بعد الفحص والتمحيص والمراجعة والاستماع المتأني أقرت لجنة الفحص بأن السمبتيك خالص مهندما وليس مأنتكا... هذا وتتوجه اللجنة بعميق الشكر والامتنان للست كاميليا باشا حسين التي لفتت نظر اللجنة الي الخطأ الغير مقصود
والله ولى التوفيق
يعيش السمك في الماء... يا يعيش... سعد سعد يحيا سعد

ليه اقعد مدة مبحلمش ولما احلم يكون الحلم فيلم آكشن بطولة مني زكي وأحمد السقا علما بإنى مبحبهمش هم الجوز!!!! اعتبر ده عقاب ؟؟ ولا احلامي بتنتقم منى!!!

ياسمبتيك خالص يا مأنتك... تسمح تزورنا الليله يا فندم... تربن تربن... اهون عليك ازعل واتأثر أظن مايلقشي... تربن تربن

والهل اغاني العوالم دي كانت ظريفه وربنا يخليلنا الثلاثيه

قمة السطل... انك تكتشف فى نص الطريق لشغلك انك لابس شبشب الحمام على طقم شيك جدا
قمة البجاحه... انك تخرج تتفسح بعد كده هىهىهىهى... الثقة بالنفس عامل مهم جدا فى الأوقات دى
قمة الضحك... ان ماحدش أخد باله هىهىهىهى... يبدو ان الناس كلها كانت مسطلة مش انا لوحدى

يمكن في الفتره دي من حياتي ماعنديش حاجات كتير حلوه تخليني مبسوطه... بس في نفس الوقت معنديش حاجات وحشه اوي لدرجة اني ابقي مش مبسوطه... يعني اقدر اقول اني مقريفه بس.... وأحب افرفش نفسي واسمع الأغنية دي من باب الأمل في غد افضل

That I Would Be Good

that I would be good even if I did nothing
that I would be good even if I got the thumbs down
that I would be good if I got and stayed sick
that I would be good even if I gained ten pounds

that I would be fine even if I went bankrupt
that I would be good if I lost my hair and my youth
that I would be great if I was no longer queen
that I would be grand if I was not all knowing

that I would be loved even when I numb myself
that I would be good even when I am overwhelmed
that I would be loved even when I was fuming
that I would be good even if I was clingy

that I would be good even if I lost sanity
that I would be good
whether with or without you

لو كان القولون العصبى رجلا لقتلته شر قلتة ومثلت بجثته ميتا كيفما يمثل بجثتي حية

لم يعد في القلب متسع للمزيد من الأحزان.. ولم يعد في الوقت متسع لاجترار احزان قديمه.. ولم يعد في الحلق مرار من الغصص.. فللكون رب... يصرف الأمور ويوزع الأرزاق ويلهم الصبر عند المحن... على الوجه ابتسامه دائمه... تبهت أو تلمع لا يهمنى... ولكنها يجب ابدا ألا تزول... فلازال في القلب بقعة نور من فيض كرم الرب....

التعود يقتل كل شيء... حتى الأحزان... الوقت كفيل بمحو كل الأشياء حتي الغصص... فقط دع الأشياء تحدث وارض بقضاء الله... فكل ميسر لما خلق له... وكل الأشياء تسعى نحو أقدارها... فاصبر وتحمل وابذل جهدك... ولله الأمر من قبل ومن بعد...

