عليه وعلى اعدائى يارب

ولا أَتمنَّى الشَرّ والشَرّ تاركى
ولكن متى أُحْمَلُ على الشَرِّ أَرْكَب

--------------------------------

لو ان الصبر والشكر بعيران لما باليت ايهما ركبت... ولكن بعير الصبر نفق... وها قد نفذ صبرى والباب بعده موصد... والكلاب اتت على لحمى وهى فى عضمى الآن تأكل...

لله تسع وتسعون اسما اختص نفسه بتمام صفاتهم... ولنا من بعض منهم على الارض صفات... وفى نفسى الضعيفه تغرس بذور الانتقام والقيها... لكننى أخشى ان تغافلنى احدى البذور وتنبت ولا اراها... حتى تكبر فلا اقدر على اجتثاثها...

منذ اعوام وهم يعصرون المر والحنضل فى فمى ولا ابالى...وكلما انبتت حدائق عمرى الخربه زهرة يتيمه دهسوها ولا ابالى... وكلما نبتت على شفتى بسمه خنقوها ولا ابالى... اما اليوم وقد نفذ صبرى فلم اعتد احتمل حتى ولا مَسّ النسيم لوجهى... فقد صار كلِّى يدمى...

يا منجى من المهالك

بضحك اوى من لباليب فؤادى لما الاقى حد بيقولى فجأه انى مش سهله وبعرف انه واطى... لان مفيش ولا مره اتقالتلى الكلمه دى الا من شخص حاول يئذينى ولبس فى الحيط... فانا بضحك عشان لبس فى الحيط... واللى بيقتلنى من الضحك انى بلبسهم فى الحيط وانا مش واخده بالى هههههههههههههههههههههههههه والله آخر مسخره تخيل مثلا وهم جايين يغزوا يوليوس قيصر راح مغمى عليه قبل مايغزوه وراحت خناجرهم داخله فى كروش بعض هىهىهىهىهى ده نفس اللى بيحصل معايا بنفد من اذيتهم صدف.... يمكن مره او اتنين فى حياتى كلها اللى اخدت بالى ان حد بيدبرلى مكيده واخدت احتياطاتى عشان ما اخيّش فيها... لكن فى الاغلب ربنا بيسترها معايا من غير ماخد بالى لانى بتعامل دايما وانا مأمنه ضهرى -الحمد لله- تحسبا لاى محاوله خيانه ممكن تحصل (ودى حاجه علمهالى بابا منذ طفولتى المشرده)... أمن ضهرك يا مرسى... وامشى فى طريقك عدل يحتار عدوك فيك... والحقيقه المره (مره بالنسبه للآخرين طبعا) ان اللى بييجى عليّه مابيكسبش... حقيقى مابيكسبش وهم بيتغاظوا... وانا ببقى مذهوله... وبحمد ربنا انه جابها جمايل... بعدين بسخسخ من الضحك... مش شماته والله بس هو موقف كوميدى الحقيقه... تخيل واحد فى فيلم قعد نص الفيلم بيحفر فحتيته لواحد ويغميها عشان ماتبانش ويجى بعد مايخلصها هو اللى يتدألج فيها... فيما يعرف باسم كوميديا الموقف هىهىهىهىهى... زى فى فيلم مبروكه كده بتاع شاديه لما ينحلوا حبل النجفه عشان تقع على دماغها وتفضل واقفه تحتيها ماتقعش اول ماتمشى تقع على دماغ واحد من مدبرى المكيده هىهىهىهىهىهى... بس معرفش ليه بياخدوا انطباع انى انا الىل احبطت المكيده مع انى ببقى فعلا معملتش اى حاجه انا بتفرج الاقى الناس بتزحلق فى قشرة موز كنت هدوس عليها واكتشف بعد كده انهم كانوا رامينهالى اتكعبل فيها نياهاهاهاهاها

Thank You, Dido

My tea's gone cold, I'm wondering why
I got out of bed at all
The morning rain clouds up my window
and I can't see at all
And even if I could it'd all be grey,
but your picture on my wall
It reminds me that it's not so bad,
it's not so bad

I drank too much last night, got bills to pay,
my head just feels in pain
I missed the bus and there'll be hell today,
I'm late for work again
And even if I'm there, they'll all imply
that I might not last the day
And then you call me and it's not so bad,
it's not so bad and

I want to thank you
for giving me the best day of my life
Oh just to be with you
is having the best day of my life

Push the door, I'm home at last
and I'm soaking through and through
Then you hand me a towel
and all I see is you
And even if my house falls down,
I wouldn't have a clue
Because you're near me and

I want to thank you
for giving me the best day of my life
Oh just to be with you
is having the best day of my life

ياريت حد يكلمنا الست المطربه ديدو تشوفلنا كام بنى ادم من اللى سيرتهم بتعدل الأيام

نفسى اقعد على طرف اى حاجه اتفرج على الدنيا من فوق... عشان اشوف كل حاجه بحجمها الطبيعى... صغنتته قد النمله... وانا بعيد عن الطرف بشوف كل حاجه... ضخمه اكمنى واقفه فى النص وانا كلى على بعضى قد الفسفوسه...

