حاجه غريبه

انك تصحي من النوم حاسس انك جزء من حاجه موجوده معاك وانت مش شايفها... تحس انك بتحب مع ان مفيش حد في حياتك.. تحس ان في حد بيحبك مع ان ماحدش قالك.. تتكلم وكأن في حد في حضنك.. نايم..خايف تصحيه.. مع انك نايم متنكد عشان بلاوي سوده في العيشه واللي عايشينها.. وصاحي متأخر وواخد تاكسي لف بيك ساعتين وربع مشوار مياخدش غير نص ساعه عشان البلد كانت واقفه والطرق مقفوله وضيعت يوم العمل عمال بتتنطط من مكان للتاني... والعجيب ان كله ده وانت مش متضايق.. مسترخي.. عشان ماتصحيش اللي في حضنك.. حاسس بدفا غريب ومش حاسس بالوحده زي كل يوم... مع ان مفيش اي حاجه في حياتك اتغيرت عن اليوم اللي قبله