الاختيار

الاختيار سهل... واتخاذ القرارات سهل.. لكن التنفيذ هو اللي صعب... وتحمل التبعات والعواقب... سهل اوي ان الواحد يختار حاجه عاجباه ويطنش كل المعارضات... لكن صعب انه يناقش المعرضات دي ويحاول يقنع الناس... بالذات لو معندهمش اسباب منطقية يمكن الرد عليها بالعقل والمنطق... في الحاله دي بيبقي قدامك حاجه من الاتنين... ياتنخ وتنفض وتسمع الكلام... يا تصمم لانك واثق من اختيارك وتسمي الله وتدوس بنعلك... معظم الناس مابتقدرش تتحمل التبعات اللي بعد كده... وده لسبب بسيط جدا لانهم بيبقوا مختارين غلط... لكن لو انت مختار صح... واساسك اللي مختار عليه صح... بعدها بشويه هتلاقي اللي كان بيقولك امبارح لأ بيقولك دلوقتي تصدق كان معاك حق... التردد بقي في اتخاذ القرار ده ابشع حاجه... اهم حاجه الثقة بالنفس وقبلها الثقه بالله... حصل قبل كده اني صممت علي اختياراتي في حاجات كتير... يعني مثلا في ثانوي اهلي كانوا مش عاجبهم اني ادخل علمي رياضه عشان اخويا لما دخل علمي رياضه سقط وعاد السنه... كانوا غافلين تماما ان في اختراع اسمه فروق فرديه وان البني ادمين قدراتهم مختلفه... اخويا سقط وحول علمي علوم وانا نجحت ودخلت فنون تطبيقيه... حصل بعد كده اني في الكليه حبيت اخش قسم طباعه ونشر واهلي قالولي خشي اعلان.. انا صممت علي طباعه ونشر.. وحولت بمحض ارادتي الكامله بعد اسبوعين عشان مقدرتش استحمل المعامله الصلفه لكتير من الدكاتره اللي هناك اللي كانوا بيتعاملوا معانا كما لو اننا فواعليه... مع ان القسم ده كان مناسب جدا لقدراتي الدراسيه لكن انا عارفه نفسي... وعارفه ان قدرتي هزيلة في التحكم في اعصابي قدام المعامله السيئة... فلقيت اني لو كملت هترفد من الكليه بالكامل واضيع مستقبلي كله فحولت... بس بمحض ارادتي الكامله... وساعتها اهلي فهموا اني لما بختار بختار علي اساس قدراتي والامكانيات المتاحه مش بفتي يعني ولا بختار حاجات متناسبنيش... حصل بعد كده اني سيبت شغلي اكتر من مره لاسباب مكانتش بتبقي دايما مقنعه لأهلي... واستمريت في شغلانات لاسباب مكانتش مقنعه بالنسبه لأهلي... بس دلوقتي هم فاهمين كويس اوي اني كنت صح لما استمريت وكنت صح لما مشيت واني كان معايا حق لما اتمسكت برأيي... واني لما استمريت في شغل متعب ومقرف كان عشان استفيد خبره وسمعه في مجالي... ولما مشيت كان عشان مخسرش سمعتي المهنيه بعمل شغل زباله... دلوقتي اهلي بيقولوا رأيهم في اختياراتي بدون اي محاولة ضغط وحتي لو مش مستوعبين المنطق اللي بفكر فيه فهم عارفين كويس اوي اني فاهمه مصلحتي فين... الموضوع كله بيتخلص في حاجه بسيطه... اني فاهمه قدراتي... وفاهمه الفرصه اللي قدامي... وبوزن المزايا والعيوب.. والمكسب والخساره... وبتكل علي الله واختار وهو بيعيني علي تحمل العواقب... عشان كده الحمد لله الحمد لله الحمد لله ربنا بيوفقني لاني في الاول وفي الاخر مبعملش حاجه تغضب ربنا ومببقاش ساعية لشىء غير رضا ربنا... يمكن اهلي كتير بيتضايقوا من اختياراتي وبيعارضوني بشده... بس في الاخر بيسيبوني اعمل اللي انا شايفاه مناسب لنفسي... لانهم مدركين دلوقتي اني فاهمه نفس كويس وبوزن الحاجات بالنسبه لقدراتي... كنت زمان ببقي خايفه اوي مع اني كنت ببقي عارفه ان معايا حق واني مختاره صح... كنت ببقي صامده وانا ركبي بتخبط في بعضيها واهلي حاطين ايدهم علي قلبهم وكله بيقول يارب سلم... اهم حاجه التوكل علي الله قبل الاختيار وهو هيعينك علي تحمل التبعات والضغوط اللي بتتعرضلها.. مينفعش الواحد يغير رأيه لمجرد انه خايف يزعل حد... او انه يسيب حد تاني يفكرله ويعيشله حياته بحجة انه فاهمه كويس... ماحك جلدك مثل ظفرك فتول انت جميع أمرك... مينفعش نخاف ولا نتردد... ينفع نحسبها كويس ونتكل علي الله وربنا يعينك علي الخطوات اللي بعد كده حتي لو الدنيا باللي فيها وقفت قدامنا... انا مع اختياراتي حتي الموت لأني مقتنعه انها الصح... وما نيل المطالب بالتمني ولكن تؤخذ الدنيا غلابا...

ولأن شر البلية ما يضحك فإن الكوميديا دايما بتتجلى فى أحلك الظروف...والله الدنيا دي هايفه... الواحد يحصله حاجه يقعد يولول ويقول الحقوني بعدين يكتشف ان الموضوع مش مستاهل والحل بسييييييييط... الدنيا بسيطه... والحياه حلوه... وبرده لسه احنا بنكلكعها... خليك علي راحتك وامشي بمزاجك... ماتسمحش لحد يكعبلك... ولو حد حاول يكعبلك نط من فوق رجله... واهي كلها رياضه تشد البدن...

