9 Oct 2012

أختااااااااااااااه

هي ايه حكاية انتفاضه النسوان دي؟ هننتفض نعمل إيه يعني ولامؤاخذه؟ نقلع ملط ونجري في الشوارع يعني عشان نبقى كده حرائر؟ كام مره هقولكوا حقي بدراعي؟


في مصر هنا الإحصائيات بتقول ان حوالي ٣٠٪ من الأسر المصريه عائلها الوحيد واحده ست...وحوالي ٣٠٪ من الأسر المرأه فيها بتشارك في الإعاله...يفضل ٤٠٪ هيخربولنا دماغنا عشان عاوزين يلبسوا مايوهات ويلبسوا قصير من غير ما يتعاكسوا! ما تلبسوا اللي تلبسوه وحاربكوا معاركوا بنفسكوا! وسيلف دفينسيك في جيبي يا أبلتي! ال ٦٠٪ الباقية مشاكلهم أكبر من كده بكتير! ذكورية إيه اللي الستات تشتكي منها وهي اللي بتربي العيال؟ انتوا هتجننوني! مانتوا اللي بتربوا ولادكوا على كده! 


قولولي حتى انتفاضه ضد العنف الأسري...النسوان اللي بتصرف على البيوت وبتتلطش من منطلق أهو غلاسه كده! 



عزيزتي المرأه: عاوزه تلبسي ولا تقلعي وأمك مش راضيه منك ليها تصطفلوا...اللي محتاجين مني تضامن الستات اللي بتنضرب بصورة شبه يوميه لحد ماتطرش دم...الستات اللي بتسف تراب  ومابتاخدش مرتبات حق مجهودها لمجرد إنها ست...الستات اللي مش عاوزه تشتغل أصلا بس مضطره عشان تلبي الاحتياجات الأساسية لأسرتها...والستات اللي حقوقها في الميراث الشرعي بتسلب رغم أنف الشرع والقانون...مش البنات اللي أهاليهم غاصبينهم يلبسوا الحجاب...ولا الستات اللي مش عارفه تشتغل قاضي!

وعلى رأي الراجل العجوز اللي قال: بلا مرأة بلا خره! شوفولنا مشكلة الأوتوبيس!

3 comments:

Noha Abdel-Tawab said...

looooooool

Gamda gedan! 3agabetny!

منة الله said...

وجهة نظر بردو
:)
فكرتني بـ "حقوق حيوانات إيه مش لما نجيب حقوق البني آدمين الأول" ، مش لازم علشان أدافع عن حقوق البني آدمين أحقر من حق أي كائن آخر ، مش لازم علشان أدافع عن المرأة ضد شكل ما من أشكال التمييز يبقى أؤكد إن بقية الأشكال الأخرى غير ذات قيمة

ربما أنا معاكي فعلا إن فيه أشكال ما من التمييز واخدة مساحة "على حساب" أشكال أخرى ، لكن عمومًا معاناة الأشخاص لا تقاس في المطلق ، و لكن بمدى تأثيرها على الشخص و حياته و بيئته أيا كان تقييم الآخرين ليها

amina zaki said...

انا مش بتكلم في حاجات على حساب حاجات...انا بتكلم في مفاهيم أساسيه: الفرق بين الحق الفردي والحق العام

مافهمش يعني إيه حملة عشان تفض خناقة في بيت