24 Sep 2005

ياعلي يا زيبق

كنت فى مكان ما بحضر حفلة تكريم لاشخاص ما تبع دار نشر ما..... روحت متاخره... بعد عشر دقايق مما دخلت كنت خلاص بطلع فى الروح من كمية التلزيق الى فى الجو.. شويه ناس مفروض انهم مشاهير عمالين يستظرفوا لحد ما خنقونى وكنت بموت بقى اما قام واحد ناقد قعد يسمع نفس البقين الحمضانين اللى بيقولهم كل النقاد اما معدتى بقت فى زوري من كتر القرف والناس اللى حواليه مستمتعين وانا قاعده بكلم نفسي من كتر الغيظ.. في وسط ده كله الاقي واحد معرفوش قاعد في اول صف طلع زى الرمح وراح مطرقع للناقد فيما معناه سيبك من التمثيل وحياة ابوك وقول رايك فى العيال ايه يا اما تخرس وتفضك من الكليشيهات اللى حفظناها دى..... معرفش ليه فكرني بعلي الزيبق ..بطل صعلوك وان كان في النهاية لصا.. مع ان ليه ملامح حاده كالنبلاء.. فضلت لاخر الاحتفالية مستمتعه بفكرة وجود علي الزيبق معايا في مكان واحد لاصطدم بمتهي القسوه بوجوده بيني وبينه اقل من متر واقف مع واحده جسمه مشدود زي احمد مظهر ..بس هو اطول شويه.. و ماتكلمش كلمه واحده عربى وحاطط ايد في جيبه والتانيه ناقصها سيجار ويبقي احد الديبلوماسيين اللي يخنقوك بتناكتهم المفرطة.. ابتعلت صدمتي بشكل مؤقت وانصرفت مع اتنين صدعت دماغهم طول السكه بصراخي وانا عماله اشتم في الناس اللي كانت هناك... مش فاكره كان امتي بالضبط عرفت ان علي الزيبق ده يبقي احمد العايدي... اتضحلي بعد كده ان البنت دي مابتعرفش تتكلم عربي كويس عشان كده هو كان بيكلمها بالانجليزي... يمكن اكون ظلمته بس النتيجه واحده.... علي الزيبق ماينفعش يتكلم انجليزي ويلبس بدله ويحط ايده في جيبه.... بس في النهايه ماهياش غلطته انه مش علي الزيبق ومش غلطته اني بحترم الصعاليك اكثر من الديبلوماسيين..... لانه ببساطه لا صعلوك ولا ديبلوماسي هو فقط احمد العايدي اللي انا معرفوش....... انا مش بكتب الكلام ده عشان العايدي لانه اساسا مايعرفنيش ولا يعرف انطباعاتي عنه انا بس بكتبه عشان انا خبطت فيه جامد بصوره ضايقتني انا شخصيا... واهو كله تفريغ شحنات انفعالية

12 comments:

MaLek said...

للأسف لا اعرف من هو احمد العايدي :)
لكن سأعلق على الفكره العامه وهي فكرة الزيبق او روبن هود المصري او ماشابه
فكرة الصعلوك المنتقم للفقراء من الاغنياء دائما تلك الفكره مثيرة للعقل والعاطفه على حد سواء لكن الفكره ان هذه الشخصيات غير موجوده في الاساس تاريخيا مهدومه وفكريا ايضا مهدومه الفكره بالظبط زي واحد حب ينزل يجيب زهره رائعه موجوده في وسط مستنقع حيجيب الورده بس هو شخصيا حيتلوث بقاذورات المستنقع وشوية شوية من كتر ما حينزل في المستنقع لا تفرقي بينه وبين اي كائن اخر من كائنات هذا المستنقع
روبن او الزيبق او غيرهم من التراث مجر افاقين
الصعلوك الحقيقي هو الشخصيات زي عبد الله النديم وامل دنقل وغيرهم
في النهايه لك تحيتي

AZ said...

مين قال ان الصعلوك والشرف لازم يبقوا متلازمين؟؟؟؟؟؟؟؟

Anonymous said...

: اقتباس
"..... لانه ببساطه لا صعلوك ولا ديبلوماسي هو فقط احمد العايدي اللي انا معرفوش....... "

... اتفق معك تماماً

تحياتي
أحمد العايدي

MaLek said...


