AZ... Al-Mar2a Al T-Shirt

فكرة صغنونة جت فى دماغ واحد من سكان كوكب مجاور قالى تعالى نعمل تصميم T-Shirts ونبيعها.. قلتله انا موافقة.. وكانت النتيجة مشروع صغنن بتاعنا احنا الاتنين.. هو مش مشروع اوى يعنى :) بس مشروع برده..... زورونا بقى "خد فكرة واشترى بكرة " http://missfitwear.blogspot.com/ .... بغض النظر عن المشروع نجح او فشل انا سعيدة بالتعاون مع مهنّد (الكائن الفضائى الزميل) وسعيدة بالتجربة فى حد ذاتها ممتعه... ولو انى مش عارفه ايه حكاية ال T-Shirts معايا.. وانا فى الكلية واحد اعرفه اقترح عليه نفس الفكرة قالى ابقى اعملى T-Shirts وبيعيها دماغك تدّى.. يظهر انى انا جاية من كوكب ال T-Shirts تقريبا و اسمى الحركى T-Shirt Woman... اوعوا تنسوا بقى... عايزين زباييييييييييييييييييييييييييين

مرمطة آخر الرجال المحترمين

ده اللى حصل واللى جرى http://harakamasria.org/node/5891

ترجمة للجزء الخاص بمصر من التقرير الدولي لحقوق الإنسان 2005

اقرا هنا http://cairo.usembassy.gov/pa/ar_hr06.htm

................................

عمرى ماحسيت بالعجز والمهانة بالمنظر ده.. انا كتبت كلام كتير ومسحته... مالوش لازمه الكلام شوفوا الطريقة اللى فرقوا بيها الاعتصام يمكن تفهموا انا قصدى ايه .......... ايام المعتصم واحده فى اخر بلاد الخلافه جماعه يهود شبكولها ديل جلبيتها فى حزام وسطها فَرجلها اتعرت صرخت وقالت وا معتصماه.. المعتصم كان هو الخليفه.. بعتلها جيش اوله عنده واخره فى بلدها عشان يجيبلها حق رجلها اللى اتعرت... وبناتنا اللى اتبهدلوا دول مين ليهم؟؟؟؟؟؟؟؟؟؟؟؟؟. والشباب اللى زى الورد اللى اتشرحوا من الضرب دول مين ليهم؟؟؟؟ والقضاه المحترمين اللى بيتبهدلوا جسديا وادبيا دول مين ليهم؟؟؟؟؟؟؟؟؟؟؟........ طبعا بعد ربنا مالهمش غيره
اخترناه اخترناه يوم ماعبر وقلوبنا معاه... كله مسامحه شرف ومصالحة صافى القلب ياكفر مصلحه
دلوقتى بس عرفت هو عبر منين

http://www.zippyvideos.com/7498406264945506/amn

زحمة يا دنيا زحمة

كان فى فى كارتون زمان بيجيبوا شخصيه كارتون لواحد قاعد يفكر... وبدل مايطلع من مخه بلالين فيها افكار او لمبة بتنور، طلع من مخه بقاليل فاضيه عشان مشعارف يفكر وقعد هو يفقع البلالين بصباعه عشان يتسلى... لو عملوا كارتون بقى عشان يمثل حالتى حاليا هبقى حاجه شبه كده.. بس الفرق ان البلالين هتفضل محبوسه فى دماغى، والبلالين هتبقى مليانه بلاوى ، وكل بلونه منهم هتفقس بلالين تانيه... مخى بقى معمل تفريخ بلالين والشيطان ماسك البلالين وبيغنى اهلا اهلا بالعيد...

عزيزى...

يجب ان تفرق بين الغضب والاحتراق... وبين الثورة والاشتعال.. صباحك فل

AZ Phone Homeُ

من زمان اوى سقطت مركبة فضائية على احد المنازل فى كوكب الارض... خرج منها كائن فضائى بعد محاولة فاشله فى اصلاحها لاجراء اى اتصال مع المركبة الأم.. عثر عليه اسرة من سكان كوكب الارض فاتبنوه..
الكائن الفضائى: بابا.... هو بيلقى الخطبة بلاى باك؟
الرجل الارضى: يعنى ايه بلاى باك؟
الكائى الفضائى: يعنى الصوت متسجل وهو بيحرك بقه بس... خطبه امريكانى يعنى
الرجل الارضى: والله مش بعيد هو عاد فيه نفس.. هو بقى كام سنه دلوقتى 76 والا 77
الكائن الفضائى: (بقرف واضح) مشعارفه.. بلا نيلة يعنى هتفرق
الرجل الأرضى: .........
الكائن الفضائى: بابا.... هو مال شكله بقى عامل كده ليه؟؟؟ عينه اليمين مرفوعة لفوق... وحواجبه بقت فى نص اورته.... مش عارف يروح لدكتور تجميل عدل!!!!
الرجل الارضى: (فى هذه الاثناء دخل يغسل ايده عشان كان بياكل)
الكائن الفضائى: ايه ده!!!!!!!!.... هو ضارب شفايفه كولاجين والا ايه؟؟؟
يتحمس الكائن الفضائى (اللى اتضحلنا انه كائن فضائى نتاية مش دكر) وتخش تعيد محاولة اصلاح المركبة يمكن ترجع كوكبها وتتمنى فى سرها يكون فى جراحين تجميل احسن من اللى فى الكوكب ده.. طبعا بتفشل المحاولة...
الكائن الفضائى: (بتكاسل شديد) بابا مين الراجل ده؟ .. انا بشوفه فى التليفزيون كتير
الرجل الارضى: ده وزير الداخلية
الكائن الفضائى: (بدلع مشابه لدلع نساء كوكب الارض) ايه ده بجد؟؟؟ لا لا بتهزر.. هو عمل زرع وش والا ايه... مكنش شكله كده
الرجل الارضى: (ضحكة ابوية) ربنا يشفيكى
الكائن الفضائى: هو متعلم يا بابا؟؟؟
الرجل الارضى: زابط
الكائن الفضائى: المفروض يعملولهم اختبارات ذكاء قبل مايدخلوهم الكلية دى..
الرجل الارضى:..........
الكائن الفضائى: هو مبرشم؟؟؟
الرجل الارضى:.......... ( هو عادة مش بيرد عليها كتير)
الكائن الفضائى بتخش المركبة بتاعتها تانى وكلها عزيمة واصرار على اصلاح المركبة بتاعتها او اجراء اى اتصال مع السفينة الام... عشان كده بتحب اوى تتفرج على اخبار البلد فى التليفزيون... عشان بتخليها متحمسه اكتر لفكرة اصلاح السفينة

