8 Sept 2006

كلنا ليلى

ليلى كانت بنت صغننه زى كل البنات الصغننه.. روح بابا وننى عين ماما... شويه وكبرت وبقت تلعب مع صحباتها منى ومها واسماء... فى الخريف يلموا ورق شجر يقطعوه ويعملوه ملوخيه.. وفى الصيف يلموا شواشى الدره من عند بتاع الدره اللى على الناصيه وياخدوها يعملوها كنافه... وساعات يلعبوا بيوت.. منى ومها يعملوا بابا وماما وليلى بنتهم، واسماء تعمل ابن الجيران.. يقولها بحبك، وشها يحمر وتتكسف وتطلع تجرى...
عدت الايام وخراط البنات خرط منى ومها واسماء.. بس مخرطش ليلى اوى... ليلى كانت فرحانه انه مخرطهاش اوى... عشان هى كده مش بتتكسف من جسمها زى مها ومنى واسماء اللى ماشيين مستخبيين ورى شنطة المدرسه...
ليلى اتحجبت.. حجاب مزبوط.. لا بتلبس ضيق ولا شفاف ولا مكشوف.. ليلى مؤدبه وكل الناس بتقول كده... وعلى عكس لعبتهم وهم صغيرين مكنش عندها ابن جيران يقولها بحبك ووشها يحمر وتطلع تجرى...
ليلى كبرت وبقت فى الثانوى... الاداره وزعتها على مدرسه بعيده... كانت بتركب كل يوم مكروباص عشان تروح المدرسه... وواحد تانى عشان ترجع منها... ليلى بقت تاخد دروس عشان تجيب مجموع فى الثانويه العامه.. والدروس فى منها بعيد ومنها قريب.. والردس البعيد يعنى مواصلات.. الاول كانت بتنبسط انها بتركب لوحدها زى الناس الكبار.. لحد ما فيوم ركب جنب واحد راجل.. مش كبير.. ومش صغير.. يجيله بتاع تلاتين سنه.. حط ايده على فخدها الشمال.. ليلى اتخضت.. ومقدرتش تتكلم.. عشان ليلى مؤدبه وكل الناس عارفه كده... مايصحش تقول لحد ان عمو ده حط ايده على فخدى.. ليلى كرهت فخدها..
مع ان خراط البنات ماخرطهاش اوى بس فى ناس بيعجبها فخد ليلى من فوق الهدوم الواسعه، وبتمسكه.. عشان ليلى باين عليها اوى انها مؤدبه.. والبنت المؤدبه لما حد غريب بيمسك فخدها مابتتكلمش.. عشان هى مؤدبه.. ليلى عيطت.. عيطت كتير اوى.. واخدت قرار انها ماتروحش دروس بعيده تانى.. مامتها عرفت انها مابتروحش الدرس ضغطت عليها عشان تعرف السبب.. ليلى حكتلها عن الراجل.. اللى مسك فخدها..
مامة ليلى ست شديده.. ضربتها قلم وقالت " بنتى مش مؤدبه.. لو كانت مؤدبه مكنش حد استجرى يمسك فخدها "
بابا ليلى اما عرف جاب مامة ليلى وقالها اللى مسك النهارده فخدها بكره يمسك صدرها.. بنتك كبرت ومعدش ينفع تخرج لوحدها
من يوميها وليلى مبقتش تخرج لوحدها.. احسن حد يمسك فخدها...