21 Apr 2008

ولأن شر البلية ما يضحك فإن الكوميديا دايما بتتجلى فى أحلك الظروف...والله الدنيا دي هايفه... الواحد يحصله حاجه يقعد يولول ويقول الحقوني بعدين يكتشف ان الموضوع مش مستاهل والحل بسييييييييط... الدنيا بسيطه... والحياه حلوه... وبرده لسه احنا بنكلكعها... خليك علي راحتك وامشي بمزاجك... ماتسمحش لحد يكعبلك... ولو حد حاول يكعبلك نط من فوق رجله... واهي كلها رياضه تشد البدن...

الصدمه اللي ماتقصمش وسطك تشد عودك وتخليك ماشى ضهرك مفرود... بس أهم حاجه انك ماتكعبلش حد... ولو لقيت حد اتكعبل ووقع شده وقومه تانى ونفضله هدومه وشاورله علي السكه... حتي حاول تمشي معاه انجاجيه تتعكزوا علي بعض وقت اما الدنيا تميل عليكوا...

وعشان مسيرك يوم تقع... متضحكش علي حد اتكعبل ووقع ابدآ... ولما تلاقي حد بيضحك علي حد اتكعبل ووقع اسفخه قلمين... عشان مايصحش... يصح اننا نقع... لكن مايصحش نضحك علي حد وقع... ولا يصح نتكسف لما نقع...

وعلي رأى اللي قال... ان وقعت اتعدل واضحك ماتقلبهاش... واغلب زمانك بصبرك اصل الزمان بكاش... والنبي قال ان الصبر عند المصيبه الأولى... يعني الصبر بيبقي مطلوب في أول طلعه للمصيبه... هي الدنيا كده بلاويها كلها بتكش بعد اول غسله... اصبر بس على أول طلعه تلاقيها هانت... اصبر ده الصبر زي اتوبيس سته بيروح كل حته... لو صبرت هتروح مطرح مانت عايز... وتنول اللي انت عايزه بس اصبر... مش الأيام دول؟؟؟...

لو خدت علي قفاك في اول لفه فتاني لفه مش هتتلزق علي قفاك... لو خدت علي قفاك مرتين من نفس الكف يبقي انت اللي حمار مابتتعلمش فمتعيطش بقي... اوعي بس لنفسك... الكفوف كتير... فلما تاخد كف متزعلش برده ده مش معناه ان الكف ده مخصوص عشانك... هي بس صدفت وجت فيك... ولو ركزت هتلاقي قفا تاني اتلزق علي قفا غيرك كان مفروض يجي فيك... هي الكفوف كده... مابتميزش...

واهي ايام وبتعدي يا برنس... يوم ليك ويوم عليك... واللي عليك النهارده بكره يبقي معاك لو احسنت معاملته... ربنا قال ( ادفع باللتي هي احسن فإذا الذى بينك وبينه عداوة كأنه ولي حميم )... وانا اصدق ربنا ماصدقكش انت... فلو انا احسنت معاملتك وانت ماتعدلتش يبقي انت اللي غلط... والحجر الداير لابد من لطه... واللي لزقك قفا النهارده... بكره يعرف قيمتك ويرجع يقولك آسف وعينه ماليها الكسوف... وساعتها يبان اصلك... لو انت واطي هتناوله الكف اللي رزعهولك... خليك بن ناس... وقوله معلش... واهو كله بثوابه

6 comments:

dina said...

تعرفي اني بحبك اوي بجد
يابنتي انتي ديما بتلمسي معايا
بحسك قريبه مني في كل موقف
:)
ارتحت اوي لما قريت الي كتبتيه
حسه انك بتشكلي في حياتي الكائن الاسطوري الي في ارض الحلم
ديما بنهرب ليه لما الدنيا تضيق اوي
نشوفه بيتكلم ازاي
بيتالم زينا ولا بيضحك زينا

تعرفي انا خيافه اشوفك علشان مش تزلي على ارض الواقع
وتفضلي في خيالي كائن من ارض الاحلام

بحبك فالله

AZ said...

هههههههههههههه يابنتى انا لا كائن اسطورى ولا نيله انا خسعه زيى زيك بالظبط بس بحاول اشد حيل نفسى عشان ماعنديش حد يعملى كده :)

محمد عبد الغفار said...

وانا جالك الغصب اعمله جوده

Anonymous said...

البوست دة جميل بجد انتى حساسة

Tarek said...

بجد مش عارف أقولك ايه غير شكرا ايتها الكائن الأسطورى زى دينا ما قالت عشان مش هتتخيلى انا كنت محتاج اسمع الكلام ده اد ايه والغريب انى اول مرة ادخل عندك وفى الوقت ده بالذات

سلمى البنا said...

والله والله وغلاوتك انتي كلامك كله حكم ودرر ومواعظ ووالله انك -ولاول مرة من كتير محدش قدر يعملها معاي - قدرتي ترجعيلي شوية الامل اللي دبلوا في السكة وانا ماشية من كتر الشمس من غير مطرة
وبجد بجد النهادرة بذات كنت محتاجة اقرا كلام زي اللي انتي كاتباه في البوست ده


ميرسييييييييييييييييييي