لعنات انثى حاقده

لانك لست لى اليوم فلن تكون لغيرى غدا.. وان لم تنسحق تحت شفاهى اليوم فستنسحق بين اناملى غدا.... وان لم اغفو فى دفء اضلاعك اليوم.. وان لم ارعى فى عشب صدرك اليوم... وان لم تنقش اسمى فى باطن كفيك اليوم.... فلتلعنك كل الايام والشموس والاقمار الى الابد.. ولتلفظك اقدار نساء العالمين الى الابد.. وليكتب الله عليك الشقاء والحرمان من حب النساء الى الابد.. وليكتب الله عليك عشقى الى الابد... حتى اذا كللت ومللت فلتعد.. لتمحو كل حقدى بقبله وامحو كل عذابك بعناق.. لتبكى انت عمرا اضعته هربا وابكى انا عمرا اضعته حقدا..
اذهب الآن ودعنى وحقدى.. فقد مللتك ومللت عذابى.. اذهب مكروها ومذموما وملعون الى الابد.. اذهب فليس لنا بعد اليوم لقاء.. اذهب.. وان التقيتنى فى عرض الطريق صدفه فلا تمد كفك ولا ناظريك... فما عاد لكفك ان يعتصر اناملى.. ولم يبقى لك فى عينى سوى اللعنات.. وبعض دمع قد جف فى مقلتى... فلا تلتفت ولا تخطو قرب اسوار عمرى فما عاد لك على كرسى العرش مكان.. وثياب المُلك قد احرقتها وبعت الصولجان

قاتل الله عينين ارتبط بهما الدفء، ودفئا ارتبط به البكاء

التوازن... ربما.. ان يكرهك احدهم لان آخرا يحبك.. وكلما اطعمك هذا حبا سقاك الآخر كرها.. وكلما زمجر هذا غضبا من انك لازلت حيا تتنفس.. تبسم الاخر فى وجهك ورفع كفيه للسماء شكرا لله لانه وهبك حياة
المعاناه... ان تظل دوما تحت ناظرى من يضيق ذرعا بك لانك تتنفس.. ويغيب عن ناظريك من تشرق ايامه بضوء عينيك
----------------------------------------------------------------------------------------
لازلت اذكر كيف كنت اعترف بكل شجاعه انى خائفه

ازيك؟
ماشى الحال
ازيك؟
عظييييييييييييم كله تومام
عامله ايه؟
فله يا روحى
...............................
وعلى راى زياد
كل مابتسالنى كيفك بتذكر انى مش منيح

لم يصفعنى سؤال على وجهى بهذه القوة من قبل.. او ربما حدث ولكننى ابالغ كالعادة.. وكالعاده ايضا اهرب من السؤال بنكته وحدوته وهوب هوب السؤال تاه فى الزحمه وهو تاه.. وانا السؤال لزق فى ودنى... انا مين.. انا عملت ايه فى الدنيا دى يستاهل انى اتصور جنبه او اكتبه بالبونط العريض واحط تحتيه خط ؟؟؟... لسه مفيش... ومفيش حاجه فى حياتى مميزه عشان احكيها الا شويه حكايات بتضحك وشويه حكايات بتزعل وشويه احلام.. طب اجاوب ازاى على السؤال ده.. انا مين.. هو انا الحاجات اللى انا بسعى لانى اكونها والا انا الحاجات اللى معرفتش اكونها والا انا حاجه غير كل دول.. انا انا... وانا ده يطلع بنى ادم.. قصير اوى ورفيع اوى ونسّاى جدا ومبينساش الاذيه ومابيؤمنش بالانتقام وبيحب الناس تضحك... وكل ده عادى.. الحاجه الحيده اللى يمكن اقول انها ممكن تتقال انى كان نفسى اكون حاجات كتير اوى وكنت ولازلت بحلم كتير اوى.. بس انا مش زعلانه انى معرفتش اكون الحاجات دى ولا انى معرفتش احقق الاحلام دى.. لان لو كان ده حصل مكنش هيبقى فى حاجات اسرح اما افتكرها وابتسم....
انا مين؟؟... معرفش... حتة بت مفعوصه ولسانها طويل عالفاضى :)