خمسه فرفشه

"يا جماعه الداعيه الاسلامي الشاب ****** بسم الله ما شاء الله عليه ربنا يباركله يارب عامل درس يوم الاحد في مسجد ******* بعد صلاه العشاء مباشره وانا حضرتله درس والله والله ان الدعاء الي دعاه هز قلبي من جوه وعيط عياط علي كلامه يدخل القلب في ثواني يا ريت كلنا نروح ان شاء الله الاحد القادم باذن الله اتمني اشوف ***** كله هناك نحضرله ونشجعه ويشجعنا ان نحافظ علي الا تنقطع الصله بالله عز وجل وجربو مره تعالو مش هاتخسرو حاجه بالعكس هاتخروجو بعد ما يخلص الدرس مستريحين راحه بجد والله يا جماعه وجزاه الله وجزاكم وجزاني خير الجزاء ان شاء الله"

آه يا زمان العبر... هى خلاص بقت كده!!!! مش دى كانت زمان بيتقال عليها مجالس علم!!! دلوقتى بقينا بنتكلم عليها زى ماتكون قعدة حشيش... تعالوا وهتتكيفوا والله يا شباب معانا صنف ميه ميه زى سكر النبات بيجوز البنات ويموت الحموات ويجلى النظر... انا حذفت اسم الراجل واسم المكان لان الاتنين مش هم المشكله خالص... المشكله فى نظرة الناس اللى رايحه... رايحين يحضروا (مجلس علم) عشان (يعيطوا ويستريحوا) يعنى تحولت مجالس العلم الى مجالس تنفيس... لو كانت الدعوه بتقول مثلا ده راجل بيقول كلام كويس هيأثر فى طريقة تفكيرك او طريقة حياتك... او كلامه هيخليك تشوف حياتك بشكل مختلف وتعيد النظر فيها كنت هروح اسمع اشوف بيقول ايه... لكن دى كده بعون الله دعوة يبعتوها لشويه نسوان يتلموا فى ساونا يحكوا قصص مؤثرة عن اللى اتجوزت واللى اتطلقت واللى عدت البحر ولا اتبلتش... حقيقى الناس اللى بتبعت دعوات من هذا النوع بتضحكنى اوى... مانا بدل ماروح واسمع دعا الراجل واعيط طب ما اقعد فى بيتنا ادعى على البهايم لحد ما اعيط وابربر كمان وابقى وفرت فلوس المواصلات... بس البت نسيت تقول ان الشيخ ده عليه كرافاته ترد الروح...

لو بتحبى الشطه
هفتح مطعم شطه
وافطر واتعشى انا فيه

كان فى فيلم بتاع ليلى علوى وهى صغيره اما كانت طالعه مخطوبه لظابط وكانت طالبه فى الجامعه سرقت انسيال دهب فى حفله مع صحابها وقفشها ممدوح عبدالعليم وذلها بشريط الفيديو اللى هى متصوره فيه وهى بتسرق... المهم ان ممدوح عبدالعليم فى الفيلم ده كان طالع فقير وهم كلهم اغنيا وكان شبه مسئول عن قضاء كل مصالح الشلّه... خادم القوم سيدهم يعنى... فكانوا بيدوله بقشيش وواخدينه معاهم فى كل حته يقضيلهم مصالحهم... فامه مره بتساله فى التليفون اتاخر ليه وا حاجه كده فبيقولها انه بيشتغل فبتساله بتشتغل ايه يابنى قالها جمله بفتكرها كتير اوى اليومين دول
- بشتغل دلدول
- ايه؟؟
- دلدول يامَّه... دلدووووووووووول

ياخوفى من الشتا السنه دى والاغانى اللى ممكن تطلع فيه... يمكن حد يعمل اغنيه للترمومتر او بربور الحبايب...
حبيبى عنده fever ياريتنى كنت fever ده الواد بياع ال fever حبسونى وحبسوووووووووووووووووه

ساعات.. لا ساعات دى تفيد القله هو عشان ابقى دقيقه (كتير اوى)... تلاقى ناس محترمه بتهفلط بكلام عجيب فبتبقى مشعارف تعمل ايه.. تسكت ولا تفطس من الضحك ولا تقوله امك اسمها حنفى

دنيا فنيا والزمن كباس
والقلب محبس والحبيب ترباس



وبعدهالك يادنيا هنفضل نقرف فى بعض كده كتير ولا ايه نظامك.. يالله اهو كله كفارة ذنوب... واهو برده اما الواحد يتعب دلوقتى احسن مايتعب يوم القيامه... يمكن الحل الوحيد هو الشغل حتى الموت فالواحد ماياخدش باله من اللى بيتعمل فيه... واهو العمل عباده... ونوم الظالم عباده..

