26 Jun 2011

رسيني يا ساقية عذاب

رسيني يا ساقية عذاب…فين اللي راح فين اللي غاب…قوليلي راحوا فين…واشكي الفراق لمين…واروح لمين…ايه اللي باقي من بعد اللي راح… غير الجراح…انده عليك يا حبيبي ولا انت داري بي في بعدك

مسجونة في العمر اللي فات…من بعد ما روح قلبي مات…خد كل العمر معاه…مخادش غير الآه…وعذاب الآه ليه يا موت تحرمني من الأحلام…مش حرام…دبلتني في ربيعي…وشوفت خضوعي في ردك

ليه يابني تسيب حضني ليه؟…في ادفى من حضني ايه؟…روحت فت وحده مره وليل طويل…روحت وخدت قلب كنت بعيش عليه…وفردت بعادك شراع…من غير ولا كلمة وداع…آه يا ريتني أعرف بس روحت فين…كنت أمشيلك كل خطوه برمش عين…خد كل العمر معاه…ولاسابش غير الآهرسيني يا ساقية عذاب…فين اللي راح…فين اللي غاب…رسيني يا ساقية عذاب…رسيني

دي اغنيه من البوم شرقيات لفتحي سلامه بتغنيها جمالات شيحة على لسان أم فقدت إبنها…ياريت تركزوا في الكلام…يمكن تحسوا…ولو ان الكلام ده مهما اتعاد واتغنى هيفضل قليل قدام شعور حد ماتله ضنا غدر



صحيح إنو انا ماعنديش أولاد…وصحيح إنو أنا ما عنديش شهيد يقربلي بدم أو نسب…بس أنا شوفت الناس اللي ماتت واتعورت…كانوا حواليا وقدامي…مكانوش ورايا…كانوا قدامي عشان أنا مايجراليش حاجه…أي حاجه من أي نوع…وماتوا هم…وانا ماتخربشتش خربوش…دمي ودم كل واحد كان معاهم وفضل عايش اتفدى بدمهم…يعني ليهم في صدر كل واحد فينا عايش وبيتنفس دلوقت شهقه…تخيل بقى انت كل واحد فينا حاسس بعجز شكله عامل ازاي عشان حقهم لسه ماجاش!




هنسى ازاي! هنسى ازاي الناس اللي كنت بجري عليها احطلها قطره واسقيهم بيبسي…يقولولي عايزين خل…مكانوش بيرضوا يرتاحوا…كانوا بييجوا بس ياخدوا خل في الكوفيه ويرجعوا تاني للرصاص والقنابل برجليهم!




هنسى ازاي منظر العيال في عربيات الاسعاف لما كان القناصه بينشوهم في شارع وزاره الداخليه…تصدقوا اني اسمعتش واحد فيهم بيقول آه؟!!!!!!!!




هنسى ازاي منظر الدكتور وهو بياخد مننا الاسعافات اللي جايبنهالهم وهو جسمه بيتنفض وبيصرخ: هم ايه اللي بيوديهم هناك! ماحدش يمشي من الشارع ده! حرام! دول مش بني آدمين…بيضربوا نار علي اي حاجه بتتحرك في الشارع!




هنسى إزاي منظر الدم…ولونه…وريحته…هنسى إزاي حرقة القلب!




انتوا فاهمين يعني ايه الحياه تتحول لعبء…دين انت عاجز عن إنك تسدد تمنه…وأهل اللي مداينك بروحه قدامك ومانتاش عارف تردلهم حتى حق الدم


انا بس بقولكم الكلام ده عشان تعرفوا كل واحد مر باللي انا مريت بيه وأكتر بيسبلكوا دين ليه لما يلاقيكوا متكدرين عشان اهل الشهدا معتصمين في الشارع بيطالبوا بحق دم عيالهم



وقبل ماتكلموهم عن المرور ابقوا افتكروا هم نازلين ليه…وافتكروا هم مديانينكوا بإيه…وابقوا افتكروا لما كنتوا بتقفوا زي الكلاب في الشوارع بالساعه والاتنين عشان تشريفة الست هانم ولا جناب البيه…ابقوا افتكروا نظيف كان بيوقف المحور كل يوم من الساعه كام للساعه كام عشان يروح شغله…ابقوا افتكروا انكوا دلوقت بقي ليكم صوت وبتقولوا اه ولأ وبتعرفوا تعترضوا…عيب أوي أول اما تفتحوا بقكوا تعضوا في اللي دفعوا عيالهم تمن عشان انتوا صوتكوا يطلع




عن نفسي انا مش هسبلكوا دين…لأن لو انتوا فعلا مش حاسين بالناس دي…ولا مقدرين مصابهم…ولا فاهمين انتوا مديونين ليهم بإيه…يبقوا انتوا فعلا ماتفرقوش أي حاجه عن الحيوانات غير انكم بتتبرزوا كلام من أفواهكم




كل واحد مات دمه دين في رقابينا كلنا…حتي رقاب اللي مانزلوش الميدان…عشان اللي مات ده فدى اللي جنبه بدمه…وعمل لاللي كان قاعد في بيتهم قيمه بعد ما كان عايش فيها ٣٠ سنه بيتعامل معامله الكلاب وراضي….قوم أول ما يبتدي يتعامل معامله البني آدمين يختار انه يتصرف زي الحيوانات

5 comments:

arabian_faithful said...

كلامك روعة بس لازم تتعلم لما تكتب متخليش غضبك يسيطر عليك بغض النظر عن مشاعرك أو الحالة اللى بتكتب فيها
لازم الكلام يبقى خالى من الشتيمة على الأقل طالما أنت بتتكلم عن شهدائنا فلابد من إحترامهم فى أسلوب الكلام

بس فى المجمل كلامك روعة وبجد أنت بتقدر توصل للى بيقرالك بسهولة وسرعة

أخيراً بقى أنا مش عارف بقى المفروض نعمل أيه فى المحاكمات يعنى الواحد مش عاجبه سير المحاكمات بس برده مش قادر أشوف بديل للقضاء المصرى المدنى يعنى أنا فعلاً مش فاهم المفروض نعمل أيه!!!

bassam said...

مشكلتك يا أمينة انت واللي زيك انكوا فاكرين أن النظام رموز مش ثقافة وعادي جدا الشعب اللي نزل الشوارع ضد مبارك ممكن يبقي ضدكوا في لجظات الثورة لازم تبقي ضد الجهل والتخلف وده هياخد وقت طويل جدا يمكن ماتلحقيش تشوفي اليوم ده زي اجيال كتير ماتت قبل كده

real estate egypt said...

انا مش معاك الثورة لازم تبقى ضد الظلم والخذلان مش الجهل والتخلف

Mostafa abdo said...

خمس سنين عدو . ناس ماتت.ناس غيرت رائيها.ناس اتصابت.ناس خسرت ناس وناس كسبت ناس . الجهل والظلم ذي ماهما.مفيش حتي نيه لمحولة السيطره عليهم او محربت الفساد. سلام ع ارواح كل من مات في سبيل )وطن(عيش-حريه_عداله اجتماعيه

Unknown said...

دمهم راح هدر ولسه الظلم والخراب مالي البلد 🙁🙁