم على دخول هولاكوا مصر بدون ما تسال قطرة دم واحدة من دماء المصريين

بعدين يخش علي مرحلة إقناع الشعب فياخد جوله إعلاميه مع يسري فوده...ومني الشاذلي...وعمرو أديب...ومحمود سعد...وتوفيق عكاشه...بعدين يقنع بلال فضل...وابراهيم عيسى...نواره...وعلاء عبد الفتاح...وابراهيم الهضيبي...وعبدالله كمال...ووائل جمال...ووائل قنديل...ومعتز عبد الفتاح...إنهم يكتبوا عنه فيمدح من يمدح ويذم من يذم

وبعدين ييجي هولاكو بذات نفسه يعمل مؤتمرات صحفيه في المحافظات كلها والشعب يضربه بالجزمه ويحبسوه في الجوامع....بعدين يقعد عالكرسي غصب فالشعب ينزل الشوارع يطرده شر طرده ويرجعه بلدهم قفاه يقمر عيش...بعدين يروحله وفد يعتذرله ويقلبه في قرشين ويرجع


إنك لمحظوظ حقا يا هولاكو..قطز جاب الدلمه وخلّصك في الإنجاز

شفيق يا راجل

امبارح قابلت واحده عندها ٤٠ سنه...ضليعه في البيزبيس ومعاها بوسترات شفيق في العربيه وبتروج لحملته الرعلانيه...لما سألتها بيجيب فلوس البانرات والبوسترات منين ضحكت ضحكة ذات معنى وقالتلي: هيكون منين يعني؟ وانتي عارفه ان الجيش ما بيحبّش يطلع شيكات عشان الجيش على مسافه متساويه من جميع المرشحين...وضحكت تاني ضحكة ذات معنى برده

ولما سألتها ازاي هي هتنتخب شفيق...بأنهو منطق يعني...قالتلي بقى حاجات جميله أوي...ان هي عندها ٤٠ سنه...وبتدرس علوم سياسه من سنه ٩٠ في الجامعه الأمريكيه...ودرست قانون دولي...وبتحضر دراسات عليا في العلوم السياسيه في جامعة السوربون...وقدمت ورق بحثي في علوم السياسه في جامعات أمريكيه كتيره...وطبعا انا كأمينة مانبهرتش...بس انبسطت

ست الكتكوته حاولت في البدايه تقتنعني انها جزء من الثوره باعتبارها مواطنه من الشعب...قلتلها مافيش شعب عمل ثوره بأكتر من ١٠٪ من مجمل تعداد سكانه...راحت فاتحة الكتاب صفحة الثورات وقالتلي التعريف المعجمي للثوره...وطبعا أنا كأمينه انبهرت بقدرتها العظيمه على الحفظ ومافهمتش من كلامها أي حاجة غير انها "معجميا/أكاديميا" جزء من الثوره

بعدين راحت قافله الكتاب ده وبدأت لعبه فين السنيوره؟ زي أي حاوي محترم في المولد....ليه بقى؟ عشان انا حمارة ومابفهمش وغبيه وماعنديش خبره فمش مقتنعه بشفيق...وطبعا كلنا عارفين إن أنا واحد في ال ٨٨ مليون زي ما هي بتقول فأنا نسبه غير ممثله لأي حاجه غير نفسي ورباط جزمتي ودبدوبي وشبشب الحمام بتاعي...وبما اني انا مقاطعه ورباط جزمتي ودبدوبي وشبشب الحمام مالهمش حق انتخاب فأنا طبعا طظ...لأن انا والناس اللي بيعملوا مظاهرات ماعندناش خبره وناس تصادميين...والتاريخ هيذكر الناس الأذكيا اللي انتخبوا شفيق عشان يغيروا النظام بهات وخد مش مره واحده دلوقت حالا...والتاريخ مش هيذكرني أنا واللي زيي عشان احنا تصادميين...وان أنا واللي زيي بنفضل طول عمرنا في نفس النقطه عشان إحنا أغبيا برد وماعندناش خبره ومابنفهمش في البيزنيس والسياسه زيها هي واللي هينتخبوا شفيق