عقبال عندكوا

السياسة...
آسه
وكمان مرة السياسة....
آآسه
اليسار....
آر
اليمين....
ميين
التقدميين...
إيين
الرجعيين...
إيين
وانا وانت..
انته
ورقصنى يا جدع......
أدع
شك شك شك شك... انااومبيليلأ أومبيللأ... عمار يا مصر.... لولولولولولولولىىىىىىىىىىىىى..

صَحّ النوم يا فرخة بتوم
ماتنساش المعاد ياولد

ياريتك تفهم

هبلة؟ عبيطة؟ عايشه فى مية البطيخ؟... شوفنى زى مايعجبك انا مش فارقة معايا... كل الناس بتشوفنى مش طبيعيه اما بيجى الكلام لتحقيق الاحلام عشان بتكلم عنها زى ماتكون حاجه سهله... طيب الاحلام تحقيقها مش سهل.. بس بسيط.. بنفس البساطة الى بنحلم بيها مفروض نحقق اللى حلمنا بيه... التنفيذ بس عايز وقت وصبر وارادة... المشكلة مش اننا بنحلم بحاجات سهله والا صعبه المشكله تبقى لو انت حلمت بحاجه مش مناسبة ليك... قبل ماتحلم لازم تفهم نفسك الاول عشان تعرف تحلم بإيه... كل مُيَسّر لما خُلِقَ له.... واى حد فعلا ممكن يعمل اى حاجه لو اتوفر دافع قوى... ومش مهم تهيئة الظروف لان لو الدافع قوى هيخليك تهيأ لظروف للتنفيذ....تحقيق الاحلام سهل بجد ام اتكون بتحلم بشىء ملائم لقدراتك...
وانا عندى 12 سنه قريت رواية لرفايل ساباتينى اسمها الخيانة العظمى (اسمها الاصلىMistress Wilding)...... الرواية دى كانت السبب فى انى دلوقتى هنقل مجالى شغلى الى الرسوم المتحركة... عشان من ساعة ماقريتها وانا نفسى اعملها فيلم كارتون.. وادينى درست فى كلية تؤهلنى للعمل فى مجال الرسوم المتحركة... واتخرجت واشتغلت وباخد دلوقتى كورسات فى البرامج اللى هشتغل فيها وطورت قدراتى فى مجال تصميم الشخصيات ولسه بذاكر تانى.... تبعت.. وتعبت اوى كمان لحد ما قطعت المسافه دى كلها مش فى الطريق نفسه لكن عشان احط رجلى على اوله... وقربت احط رجلى على اوله... مع بداية 2007 بامر الله هكون خلاص ابتديت شغل فى مجال الرسوم المتحركة....
لو حسبنا بقى انا عملت ده فى كام سنه هنقى من سن 12 سنه وانا دلوقتى 25 سنه يبقى 13 سنة منهم 9 سنين وشوية فى التعليم وبقالى 3 سنين وشوية برده متخرجه..... حلم اهبل لعيلة هبله حدد مسار بقية حياتها... وفى ناس بتشوف انى بمثل وان كل ده كلام فارغ ... وناس بتشوف الموضوع حظ بحت... ماحدش بيصدق ان الموضوع فعلا ارادة و " إن الله لا يضيع اجر من احسن عملا"..... بيعتبروا دى كلها كليشيهات و"فِسَا"....... بس هم حرّين... وانا كمان حرة.. الكليشيهات والفسا دول حققولى احلامى ياريت بقى اللى بيشاوروا عليه بصباعهم المقدس يورونا افكارهم العظيمه اللى هى مش فسا ومش كليشيهات وصلتهم لحد فين؟؟؟؟؟؟؟؟ مش عشانى بس بجد عشانهم هم.. يقفوا مع نفسهم بجد... تحقيق الاحلام مش سهل.. انا عن نفسى كان فى قرارات مصيرية كتير اتضطريت اخدها لوحدى تماما وانا فى سن صغيرة عشان ابقى دلوقتى فى الحال ده... انا مش بيونيكوومان ولا ستيف اوستن ولا انا مكشوف عنى الحجاب عشان اعرف سكتى والا اعيش حياتى سهلة.. انا طلع عينى.. بس طلع عينى وانا مستمتعه.. انا مملكش اى شىء اكتر من غيرى.... ولا فُرَصى كانت افضل من فرص غيرى بالعكس، الحياةعادتنى... وعاندتنى كتيييييييييييييير اوى وطلعت عينى... محدش بيفهم يعنى ايه واحده عندها 10 سنين فى مدرسة حكومة تتشطر فى الانجليزى عشان سمعت صوت جورج مايكل وعجبها فقررت تتعلم انجليزى عشان تفهم هو بيقول ايه.. واتعلمت... وبقيت الحمد لله شاطرة فى الانجليزى... ومبيستوعبوش انى عايزه اتعلم فرنساوى عشان اقرا سالومى بتاعة اوسكار وايلد... و مكنش حد مصدق ان البت اللى مبتذاكرش ومقضية يومها بتسمع اغانى وليلها بتسمع الراديو هتخش فنون تطبيقية... ولا ان البت اللى طول الليل قاعدة على النت وبتلعب age of empires فى ليالى الامتحانات وبعد الامتحان تجيب 3 شرايط فيديو تتفرج عليهم قبل الامتحان اللى بعده، هتنجح وتتخرج بتقدير جيد والمشروع جيد جدا... ولا حتى اهلى نفسهم كانوا مصدقين... واما اتخرجت كنت باخد مرتب 400 جنيه وقلتلهم فى اقل من سنه مرتبى هيبقى الف جنيه مصدقونيش... وحصل... دايما مبيصدقوش كلامى ودايما بيحصل.. دايما بيضحكوا من احلامى.. ودايما بيقولولى ربنا يشفيكى... الكلمه دى سمعتها زمان من كل الناس اللى حواليا... لحد مابطلوا يقولوها عشان لقوا ان فعلا بحقق الاحلام الهبلة... بابا بيقولى ا نى أَروبه عشان بعرف اعمل الحاجات الغريبة اللى بفكر فيها، اللى بالنسباله جِنَان رسمى .... ولسة الناس اللى متعرفنيش كويس بيقولولى ربنا يشفيكى.. نفس الكلام اللى كنت بسمعه زمان وانا صغيره... نفس الكلام ربنا يشفيكى، بطلى هبل، ايه التخريف اللى بتقوليه ده...ولسة لغاية دلوقتى اما بقول لحد على قراراتى دايما بيتعبروها فَنْجَرِة بُق (طق حنك يعنى) عشان بقولها ببساطة.. عشان بقولها وانا وشى مفرود واحيانا مبتسمة وساعات ببقى بضحك كما لو انه قرار عبثى.......
معنديش مانع الناس تشوفنى هبلة ومجنونة واى حاجه عايزين يشوفونى عليها هم حرين... الحاجة لوحيدة اللى بتخنقنى انى اما بقول الكلام ده لناس بحبهم وعندهم احلام مشعارفين يحققوها عشان خانقين نفسهم بواقعهم وخايفين يقوموا بالمخاطرة بيعتبرونى بخرّف.... مبيصدقوش ان الموضوع مش اكتر من ارادة وصبر والتوفيق بتاع ربنا......... انا مش ربنا.. ولا اعلم الغيب.. انا بخاطر.. بكل شىء وبكل حاجة فى سبيل احلامى....... ليّه ناس صحابى دايما يقولولى انى مثال للبنى ادم اللى مقطّع البطاقة وماشى وانى مِستَبيَعَة وانى a girl that has nothing to lose...... يمكن... مش هقول لا.. بس انا ماحيلتيش حاجه عشان اخسرها غير نفسى واحلامى... ومعنديش استعداد افرط فيهم.. يصعب عليه اشوف ناس زى الورد بتبدل قدام عينيه كل يوم عشان احلامهم بتموت وتتخنق وتتجمد فى ننى عينيهم.... بيصعب عليه اشوفهم قدامى بيكتئبوا كل يوم اكتر من اللى قبله... والغضب بيكبر جواهم كل يوم عن الى قبله.... نفسى مرة حد منهم يصدقنى وياخد المخاطرة...
يمكن انا فعلا هبلة... طيب انا هبلة..