مضحك هو حقا اعتيادنا علي الكرب والبؤس.... ومضحك اكثر استمرارنا في البكاء بالرغم من اننا نعلم انه لا يفيد... ،مؤلم هو حقا عدم قدتنا علي البكاء......
لاجديد تحت الشمس... فكل ما لنا كان لغيرنا يوما وكل مالغيرنا قد كان لغيرهم يوما... فلا تبتئس... فلست المرّيِخيّ الوحيد علي ارض هذا الكوكب... وربما انت لست مريخي علي الاطلاق والآخرين هم المرّيِخّيون و صار سكان هذا الكوكب اغراب في اوطانهم... انها الاحتمالات يا عزيز فلا تبتئس.... فلابد لكل شيء آن ينتهي شاء ام أبي.... فالنهاية حقيقه حتميه لا ينكرها احد وانما اختلفوا في طبيعتها... اهي نهاية بعقبها فاصل قصير ومواصلة لشيء آخر ام هي نهايه لايعقبها شيء..... لا تنزعج... ففي كل الأحوال انت لا تملك شيء لتخسره سوي نفسك... فاحرص علي الا تفارقها الا جثه هامده حتي لا تعيش ممجدا بين الرعاع ومحقرا بين جنبات صدرك... وفي النهاية... النهاية هي النهاية..
فلا تبتئس....
لاتحزن ولا تبكي لفراق احد... فما نحن الا ثمرات ليمون في قفة واحده... الاتصاق والتضاغط اقصي حميميه يمكن ان نحصل عليها...ثم يذهب كل الي حال سبيله..... فلا تبتئس.. فمصير كل ثمار الليمون سواء.... قد تشق نصفين... وقد تعصر بكاملها في خلاط ما وقد تترك لتجف وتتعفن ولكن في النهايه الفناء هو النهاية الحتميه.... فلا تبتئس فلا الليمون يبقي ولا فتات قشره...
ابتلع قرصا آخر واضحك ملء فمي في وجه صانعي العقاير المضادة للإكتئاب... عذرا ربما من الافضل ان تبيعوا وهمكم لآخرين ليسوا مثلي قد صار يصعب فصلهم عن الاكتئاب... ربما من الافضل ان تصنعوا للكتئاب مضادات
عزيزي... لا تبتئس فمازلت بخير... كل الأمور تنتهي علي نحو طيب... ربما هي فقط لم تنته... وانا ايضا

قرر يوما ان يستل سكينا ليذبح بها العالم بأسره.. ولأن العالم لا يمكن ذبحه فقد اهداها العالم للسكين فداء عنه.. لتطهر بدمائها آثام السكين.. وها هى ترقد وحدها مذبوحة ودمها يغطى السكين.. اما هو.. فقد استراح اخيرا من العالم وجلس وحده يستمع الى انفاسه ويتتبع سريان دمائه فى عروقه آملا ان تكف الأرض عن الدوران للحظات لأنه يشعر بالدوار بالرغم من انه قد تخلص الان من كل الاسئله فقد صارت بلا قيمه.... فلم يعد شىء يحدث فى هذا العالم حتى ولا هو

لماذا يتخذ الشوق شكل الخراب

توضيح

حبيت فقط اوضح انى مش جزء حملة ليلى ولذلك انا مش حاطه اللوجو بتاع الحمله فى اى مكان عندى لا فى السايد بار ولا فى البوست من اول الحمله ماتعملت.... لسبب بسيط الا وهو انى مؤمنه ان فى حاجات حلها بيتم بشكل فردى وفى حاجات بتتطلب مواقف جماعيه... المجتمع وان كان ذكورى فان آلياته والحمد لله مابتضغطش عليّه لانى قدرت احل مشاكلى بشكل فردى... ماينفعش انزل اعمل مظاهره فى الشارع اطالب فيها بان البنات ترجع متأخر ولا ينفع اطال حد بانه يجى يخطف ابويا عشان يسيبنى اسافر لوحدى دى مسائل ماينفعش فيها الاستعانه بصديق عبر الانترنت دى بتتحل كل واحده وشطارتها وعلى قدرتها على التواصل وفض النزاعات مع اهلها.. لكن ارحب بمظاهره تتعمل تطالب بقانون يقرر عقوبه لولاد الكلب اللى ماشيين ينطوا على البنات فى الشوارع ويمكن تكون دى اول وآخر مظاهره اتفق معاها قلبا وقالبا وانزل فيها اهتف فيها لحد ما حسى يتنبح وانشاله يولعوا فيه ولهذا انا كتبت البوست اللى كتبته..
المهم البوست ده مش لمهاجمه الحمله.. فقط بعلن انى لم اكن يوما جزء من هذا الكيان المسمى بكلنا ليلى وانى لا اعتنق اى من مبادىء او اهداف هذه الحمله اللى انا مش عارفاها هى ايه اساسا الصراحه بس اللى واضح من البوستات انهم بيناقشوا مسائل انا مش مقتنعه بيها على الاطلاق كمشاكل جماعيه تستحق عمل حمله لحلها خاصه وان مفيش اى حد بيطرح اى حلول والعمليه بقت فضفضه جماعيه وده موقف انا ارفضه تماما لان المنظر العام للبنات بقى مزرى جدا ككائنات بكباكة (كثيرة البكاء) تعيسه بتدور على حد يحللها مشاكلها... وياريت اصدقائى المشاركين للحمله مايزعلوش منى لان انا قلتلهم من الاول انى مش جزء من الحمله بس من الواضح ان بعض الناس ابتدوا يعتبرونى جزء من الحمله فكان لازم اوضح موقفى لانى ماحبش ان يتم تصنيفى كأحد معتنقى فكر ما اكاد اكون ضده تماما

