9 Nov 2012

الصعيدي الذكي

كان في زمان نكته عن واحد صعيدي سألوه ليه كاتب على برطمان السكر: ملح؟ قالهم عشان النمل ماياخدش باله

بم بارابارم بم بم

غبي أوي صح؟...المفاجأة أيها الأخوة المواطنون أن الصعيدي ده طلع معاه حق...ومن غير ماتسألني ليه انا هقولك...ده بالزبط اللي بيتعمل معنا واحنا بنصدق زي أي مستعمرة نمل هبله...مع إن النمل نبيه بس إحنا أي خره بيتعبالنا في إزازه ويتكتبلنا عليه ملبس بناكله بدون تفكير وبنتعامل معاه على إنه ملبس...ومن غير ماتسألني إزاي انا برده هقولك

لما نقول احنا عاوزين ضرايب تصاعديه يقوموا قايلينلنا هنطبق الضريبه التصاعديه بإن أي حد بيقبض أكتر من ٩٠٠٠ جنيه في السنه (٧٥٠ ج في الشهر) هنطبق عليه ضريبه ١٠٪...وإحنا نصدق إن دي فعلا الضريبه التصاعديه يبقى إحنا صدقنا إن برطمان السكر فيه ملح

لما يقولولونا إن تعدد الزوجات "سنه" عن الرسول عليه أفضل الصلاه والسلام وإحنا نصدق إنها سنه فعلا مش مجرد رخصه تبيح الفعل يبقى إحنا صدقنا ان برطمان السكر فيه ملح

لما يقولولنا إن زواج الطفلات في سن ٩ سنين قشطه شرعا وإحنا نصدق إن ده فعل مباح مش مرض اسمه بيدوفيليا يبقى إحنا صدقنا ان برطمان السكر فيه ملح
 
لما يقولولنا إن الفوائد على القروض الدولية مش ربا وأحنا نصدق يبقى إحنا صدقنا ان برطمان السكر فيه ملح
 
لما رئيس الوزرا يقولنا إنه شم غاز مسيل للدموع عند السفارة الأمريكية وإن الغاز غير ضار بالصحة ونتجاهل اللي شوفناه بيحصل لينا ولغيرنا من جراء التعرض للغاز المسيل للدموع ونصدقه يبقى إحنا صدقنا ان برطمان السكر فيه ملح
 
ولما يقولولنا إن الجيش ماسحلش حد ولا قتل حد وإحنا نتجاهل اللي شوفناه بعينينا ونصدق يبقى إحنا صدقنا ان برطمان السكر فيه ملح
 
لما يقولولنا ان هيبة الدوله تعني إن الداخليه تعذب الناس في الأقسام وتهدد ذويهم وتضربهم في الشوارع وإحنا نصدق يبقى إحنا صدقنا ان برطمان السكر فيه ملح
 
لما يقولولنا إن الجيش عمل عملية عسكرية لتمشيط سيناء والقبض على الإرهابيين وبعدها بشهر يرجع الوضع كما هو عليه وبرده نصدق يبقى إحنا صدقنا ان برطمان السكر فيه ملح
 
لما يقولولنا مش قادرين يطبقوا الحد الأدنى والأعلى للأجور وإحنا نصدقهم يبقى إحنا صدقنا ان برطمان السكر فيه ملح
 
قِس على ذلك مئات الأمثلة يا عزيزي المواطن ... السؤال اللي بيطرح ذاته يا عزيزي: هتفضل لحد امتى مصدق إن برطمان السكر فيه ملح؟؟؟؟؟؟؟

1 comment:

mhsn.m said...

ادمان النكد خطر على الصحة
وبلطجة اللسان لا تقنع "نملة"
اغلب ما كتبتيه مزيف
فلا ضريبة تصاعدية بالمعنى المكتوب
ولا حد قال تعدد الزوجات سنة مش رخصة
الا في البرامج والصحف الصفراء
ولن يصدر قانون او اي اشارة في الدستور للسماح بزواج ذات التسع سنوات
بخصوص القروض حلال وحرام
لا توجد فتوى ثابتة الفتاوى تتغير بتغير الزمان والمكان والظرف وحتى ان كان كلامك صحيح حددي اين المشكلة
والجيش اللي اصبح ملطشة لكل من هب ودب
باق مرفوع الرأس الى ابد الآبدين ان شاء الله
وبعدين
من ابن الكلب الذي قال ان هيبة الدولة تعني تعذيب المواطنين


بخصوص سيناء كان الله في عون مصر وجيشها العظيم من السنة ابنائها ان شاء الله اسرائيل سوف ترسل لكم جواب شكر
وعليك ان تعلمي ان بعض الاسرار ليس من حق الغجر معرفتها ولا اقصد بالغجر شخص معين انا اقصد مش لازم تكون متاحة للجميع
انا تعبت
باقي الحد الادنى والاقصى لما يقولولك انهم مش عارفين يطبقوه
ابقي صدقيهم لبعض الوقت وان شاء الله هترتاحي
وبعدين ايه العنوان العنصري ده
ابقي اختاري عناوينك كويس
وكمان اختاري مصادر معلوماتك
في النهاية من حقك تكتبي ما تريدين
ومن حقك تعارضي كل شيء ومن حقك
تتشاءمي
لكن بالمنطق بلاش نظام اللطم ده
وبعدين ده مش دليل على انك ثورية
بعض الناس مفكرة ان الثورة طولة لسان
واعتراض على الفاضي والمليان
منه لله الاعلام والله انا عمري ماكنت قاسي مع حد كده بس انا غلبت 24 ساعة نكد طفحت خلاص
طبعاً حتقولي ده اخواني او سلفي
كالعادة لكن والله انا مش منتمي لحاجة الا لمصر وديني الاسلام بدون اي انتماءات اخرى سلام