محاولات فاشلة للاستسلام للحزن

وحدك.. تمدد فى يأس وحملق فى سقف الحجرة فى سكون حتى تصبح ملامح وجهك ساكنة وتتسطح قسماتك تماما فتصبح مرآة لسقف حجرتك فتعكس لونه الحائل و تآكله العتيق... وانتظر حتى يسقط عليك اوينتهى حزنك

--------------------------------

وحدك... اجلس القرفصاء واحضن ساقيك بشدة فانت حزين وتشعر بالوحدة... ادفن رأسك فى الفراغ بين ذراعيك وساقيك المضموتين الى صدرك.. اترك احبال الاحزان تلتف حولك حتى تصنع شرنقة.. فربما يوما يلدك حزنك انسانا او وَحشاً...

--------------------------------

وحدك.. انفرد بكرسى فى ركن ما فى احدى البلكونات .. مِل بكرسيك إلى الخلف حتى يستند الى الحائط وارفع ساقيك الى السور، واعلم انه ليس ثمة شىء اخر تستند اليه سوى الحوائط.. بعض الحوائط.. واعلم انها حتما -يوم ما- ستضيق بك ذرعا هى الاخرى.. ثم الى السماء انظر وانتبه، وانتظر هبوط ملاك.. او نَيزَك.. او سفينة فضائية يهبط منها كائنت عدائية تنهى عذاباتك بشراستها

--------------------------------

وحدك... اجلس محنى القامة مقوس الكتفين وذراعاك متدليان الى جوارك وافتح فمك كالأبله ... وانتظر ان تحن عليك الجوارح -التى لا تعيش بأى مكان قريب- وتنهشك حيا

--------------------------------

او ربما تسترخى على احد الكراسى تستمع الى بعض المقطوعات الموسيقية التى تقودك ببطء الى الجنون.. او تتجه الى بعض الاماكن المزدحمة بوجوه لا تعرفها حتى تشعر اكثر بالوحدة.. او قد لا تفعل شيئا وتظل متجهما وتتعمق فى التفكير وتستدعى كل ذكرياتك الحزينه حتى تصاب بلوثة عقلية.. او ذبحة صدرية.. او تظل تتحسر لأن شيئا من ذلك لم يصيبك وان حياتك لم تنتهى بعد... وربما تفكر فى ان تنهيها.. او ربما تهاتف احدهم وتظل صامتا تستمع الى انفاسه ودقات قلبك حتى تخفف من شعورك بالوحدة.. او ربما تفتح حاسوبك وتتحدث الى بعض اصدقئك عبر الماسنجر لتشعر اكثر بألم المسافات وبأنك وحيدا جدا... وربما تكتب بعض الكلمات اليائسة.. او تبحث عن اشخاص كتبوا كلمات اكثر يأسا فقط لتشعر بانك لست اسوأ حالا من غيرك.. ولكنك تعلم تماما ان لاشىء يفيد.. وان حياتك لن تنتهى.. وانك مضطر ان تستمر هكذا.. بحزنك او بدونه.. ستظل تتنفس وسيظل قلبك الملعون فى ضخ حزنك الى اعضاء جسدك كالسم ولكنك لن تموت.. فهو سم بطىء المفعول يقتلك دون ان يقتلك