الصدمه اللي ماتقصمش وسطك تشد عودك وتخليك ماشى ضهرك مفرود... بس أهم حاجه انك ماتكعبلش حد... ولو لقيت حد اتكعبل ووقع شده وقومه تانى ونفضله هدومه وشاورله علي السكه... حتي حاول تمشي معاه انجاجيه تتعكزوا علي بعض وقت اما الدنيا تميل عليكوا...

وعشان مسيرك يوم تقع... متضحكش علي حد اتكعبل ووقع ابدآ... ولما تلاقي حد بيضحك علي حد اتكعبل ووقع اسفخه قلمين... عشان مايصحش... يصح اننا نقع... لكن مايصحش نضحك علي حد وقع... ولا يصح نتكسف لما نقع...

وعلي رأى اللي قال... ان وقعت اتعدل واضحك ماتقلبهاش... واغلب زمانك بصبرك اصل الزمان بكاش... والنبي قال ان الصبر عند المصيبه الأولى... يعني الصبر بيبقي مطلوب في أول طلعه للمصيبه... هي الدنيا كده بلاويها كلها بتكش بعد اول غسله... اصبر بس على أول طلعه تلاقيها هانت... اصبر ده الصبر زي اتوبيس سته بيروح كل حته... لو صبرت هتروح مطرح مانت عايز... وتنول اللي انت عايزه بس اصبر... مش الأيام دول؟؟؟...

لو خدت علي قفاك في اول لفه فتاني لفه مش هتتلزق علي قفاك... لو خدت علي قفاك مرتين من نفس الكف يبقي انت اللي حمار مابتتعلمش فمتعيطش بقي... اوعي بس لنفسك... الكفوف كتير... فلما تاخد كف متزعلش برده ده مش معناه ان الكف ده مخصوص عشانك... هي بس صدفت وجت فيك... ولو ركزت هتلاقي قفا تاني اتلزق علي قفا غيرك كان مفروض يجي فيك... هي الكفوف كده... مابتميزش...

واهي ايام وبتعدي يا برنس... يوم ليك ويوم عليك... واللي عليك النهارده بكره يبقي معاك لو احسنت معاملته... ربنا قال ( ادفع باللتي هي احسن فإذا الذى بينك وبينه عداوة كأنه ولي حميم )... وانا اصدق ربنا ماصدقكش انت... فلو انا احسنت معاملتك وانت ماتعدلتش يبقي انت اللي غلط... والحجر الداير لابد من لطه... واللي لزقك قفا النهارده... بكره يعرف قيمتك ويرجع يقولك آسف وعينه ماليها الكسوف... وساعتها يبان اصلك... لو انت واطي هتناوله الكف اللي رزعهولك... خليك بن ناس... وقوله معلش... واهو كله بثوابه

ولما هدد فرعون موسى عليه السلام وقومه، أن يقتل أبناءهم، ويستحيى نساءهم، مستخدمًا سيف القهر والجبروت، قال موسى لقومه (اسْتَعِينُوا بِاللَّهِ وَاصْبِرُوا) (الأعراف128)

بسم الله الرحمن الرحيم
( وإن يمسسك الله بضر فلا كاشف له إلا هو وإن يردك بخير فلا راد لفضله يصيب به من يشاء من عباده وهو الغفور الرحيم)
صدق الله العظيم

بسم الله الرحمن الرحيم
( ما يفتح الله من رحمة فلا ممسك لها وما يمسك فلا مرسل له من بعده وهو العزيز الحكيم )
صدق الله العظيم

حديث
واعلم أن الأمه لو اجتمعت على أن ينفعوك بشيء لم ينفعوك إلا بشيء قد كتبه الله لك ولو اجتمعوا على أن يضروك بشيء لم يضروك إلا بشيء قد كتبه الله عليك رفعت الأقلام وجفت الصحف

ما شاء الله كان... كان بصيغة الماضى يعني هيحصل بكل تأكيد وده مش هيتغير مهما حصل... وما لم يشأ لم يكن... يكن مضارع تفيد الاستمرار يعنى مش هيكون فى اى وقت راح او جاى

وأفوض امرى إلى الله ان الله بصير بالعباد

اللهم اني اشكو اليك ضعف قوتي... وقلة حيلتى... وهواني علي الناس... انت رب المستضعفين... وانت ربى... ان لم يكن بك غضب على فلا أبالى... ولا يعنيني شيء... ولا أملك شيء... ولا أرغب سوى فيما يعطينيه ربى... الحمد لله حمدا كثيرا طيبا مباركا...

يتأكد لي كل يوم انني في كف الرحمن أرقد... كالدنيا... ليس لي سلطان علي شيء... وليس لشىء علي سلطان... وكلما تململت تكتنفنى رحمة ربى لتقيني الزلل... اليوم... اتكور علي نفسي تماما... واعلم انني لا استحق كل ذلك... واعلم ان رحمة ربي تسع كل ذنوبى... فادعو ربي... وباسمه استهل فعلي... عليه اتوكل... وبه استعين... واتيمن الخير... فان منح شكرت... وان منع استغفرت... كله خير... لا اطلب سوي الصبر... والمزيد من الصبر ابدا لا يضر...