الغضب وحده لا يكفي

غضبانه لاقصي الحدود..... مشروع التيشيرتات اللي كان مفروض يتنفذ من شهر مايو اللي فات اتاخر كتيييييييييييير لغايه دلوقتي لسه مابدأناش طباعه....... وكانت النتيجه ان في ناس تانيه عملوه..... يمكن مايكونوش سرقوا الفكره... بس شيء مؤسف للغايه انك تشتغل وتتعب ف فكره حاجه وترتبلها وتلاقي في الآخر ناس تانيه عملوها قبلك عشان انت اتأخرت لأنك اعتمدت علي كلمه حد اداهالك.... بس انا مش هضيع وقتي في عتاب وملام... اللي حصل حصل وأخدت قلم فوقني من وهم ان الناس مش زي بعضها..... للأسف الناس زي بعضها.... وكلهم مينفعش تعتمد عليهم في حاجه تخصك... مهما ابدوا اهتمام في النهايه ماحدش هيبقي قلبه علي الحاجه الا اللي طفح فيها الدم... مش هقول اني بذلت مجهود خرافي... بس انا طلعت نفسي في حاجه... المشروع مكنشي فكرتي من البدايه بس انا اشتركت فيه... وتعبت فيه... واتوقعت منه كتير.... اتوقعت منه حاجات مالهاش علاقه بالفلوس والمكسب والخساره... حاجات مابتتجمعش علي الآلة الحاسبة....
اتعلمت درس كنت عارفاه.. بس في الاعادة افادة مهما كانت مولمة... صحيح مقهورة ،مخنوقه ،متضايقه وحاسه اني اتبعت بدون سبب... بس احسن عشان اتعلم انه ماينفعش فعلا اعمل استثناءات .... العاقل لا يثق حتي يجرب ولا يتهم حتي يتبين
الغضب لوحده مش كفايه... ان مكنش الواحد يستفيد من غضبه يبقي انسان أَجوَف... ماينفعش نهاية الغضب تكون مجرد جلطة ف المخ أو ذبحة صدرية... الغضب طاقة.. والطاقة لا تفني ولا تستحدث من العدم ولكنها تتخذ أشكالا أخري
لازم تتبدل وتتغير عشان الواحد يعرف يعيش بكامل قواه العقليه وبصحته.... كفايه علينا التلوث مبهدلنا..... مش كمان حرق في دمي من الزعل لحد ما يجرالي حاجة من القهرة... لا..لا..لا..... ورب نازلة ضاق بها صدر الفتي ذرعا وعند الله منها المخرج ضاقت فلما استحكمت حلقاتها فرجت وكنت اظنها لا تفرج
معلش يا زهر... تتعوض