انا ميييييييييييين

من سنين مش كتير اوى اتخلصت من عقدة مزمنة كانت عندى.. عقدة تقديس الناس اللى بحبهم.. عشان انا بحب واحده صحبتى يبقى كل الناس لازم تتكلم عنها كويس واللى يقول عليها نص كلمة اقطعله لسانه.. لحد ماكتشفت فى الاخر ان اللى انا بشوفه حقيقة الناس ماهواش حقيقتهم ولا اللى الناس التانين بيشوفوه في الناس دى حقيقتهم برده... الموضوع زوايا.. كل واحد واقف فى زاوية شايف الناس منها وكل واحد فاتح فى نفسه شبابيك الناس بيطلوا عليه منها.. وكل واحد بقى الناس بتشوفه زى ماهو باين من الشباك اللى فتحهولهم من الزاويه اللى هم واقفين فيها... ومهما كنت قريب من شخص استحالة هتشوف كل شبابيك.. ولو شفت كل شبابيكه هيفضل فى حتت مالهاش شبابيك اساسا... ماحدش بيعرف حد بس كلنا بنحاول.. عشان كده مبقيتش ازعل اما حد يشوف واحده صحبتى رخمة فى حين انى بشوفها زى العسل لان هى ممكن متكونش لا كده و لاكده.. بس انا شايفاها كده وغير شايفها بصوره تانيه وفى الحالتين كلامنا لن يغير من واقع الامر شىء.. عشان كده برده معدتش بحاول اغير رأى اى حد فيه.. معدتش بناقش اللى بيقولولى انى بصدر احكام مطلقة ولا بحاول افهم اللى بيشوفونى على نياتى انى مش كده... لكن طول عمرى مقتنعه ان صاحب صاحبى مش لازم يكون صاحبى ومقتنعة برده ان مش كل صحابى لازم يحبوا بعض ومقتنعه ان كل الناس لازم يبقى فى حد بيشوفها كويسه حتى لو هى مش كويسه وكل الناس لازم فى حد يشوفهم مش كويسين حتى لو هم كويسين

الصديق وقت الضيق، اول واحد يقلع الجزمة ويديك

سيريالية الايام

السيرياله ترجمتها بالعربى ماوراء الواقع.. التخريف او الهفلطه الى ممكن يبقى ليها معنى او لا.. زى الحلم بالزبط زى ايامى.. ايامى الفتره دى بقت اكثر غرابه من احلامى.. احلامى دايما بتدور حوالين نفس الفكرة... ناس بتطاردنى وعادة عايزين يقتلونى او يخطفونى لصالح ناس تانية.. الغرابه بتيجى من التفاصيل.. انط مثلا من فوق جبل وماموتش ولا اتعور ( زى الافلام العربى)... نفس الشىء فى ايامى الحالية... اللى بعمله فى حد ذاته مش غريب لكن التفاصيل اللى بتحصل غريبه.. او يمكن انا اللى بقت غريبه.. ماشية طول اليوم رافعه حواجبى من الدهشه مع انى بطلت اشعر بالدهشة بس شكلى مابطلش يبقى كده... ابقى نازله اخد تاكسى عشان اوصل بدرى ربع ساعه الاقى نفسى وقعت فى سواق وصلنى متأخر نص ساعه.. ابقى عايزه اخرج الاقى ل الناس فجاة مشغوله.. اما ابقى مش طايقه اكلم حد الاقى الناس لها بتتصل فيه عايزين يقابلونى.... اعتقد الدنيا شاربه حشيش وبتهيس عليه اليومين دول.. يا اما بقى ابتدت تعمل دماغ كيميا...

سلامتك يا دماغى.. آآه آآه يا قلبى

اصابنى الخرس الغير التام منذ فتره ليس لأننى لا اجد ما اقوله بل لأننى لدى الكثير لاقول.. بس انا امتلك صفة ساعات تبقى ميزة واسعات تبقى عيب.. تبقى عبء.. وبتتعبنى انا شخصيا.. الا وهى انى عندى قدرة على انى ابتسم واضحك واسخسخ من الضحك عشان ماحدش ليه ذنب بالطواحين اللى بتلف فى دماغى بتشرّح فى مخى... البوستات اللى بعملها سطور دى مش عشان انا بشوف الاشياء بهذا التجريد لكن للأسف لانى ببقى مشعارفه اشرح اللى حاسه بيه فبحاول اوصفه.. بحاول ادور على اى كلام يعبر عن اللى حاسه بيه مبلاقيش غير سطر.. او اتنين

Another Tag hehehe

(x) Smoked a cigarette
( ) Drank so much you threw up
( ) Crashed a friend's car
( ) Stolen a car
(x) Been in love (i thought its love... but mabe it never was.. who knows!!!)
(x) Been dumped
( ) Shoplifted
(xxxxx) Quit your job ( we dh so2al brdo!!)
( ) Been in a fist fight (7ayezi el fezya2i la yasm7)
( ) Snuck out of your parent's house
(x) Had feelings for someone who didn't have them back
( ) Been arrested (2orayeb geddan)
( ) Gone on a blind date
( ) Lied to a friend (elhamd lelah)
( ) Skipped school
( ) Seen someone die ( only animals)
( ) Been to Canada
( ) Been to Mexico
( ) Been on a plane
(xxxx) Been lost
( ) Been on the opposite side of the country ( if alex s on z otehr part of z country mark an X for me)
( ) Swam in the ocean (MAB3RAFSH A3OOM)
(x) Felt like dying
( x) Cried yourself to sleep (only once we nemt besabab elmohade2 mesh besabab el3eyat)
(xxxxxxxxxxxxxxxxx) Played cops and robbers
( ) Recently coloured your hair (hasbo3'o ko7li oryeb)
(x) Done something you told yourself you wouldn't
( ) Made prank phone calls
(x) Laughed until some kind of beverage came out of your nose
( ) Caught a snowflake on your tongue
(xxxxxxxxxx) Danced in the rain (gayba lommi el3aar i know)
( ) Written a letter to Santa Claus
( ) Been kissed under the mistletoe
(x) Watched the sun rise with someone you care about
(xxxxxxxxxx) Blown bubbles ( i have cartona malyana bubble maker bottles)
( ) Made a bonfire on the beach
( ) Crashed a party
( ) Gone roller-skating
( ) Ice-skating