طبعا مكانش مهم بالنسبالها خالص إن أنا ورباط جزمتي ودبدوبي وشبشب حمّامي مش طمعانين في إن اسمنا يدخل كتب التاريخ ككائنات معرّصه...ولا حد فينا طمعان في منصب سياسي ولا كرسي رئاسي...لأن ده بالنسبالها انعدام طموح لأسباب ماقدرتش تشرحهالي عشان انا غبيه طبعاولا فهمتني ليه برده إن الناس كلها لازم تبقي محنكة سياسيا...وطبعا مش مهم بالنسبالها إن إحنا (أنا ورباط جزمتي ودبدوبي وشبشب الحمام) مش عايزين نمارس دور غير الدفع في اتجاه التغيير بالضغط على مؤسسات الدوله...لأن هي شايفه إن مافيش حاجة اسمها ضغط شعبي

حاولت اشرحلها نظرية إن أي مرشح رئاسي مالوش خلفيه عسكريه يبقى مكسب للثورة بس هي صممت إن شفيق راجل مدني حتى بصي المطار ومصر للطيران...وبالرغم من إن مصر للطيران متصنفه ضمن أسوأ ٩ شركات طيران في العالم هي مقتنعه تماما إن ده انجاز: قبل كده ماكناش بنتصنف أصلا ده انجاز!...مافهمتش ازاي بصراحة مصر للطيران مكانتش بتتصنف قبل شفيق...مين يعني كان بيدفعلهم عشان مايصنفوهاش مع إن كل شركات الطيران في العالم بتتصنف دوليا من أصغر شركة لأكبر شركه

وبعدين بقى يا سيدي لما إنت قالتلي إييييييييه إني لازم أقرا التاريخ...ليه بقى؟ عشان أعرف ان الفلسطينيين هم اللي باعوا أرضهم ودخلوا اليهود عندهم...وإن المرشحين الرئاسيين كلهم أشرار ماعدى عمرو موسى وشفيق عشان هم دول الوحيدين اللي ماقالوش إن إسرائيل دوله عدوّه...وإن أبو الفتوح إخص عليه...ليه بقى؟؟؟؟؟؟ عشان أبو الفتوح مابيقولش دوله اسرائيل...بيقول الكيان الصهيوني...توء توء توء...يا حيراااااااام بيجرح مشاعر دولة إسرائيل ومن حقهم يقاضوه في الجنائية الدوليه (آه وربنا قالتلي كده من حقهم يقاضوه في الجنائية الدوليه عشان بيقول عليهم الكيان الصهيوني) :D

وكمان بقي يا سيدي قالتلي إن معاهده السلام دي ثبت تاريخيا إنها دليل على عبقريه السادات وكلما مميزات للمصر وفلسطين...قلتلها دي مصيبه وحطت علينا...تقولي انتي قريتيها؟ قلتلها أيوه! قالتلي إيه مش عاجبك فيها؟ قلتلها انها موجوده أصلا...فضلنا ربع ساعه مثلا تقولي إيه مش عاجبك فيها...وأقولها إنها موجوده أصلا...وإن بسببها مش عارفين نسلح حدودنا مع إسرائيل ومقعدالنا قوات حفظ سلام ورن مالناش سيطره على سينا أصلا كأنها مارجعتش إحنا قاعدين بنحرسها على ما تفرج...وهي برده مصممه تسألني أيوه يعني إيه اللي مش عاجبك فيها؟...بعد ما أدركت إني مش عاجبني المعاهده قالتلي يعني كنتي هتبقي مبسوطه لما نسلح حدودنا مع إسرائيل بشكل طبيعي وتخش اسرائيل تحتل سينا تاني؟ قلتلها آه...قالتلي نعم! ازاي! قلتلها آه وربنا...على الأقل كان هيبقي عندنا فرصه مقاومه شريفه من غير مطاطيه وانا هيبقي عندي فرصه أروح أقتل اسرائيليين أصل انا بنت وسخه وبحب أقتل الإسرائيليين اللي بانيين دوله على عضم بشري

وبعد بقي ماقعدت تهري كل الهري ده...ضربتلي مثل بشخصيه من أمثالي...آه وربنا بتقولي ان امثالي دول طبيعه شخصيتهم بتحدفهم في غياهب النسيان التاريخي زي مين؟؟؟؟؟؟؟؟ زي جيفارا..حتى شوفي جيفارا كانت نهايته إيه؟...............

