20 Oct 2011

الحمد لله ربنا رحمني امبارح من مشاهدة لقاء الجنرالات مع منى الشاذلي وابراهيم عيسى...شوفت منه آخر نص ساعه تقريبا...تمثيلية رديئة غير مكتملة الأركان...كان ناقصها تقاسيم ناي مع كمان حزين في الخلفية...أكيد كانت هتبقي أحلى وهم بيغنوا علينا يكون في مزيكا...أهو كان يبقى الحلقه ليها معنى بدل الهري الفاضي اللي اتهرى علينا وهرى أكبادنا معاه....كان منظرهم يضحك أوى! العصار قاعد مش صالب طوله...وحجازي قاعد مميل لقدام شويه...قال يعني بقي هي دي المدنية....ومني الشاذلي وابراهيم عيسى كانوا عاملين كورال هايل أوي...وكل اما ابراهيم عيسى يحاول يخرج عن النص منى طبعا كرفيقة سلاح تلقنه...بس الغريبه انها ماضيقتلناش عينيها امبارح!
انا فعلا مش فاكره اي حاجه من الكلام...كل أما آجي افتكر الاقي منى بتغني: حبك جننا ياسمك ايه..وابرهيم يكمل وراها: الحقني يا مرسي يابو العباس دا باين الفاس وقعت في الراس...يقوم العصار وحجازي يبتسموا أوي ويقولولهم: وانتي قوليلي قولي مين مكلبش مهجتك؟
كل الي فاكراه ان حجازي قال: جميل جدا انك تعبر عن رأيك...بس تسيب صاحب القرار............بعدها وقعت منه....سرحت في ذكريات الميدان...وفي يوم التنحي...وفي مطالب الثورة....حاول افتكر امتى المجلس بقي صاحب القرار....وبرده مافتكرتش...فاكرة كويس جدا منظر ممدوح شاهين وهو مع مني الشاذلي في اول ظهور إعلامي وهو بيقول: احنا خدامين الشعب...القوات المسلحة ملك للشعب...احنا بنشتغل عندهم...وافتكرت مينا وصبحي ومايكل اللي ماتوا في موقعة ماسبيرو الملطخة بالدم والعار...وصورة حد بعتهالي لطنطاوي بيضرب تعظيم سلام وكف ايده ملطخ دم...وافتكرت ان الرصاصه اللي اتقتل بيها مينا...والمدرعه اللي دهست مايكل فلوسهم من الضرايب اللي بدفعها! العجيبة اني اما افتكرت قعدت أضحك...حقيقي ضحكت من قلبي! صاحب قرار؟ سيد قراره؟...هو احنا سلمناهم مفاتيح العربية امتى؟ احنا مش بس اديناهم الدريكسون يسوقوا شويه لحد مانجيب سواق جديد؟ مين اداهم رخصة العربية!
فاكره كويس جدا ان المجلس جه عشان "ينفذ مطالب الثورة" مش عشان نعرض رأينا عليه وهو يقرر....ومش فاهمه احنا ليه مستسلمين لاللي بيحصل فينا كده بهدوء...عادي يعني!
وفي آخر كوبليه من الأغنية الحزينه العصار وحجازي غنولنا دويتو: المجلس سيقوم بتسليم الحكم لسلطه مدنيه منتخبه.....والشعب يصيح من أمام شاشات التلفاز في المنازل: غرّقنا...غرّقنا
افتكرت ساعتها المشهد الافتتاحي بتاع فيلم ابوكاليبس...والقرود قاعده بتسبح للخازوق الحديد عشان مش عارفه تتسلقه...روحت ناطه علي راس الصاروخ مع الراجل اللي كان علي راس الصاروخ في مشهد من نفس الفيلم...ماهو يا كده يا تشوفولي قميص ابيض بزراير من ورى ألبسه أحسن مادخل الانعاش...دانا لسه شابة وعايزه اشعر بالانتعاش...هع هع هع
وبعد ما اللقاء خلص افتكرت ان انا كمان عندي جنرالين في البيت...جنرال فوق الحوض بغسل منه المواعين...والتاني تحت الحوض عشان لو الأولاني خلص...جنرال الجديد: بقوة اللمون...اللي تقضي علي اصعب الدهون

4 comments:

نادي حواء said...

شكرا على الموضوع

Nemo Nobody said...

hehehehe ... painful, but I can't stop laughing :D

moo said...

على راى عم نيمو مؤلم ولكنى لم اضحك يمكن من التعب ومن انى حاسس ان الاسوا لم نره بعد ولكن كويس انك طلعت اللى جواك بدل ما تنامى وانتى شيلاه جواك يعملك كالو لكن فكك من مود الياس ده وحاولى تعملى حاجة بتحبيها

Anonymous said...

لما المظاهرات توقف حركة المرور يبقى تضرب بالجزم و اي كلب يموت ملوش ديه و 10 / 10 على المدرعة اللي داستهم