محدش قال ان الشرف والصعلكه لازم تكون متلازمه
بس الفكره انك المفروض بتتكلمي عن حاله في التراث المصري او الانساني الكل بيعتبرها شريفه(نقول الاغلبيه لاني مش بعتبرها شريفه) فالفكره هنا بكل بساطه اني برد على جزئية الزيبق زعيم الانتقام من الاغنياء في التراث الشعبي وبحط بداله اسامي عملت حاجه من اجل الوطن بجد واتكلموا بلسان الفقراء ضد القاهرين من الفاسدين والاغنياء وكانوا صعاليك
يعني بحاول اعطاء تعريف اخر غير التعريف اللي انتي بتقوليه وبتمثليه بعلي الزيبق
بس:)

AZ said...

يمكن لو مكانش علي الزيبق حرامي مكنتش حبيته

MaLek said...


معلش ليا اني اسئل ليه ؟
ليه لو مكنش حرامي مكنتيش حبيتيه ؟

AZ said...

لان علي الزيبق اشتهر بالرغم من كونه مش بيعمل كل حاجه كويسه في الدنيا...... اثبت ان الانسان علي نقصه ممكن يكون بطل
مابحبش الابطال اللي صفحات حياتهم بيضه زياده عن اللزوم.. بتثير في نفسي الشك

MaLek said...


انا معاكي ان الانسان اللي صفحة حياته بيضه تثير الشك
لكن انه يكون لص عشان متكونش الصفحه بيضه
يعني هل دا منطقي؟


بعدين اتذكر بمنطق التشفي وهو شخصية اصلا غير مثبته تاريخيا يعني شخصيا اسطوريه بمعنى اصح اختلقها الخيال العام كرد فعل على الفساد اللي مش قادر يحاربه فاخترع له فارس وهمي زي دون كيشوت ما اخترع اعداء وهميين بالظبط الشعب بينضرب على قفاه من الحكام مش عارف ياخد حقه من طبقة الاغنياء الموجوده باغتصاب حقوقه المشروعه اخترع بطل يسرق منهم ويعطيه لمجرد التنفيس عن مشاعر مكبوته زي الست اللي مبتخلفش لما بتشتري عرايس وحاجات الطفل كلها وتقعد تتكلم معاها كانها اولادها

AZ said...

وانا يفرق معايا ايه شخصيه حقيقيه ام اسطوريه.. خط الصعيد كان شصيه حقيقيه بس كان قبيح عشان كده ماحدش حبه ادهم الشرقاوي مكانش محبوب..... لان ادهم الشرقاوي وعلي الزيبق نماذج للعداله الشعبيه.. وبغض النظر عن واقعية علي الزيبق من عدمها فانا بحب علي الزيبق حتي وهو لص وحتي وهو مش واقعي وده مش معناه اني شايفاه صح..... ارسين لوبين ماهو كان حرامي..... في حين اني مابحبش ادهم الشرقاوي عشان كان سياسي اوي لكن علي الزيبق كان هليهلي اوي وبسيط

Geronimo said...

عارفة يا از
انا كنت بحب على الزيبق قوي وبفرح بالمقالب بتاعته ويا سنقر الكلبي واكتر حاجة كانت بتفرحنى انا زينا بيغلط و كده مهواش نبي ولا منزه ....
هو البطل اللي جوه كل واحد والكلام اللى محشور ف زورنا ومش عارفين نقوله والايد اللي تطول العدا ولو كانوا فين هو الحلم ....
بس يا ترى مين بقى احمد العايدي دوت ؟

Pianist said...

انا اعرف احمد العايدي
مش معرفة شخصية بس اعتقد انه هوه اللي في دماغي
كاتب في الدستور
وكان بيكتب في سلسلة اسمها مجانين زمان وكتب رواية اسمها ان تكون عباس العبد
انا باحترم عقلية هذا الشاب
بس في حاجة واحدة عملها معجبتنيش
في برنامج بيجي في دريم اسمه شباب بيك
حبة شباب مرفه جدا بيتكلم عن مشاكل الشباب الكلام اللي انتي طبعا عارفاه
سطحية ونفخ وشوية كلام عن الحب والجمال وجيفارا وما الي ذلك
في حلقة اتصل بيهم احمد العايدي وشكر طحن في البرنامج واد ايه البرنامج جميل ومفيد ومغذي
بصراحة مش عارف ليه استعيبتها منه يمكن عشان اللي اعرفه عنه انه انسان واعي وماكنتش تيجي منه
وعن علي الزيبق انا متفق معاكي جدا
البطل المثالي شئ عفا عليه الزمن خلاص

littilemo said...

كالعاده
اللى ميعرفك يجهلك