مصر بلد الأمن والأمان والمختلين عقليا

هو ليه كل اما مصيبه تحصل وحد يقتل حد او يحاول يعتدى على حد يقولك مختل عقليا!!!... هو فى ايه!!!.. انا مش زعلانه ولا حزينه ولا مشعارفه انام عشان اللى حصل فى اسكندرية لأنى من فترة طويلة فقدت كل القدرة على التعاطف مع اشياء مش فاهماها ونظريات المؤامرة بقيت كتير لدرجة ان الواحد ماعادش حتى بيصدق نظريات المؤامرة كمان... انا موافقه ان سفاح بنى مزار مختل عقليا.. وموافقة ان اللى قتل الناس فى اسكندرية مختل عقليا.. وموافقه ان كل حد بيقولوا عليه مختل عقليا هو بالفعل مختل عقليا... هيعملوا ايه بقى؟ مش معقوله مش شايفين ان ده مؤشر منيل بستين نيله على حالة لناس... ماحدش عاد مستحمل... الناس بتتجنن ببطء.... انا مابلومش على الراجل اللى قتل الناس فى اسكندرية... انا نفسى بقت بتراودنى فكرة القتل الغير مبرر اكتر من مرة فى اليوم.. وانا ماشية فى الشارع، وانا واقفه مستنيه المواصلات... كيتر اوى بيخطر على بالى انه ياسلام لو معايا سكينه أَحِشّ رقاب الناس اللى واقفه دى كلها او بمدفع رشاش والا حتى قنبلة... دى من احد اعراض الاكتئاب بالمناسبة... الفرق بينى وبين الراجل ده (بفرض انه سوبر مان يعنى واخد اسكندريه بالطول فى نص ساعه) انى بقدر امسك نفسى (لغاية دلوقتى ومعرفش لحد امتى هفضل عندى لقدرة على ضبط النفس) وانى مبضحكش على ضميرى بانى عايزه اقتل الناس فى سبيل الله ولا فى سبيل ازازة كازوزة... انا ارفض ان الأمر يتحول لمسلمين ومسيحيين.. انا تعبت.. تعبت... تعبتــــــــــــــــــــــــــــــــــــــــــــــ..............

projection

اجلس مع جدران غرفتى وابتسم فى ارتياح فلازالت لم تنكرنى بعد.. المسيح انكروه ثلاثا ونحن ننكر بعضنا فى كل يوم الاف المرات حتى اصبحنا فى حالة من الانكار الدائم لكل الاشخاص والاشياء.. فقد اصبحنا لا نرى الآخرين كما هم ولكننا نراهم كما نحن.. فلأننى لن اتمنى لك صباحا سعيدا الا اذا اردت منك شيئا فأننى اقسم بأغلظ الايمان انك تريد منى شيئا حينما تتمنى لى صباحا سعيدا.. اليست هذه هى الحياة اليوم؟.. لانك نذل وخبيث فانت تتوقع النذالة والخبث أينما حللت.. واذا انت انكرت ذنبا تكره فعله فلا تبتئس عندما يخبرك أحدهم بانك فقط تدعى الفضيلة.. بالرغم من انك لم تنكر بقية ذنوبك وانما فقط كرهت فعل احد الذنوب، عندها سيخبرك احدهم بمنتهى الثقة انك لست قديسا بالرغم من انك لم تدّعى القداسه وانما انت بكل بساطة كرهت فعل شىء توافق وانه فعل مذموم.... واذا اخبرت احدهم بانك من برج الجحش سيهرع الى كل كتب الابراج بحثا عن حقيقتك، واذا اقر الكتاب بأنك نذل وكل تصرفاتك انكرت ذلك فالكتاب صادق وانت نذل وايضا مخادع، فقد استطعت ان تخفى نذالتك عن الجميع كل هذا الوقت، لكن العناية الالهيه ارسلت لهم كتب الابراج لتهتك سرّك.. فانت تخطىء و الكتاب لا يخطىء.. ولابد ان يكون هناك دوما خطأ، مما يستلزم دوما وجود مخطىء.. ولابد ان لا يكون انت المخطىء.. كل شىء دوما غلطه شخص آخر.. ثم يبدأ الجميع فى تراشق الاتهامات (انت القرد.. لا انت القرد... لا انت لا انت لا انت القرد.........).. بينما لا ندرك اننا قد نكون جميعا على حق او اننا جميعا مخطئين...

مسكين هو

من لا يستطيع التفرقة بين النتائج الحتمية لمجهوداته والإنجازات

الشقاء

ان يصبح ايسر الأمور عليك هو ان تلوم الله والآخرين على اخطائك

صديقى الانتيخ

متى تدرك ان الكون انت والله فقط وبقية الاشياء موجودات حتمية

estegwaaaaaaaaaab

31.Grab the book nearest to you, turn on page 18 and find line 4
ولكنها لم تجد الشجاعة على هجر ابويها ومسقط رأسها---- عذراء اللورين (جان دارك)-- اليكساندر ديماس
ملحوظه: اما فتحت ولقيت السطر ده قدامى حالا بلّمت


2.Stretch your left arm out as far as you can.
ok


3. What is the last thing you watched on TV?
french movie starring jean pul belmondo, i dont know its name but its about one of arsin lupin's stories


4.Without looking, guess what time it is?
1.30


5. Now look at the clock, what is the actual time?
1.21


6. With the exception of the computer, what can you hear?
a clock on the wall ticking


7. When did you last step outside? What were you doing?
today... afte i got from work i went to a pharmacy


8. Before you started this survey, what did you look at?
pix from the movie Bande A Part



9. What are you wearing?
rabena 7aleem sattar... el donia 7arr


10. Did you dream last night?
yeah


11. When did you last laugh?
2 hours ago when my father interrupted me for the gazillion time in less than 30 minutes while i was watching a movie for teh first time since whats more than 10 days ago


12. What is on the walls of the room you are in?
mickey mouse painted on the wall... i did it when i was 10.. some drawings over my bed, i used to draw whenever i was insomniac... an empty gift bag i got for my birtdhay ages ago... clock i got when i succeeded n sanawya 3amma... shamma3a... raff fady.. meraya beraff 7atta 3leha sham3a we kabrete we sharayet cassette


13. Seen anything weird lately?
yeah.. i saw my face today in the mirror...


14. What do you think of this quiz?
lan a3taref :p


15. What is the last film you saw?
weekend, directed by Jean-Luc Godard


16. If you became a multimillionaire overnight, what would you buy?.
caravan, horse, mp3 player, new pc, the lightest laptop on earth, a very large soft pastel color palette, house in italy,another one in france and a 3rd house in england... a lot more do u have time????