اصبحت ضيف الله وضيف الله لا يضام...

لا شيء يقلق... لي رب رحيم... انه فقط الترقب اللعين... الانتظار قاتل... والصبر ليس ابدا فقير...

ادعو ربي واتعجل دوما الاجابه... ولكنه لا يستجيب الا عندما تكون الاجابه خير... ولا يمنع الا عندما يكون المنع خير... منه الخير واليه... عليه اتوكل... به استعين... واتيمن الخير...

يارب لك الحمد كما ينبغي لجلال وجهك وعظيم سلطانك... عليك اتوكل... بك استعين... واتيمن الخير...

الخير آت مهما طال انتظارى... فلي رب كريم...

مثل شعبى

اللى يعمل نفسه قنطره يستحمل الدوس عليه

قريب جدا هشترى سيف واطيح فى الناس فى الشوارع قتل عشوائى... بس ده طبعا بعد ماعمل بودى بيلدنج عشان اقدر اشيل السيف... هو ليه مفيش سيوف حريمى... فييييييييييييييين جمعيات حقوق المرأه... انا عايزه سيف حريمى :(

اظن مفيش حد مش واخد باله ان البلد فى حاجه ماسه لاصلاح اجتماعى واصلاح سياسى... المشكله... مين الاول... البيضه ولا الفرخه؟؟؟... لو كل قال البيضه او كله قال الفرخه يبقى افضل المأساه ان حبه بيقولوا البيضه وحبه بيقولوا الفرخه... فالنتيجه مجهودات ضايعه فى الاتجاهين...

جرائد الحكومه تسبح في مياه البطيخ ٢ متر فراشه واربعه متر كرول يا ولاد.... تفتح الاهرام تحس الدنيا بمبي بمبي والناس مش عاملين مظاهرات ولا حاجه والناس في المحله وحشين اخي اخي بيحرقوا المدارس والعربيات ولا يعرفوش ياخويه انه بيترمي عليهم قنابل مسيله للدموع وبينضرب عليهم رصاص مطاطي ورصاص حي وقطعوا عنهم الكهربا وخطوط التليفونات الارضيه في بعض المناطق... لا لا محصلش ماحصلش... تفتح بقي اي جريده غير بتوع الحكومه تلاقي نفسك بتقرا كلام عن بلد غير البلد... هو في ايه!!!.....

ربنا قال
بي حلفت لأتيحن لهم فتنة يصير الحليم فيها حيران

وسلملي علي العاشرة مساءا من هنا ومن هنا

ماحدش ينزل من بيتهم بدون بطاقه حتي لو بنت... عند جامعه القاهره بيوقفوا المكروباصات والتاكسيات والعربيات وكله... بيفتشوهم واللي مش معاه بطاقه بيتحجز في عربية الأمن المركزى حتي لو بنت... خدوا بالكوا من نفسكوا

اصطبحنا واصطبح الملك لله... مبدئيا كده الكثافه العدديه علي المواصلات زي ماهي تقريبا بس الفرق ان في تواجد عالي لضباط المرور مبيخلوش الشوارع تقف... وفي اثناء مروري من امام جامعه القاهره لقيت خير اللهم اجعله خير ١٧ عربية امن مركزي وعربية مطافي وعربيتين مبططين كده معرفش جايبينهم منين شكلهم مصفحين شبه المدرعه الحربيه بس مبططه... وتش تش تش أنننننننن فرقة كاراتيه... يعني من الآخر هيطربقوا الجامعه علي اللي فيها... هيشطفوا العيال.... برده الحكومه كتر خيرها يعني هتحمي العيال ببلاش.... اما بقي عن التبقيق الحاد اللي بيقول ان الناس هتعلق اعلام مصر في بلكوناتها فمفيش اي بشاير... السكه من الجيزه لحد المهندسين مرورا بالدقي مافهاش علم واحد يوحد ربنا...
هذا وسنوافيكم بتطورات الأحداث اولا بأول.... الاشاعات كتير وماحدش فاهم حاجه.... عامة موظفين الحكومه موجودين النهارده من تسعه وممنوع ينصرفوا قبل انتهاء مواعيد العمل الرسميه ومفيش فوت علينا بكره... يعني اللي ليه ورقه يروح يخلصها... مع ان الاضراب قانوني بس سبحان الله ياخويه ماتفهمش جابوا الموظفين ازاي من بيوتهم... ولو اني مش شايفه اي جدوي من الاضراب بس خلينا نشوف... ربنا يستر...