ودي كانت اللحظه اللي ماقدرتش أمسك فيها نفسي من الضحك أكتر من كده لدرجة إني كنت هقع من علي الكرسي من كتر الضحك...النصيبه بقى ان الكلام اللي فوق ده حصل فعلا...بالحرف الواحد! وحقيقي منبهره بنفسي جدا إن واحده بقالها ٢٢ سنه بتدرس علوم سياسيه شايفه اني شبه جيفارا :D دا صورته بتنزل عالتيشيرتات من قبل مانا اتولد آساحبي

الحقائق المفجعة

طول الوقت واحنا بنراوغ انفسنا...مش عايزين ننطق الحقيقه اللي احنا عارفينها كويس....عشان الحقيقه مش هتكتمل إلا لما ننطقها...وساعتها بس هنحس بالفجيعة

طول الوقت وانا بتكلم عن مينا...بس أبدا لم استخدم مفردة لغوية تفيد معنى الموت...قبل مينا...بعد مينا...يوم مينا...حاولت مره إقول قبل استشهاد مينا...اتلجلجت كتير اتلعثمت في نطق كلمه "استشهد"...مكنتش فعلا عارفه انطقها! ولا حد فينا كان قادر يسعها من التاني...كل ماتيجي سيرته عينينا تزوغ من بعض واحنا بنتكلم...مع اننا بنكون بنحكي ذكريات مبهجة...يمكن عشان كده تحديدا مابنقدرش نستحمل اننا نقول ان نسمع: قبل مينا ما يتقتل....بعد مينا ماتقتل...يوم لما مينا اتقتل

مراوغتنا وتجنبنا لاستخدام المفردات عمره ما بينفي حقيقه ان مينا مات...مات مقتول...مينا مات بقتول برصاص الجيش بتاعنا اللي جزء من ضرايبنا بيتصرف على تسليحة...الرصاصه اللي فرتكت رئة مينا وكبده انا مشاركة في فلوسها...الحقيقه دي كانت كفيله اني افقد ادني رغبه في الشغل لفتره...عشان مش عايزه ادفع ضرايب...ومش عايزه حد تاني يتقتل برصاص فلوسه من جيبي...بس الحل مش اني ابطل اشتغل...الحل اني مامسكش السلاح لناس ماتعرفش قيمة أرواح الناس...والأهم من ده ان اللي قتل لازم يتحاسب

مينا اتقتل يوم أحداث ماسبيرو...مات برصاصه فرتكت اعضاؤه الداخلية...الطريقه اللي مات بيها مكانتش ابشع ميته في اليوم ده...على الأقل مينا كانت جثته سليمه ظاهريا مكانش فيها عضو ناقص او مفصول زي كتير غيره من اللي دهستهم المدرعات يومها...الي حصل كان مأسوي ومفجع بكل المقاييس..بس إحنا للأسف مكانش عندنا وقت نحزن بشكل كافي...ماعرفناش نزعل ف يمحمد محمود...وبقينا زي الميتين مش حاسين بأي حاجة...في حاجة ماتت فينا في ماسبيرو وحاجة تانيه ماتت في محمد محمود...يمكن الأفضل اننا نحاول دلوقت نحزن الحزن اللي ماحزناهوش عشان مانطقش من جنابنا....وأول خطوه نعملها إننا لازم نقر بالحقيقة...

مينا صديقي مات مقتول برصاص الجيش اللي جزء من ضرايبي بيروح لتسليحة!

الغضب المطلق

بعد فتره طويله من فقدان الشعور وفقدان القدره على الكتابة أول حاجة بحس بيها تكون الغضب! شيء عجيب! زي مايكون في ماسورة ادرينالين انفجرت في جتتي دلوقت حالا! غضب بشع قادر علي سحق العالم في عشر دقايق علي الأكثر!

بقالي يومين بحاول افهم انا غضبانه من إيه مافهمتش غير دلوقت...انا غضبانه في المطلق من كل اجة وأي حاجة وكل حد وأي حد...عايزه ادمر شيء ما...ومش جماد...مش عايزه ادغدغ كوبايات ولا عايزه اضرب دماغي في الحيط اعور نفسي...عايزه اضرب حاجة قادره على رد الفعل...بني آدم...إنسان...بالقليل ساند باج حلّوفه عشان لما اخبطها خبطه جامده ترد فيا تاني اخبطها تاني لحد مافرهد يا هي تتفرتك فإيدي

أول مره افهم ليه ادوارد نورتون فشخ الولد الأشفر في فيلم فايت كلاب! عشان اول مره دلقت احس اني فعلا عايزه اعمل كده! ادمر حاجة حلوة أو جميلة...وتكون قادره علي رد الفعل...واشوفها بعد كده وهي متدمره...بس مش حد طيب...مش عايزه ادمر حد طيب او بس حلو...عيزه ادمر حاجة سخيفه وشكلها حلو...حد يكون متدعي مثلا...حد من المجلس العسكري...حد من مجلس الشعب../حد من القوي السياسيه المتخاذله...حد يستحق الغضب عليه...حد يكون ببدلة ميري....أو حد من اللي شعرهم ابيض وهاريينا تنظير عاللي جابونا بعد ما دفنوا راسهم في الرمل سنين واحنا الل بندفع تمن صمتهم وتقاعسهم عن فعل أي شيء ما من شأنه إيقاف المهزلة اللي كانت ولازالت شغاله من سنين!

