ياريتك تفهم

هبلة؟ عبيطة؟ عايشه فى مية البطيخ؟... شوفنى زى مايعجبك انا مش فارقة معايا... كل الناس بتشوفنى مش طبيعيه اما بيجى الكلام لتحقيق الاحلام عشان بتكلم عنها زى ماتكون حاجه سهله... طيب الاحلام تحقيقها مش سهل.. بس بسيط.. بنفس البساطة الى بنحلم بيها مفروض نحقق اللى حلمنا بيه... التنفيذ بس عايز وقت وصبر وارادة... المشكلة مش اننا بنحلم بحاجات سهله والا صعبه المشكله تبقى لو انت حلمت بحاجه مش مناسبة ليك... قبل ماتحلم لازم تفهم نفسك الاول عشان تعرف تحلم بإيه... كل مُيَسّر لما خُلِقَ له.... واى حد فعلا ممكن يعمل اى حاجه لو اتوفر دافع قوى... ومش مهم تهيئة الظروف لان لو الدافع قوى هيخليك تهيأ لظروف للتنفيذ....تحقيق الاحلام سهل بجد ام اتكون بتحلم بشىء ملائم لقدراتك...
وانا عندى 12 سنه قريت رواية لرفايل ساباتينى اسمها الخيانة العظمى (اسمها الاصلىMistress Wilding)...... الرواية دى كانت السبب فى انى دلوقتى هنقل مجالى شغلى الى الرسوم المتحركة... عشان من ساعة ماقريتها وانا نفسى اعملها فيلم كارتون.. وادينى درست فى كلية تؤهلنى للعمل فى مجال الرسوم المتحركة... واتخرجت واشتغلت وباخد دلوقتى كورسات فى البرامج اللى هشتغل فيها وطورت قدراتى فى مجال تصميم الشخصيات ولسه بذاكر تانى.... تبعت.. وتعبت اوى كمان لحد ما قطعت المسافه دى كلها مش فى الطريق نفسه لكن عشان احط رجلى على اوله... وقربت احط رجلى على اوله... مع بداية 2007 بامر الله هكون خلاص ابتديت شغل فى مجال الرسوم المتحركة....
لو حسبنا بقى انا عملت ده فى كام سنه هنقى من سن 12 سنه وانا دلوقتى 25 سنه يبقى 13 سنة منهم 9 سنين وشوية فى التعليم وبقالى 3 سنين وشوية برده متخرجه..... حلم اهبل لعيلة هبله حدد مسار بقية حياتها... وفى ناس بتشوف انى بمثل وان كل ده كلام فارغ ... وناس بتشوف الموضوع حظ بحت... ماحدش بيصدق ان الموضوع فعلا ارادة و " إن الله لا يضيع اجر من احسن عملا"..... بيعتبروا دى كلها كليشيهات و"فِسَا"....... بس هم حرّين... وانا كمان حرة.. الكليشيهات والفسا دول حققولى احلامى ياريت بقى اللى بيشاوروا عليه بصباعهم المقدس يورونا افكارهم العظيمه اللى هى مش فسا ومش كليشيهات وصلتهم لحد فين؟؟؟؟؟؟؟؟ مش عشانى بس بجد عشانهم هم.. يقفوا مع نفسهم بجد... تحقيق الاحلام مش سهل.. انا عن نفسى كان فى قرارات مصيرية كتير اتضطريت اخدها لوحدى تماما وانا فى سن صغيرة عشان ابقى دلوقتى فى الحال ده... انا مش بيونيكوومان ولا ستيف اوستن ولا انا مكشوف عنى الحجاب عشان اعرف سكتى والا اعيش حياتى سهلة.. انا طلع عينى.. بس طلع عينى وانا مستمتعه.. انا مملكش اى شىء اكتر من غيرى.... ولا فُرَصى كانت افضل من فرص غيرى بالعكس، الحياةعادتنى... وعاندتنى كتيييييييييييييير اوى