إذا نزلت بك مصيبة فاثبت واحمد ربك الذي احبك فابتلاك... واستغفر فربما ابتلاك لتقترب... واذا رفع عنك البلاء فابكِ ملء جفنيك فإن الله اذا آحب العبد ابتلاه
وإذا انعم الله عليك فابثت واحمد ربك لئلا يغرك ما انعم الله عليك... واستغفر فربما انعم عليك لتزداد بعدا... وإذا رفع عنك ما انعم به عليك فابكِ ملء جفنيك فكلّه بذنبك

يا أرحم الراحمين
أنت رب المستضعفين ، وأنت ربى
إلى من تكلني ، إلى بعيد يتجهمني ؟ أم إلى عدو ملكته أمري
إن لم يكن بك غضب علي فلا أبالي ، غير أن عافيتك أوسع لي
أعوذ بنور وجهك الذي أشرقت له الظلمات
وصلح عليه أمر الدنيا والآخرة
أن يحل علي غضبك ، أو أن ينزل بي سخطك
ولك العتبى حتى ترضى ، ولا حول ولا قوة إلا بك

شر البلية ما يضحك

انا دلوقتي بقي معايا بحوالي خمستلاف جنيه مصري حسنات متحوشالي يوم القيامه... دلوقتي بقي العمل عباده فعلا... اشتغل... الناس تاكل فلوسي... اخد بيهم حسنات يوم القيامه.... انا عايزه ارجع الكوكب بتاعي والنبي... انا كنت عايشه في عالم موازي لعالمي الإنس والجن.... عالم مستقل بذاته مفهوش غيري انا واشيائي الكميله الحلوه اللي بحبها... طلعت منه غصب ومشعارفه ارجعله تاني... رجعونييييييييييي... واروح علي باب عالمي الموازي اخبط.. واخبط... واخبط... ماحدش يفتح... وكل اما اقول افتحولي الباب ده يجيلي صوت عمييييييييييييق من الداخل يقول الجاموسه واااااااالده

وليكن شعار المرحلة... اخبط راسك في الحيطة

كل آما اقول انا شوفت آخر الحقاره الاقي ناس تفوقت الحقيقه علي حقارة الناس اللي قبليهم... ايه الإبداع ده!!! لأ لأ لأ حقيقي مش مصدقه نفسي... طلاق تلاته ماعاد في شياطين فيكي يابلد الناس عدت اجرام الشياطين بزمن... حد يقول لابليس يجي ياخد كورسات في بلدنا... بجد مصر طول عمرها ولاده... بس دلوقتي مبقتش بتولد مواهب عاديه... مواهب حقييييييييييييييره آخر حاجه الناس اب تو ديت اوي في الوَطيَنَه... حقيقي شابو يا حَوَش

الجعجعه... فعل مريح للغاية... الغضب بيطرح افكار سودا خليها تطلع جعجعه احسن ماتطلع افعال مشينة سكيتي

لا شىء يحدث علي وجه التحديد... ربما كان ذلك هو السبب في الراحة الداخلية... او ربما لان كل الآشياء تحدث في نفس الوقت... ربما الاستقرار ينبع من تعادل اسباب السعادة مع اسباب الشقاء فتصبح النفس ممتلئة دون ان تفيض السعادة او ينفرد بك الشقاء

You Are Wind

Strong and overpowering A force to be reckoned with, no one dares cross you You have the power to change everything around you You are best known for: your wrath Your dominant state: commanding

What Type of Weather Are You?

يارب سامحنى
انا مكنتش بكره الحضانه بس كنت بكره اللبن
يارب سامحنى
انا بحب الجبنه الرومى وبقية الجبن لأ
يارب سامحنى
كل حاجه حلوه حتى اللبن والجبنه والقرنبيط والقلقاس...
حتى يوم التلات حلو يارب
بس اعمل ايه... انا بنى ادمه يارب وزى مابحب لازم اكره

عندما ضاق قلبى القابع فى الجزء الايسر من قفصى الصدرى بوحدته اخترعت له قلبا وزرعته فى الجزء الأيمن... فى قلبى الايسر جنة للعابرين اخزن لهم فيها الحلوى والحواديت واغسل فيها اقدام الجميع بماء الورد... اما فى قلبى الأيمن فأختبىء من كل شىء فى جنتى الخضراء الكائنة فيه... يصحبنى فيها فرسى الاسود وقطتى المشمشيه... يأكلون من كفى يدى... تمنحنى قطتى دفء العالم بقرقراتها المختبئه فى قلبها... ويصهل لى فرسى طربا فيما يشبه الغناء.. وفى الليل... يسطع لى بدرى الدائم التمام الذى لا يصير هلالا ابدا... فأشرع فى رقصة طفولية تحت ضوء القمر تراقصنى فيها كل الأشياء فيبتهج كل مافى جنتى الصغيره وتمتلىء برائحة الياسمين وتغنى لى وتعزف لى اعذب الالحان حتى اتعب من الرقص فأتوسد سحابة... وأنام

