من فتره كنت بقول لحد ان البعد الشخصي اختفي من حياتي تماما بعد الثورة...والنهاردة أخدت بالي اني مارست احدى عاداتي المهببه...جريمة برتكبها في حق نفسي...لما بنشغل بحاجه بنسى نفسي...تفاصيل حياتي بتختفي مابيبقاش منها غير الحاجه اللي انا مشغوله بيها
امبارح قررت آخد جولة في البلوج بتاعتي من يوم ما عملتها لحد آخر بوست كتبته...اكتشف حاجات مهمه جدا بالنسبالي...أولها ان قيام الثورة كان أمر حتمي في التوقيت ده....واني اختفيت تماما كبني آدمه من بعد قيام الثورة!
امبارح كان أول مره ابص للحاجات اللي كنت بكتبها بعين عابر السبيل مش بعين واحد بيجتر ذكرياته...ضحكت جدا: أنا هبلة فحت!
اكتشفت كمان اني كنت بعلم نفسي الصبر طول الوقت...بصبر نفسي عشان أقدر أعيش واقفة علي حيلي وماتقطمتش واني نجحت فعلا في اني اعمل كده...واني دلوقت مش بعمل كده عشان انا مابقيتش موجوده في حياتي...انا فعلا مش فاكره امتي كانت آخر مره قعدت فيها مع نفسي من بعد الثورة...بطل أكتب...بطلت أمشي...بطلت أخرج لوحدي في نزهات قصيرة...بطلت اسمع مزيكا...بطلت اطبخ لنفسي أكل بمزاج...بطلت أخرج مع صحابي القدام...بطلت اقولهم أد ايه انا بحبهم...بطلت اقولهم انهم بيوحشوني...بطلت أجيب لنفسي سكر نبات وعقود فل.........
باختصار: بطلت أعيش
النهاردة صحيت من النوم نفسي هفاني اقرا للأبنودي...قولت لبعض الناس اللي بحبهم اني بحبهم...وانهم وحشوني...وطول اليوم كان نفسي أوي أتمشى..وكان نفسي أوي في عقد فل...وكوز دره...وغزل بنات...وكيس سكر نبات