الأستاذ الفهّامة العلّامة: الفلحوس

غريبه الناس والله .. يعني لما تبقي عايش زي خلق الله وفجأه تتكعبل في مصدر معلومات .. بني آدم يخليك تفكر بشكل مختلف فتتكشفلك حاجات ماكنتش شايفها .. تقوم أول حاجة تشوفها: إن الناس بهايم عشان مش عارفين اللي انت لسه عارفه بالصدفه من كام يوم .. طب هم ذنبهم إنهم ماتكعبلوش في شخص زي اللي انت اتكعبلت فيه وراك حته جديده من الواقع؟ طب لو هنمد نفس الخط على استقامته هنكتشف إن انت قبل ماتقابل الشخص ده كنت بهيم على فكره :D 

 

الفرق بينك وبين الناس اللي انت بتقول عليهم بهايم إيه طيب؟ طب ماشي انت عرفت إن الناس بهايم وبيتضحك عليهم وهم مش فاهمين .. وانت فهمت .. مابتفهمهمش ليه طيب لما انت بقيت الواد الفكيك اللي عارف الدنيا ماشيه ازاي وعارف في كام معلقه سكر في الشاي؟ طيب فكك من الناس وبص لنفسك .. انت عملت إيه بعد ما شوفت الواقع من زاويه مختلفه؟ قعدت تشتم الناس اللي اكتشفت إنهم ولاد وسخه بيضحكوا على الناس .. وقعدت تشتم الناس عشان هم بهايم مش فاهمين إن اللي سايقينهم ولاد وسخه .. عملت حاجة أكتر من كده؟؟؟ 

 

إزاي بتطلب من الناس تكافح مع بعض وانت ماعندكش ما يكفي من الإيمان بذاتك وبمعرفتك وقدرتك اللي يخليك تبدأ بنفسك؟؟؟؟؟؟؟؟

النوعية دي من البشر مثيرة للشفقة لأنهم مش أكتر من أبواق ناعقة عديمة الفائدة ..  قرن الكبش أفيد منهم .. وعادة برده مابيوصلوش لأي حاجة ولا بيغيروا أي حاجة .. ولا بيساعدوا حد ولا بيساعدوا نفسهم .. لأنهم بيكتفوا بالعويل والسخط على غباء وجهل البشرية والنقمة على كل الأوضاع اللي مش عاجباهم

عادة الناس دي بتكون حجتها العظمى إن ماحدش بيسمعلهم .. وطبعا هم بيشوفوا إن ماحدش بيسمعلهم عشان الناس جهلة وبهايم ومش عاوزين ينضفوا .. عمرهم مابيشوفوا أبدا إن الناس بتنفضلهم عشان مافيش بني آدم طبيعي عنده مبرر يسمع شتيمته بودنه .. لو انت شايف الناس بهايم وجهلة إزاي عاوزهم يشتروا منك كلام ولا حتي يعبروك بالجزمة القديمه وإن كنت أعلم أهل الأرض؟

لو المفكرين كانوا اتصرفوا مع الناس كده مكانش في فكر انتشر .. ولو كان كل صاحب فكرة عبر التاريخ تعالى على الناس بالمنظر ده مكانش في فكره اتحققت

رحم الله جيفارا ولعن الفلاحيس في كل مكان وزمان