كسيرى القلوب ليسوا بحاجة الى احد... فلم يعد لديهم مكان لاحد ليسكن فيه

لا ادرى لم لا استطيع ان ارى انعكاس صورتى على اوجه المرايا... لذلك انا لا استطيع ان اتجمل ولا ان ارتدى اجمل الثياب... فانا مازلت بعد طيف لم يتحقق

الوحدة قاسية خاصة على من لا يملك ثمن الونس

اعلم تماما انك لا تملك شيئا، ولكن احذر، حتى لا تعطِ مالاتملك لمن لا يستحق، او تمنع مالاتملك عمّن يستحق

لأنك واقف فالعالم يتحداك... فهو لايبغى الصمود سوى لجباله... لذلك فملوك العالم دوما جالسون... متكئون... مضجعون... وعندما يطول بهم المقام ينبطحون

منذ كليل كنت الفلف عبر الانترنت ولقيت مدونة شقير دخلت اخدتلى فيها غطس... فلقيته عامل موضوع مفهمتش منه اى شىء ولا فهمت موقفه ايه من الموقف اللى انا مفهمتوش بالظبط
الموضوع يا ساسه عن مشكله ان فى واحده بتستشير بقية البنى ادمين عن الصداقه بين الولد والبنت هى مش مقتنعه وواحد تانى مقتنع وواحد تالت قالها امسحى الموضوع عشان الفتنه وضعاف النفوس... مش فاهمه بقى احمد شقير حاطط الحوار عنده ليه لان ماجاليش خلق اقرا عشان انا اتفقعت من كلام الناس...
اولا يعنى الست مش عايزه يبقى ليها اصدقاء ولاد مانتى حره يا انسه مش محتاجه تبررى مواقفك الشخصيه لحد... بتقول رايها ان هى مش مقتنعه بوجود الصداقه بين ولد وبنت هى حره برده... بتسال بقية الناس عن رايها بييس برده... لكن تسال الناس بقى حلال ولا حرام وتقول هى حلال ولا حرام... الى هنا واستوب يا شباب... بغض النظر بقى عن البنوته والناس والموضوع ايه بس الجريمة دى بتحصل كتير... تلاقى سخس مش فاهم اى حاجه داخل يفتى فتاوى ما انزل الله بها من سلطان بناءا على رايه الشخصى... والنبى الله يكرمكوا يعنى مش كل واحد هيعملنا فيها مفتى... من افتى بغير علم فليتبوأ مقعده من النار... لا انتوا اهل فتوى ولا اللى بتسالوهم اهل فتوى... اللى الحلال والحرام محيره اوى يروح يسأل اهل السؤال... واهل السؤال فى الامور دى مش مجرد اى حد مثقف ولا قارى ولا فلان الفلانى اللى دماغه توزن بلد... اهل السؤال فى الحاجات دى ينقب عنهم بمنكاش زى مابنقب عن الدكتور الشاطر... دلوقتى اى حد سمعله كلمتين فى قناة الناس ولا سمعله شريطين حبوب منع الحمل بيعملك فيها شيخ زى البقف اللى حرم افلام الكارتون والتانى اللى افتى بان الجامعه حرام وهم مش اكتر من اتنين مروحين من شغلهم مفرهدين...
اما بقى الموضوع الاكثر استفساسا فهو الناس اللى كل اما تحصل حاجه يقولولك طرمخ طرمخ ياعم الحاج احسن يحصل فتنه واوعى وشك من ضعاف النفوس... الحقيقه الناس دى بقى بتجيبلى حقنة فى زورى... ضعاف النفوس اهون فى نظرى من ضعاف العقول من امثال البهايم دول... يابنى ادمين يا عاقلين حد فيكوا يفتح كتاب بن كثير بتاع تفسير القرآن ويقولى بقى ليه ماحذفش الاسرائيليات اللى فيه والاحاديث الموضوعه والبلاوى السودا المنكره اللى فيه؟؟؟؟ عشان سبب بسيط جدا قاله واحد صحابى مش فاكره اسمه... كان بيقول الناس كانت بتسال الرسول عن الخير عشان تعمله وانا بساله عن الشر عشان اجتنبه... المبدأ واحد... لو انت انسان ضعيف النفس او ضعيف العقل وجيت لقيت قدامك الصح والغلط مش دايما هتقدر تميز بينهم... لكن اما تبقى عارف من الاول ايه الغلط او ايه الصح هتعرف التانى باللى انت عارفه... الضد بالضد يعرف... الصح والغلط الاتنييييييييين لازم يتوضحوا و الغلط يتحط تحتيه خمسين خط احمر ويتبرر جنبه كمان غلط ليه...
والنبى ياعنى اللى بيقولك خايف عالناس من الفتنه لو كان فاهم اساسا يعنى ايه فتنه مكنش نطقها فى موقف زى ده... قال فتنه قال... هو اى حد يقول اى حاجه بقى خلاص هيعمل فتنه واوعىتقول يا اخى احسن الفتنة تعضك وجزاك الله خيرا يا اخى المسلم... الهى يارب يجازيكم بجهلهم ضحكتوا الناس علينا... انا مبتفقعش من الناس اللى بتهاجم الدين قد مابتحرق من الناس المسلمين اللى بيشوهوا منظره.. اصل اللى بيهاجم الدين مردود عليه ده واحد جاى بيناقشك وحجه امام حجه فمش قلقانه... لكن المسلمين اللى مش فاهمين حاجه وبيهفلطوا بقى هم دول اللى بيعكوا الدنيا... اموت واعرف بس مين فهمهم ان الدين هو السلام عليكم وانا لا اصافح النساء وجزاك الله خيرا يا اخى اعزك الله!!!
مش عارفه لحد متى هنفضل بغبغانات بنردد الكلام اللى بنقراه واحنا مش فاهمين فيه حاجه وبنردده فى غير موضعه كمان... ده شيوعى واخوان وحزب وطنى يا باشا انا شوفته بعينى... على راى عبلة كامل