اشتياق

كلما لمست كفك تذكرت كيف يكون السحاب فى السماء

كلنا ليلى

ليلى كانت بنت صغننه زى كل البنات الصغننه.. روح بابا وننى عين ماما... شويه وكبرت وبقت تلعب مع صحباتها منى ومها واسماء... فى الخريف يلموا ورق شجر يقطعوه ويعملوه ملوخيه.. وفى الصيف يلموا شواشى الدره من عند بتاع الدره اللى على الناصيه وياخدوها يعملوها كنافه... وساعات يلعبوا بيوت.. منى ومها يعملوا بابا وماما وليلى بنتهم، واسماء تعمل ابن الجيران.. يقولها بحبك، وشها يحمر وتتكسف وتطلع تجرى...
عدت الايام وخراط البنات خرط منى ومها واسماء.. بس مخرطش ليلى اوى... ليلى كانت فرحانه انه مخرطهاش اوى... عشان هى كده مش بتتكسف من جسمها زى مها ومنى واسماء اللى ماشيين مستخبيين ورى شنطة المدرسه...
ليلى اتحجبت.. حجاب مزبوط.. لا بتلبس ضيق ولا شفاف ولا مكشوف.. ليلى مؤدبه وكل الناس بتقول كده... وعلى عكس لعبتهم وهم صغيرين مكنش عندها ابن جيران يقولها بحبك ووشها يحمر وتطلع تجرى...
ليلى كبرت وبقت فى الثانوى... الاداره وزعتها على مدرسه بعيده... كانت بتركب كل يوم مكروباص عشان تروح المدرسه... وواحد تانى عشان ترجع منها... ليلى بقت تاخد دروس عشان تجيب مجموع فى الثانويه العامه.. والدروس فى منها بعيد ومنها قريب.. والردس البعيد يعنى مواصلات.. الاول كانت بتنبسط انها بتركب لوحدها زى الناس الكبار.. لحد ما فيوم ركب جنب واحد راجل.. مش كبير.. ومش صغير.. يجيله بتاع تلاتين سنه.. حط ايده على فخدها الشمال.. ليلى اتخضت.. ومقدرتش تتكلم.. عشان ليلى مؤدبه وكل الناس عارفه كده... مايصحش تقول لحد ان عمو ده حط ايده على فخدى.. ليلى كرهت فخدها..
مع ان خراط البنات ماخرطهاش اوى بس فى ناس بيعجبها فخد ليلى من فوق الهدوم الواسعه، وبتمسكه.. عشان ليلى باين عليها اوى انها مؤدبه.. والبنت المؤدبه لما حد غريب بيمسك فخدها مابتتكلمش.. عشان هى مؤدبه.. ليلى عيطت.. عيطت كتير اوى.. واخدت قرار انها ماتروحش دروس بعيده تانى.. مامتها عرفت انها مابتروحش الدرس ضغطت عليها عشان تعرف السبب.. ليلى حكتلها عن الراجل.. اللى مسك فخدها..
مامة ليلى ست شديده.. ضربتها قلم وقالت " بنتى مش مؤدبه.. لو كانت مؤدبه مكنش حد استجرى يمسك فخدها "
بابا ليلى اما عرف جاب مامة ليلى وقالها اللى مسك النهارده فخدها بكره يمسك صدرها.. بنتك كبرت ومعدش ينفع تخرج لوحدها
من يوميها وليلى مبقتش تخرج لوحدها.. احسن حد يمسك فخدها...

interaction

نظرا للاقبال المتزايد على الرغبه فى التعليقات قلت اعمل بوست تنفيس متبادل.. الى فنسه فى كلمتين يكتبهم يا اولاد.. علّقوا تصحّوا

البوس.. البوس.. الحضن.. الحضن... بلوبيف بلوبيف

i v just read a forwarded email that i v recieved zillions of times befor... it tells u about kissing and what do kisses mean and gives u some reasons why do guys like girls.. for somereason this time when i read it i found myself wondering why do girls like guys and i thought of what i saw as good reasons that i was going to post when i realised

ان الساعه 3 الا تلت وعندى شغل بكره الصبح وانا لسه منمتش ومش عايزه انام ولا كابس عليه النوم اساسا.. هو الموضوع بدا فى الاول انى بحب السهر واحب انام بالنهار.. بعدين دخلت الكليه وبقيت انشغل كتير فبقيت لا انام بالليل ولا بالنهار ولو نمت 3 ساعات فى اليوم احمد ربنا.. بعدين دلوقتى ماعنديش حاجه اعملها... وبشتغل شغلانه مريحه... ولسه برده مابنامش اكتر من تلات او اربع ساعات فى اليوم... يظهر والله اعلم ان الجثه اتبرمجت على ان النوم فى الويك اند فقط!!!!!!!!!!.. هى دى يا اولاد وساخه المخ المجسمه... سايبه النوم واعمله اقرا ايميلات جتلى قبل كده تسعين الف مره لا وبسلامه اللى خلفونى المايل اللى قريته سحلوميت مره عجبنى المره دى واثار فيه تساؤلات جديده... بدل ماقوم اتخمد احسن ماروح الشغل بتطوح زى كل يوم والبس فى كل الحيطان اللى ماببقاش ماشيه جمبيها اساسا معرفش بتطلع امتى دى قاعده بسلامتى مبعملش أى حاجه فعلا.. لا حاجه مفيده ولا غير مفيده.. فقط عماله اتفرج عالناس اللى عماله بتخش على المسنجر عندى وحتى مبكلمهمش واغانى عماله تدش فى الاى تيونز ولا فاكره منهم ولا اغنيه لا اعرف سمعت ايه ولا ماسمعتش ايه... الوقت بيتبخر.. المفروض يدونى اوسكار احسن تضييع وقت ده اذا طبعا اتفقنا ان مضغ اللبان ميتبرش استثمار للوقت

smells

Maxxed`ouT عمل بوست حلو اوى بيتكلم فيه عن الروايح اللى بيحبها وسال مين بيحب روايح ايه ونظرا لان ليستتى طويله فانا هعملها بوست
بعد ريحه الياسمين والزنبق والقرنفل تيجى ريحة المطر وريحة الجو المندّى ساعه الفجر والهوا لسه نضيف.. بالذات فى الشتا
ريحة الحمام بعد دوش سخن مولع.. بتبقى ريحه بخار ميه مشبع برائحة الشامبو والبلسم والذى منه
ريحه الهدوم وهى لسه طالعه من الغسيل.. طازه كده زى فاكهه مقطوفه من على الشجره
ريحه المتحف الاسلامى.. محرومه منها من ساعه ما بدأوا ترميم المتحف.. بجد لو شميتها دلوقتى ممكن اعيط من كتر الدفا والونس اللى فيها.. وكمان ريحة جامع البنات.. دافيه اوى.. حنينه بشكل غريب
ريحة شعرى وهو مبلول بعد مايتغسل وياخدله ٌفّمين شامبو وفٌم بلسم بالعسل وزيت اللوز
ريحة جدتى الله يرحمها
ريحة الاسيتون ودوكو السمكريه
ريحة الكتب القديمه بالذات لو ممتزجه بعطر او ريحه سجاير مطرح ايدين اللى كانوا بيقروها... بتبقى ريحه حميميه اوى تخليك تحس انك بتقرا الكتاب واللى كان بيقاره قبلك كتفه فى كتفك
ريحة هدومى بعد ماتتشبع بريحتى وريحه الديودرانت والكريم والبرفان اللى بستخدمهم
ريحة القرفه والجنزبيل والبهار.. والبهارات بصوره عامه.. بحب اوى اعدى من قدام محلات العطاره واقعد اميز الروايح.. كركديه.. كمون.. خروب.. بهار.. الخ الخ الخ
ريحه بارفان اسمه 360 .. بتفكرنى بخالتى
ريحة الروج بتاع زمان كان بيبقى ليه ريحه مميزه كده اليفه اوى
ريحة القطه بتاعتى (ايام اما كانت لسه عايشه)
ريحة الاطفال الصغيرين وهم لسه طالعين من الحمام وهم ريحتهم ميه سخنه ولوشن وشامبو
ريحه ادوات المكياج لو محطوطه فى شنطه مقفوله بتبقى ريحه الشنطه دافيه كده تحس ريحتها بتبقى شبه ريحة اللى بتستخدمها
ريحة الهوا فى الليالى المقمره على كوبرى قصر النيل
ريحة هوا الاوبرا... معرفش بحس الهوا هناك ريحته مختلفه
ريحة جسم اى حد بحبه.. بشمها من على بعد الف كيلو
ريحة الكالامينا... منعشه
ريحة االسكر على اى اكل سخن
ريحة الجبنه المتسيحه
ريحة الخل... بمووووووووووت فيها... بتخلى ريقى يجرى.. مستفزه جدااااااااااا
ريحة الدلكه المغربى او السودانى معجونه بزيت الزيتون
ريحة الحنّه... ناس كتير بتقرف منها بس انا عن نفسى بحبها جدااااااااا
ريحة اى حاجه مسامية السطح استخدمتها لمده طويله.. بيبقى ريحتها
ريحة الشربات وهو بيتصب على اى حاجه سخنه زى الجلاش او البسبوسه ويعمل تشششششششششششش وريحته تفوووووووووح
ريحة ايريال اوتوماتيك
ريحة الشاى بالقرنفل والنعناع
ريحة الحاجات اللى بيتحط عليها فانيليا
ريحة المانجه
ريحة الطمى وهو معجون بالميه
ريحة الزرع وهو لسه مسقى ميه
ريحة الاكل المحمر (طفاسه نياهاهها)
كفايه دول كده :)