17. Tell me something about you that I dunno.
i hate liars


18. If you could change one thing about the world, regardless of guilt or politics, what would you do?
wala 7aga



19. Do you like to dance?
yes

20. George Bush.
3ayel ahbal


21. Imagine your first child is a girl, what do you call her?
asia


22. Imagine your first child is a boy, what do you call him?
ayman


23. Would you ever consider living abroad?
yes ofcourse.. i'd love to


24.What do you want GOD to say to you when you reach the pearly gates?
he ll just tab on my back and smile

الكوميديا السوداء

اما الناس اللى حواليك يعتقدوا انهم فاهمينك اكتر مانت فاهم نفسك ويبدؤا فى اصدار احكام مطلقة عليك واذا اعترضت تبقى طبعا انت حمار مش فاهم حاجه انت هتفهم نفسك اكتر منهم يا حشرة!!!!!!!!!

بالرغم من انى مبسوطه بس حاسة بطعم دموع فى حلقى

اكثر ما اكرهه فى المجتمعات المغلقة هو ألفة الوجوه.. اكره مكانا لا استطيع ان اتوه فيه.. لا استطيع ان القى فيه وجوه غريبه لا تعرفنى ولا اعرفها؟؟ اكره الطرقات التى الفتها والفتنى و يحمل المارين فيها اصابعا تشير الى وعيون تتسائل بريبة عن سبب وجودى هنا الآن.. افضل ان اسير وحدى كغريبه فى مكان لم يميز صوت خطوتى عن بعد... فالغربة هى مأوى لمن اعتنق الوحدة

الآن

يسعدنى ان اكون النمرة الحالية فى

تياترو صاحب السعادة

كلمة السر

نينا: لولّى ازيّك عامل ايه

لولّى: ازيك يا بنتى فينك!!!!

نينا: فى الحياه انت اخبارك ايه كده؟

لولّى: والله مخنوق يا نينا

نينا: ليه بس يا ريّس!!!

لولّى: زهقان.. المهم انتى اخبارك ايه

نينا: زين زين والله ماجصَّرت

لولّى: وبتعملى ايه فى الدنيا كده اليومين دول؟

نينا: ولا حاجه يابنى والله زهقانه.. الزهق يجتاح العالم بجنون

لولّى: آآآآه انا اؤيد.. انا زهقان يا نينا زهقاااااااااااااان

نينا: روّقى يا شابه متعمليش فى نفسك كده

لولّى: انا خلاص مش قادر.. ده انا حتى مشعارف انحرف!!!!

نينا: ليه بس ده حتى مفيش اسهل منّه!!!

لولّى: المنحرفين مش راضيين.. انا اعرف شلة كلهم بيشربوا حشيش كنت قاعد معاهم مره وحبيت اجرب رفضوا قالولى يا لولّى لا انت محترم وقفشوا عليه

نينا: ولا يهمك يا لولّى طول مانا موجوده متعتلش هم اى حاجه ابدا ننحرف سوى

لولّى: ربنا يخليكى ليّه مشعارف منغيرك انا كنت هعمل ايه

نينا: كنت هتاكل فى نفسك عادى يابنى ولا يهمك Not a big deal

لولّى: خلاص قشطه انا هجيب حشيش مفيش اسهل من مجايبه... تحبى نلفّه والّا نعمله فى كبايه؟

نينا: لا لا كبايات لا هيفكرنى بالشرب وبَقلَلِة البطن خلينا فى الصواريخ حتى يعمل امبيانص للقعدة

لولّى: خلاص قشطه هنرولّ انا بعرف ارولّ كويس

نينا: طيب والمُكنه يا لولّى؟؟

لولّى: مشعارف بقى صحيح هنسموك فين!!!

نينا: فى العربية فى اى حتة متطرفة

لولّى: لا يا نينا سهل نتقفش.. بعدين اخاف عليكى

نينا: يالولّى تخاف ايه بس انت دلوقت واحد منحرف لازم تبقى واطى مفيش حاجه اسمها تخاف عليّه مفروض تراودنى عن نفسى يا حمار

لولّى: لا مانا مش لازم ابقى منحرف اوى يعنى انحرف نص نص.. حشيش بس يعنى

نينا: هو ايه اصله ده ماهو يا منحرف يا لامنحرف مفيش نص منحرف دى هى جبنه رومى!!!

لولّى: طيب خلاص ننحرف حتى الثمالة بس بلاش نتقفش دى اهم حاجه

نينا: طيب خلاص بلاها حشيش.. نبوس بعض

لولّى: لا يا نينا انتى بنت كويسه انا مقدرش اعمل كده

نينا: وبعدين بقى مش قلنا هننحرف انا اعملك ايه طيب فاضل ايه بقى لا عارفين نحشش ولا نمارس الجنس هننحرف ازاى!!!!!

لولّى: مشعارف بقى

فترة صمت قصير

لولّى: نينا...

نينا: نعم؟

لولّى: نمتى؟

نينا: بحاول.. هى هى هى

لولّى: هى هى هى هى

فترة صمت قصير تانى

نينا: بسسسسسسسسس عرفت يا لولّى ننحرف ازاى وجدتها.. هيوريكااااااااااااااااا

لولّى: ها قولى ازاى

نينا: احا يا لولّىىىىى

لولّى: !!!!!!!!!

نينا: مش فاضل غير الالفاظ البذيئة... قول ورايا أحّاااااااااااا.....

لولّى: احّاااااااااااااااا

فترة ضحك هيستيرى

نينا: لولّى هم مش المفروض نشخُر الاول بعدين نقول احّا؟؟

لولّى: اه عادة

نينا: طيب انا كده مش هعرف انحرف عِدِل!!!!