ليس كل ما يلمع ذهبا... وليس كل ماهو بارد بلاستيك

خطوه الى الامام.. هوب هوب... خطوه كمان... هوب هوب... فووووووووووووووووووووووو... اللى يحصلنى يكسرنىىىىىىىىىىى
وخليكوا انتوا هنا فى البالونه الكبيراااااااااااااااه اللى انتوا معيشين نفسكوا فيها... عشان انا بحب البلالين الصغيره العب بيها مبحبش اعيش جوا بلالين كبيره عشان الهوا اللى جواها بيعطن بسرعه... وحلال عليكوا كرسى العرش البلاستيك... والسلطانيه البلاستيك.. والأمجاد البلاستيك... وهديه منى ليكوا الصولجان البلاستيك.. وآآآآآآآآآه يا بلاستيك يا بلاستيك... الحاجه الوحيده اللى بلاستيك وليها قيمة... ولادى البلاستيك... ودول ماتوا من زمان... وعيطت عليهم... بس دموع بجد مش دموع بلاستيك... ومتستنوش منى غير كلام بلاستيك... ومعامله بلاستيك... عشان مابقاش نشاز فى حياتكم البلاستيك يا هواة البلاستيك... انا شخصيا هقلب بلاستيك... بس بالحجاره... تدوسوا على كتفى اسقف.. وتقلبونى على وشى اقول بابا وتقلبونى على ضهرى اقول ماما... زى العرايس البلاستيك اللى كانت الناس بتجيبها لعيالها من السعوديه

شوية حكم عالماشى

- نحن الذين نصنع الآلهة ونعلمهم كيف يعاملوننا كالعبيد (مجهولة المصدر)
- لا أحد منا يعلم تمام العلم مايريد ومالا يريد حتى تفوته الفرصه (من رواية الظبى الصغير لمارجورى كينان)
- على قدر الطوح تكون مرارة الفشل (توفيق الحكيم)
- اننى اعلم انه ايسر على من سواى ان يكون اعلى منى من ان يكون مساويا لى (ميشيل دى سان بيير)
- انما يعرف الفضل ذووه (الرسول صلى الله عليه وسلم)
- تخلى، تتفوق. افرغ نفسك، تمتلىء، ارض بالقليل، تصبح غنيا (من حكمة الطاو)
- اذا رضيت بالمقدمات فعليك احتمال النتائج (مجهولة المصدر)
- كتر القسيه يقطع عروق المحبه (مثل شعبى)
- خير للإنسان أن يحتمل الشدة من ان يحتمل العار (مجهولة المصدر)
- من وضع نفسه دون قدره رفعه الناس فوق قدره (مجهولة المصدر)
- اذا اشتد الكرب هان (مجهولة المصدر)
- السعيد، هو الذى لا يتوقع خيرا من الناس (مجهولة المصدر)
- اللسان الملسوع لا يتذوق شيئا (مجهولة المصدر)
- بيع الجمال واشترى خفه، الجمال كتير لكن الخفه صدفه (مثل شعبى)
- اللى ليه عمر ماتقتلوش شدة (مجهولة المصدر)
- اذا جالست العلماء فانصت لهم فان انصاتك لهم يزيدك علما... وان جالست الجهلاء فانصت لهم فان انصاتك لهم يزيدك حكمة (إخناتون)
- فى رجالة تنباس وفى رجالة تنضرب بالمداس (مثل شعبى)

