امبارح مكانش كلاكيت تاني مره للثورة ولا حاجة....كان واضح جدا ان الناس اللي نزلت مسوعبه ده...مستوعبين انهم نازلوا يكملوا مش نازلين يعيديوا المشهد بحذافيره..ولا نازلين يحتلفوا بفرحة ماتمّت خدها ضرب الرصاص وطار.امبارح كان سطر جديد في رساله مهمه جدا...للعسكر...والإخوان...مجلس الشعب...وأي حد تاني بيفكر يمسك السلطة في البلد دي: الشعب مش هيقبل الحال المايل تاني.
في ١٨ محافظة امبارح انتفضت بشكل واضح وقوي ضد حكم العسكر....ولو حسبنا تعداد الناس اللي نزلت المسيرات...وضيفنا عليه الناس اللي كانت بتشاور للمسيرات من البلكونات بيحيوهم وبيشاورولهم بالنصر وبعضهم رفع أعلام مصر هنكتشف ان الكتله المنفّضة للثورة قليلة جدا....كان واضح اوي ان الشعب مش بيكره الثوره...هو ساعات مابيكونش فاهم العيال اللي بتنزل الشوارع دي عايزه ايه عشان رسالتهم بتكون معقده شويه....حتى لو بصينا هنلاقي ان الهتافات المعقده بتفطس ماحدش بيعرف يرددها...الناس بتحب الرساله الواضحة البسيطة: الشعب يريد اسقاط النضام في ٢٥ يناير الماضي....ويسقط يسقط حكم العسكر...وسلم...السلطة...في ٢٥ يناير ٢٠١٢..............دول مطالب واضحة وسهلة الفهم وبالتالي ماحصلش عليهم خلاف..وفي المرتين الناس نزلت بأعداد غفيره الشارع تهتف بيهم....ولو بصينا علي ٢٨ يناير الماضي و٢٥ يناير ٢٠١٢ هنلاقي ان الأعداد اللي نزلت امبارح اكبر بكتير من اللي نزلت ٢٨ يناير السابق...وده معناه ان الكتله الفعالة في الثورة كبرت أكتر...والكتله المتعاطفه مع الثورة بس مش بتتحرك معاها في الشوارع كبرت أكتر
وبشوية مذاكره بسيطة جدا هنكتشف الدور العظيم اللي لعبته حملة عسكر كاذبون في الحشد الغير مباشر...حملة عسكر كاذبون مكانتش بتقول للناس انزلوا اهتفوا معانا في الشوارع يوم ٢٥ يناير...الحملة كانت بتفهم الناس ليه الناس بتطالب باسقاط حكم لعسكر من أكتر من ٣ شهور....الرساله اللي ماعرفناش نوصلها للناس بمجرد نزولنا في الوارع بالهتاف ده...وروهم الواقع...والناس ادركت قسوته...وفكرة: النهارده عليك بكره عليا....كانت واضحة جدا للناس لأن الوعي الجمعي للشعب مدرك قسوة ورداءة الحكم العسكري
حملة عسكر كاذبون تطور واضح لآليات الثورة...والمسيرات آلية الثورة مكانتش بتستخدمها كتير بس رجعت تتفعل تاني مع حملة عسكر كاذبون...حملة عسكر كاذبون انتشرت بشكل تلقائي في كافة المحافظات...وكانت النتيجة ان محافظة زي أسيوط كان مفقود الأمل فيها انها تتحرك قامت امبارح بمسيرات حاشدة :)
أحمد الله من قبل ومن بعد..وأتوجه بعميق الشكر لأفراد حملة كاذبون وعميق الاحترام للشعب المصري اللي اثبت للعالم بأكمله امبارح ان الشعب ماكرهش الثورة...وان الشعب مش مع الحكم العسكري...وان الشعب مش هيسكت عالحال المايل لا ن العسكر ولا مجلس الشعب ولا غيره...وتظل الرساله الموجهة من الشعب للنواة الفعالة في الثورة: الشعب ما بيتحركش غير لما بيفهم انت بتنزل ليه ولو متفق معا هينزل بمجرد ماتقوله انزلوا من بيوتكوا على شان تجيبوا حقوقكوا
1 comment:
حملة كاذبون كان ليها دور ايجابي كثير في توعية الناس للي بيحصل حواليهم من خداع وتضليل .. وجت بعديهم حملة سلاسل الثورة ابتدت تشتغل بعد ما كانت الناس ابتدت تفوق .. انا مش بقلل من حملة سلاسل الثورة ..بس محدش ينكر الدور المهم لحملة كاذبون ..
في ناس كثير جدا كنت بكلمها رافضة من جواها وجود العسكر لكن السلبية بتاعتها مخلياها مش عايزة تشارك في دور ايجابي وواقفة تتفرج .. الضغط النفسي اللي عملته حملة كاذبون حرك ناس كثير للنزول
انا انبسطت جدا من نزولي 25 يناير فكرني بأيام الثورة السنة اللي فاتت - مع ملحوظة اني متسحلتش مشي السنة اللي فاتت زي اليوم ده .. :))
Post a Comment