لولّى: ليه بس يا نينا؟؟

نينا: مبعرفش اشخٌر يا لولّى!!!

لولّى: انا اعلمك

نينا: طيب قشطه

لولّى: (يصدر مجموعه من الاصوات لا علاقة لها بالشخر) مشعارف يا نينا يظهر انا كمان مبعرفش

نينا: طيب وبعدين هنتصرف ازاى!!

لولّى: خلاص نقول الفاظ بذيئة لحد امنشوف حد يعلمنا نشخر

نينا: قشطه فى الكلوت.. انا موافقة

لولّى: ايه يابت قشطه فى الكلوت دى يخربيتك جبتيها منين

نينا: سمعتها من اسبوع.. هو يعنى ايه قشطة فى الكلوت يا لولّى؟؟

لولّى: حاجه قبيحة اوى اوى اوى يا نينا مقدرش اقولك!!!!!!!

نينا: لا بقى مفيناش ممالحركات دى احنا مش اتفقنا ننحرف سوى لازم تقولى

لولّى: لا ياستى انا مليش دعوة

صمت قصير

نينا: لولّى... هو احنا عايزين ننحرف ليه؟

لولّى: مش فاكر

نينا: طيب هى الناس اللى بتنحرف بتنحرف ليه؟

لولّى: فراغ بيتهيألى يا إما بيبقى حاجات بيحبوا يعملوها

نينا: طب احنا ليه مانحرفناش من بدرى؟؟؟؟؟

لولّى: احنا اتخدعنا يا نينا.. اهالينا ضحكوا علينا

نينا: مانا بقول كده برده... ماتيجى نعمل تنظيم ضد الآباء اللى بيربوا عيالهم؟

لولّى: انا موافق لازم ننقذ الاجيال القادمة من الاحترام.. واهو كله عشان مصر

نينا: ايوه كله من اجل رفعة الوطن

لولّى: رفعت مين؟؟؟ انتى بتحبى عليه!!!!!!

نينا: الله ايوه طبعا مش انا بت منحرفة.. سيبك من التفاهات دى وخلينا فى التفاصيل بتاعة التنظيم

لولّى: ايوه صح.. التنظيم.. انا وانتى بس التنظيم لحد مانلاقى حد نثق فيه نضمه معانا

نينا: قشطة فى الكلوت

لولّى: يابت بلاش قلة حيا

نينا: الله مش تنظيم منحرف!!!

لولّى: لامؤاخذه نسيت... خلاص قشطة فى الكلوت

نينا: بس كده؟ مفيش اى حاجه تانى؟

لولّى: لا كفاية كده ماهو التنظيم انا وانتى بس احنا مجلس قيادة التنظيم

نينا: طيب مش كل تنظيم ليه كلمة سر..

لولّى: يابنتى كلمة سر ايه هو احنا اتنين

نينا: الله افرض البوليس كبس علينا!!!!

لولّى: نعمل نفسنا بنبوس بعض سهلة يعنى

نينا: لا ماليش دعوة انا عايزه كلمة سر

لولّى: انتى عيلة.. طيب ياختى شوفيلك كلمة سر بس تكون حاجه ملائمة لجوهر هدف التنظيم

صمت قصير

نينا: أحّا

لولّى: هى هى هى انتى استحليتيها والا ايه مالك بتقولى أحّا ليه؟

نينا: كلمة السر

لولّى: مالها

نينا: كلمة السر (أحّا)هى هى هى هى

لولّى: جامده فشخ هى هى هى

ضحك هيستيرى

الشارع المقفول.. فوول.. فوووووووول

من كام يوم وانا رايحه شغلى الصبح كنت رايحه عبدالمنعم رياض عشان اركب مكيروباص وانا جايه من على الكورنيش من ناحية نقابة الصحفيين كنت ماشيه فى المسافه الوحيده اللى مبتعديش فيها العربيات اللى مفروض انها معموله للبنى ادمين اللى هى مابين الكوبرى اللى بيودى على رمسيس وبين الكورنيش... وشايفه علامات مرور المشاه قدامى ولسه هنزل من على الرصيف لقيت عسكرى سفروت اتزرع قدامى وهياخدنى بالحضن.. مالك يابنى فى ايه عدينى يقولى الشارع مقفول.. لسه هسأله مقفول ازاى امال نعدى منين وفين الزابط خلينا نتفاهم لقيت واحد مواطن غير محترم بالمره بمنتهى السفالة زَقّ العسكرى كأنه ورقة جرنان وعدّى الشارع... العجيبه انى تعاطفت مع العسكرى مع ان موقفه كان غريب بس هو مالوش ذنب... ياترى لو كان اللى واقف بيحوشنا ده مش عسكرى وكان لوا شرطه والا زابط كان المواطن ده زقه فى كتفه والا كان وطى على ايده باسها زى الكلب.. ناس تخاف ماتختشيش

استقيظت اليوم لأجد بقايا دموع فوق رموشى

ملعون هو الغضب الذى يعطينا القدرة على سحق العالم بالكلمات

الارشادات اللازمة للحصول على النتيجة المُثلى

نعم.. هكذا.. ضيّقوا المسافات بينكم.. ساووا الصفوف وضيّقوا الفُرَج.... شبّكوا ايديكم جيدا.. نعم هكذا.. جيد جدا.. والآن...فلتقفزوا سويا إلى قاع الجحيم..

اوففففففف

كلاكيت سحلوميت مره

_______________________

اليوم اكتشف للمرة السحلوميّة اننى لا يجوز ان أُعَد من إناث او ذكور او حيوانات او نباتات او اى من مخلوقات هذا الكوكب

وعلى هذا استنتج للمرة السحلومية بعد السحلوميت أننى حتما اتيت من بعد زمنى آخر او من مجرة اخرى

آآآآه يا منير

كل شىء بينسرق منى
العمر مالأيام.. والضىّ مالننّى
كل شىء حواليا يندهلى
جوايا بندهلك
ياترى بتسمعنى
فينك

مشكلة المشاكل أُسّ الفساد

فى بلاد العرب عندنا ضماير كتير فى لغتنا لكن المأساه اننا اكتر ضماير بنستخدهما وبنقفش فيها ضماير الملكية ومعاها "انا" و"أنت"... وحاجتى وحاجتك... تلاتربع تراكيبنا اللغوية بقت انا وانت او احنا وهم ووراها حاجه متضافلها ضمير ملكية يا اما انا وانت او احنا وهم ومتضاف وراها صفات... انا حلو وانت كخه.. احنا كويسين وهم البوبيهات ولاد البوبيهات.... مبنعرفش نقول احنا.. وحاجتنا.. كلنا.. حاجه واحده.. الحاجات عندنا زى السجاير بتتباع فَرط عشان كده احنا كمان فَرط.. مابنتلمّش ابدا...