إلى كل البؤساء فى حياتى... متشكرين... مانجيلكوش فى حاجه وحشه... وكفايه عليكوا لحد كده... نكدتوا عليه بما يكفى... تقدروا تمسكوا ايديكوا فى ايدين بعض وتنطوا من اى شباك وتسيبونى فى حالى... عشان انا معنديش استعداد افلق نفسى اكتر من كده... سورى... مش واخده على انى افضل متنكده كتير... متاسفه انى خيبت ظنكوا ومش هقدر اكتئب لمدة اطول...
طظ فى كل حاجه وكل الناس... اه انا لوحدى بس انا مبنكدش عليه زى مانتوا بتعملوا... نكدوا على بعض بقى او تنكدوا على نفسكوا دى مش ازمتى... قهوتى هشربها... وبحبها... وهستمتع بيها... حتى لو كانت بتراب... واكلى بيشبعنى حتى لو كانوا سندوتشين سجق وجبنه رومى او حتى فطيره... انشالله اكلها على الرصيف مع شوية وشوش تعبانه بس وشوش ناس طيبين... سكان الجنه الأصليين... والباقى ضيوف عليهم... ومش عايزه حد يحكيلى حواديت... ولا عايزه حد من اساسه...
وانا بطولى كده... حالى احسن كتير... والحياه حلوه وجميله انشالله على الرصيف...

جواز صالونات

واحده ست عجيبة الشكل والهيئه تقدم فتاه عجيبة الشكل والهيئة برده
نفيسه بنتى
تبتسم البنت وتجلس فى مواجهة جعيدى العريس المنتظر برده عجيب الشكل والهيئة
بعد شويه الام بتخلع هى وام العريس وبيسيبوا نفيسه وجعيدى قاعدين مع بعض
كل واحد فيهم بيطلع اللاب توب بتاعه وبيتبادلوا الايميلات
ويدور بينهم الحوارالتالى
عذراء الربيع تقول:
ها أوللى بقى انت عندك كام ايميل؟
هيثم عبد ربه التائه يقول:
اربعه وانتى؟؟
عذراء الربيع تقول:
عندى تلاته واحد ياهو وواحد هوتميل وواحد جوجل
هيثم عبد ربه التائه يقول:
انا زيك برده بس عندى واحد رابع بتاع الشغل
عذراء الربيع تقول:
وياترى بقى عندك بلوج؟؟؟؟
هيثم عبد ربه التائه يقول:
عندى خمسه
عذراء الربيع تقول:
(ايقونه سمايلى فاتح بقه من الدهشه) واااااااو دانت باين عليك كوول خالص
هيثم عبد ربه التائه يقول:
وانت البلوج بتاعتك اسمها ايه؟؟
عذراء الربيع تقول:
انا معنديش بلوج بس نفسى موت اعمل واحده عندى كلام كتير اوى عايزه اقوله للناس تتعلم منه... عشان اساهم ف نهضة المجتمع
هيثم عبد ربه التائه يقول:
باين عليكى بنت مجتهده... انا بحترم اوى الناس اللى بتفكر فى غيرها
عذراء الربيع تقول:
اوه ميرسى (ايقونه سمايلى وشه محمر) بفكر اسمى البلوج بتاعتى (اللا نهائية ومابعدها)
هيثم عبد ربه التائه يقول:
اسم هايل جدا... احنا باين علينا هنتفق (وش بيغمز)
عذراء الربيع تقول:
وانا برده شايفه اننا هنتفق (وش خدوده محمره)... انا طول عمرى ببحث عن انسان عصرى متطور يعاونى فى مواكبة العولمة ومواجهة تحديات القرن الجديد
هيثم عبد ربه التائه يقول:
وانا اموت فى التحديات (وش بيلعب حواجبه)
---------------------------
الحقيقه انا اتنفخت ومش قادره اكتب كلام خنيق اكتر من كده واترك للساده المشاهدين حرية تخيل بقية المحادثه الفقيعه اللى فوق دى

كفايااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااه

ايها المارون من هنا والعابرون من هنا برده
حدش معاه فِرفِر سلف؟؟؟ طب بندقية رش؟؟ طب نِبله طيب
عايزه اطخ التيران اللى دايرين فى السواقى اللى بتنعى فى نافوخى دى
لا نافع معاهم هس ولا بس ولو حمير كنت قلتلهم هسسسسسسسسسس
بس دول سبع تيران بيجروا سبع سواقى
طب حد يغنيلى... يحكيلى حدوته.... اى حاجه تلهى السبع تيران

خد وادى معايا - على سلامة

خد وادى معايا
وقولى كلام غير اى كلام
ولا الدنيا خلاص والناس بطلوا حب واحلام
طب أقولك
أحكيلى حدوتة لحد ما أنام
والعبلى فى شعرى
بقاله سنين مشدود ع البكر
فى بطاقتى الشخصية
مثبوت أن أنا أنثى وأنك دكر
الميه الرايقه بقالها سنين وملاها العكر
كان صيف وشتا وخريف ومطر
جرب تعزف
يمكن لسه جوايا حاجات
دور جوايا تلاقى حاجات وحاجات وحاجات
ضحك لفوانيس
وعروسة وعريس
ودلع ومياصة ولقم بنات
محتاجه لحزن وفرح ودمع ساعات
جرب تعزف
يمكن لسه جوانا نغم وعجب ودهب
وسامحنى
سامحنى ان كنت صريحة معاك الفجر وجب
شايفاك فى عيونك نار وغضب
سامعاك بتقول
ودى مين رباها بنت الكلب قليلة الأدب
-----------------------------------------------
على سلامة

