29 May 2006

نكتة قبيحة

ياترى الحاجات شايفانا ازاى وبتقول علينا ايه ؟؟.. يعنى زى مانا شايفه الحيطه اللى قدامى وبقول عليها فاضيه وممله هى شايفانى ازاى وبتقول عليه ايه؟؟ وعلى اللى قعد قدامها قبلى واللى هيقعد قدامها بعدى.. دايما الفكره دى بتيجى على بالى بس باشكال مختلفه... مؤخرا سمعت نكته عن واحد لقى خاتم سحرى دعكه طلعله عفريت قاله تطلب ايه... قاله نفسى اشوف مؤخرات حريمى عريانه كتير وابقى ابيض.. العفريت حوله كبانيه.. بم بارابارم بم بم.... هى نكته بايخه مش دى القضيه بس القضيه انها ضربت فى دماغى فكره بنت لذينه... ياترى الكبانيهات رايها فينا ايه؟؟ طيب لو بصينا اوسع شويه وقلنى كرسى .. كرسى بيقعد عليه ناس كتير اوى ورى بعض.. زى كرسى فى محطة مترو... اعتقد هيبقى شىء مسلى جدا لو ثبتنا كاميرة فيديو قدام احد كراسى المترو لمدة يوم عمل للمترو من 6 الصبح لحد 12 بالليل... هنشوف العجب... واحده تقعد بعدين تقوم يقعد مكانها واحد.. واحد مهموم.. واحده مجنونه... واحد مبسوط.. واحده متضايقه... واحد وشه قاسى... واحده بتفكر... تعبيرات وشوش مختلفه.. وشوش اشكال والوان... Body Language للصبح ... ده غير المواقف اللى هنشوفها والناس بتتسابق على كرسى مين اللى هيلحق الأول.. والىل قاعده وواخده ابنها على حجرها واللى قااعده وجمبها واحد بيشاغلها... يوووه ياما... نفسى بجد اروح ومعايا كاميرا ديجيتال مخبياها واصور الناس بجد.. بس اكيد مش هقدر يوم بحاله.. يمكن قريب اعملها ساعتين تلاته اروح اترصد كرسى واتدبىء اللى يقعدوا عله اتابعهم.. وارجع بحصيله ارميها على البلوج

No comments: