غير مصرح بحمل بروز واطوال

الصيف دخل والحر هوف هوف.. وتبعا انا مبستحملش الحر عشان انا ديليكات خالس... المهم انا فى الصيف متعوده بلبس فى قدمى الكريمه (او التى كنت احسبها كذلك) اى حاجه مفتوحه وكعبها واطى فيما يعرف باسم شبشب او صندل عشان مبستحملش اى حاجه مقفوله ولا اى حاجه بيتلبس تحتها شراب الا فى الشديد الاوى (لو نازله اتسنكح فى مكان مليان تراب والا ميه فى الارض بلبس صندل من اللى بيتلبس تحتيه شراب).. طبعا بقى نظرا لانى بشتغل فى شركه مرموقه فى هذا البلد البائس فلا يجوز بأننا نلبس لبس غير رسمى Formal يعنى.. وحسب ماقالوا فى بلاد الخواجات ان الفورمال هو كل ماليس هو جينز (باعتبار انه مفهوم ان ماحدش بيروح الشغل بهدوم النوم ولا شورتات النادى).. يشاء الله تعالى انى اقرر يوم انزل من بيتنا شيك وهدومى مغسوله وكماااااااااااااان مكويه على غير العادة (سامحنى يارب).. وكملت التطقيمه بشنطه حريمى (استغفرك ربى واتوب اليك) وشبشب بصباع على الموده (على غير العاده بس لقيته شبشب جيد التهويه فاشتريته)... رئيستى فى الشغل (اللى بتيجى كل يوم ببنطلون جينز) شافت الشبشب جالها انهيار عصبى ( مع انه مابيبانش انه شبشب وانا واقفه بس هى شافتنى وانا قاعده) وجالها نوبة عياط وقعدت تقول شبشب لأ شبشب لأ... لازم تكون جزمه مقفولة... وعشان خاطرك بس هسيبك تلبسى سابوه (عند امها طبعا).. ياستى يهديكى يرضيكى البشر فى جميع ارجاء الكوكب بيروحوا الشغل باى حاجه فى رجلهيهم ماعدا شبشب زنوبه.... ودى ابداااااااا فورمال فورمال........ يا ماما مين قالك ان ده مش فورمال.. الله الوطن الفورمال.... وانا مروحه سبحانك يارب عديت من قدام فندق ابن ناس اوى فى الزمالك فى اول الزمالك...... الميريديان باين والامعرفش سمه ايه (زهايمر سورى نفيسه) شفت راجل محترم اوى شكله مهم كده ولابس بنطلون كتان ولابس جزمه منغير شراب وقميص ساده وماسك فى ايده دوسيهات وماشى جمبه واحد لابس بدله (شكله مصرى)... تشوف الاتنين ماشيين جمب بعض واحد ماشى مرتاح والتانى ماشى مركز مع جاكتة البدله الىل الهوا عمال يمطوحها شمال ويمين وهو عمال يجرى ورى كل جنب شويه عشان يلمه على صدرع.. عديتهم لقيت واحده ست اموره كده (مش من هنا طبعا) شايله لابتوب وشويه ورق ولابسه بنطلون كتان برده بوسط حزام وشبشب (كان شيك اوى ولونه بيج)..... سخسخت من الضحك.. فى اوروبا والدول المتقدمه مفهومهم عن الفورمال لا بدله ولا نيله اهه والناس اخر طعامه وشكلهم افنديه رايحه تشتغل مش ولاد شغاله يعنى... كان نفسى اصورهم واورى الصور لرئيستى عشان تفهم ان الحوار مش لبس ماهى بتلبس جينز وشكلها مبيفرقش عن شكلها اما بتطقم... فى جميع الاحوال مبتبقاش محتاج تشوفها شايله جردل ميه وخيشه عشان تعرف هى بتشتغل ايه... بعدها بيومين عملت فيها خدعه مكتشتفتهاش لغاية دلوقتى.... لبست الشبشب ابو صباع (هو بعينه) وتحتيه لبست شراب بصوابع (مع انى بكره ابوهم الشرابات دى بس اهو نص العما) ولغايه دلوقتى اديلنا داخلين فى شهر اهه مقضياها شبشب بصباع وشراب بصوابع ولغايه دلوقتى لسه مكتشفتش مع انها بتشوفنى فى اليوم سبعين مره... هو تقريبا والله اعلم.. يظهر يعنى.. ان مش الشبشب هو اللى مش فورمال.... انا اللى صوابع رجلى مش فورمال