القولون العصبى... عقاب الجسد لنفسه... يتلوى ويتشنج كالممسوسين... ولكنه لا يجدى معه دق الزار او قراءة التعاويذ...
تداهمنى كل عام نوبة او نوبتان عنيفتان من تقلصات القولون العصبى وبقية العام يناوشنى واخادعه... اعنفهم على الاطلاق اول نوبة فى الثانوى لعام... او كانت هى اعنفهم على الاطلاق حتى تفوقت عليها نوبة اول ايام عيد الفطر الماضى حيث نقلت على اثرها للمستشفى عقب صلاة العيد... والآن ارى نوبة اشنع من كلتيهما تتكون فى بطء... حاولت تفاديها مذ بداية رمضان... حاولت فعلا الا اخزن احزانى فى القولون... والا القى بغضبى الفائض فى القولون... يبدو اننى فشلت فها هو يتلوى كالثعبان فى محاولة عنيفة لابتلاع احشائى

مات الكلام

قد حان وقت الرحيل... ليس لأننى ارغب ولكننى ارى اشيائى قد تلملمت... واشيائى تتلملم عندما ترغب فى الرحيل، فأنا لا ارحل الا لان العالم قد ضاق باشيائى... ارحل قبل ان اغرق العالم بدمعة واحده من عينى... ارحل لان كل الاشياء ماتت وفمى قد ملّ الطعوم وانفى زكمت من كل الروائح... وبعد ان ارحل... اعود باشياء جديدة... تحمل نفس البهجه واظل حتى تتلملم هى الاخرى طالبة الرحيل...
عفوا ايها العالم... هكذا انا... ارحل واعود وتتبدل اشيائى دون ان ابرح مكانى... كالزئبق... اتفتت لكريات صغيره كلما سحقتنى قسوة ما، ثم اتلملم فأعود كما كنت... كالريح اتبدل واصعد واهبط واعصف واهدا... بينما لا أزال فى مكانى

يأكلنى الغضب حتى يكاد يفنينى ويتوقف... ليس لأنه يشعر بالامتلاء... وانما يمنحى فرصة كى التقط انفاسى ليعاود التهامى من جديد

------------

لم اجد يوما داعى لادعاء الحب مقابل عطاءات تطوعية من الآخرين... ولم اقتنع يوما اننا يجب ان نعطى لاننا نحب... نحن يجب ان نعطى لأننا نقدر... ولا يجب ان نأخذ لأننا نريد... ولا لأننا نمنح... يجب ان نأخذ فقط عندما نكن فى حاجه لما يمنح لنا... ومن الغباء ان ننتظر مقابل لما نعط... ومن القسوة ان نعطى حبا لا نعنيه مقابل حب نأخذه... فالحب لا يجب ان يعطى الا عن رغبه اصيلة فى اعطائه مهما احتاجه الآخرون

------------

لا تندهش اطلاقا اذا لفظك احدهم لانك اعطيته مايريد بينما هو يعلم انك ما اعطيته الا لانه يحتاجه وليس لأنك ترغب فى ان تعطيه له

عقلة الأصبع تسكن فى كفى فى قصر من حبات السكر... وفى الليل.... تتسلل الى اذنى تتعلق فى قرطى الذهبى وتتأرجح... احيانا تغنى واحيانا تروى لى الحواديت واحايين أخرى تعزف لى الحانا على ناى سحرى عندما تسمع الحانه تنفح لنا فى كبد السماء طاقة نصعد اليها فوق الحان الناى... نستلقى على سحابة ويمر اعالم امام اعيننا فى الطاقه المفتوحة فى السماء كفيلم كارتون ظريف... واحايين اخرى تجلس فوق القرط ولا تصدر اصواتا سوى صفير خافت... ناعم... يستحيل الى وردات صغيره تعطر الوسادة... وتظل تصفر وتصفر حتى نغفو سويا على ضوء قمر وهمى لم يكن يوما سوى مصباح مضاء فى شرفة بآخر الشارع

عنتر

تمضى وصليل الأغلال يجلجل
يملأ صحراء حياتك يا عنتر
أغلال.. أغلال.. أغلال
من اعطى العالم هذا الحق ليشنقنى
----------------------------
ابيات مش عارفه مين اللى كتبها

الناس بقت بتخزن كل حاجه... معرفش بخل ولا خوف... حتى الحب والكلام الطيب بقى بيتحوش

كن مثله... لا تذكر الا الأشياء العابره.. اما ما يسكن القلب فدعه مخبوء هناك... فى ادفأ بقعة فى القلب حيث الونس

قد كنت امتلك ظهرا مستقيما وكانت رأسى تميل على كتفى فى دلال... اما الآن فقد صار رأسى اثقل من ان تحتمله عنقى وحدها فصار يعتمد الى كفى معظم الوقت ومال ظهرى ليصبح كفى اكثر اقترابا... وصار كتفى يحتاج الى كتف... وراسى يحتاج الى كف...