كانوا فين العالم دي من زمان!!!!! جايين دلوقت يفوقوا ان في بلد خربانه ومحتاحة تتصلح وكل واحد فيهم يلمع قرعته ويركب طقم السنان ويتجعص ويقولنا نعمل إيه عشان يبقي عندنا بلد كويسه؟؟؟؟؟ كنت بتعمل إيه لما كنت أدّي يا جدو؟؟؟؟ على رأي واحد صديقنا: قنابل الغاز انتاج سنه تسعين اللي بنشمها دي مكانتش معموله لينا بس احنا اللي بنشمها بدالهم!!!!

 

مانزلوش ليه يشموا قنابل الغاز بتاعتهم اللي احنا بنطفحها دلوقت؟ وبأمارة إيه جايين دلوقت يتكلموا وينظّروا علي ميتين أهالينا! كنتوا فييييييييييييييييين؟؟؟؟؟؟؟؟؟؟؟؟؟؟؟؟؟ وبتفتحوا بقكوا دلوقت ليه؟؟؟؟؟؟ 

قرفتونا الله يلعنكم حلّوا عن سما ربّي بقى!!!! عايزين مننا ايه بعد ماتخرستوا سنين بتطفحوا الدردي وتقولوا اديني أكتر؟؟؟؟؟ احنا اللي نزلنا نعترض ونتكلم ونطالب بحقوق الخلق المهضومه بقالها سنين...وموتنا في سبيل ده...ولسه عندنا استعداد يموت مننا ناس تاني...ماحدش فينا طلب حاجة لنفسه....وماحدش فينا طلب حاجة مش من حقه...انتوا بتطلبوا حاجات مش من حقكوا...مش ذنبي انك اتولدت في الدنيا قبليا....لكن ذنبك انك عيشت أخرس عشان تربي العيال وخوفت تشم غاز وتتحبس وتموت...احنا ماعملناش ده عشان نفسنا...ولا عملناه عشانك...احنا عملنا كده عشان الناس اللي جايه...عشان العيال الصغيره اللي عندها عشر سنين وسبع سنين لزن ده واجبنا ناحيتهم...لكن انت اللي اهدرت حقك بنفسك ماتجيش دلوقت تتكلم وتقرر بالنيابه عننا وعن الكتاكيت دول وترسملنا حياتنا!

جتكوا القرف! داهيه تاخدكوا! قبر يلمكوا ويريحنا من انفاسكم المعطّنه...وأفكاركم المعطّنه...وكلامكم الفارغ...وتنظيركم الأجوف! انتوا ماعيشتوش! ومش عايزينا احنا نعيش! واحنا ماعندناش استعداد نعيش محبوسين في أحلامكم الضيقه! عشان إحنا احلامنا أكبر من عمركم الكبير أوييييييي اللي رميتوه في الزباله بمحض ارادتكم الكامله! أيوه بإرادتكم لأنكم ماحاولتوش تعترضوا...ماحاولتوش تحققوا أحلامكوا...وماحاولتوش تطالبوا بحقكوا! عايزين إيه دلوقت وانتوا علي حافة القبر! انتوا اللي اتخليتكوا عن حقوقكم...خلاص! مالكوش حاجة تطالبوا بيها واحنا نزلنا نطالب بحقنا عشان اللي بعدينا ياخدوا حقوقهم! انتوا بره اللعبه والحسبه وبره كل حاجة بس للأسف لسه رجلكوا في الدنيا! لكن اذا ربنا سايبكم عايشين ده مايديكوش الحق انكم تسمموا حياتنا! غوروا!

يانجيب حقهم...ونحقق حلمهم...يانموت زيهم...واللي بعدنا هيكمل

عندما تتوقفون عن التفكير بأنفسكم كعبيد سيستحيل على أي شخص أن يستعبدكم

- المهاتما غاندي

جيل الثورة....ذلك الجيل اللذي محى كل الخطوط الحمراء فصارت الدنيا براحا لم يكفيه....أول ما محى هذا الجيل هو تعريف الجيل ذاته...فالجيل مدته عشر سنوات...أما جيل الثورة فقوامه اطفال من سن العاشره ويمتد ليشمل رجالا ونساءا تخطوا الثلاثين ببضعة أعوام...وثان ما محى هذا الجيل هو الخطوط الفاصلة بين الطبقات الاجتماعية..ففتيات ونساء الطبقة العليا يحتضنّ أطفال الشوارع ويتلقين منهم دروسا في الصبر والصمود أمام  قسوة العالم...وفتية ورجال الطبقة العليا يقفوا جنبا إلى جنب مع أبناد الطبقات الأفقرليقدموا لهم المعونة التكنولوجية وبعض فلسفات الثورات ويتلقوا منهم دروس في التصرف بما تقع عليه الأعين لمواجهة أي سلاح...وثالث خط محوناه هو الخط الفاصل بين الذكر والأنثى في ثقافتنا العتيقة...فلم يعد ذكور الصف الأول يخشين على إناث الصف الأول وقد صرنا نتبادل الخبرات...لما ييجي عليك الغاز اكتم نفسك واجري واطلع بره كح وبربر في الهوا النضيف...الضرب جوا شديد يا أبله خدي بالك لو ضربوا خرطوش تديله ضهرك وتميلي لقدام عشان مايجيش في وشك...ورابع خط محوناه هو الخوف من الآخرين...لم نعد نخش من الحديث إلى الغرباء

وقبل كل ذلك تمرد هذا الجيل على السلطة الأبوية...فمنذ نعومة الأظافر عشقنا كلمتين: ليه؟..لأ...فاحتار فينا الآباء فنحن لم نرتضي التفسيرات الساذجة والتبريرات الواهية فصرنا نبحث عن إجابة ترضينا لكل: ليه؟ فاعتدنا على قول: لأ..فرفضنا كل مالم نفهم وبحثنا حتى فهمنا قليلا فصرنا نشفق على الآباء بدلا من أن نخشاهم كالأجيال السابقة

جيل الثوره لا يضم كل من هو بين العاشره وبضع وثلاثون...ولكن جيل الثوره اللذي اقصده هو تلك الكتلة اللتي تمثل النواه المحركة للثورة...هؤلاء تجدهم في المسيرات الصغيره اللتي تجول الشوارع تهتف ضد السلطه الأبوية للدولة...وتراهم في عروض كاذبون اللتي تفضح كذب السلطة المسلحة الحاكمة...وتراهم في الاعتصامات ضد قع السلطة المسلحة الحاكمة يخدمون الجميع

هذا الجيل تجمعه الغربة في وطن محتل  وغضب على طغاة يجلسون على كراسي الحكم وهم على مشارف القبور لا يمكنهم استيعاب هتافنا: يا نجيب حقهم يانموت زيهم...فيظلوا يفعلون ما يستطيعون ليجعلونا: نموت زيهم...بينما نحن نفعل المستحيل لكي: نجيب حقهم...ونحقق حلمهم...فهدفنا الرئيسي هو تحقيق حلم من قتلوا إلى جوارنا وأمام أعيننا...ومن أصيبوا بين ظهرانينا...نحن ندرك تماما مدى عجزهم أمام فهم تلك الحقيقة...ندرك تماما أنهم عاجزين عن فهم عشقنا للحياة لهذا فإن تضحيتنا بأرواحنا في سبيل استعادة حق من قتل أو أصيب منّا ليست رغبة في الموت ولكنها رغبة في الحياة...وتلك الرغبة في الحياة هي كل ما نملك لذلك فهي أقصى ما يمكن أن ندفعه كثمن لاسترداد حقوق إخوتنا في الغربة اللي ماصدقنا لقيناهم!

هؤلاء الواقفون على حافة القبور يظنون أنهم يدفنونا مكانهم في قبورهم لينجوا هم من الموت...ولأنهم يضحوا بنا من أجل ذواتهم فهم غير قادرين على فهم استبسالنا في محاولة تحقيق حلم آخرين قتلوا وأصيبوا ولا نعرفهم ولكنا ننعرف ما يريدون...لأن هؤلاء العجائز غير قادرين على إدراك أي شيء يقع خارج نطاق رغباتهم الخاصة ومصالحهم المشتركة


لذلك...في النهاية...سننتصر