وطلعت عينى... محدش بيفهم يعنى ايه واحده عندها 10 سنين فى مدرسة حكومة تتشطر فى الانجليزى عشان سمعت صوت جورج مايكل وعجبها فقررت تتعلم انجليزى عشان تفهم هو بيقول ايه.. واتعلمت... وبقيت الحمد لله شاطرة فى الانجليزى... ومبيستوعبوش انى عايزه اتعلم فرنساوى عشان اقرا سالومى بتاعة اوسكار وايلد... و مكنش حد مصدق ان البت اللى مبتذاكرش ومقضية يومها بتسمع اغانى وليلها بتسمع الراديو هتخش فنون تطبيقية... ولا ان البت اللى طول الليل قاعدة على النت وبتلعب age of empires فى ليالى الامتحانات وبعد الامتحان تجيب 3 شرايط فيديو تتفرج عليهم قبل الامتحان اللى بعده، هتنجح وتتخرج بتقدير جيد والمشروع جيد جدا... ولا حتى اهلى نفسهم كانوا مصدقين... واما اتخرجت كنت باخد مرتب 400 جنيه وقلتلهم فى اقل من سنه مرتبى هيبقى الف جنيه مصدقونيش... وحصل... دايما مبيصدقوش كلامى ودايما بيحصل.. دايما بيضحكوا من احلامى.. ودايما بيقولولى ربنا يشفيكى... الكلمه دى سمعتها زمان من كل الناس اللى حواليا... لحد مابطلوا يقولوها عشان لقوا ان فعلا بحقق الاحلام الهبلة... بابا بيقولى ا نى أَروبه عشان بعرف اعمل الحاجات الغريبة اللى بفكر فيها، اللى بالنسباله جِنَان رسمى .... ولسة الناس اللى متعرفنيش كويس بيقولولى ربنا يشفيكى.. نفس الكلام اللى كنت بسمعه زمان وانا صغيره... نفس الكلام ربنا يشفيكى، بطلى هبل، ايه التخريف اللى بتقوليه ده...ولسة لغاية دلوقتى اما بقول لحد على قراراتى دايما بيتعبروها فَنْجَرِة بُق (طق حنك يعنى) عشان بقولها ببساطة.. عشان بقولها وانا وشى مفرود واحيانا مبتسمة وساعات ببقى بضحك كما لو انه قرار عبثى.......
معنديش مانع الناس تشوفنى هبلة ومجنونة واى حاجه عايزين يشوفونى عليها هم حرين... الحاجة لوحيدة اللى بتخنقنى انى اما بقول الكلام ده لناس بحبهم وعندهم احلام مشعارفين يحققوها عشان خانقين نفسهم بواقعهم وخايفين يقوموا بالمخاطرة بيعتبرونى بخرّف.... مبيصدقوش ان الموضوع مش اكتر من ارادة وصبر والتوفيق بتاع ربنا......... انا مش ربنا.. ولا اعلم الغيب.. انا بخاطر.. بكل شىء وبكل حاجة فى سبيل احلامى....... ليّه ناس صحابى دايما يقولولى انى مثال للبنى ادم اللى مقطّع البطاقة وماشى وانى مِستَبيَعَة وانى a girl that has nothing to lose...... يمكن... مش هقول لا.. بس انا ماحيلتيش حاجه عشان اخسرها غير نفسى واحلامى... ومعنديش استعداد افرط فيهم.. يصعب عليه اشوف ناس زى الورد بتبدل قدام عينيه كل يوم عشان احلامهم بتموت وتتخنق وتتجمد فى ننى عينيهم.... بيصعب عليه اشوفهم قدامى بيكتئبوا كل يوم اكتر من اللى قبله... والغضب بيكبر جواهم كل يوم عن الى قبله.... نفسى مرة حد منهم يصدقنى وياخد المخاطرة...
يمكن انا فعلا هبلة... طيب انا هبلة..