لما تلاقى حد بيعيط ماتحاولش تناقشه فى اى حاجه... ولما تلاقى حد بيعيط ماتحاولش تضحكه... لما تلاقى حد بيعيط ماتكلموش... ولما تلاقى حد بيعيط يا تطبطب عليه وتمشى... يا تاخدها من قاصرها وتغور من وشه الساعه دى لأنه فعلا مش طايقك... مش عشان انت وحش... بس عشان هو مش عايز يتناقش ولا يضحك ولا يتكلم ولايشوف وشك اهلك من اساسه هو عايز يعيط... زى مابياكل ويشرب ويخش الحمام ويضحك ويتكرع الانسان بيحتاج يعيط برده عشان يطلع طاقته السلبيه... واى حد بيعوق العمليه دى مايلومش الا نفسه لان الطاقه السلبيه لازم تطلع.. يا عياط... يا صريخ... يا شتيمه... بعد مابيكون الواحد استنفذ كل قدراته فى الاعلاء والتسامى مبيقاش قدامه غير العياط والصريخ وفظائع الكلم... ماتسيبوا الناس تعيط بدل ماتتساخفوا عليهم وتقاطعوهم وترجعوا تزعلوا انكوا اكلتوا بالجزمه... حاجه بارده صحيح... والابرد من كده الناس اللى تعيطك وتيجى تسالك بمنتهى البرود انتى بتعيط ليه... زى بالظبط اللى ييجى يغزك ويندهش ويسالك" ايه ده!!! انت بتخر دم ليه!!!!" وتلاقى ناس معديه تقول "ايه ده انت بتخر دم ليه" وهم شايفين السكينه مدبوبه فى كرشك... الواحد ماعادش عارف حتى يتوحد مع اشجانه فى هدوء

لما الواحد بيعوز حاجه مش بتاعته مبيطلهاش مهما جرى وراها... ومن كتر الموقف ده بيتكرر... ساعات الواحد لما بيبقى عايز حاجه اوى بيخاف يمد ايده يمسكها... بيخاف تروح منه زى بقية الحاجات... حتى لما بتنط فى ايده بيخاف يمسكها عشان مش مصدق... اصله مش متعود الحاجات اللى عايزها تنط فى ايده... واخد بس على انها تجرى منه

الناس اللى بتحبك عامله نفسها مابتحبكش... والناس اللى مبتحبكش عامله نفسها بتحبك... ولا انت عارف تحتمى باللى بيحبوك عشان عاملين مش بيحبوك ولا انت عارف تخلص من اللى مش بيحبوك عشان عاملين بيحبوك... والضحك الأعظم بينفجر بقى لما ناس تفتكر انك خايف منها وانهم يملكوا لك من امرك شىء وبيتفاجئوا انك من انصار مبدأ تخلَّ تتفوق...
يا بنى ادمين اعلموا... انا مملكش من امرى شىء... بس انتوا كمان ماتملكوش من امرى شىء... انا بعبد الله طواعيه... ومستقيمة طواعيه بفضل الله... وبصبر مش خوف من طراطيركم الملونه... انا لا يعنينى من الدنيا غير نَفَسى اللى خارج وداخل وده مش بايدكوا تمنعوه عنى...اللى ليه حاجه عندى ياخدها... واللى طمعان فى حاجه فى كفّى دكر يورينى هياخدها ازاى... اللى ربى قسمهولى ولا اهل الارض ولا الجن هيقدروا ياخدوه حتى لو انا رميته عالارض... واللى عايز يسفخنى قلم يتفضل ومينساش يسفخ الخد التانى احسن يزعل... انا منى لربنا وانتوا منكوا لربنا... ولينا يوم قيامة يجمعنا... وخليكوا مستخبيين ورى قال الله وقال الرسول اللى انتوا مابتعملوش بيها... ويوم القيامه هنعرف مين فينا عصى ومين سمع واطاع والقلم اللى خدته اتنين يوم القيامه ربنا هيخلصلى تاره...
انا يمكن مبعملش حسنات كفايه تدخلنى الجنه... ولا انا رابعه العدويه... ولا انا من الاوليا... ولا اعبد اهل زمانى... انا غير ذات شأن على الاطلاق... بس ربى عادل... واللى اتعمل فيه هيجيلى لانى ببساطه انسانه غير متسامحه... وبسكت واحتمل واصبر مش عشان مسامحه... انا بس مبحبش انتقم عشان مافتريش ويبقى اللى محقوقلى ليه حق عندى...
حزت فى ايديه الحبال والروح راحت منى... يالا اظلمونى كمان يالى انتوا ظالمينى
وكله بثوابه... وعلى فكره هانت يا بنى ادمين... القيامه مش بعيد... وليه رب اسمه الكريم...