كان معكم سمير ابو العافيه - كفر ابو طشت

الى المكان الجديد ادلف فى صمت دونما صوت سوى حفيف خطواتى الواثقة كأننى ولدت هنا قبل ان يُخلق المكان.. اتجه الى آخر كرسى فى القاعة.. المنبوذ دونما سبب مفهوم لذلك فهو دوما خيارى الاول حيثما ذهبت ربما لأن الكراسى الوحيدة المنبوذه تشبهنى.. اجلس بهدوء ومن محتويات حقيبتى المكتظه بأشياء لا تهم أحد انتقى فقط كشكولا وقلما وأبدأ فى سب العالم بطريقتى الخاصة

يمكنك ان تختار اى مفردة بذيئه تنم عن الخنقة ونفاذ الصبر وتضع التالى تعريفا لها

عينيكى فيهم براح ولا فَسَحة بيتنا نفسى ازرع فيهم فوتييين واريكه ثم نحتسى الجعة سويا على طَرَف كَوكَب انفك الشامخ

اللعنة

ان تظل تحترق فى ركنك التافه من العَدَم دون ان يدرى احد.. حتى ولا أنت

ماوراء الطبيعى

ان يستطيع احدهم ان يكتم آلامه بضحكات مجلجله يظل صداها يتردد حتى بعد ان يتلاشى كيانه من الالم

الأرق

ان تظل مستيقظا الى ان يختلط حدود الواقع بالحلم ويصبح النوم والموت احلام يقظة تراودك باستمرار

تعاسه

كل اما اجى اسند راسى على حيطه عشان ارتاح الاقى الحيطه بارده وكلها شوك

الظلم

أن يعاديك احدهم لأنك تتنفّس

غريب هذا الهدوء الذى يتسلل الى نفسى عقب الغضب مغافلا رَجَفات الغضب الذى يجتاح خلايا جسدى، لأجد نفسى فى النهاية مستسلمة لحَضرَة الهدوء المقدّس

اذا التقينا يوما فلا تجلس الى قبالتى واجلس الى جوارى حتى نشاهد العالم سويا

يصعب على البعض ادراك متعة الصحبة.. كلما اقتربنا كلما قلت الثرثرة وزادت متعة الصحبة.. وأقول ثرثرة وليس كلام فالكلام تواصل والثرثرة محاولة للقضاء على الخوف من الغرباء.. قليلون جدا هم من يؤنسونى عندما اكون معهم دونما كلام فيكفينى فقط ان يكونوا فى مرمى بصرى لأشعر بدفء يلمؤنى.. بعض الناس لا يدركون معنى وجودهم فى الجوار.. لايفهمون انهم باعث على ممارسة الاشياء الاخرى فى هدوء.. لا يستوعبون اننى ابلغ اقصى انشغالى وانا معهم لان بغيابهم تصعب ممارسة الاشياء.. وبعضهم لا يدرك ان اخفاء تفاهاتهم عن اصدقائهم يعدّ خيانة... ان لم يكن الصديق هو اكثر من يعلم كم هى مؤرقة الحصاة الصغيره فى باطن حذاءك فلن يفعل أحد.. ان لم يكن الصديق هو من يربت على كتفك عندما تسقط عَلكَتك على الارض لأنه يعلم انك وددت ان تحتفظ بها لمضغة او اثنتين فإن أحدا لن يفعل... وان لم يفعل فإنه ليس بصديق وان لم تفعل فهو بعد غريب .. بعيد عنك كبعد السماء السابعة عن باطن الأرض

مؤلمون هم الأصدقاء

من حقائق الحياة

it's always your fault

ماعدت اذكر والحرائق فى دمى

ان كنت اكرهه ام كنت اكرهنى ام كنت اكره العالم من الِفِهِ الى ياءِه... تحترق الاشياء بداخلى والعالم من حولى بارد... يحترق النبض فى قلبى ولازال كفى بارد.. يشتعل القلب فى صدرى ولازال جسدى بارد.. اعدو هربا من اشباح تطاردنى فى صحوى، تلتهمنى فى نومى وتلفظنى.. وحدى ابكى فى دربى ولازال دمعى بارد.. تتلاشى الدروب من تحت قدمى فألتَحِف جَسَدِىَ البارد...

توفيق زيّاد

غزلت الحَبل من دمِه

وغزل الدم لا يبلى

ألم يغزل على نولِه

من دمى انا حبلا؟

يمكن للمرء ان يصلح ما تكسّر ولكن لا يمكنه ان يعيد خلق ما سَحَقَته يداه

قرار ديكتاتورى بمحو هوية مواطن ظن انه ينتمى لدولة ما

الاصدقاء كالأوطان اليها ننتمى ومنها نسافر واليها نعود محملين بالأشواق والحكايا.. حينما يمنحك احدهم هوية ويعدّك من خاصه الملك ويعينك سفيرا فمن الظلم أن يسحب عنك كل مزاياك ذات صباح ليحولك الى عابر سبيل..... تستجدى الاخبار من عيون الغرباء

لاننى اعلم تماما اننى لا انتمى الى اى شىء او اى احد او اى مكان يدهشنى دائما حين يصنفنى البشر فى قائمة الغرباء.. ولان ا لغربة لم تعد تؤلمنى ولا القسوة ولا الوداعات... ولأن الرحيل من هواياتى والصمت حرفة اجيدها تماما متى اشاء... فلا تنتظر منى سؤالا ولا عتابا او ملاما... فلم اعتد معاتبة الغرباء