16 Jul 2011

لماذا يكره العلمانيون مطة البطيخ؟

وقع فإيدي امبارح فيديو لا يقل رخصا عن "هبه سيكس كول" الفيديو اسمه لماذا يكره العلمانيون المجلس العسكري...وجايبلك صلاه كلها عسكريين في الجامع واعضاء المجلس العسكري واقفين صف أول

طب واحد واحده كده بقى نفتكر مع بعض ان في الفتنه الكبرى عمرو بن العاص طلب التحكيم للمصحف...الحجاج ابن يوسف الثقفي من اشهر السفاحين في تاريخ الخلافه الاسلاميه وقتل ابن الزبير ابن العوام في كعبه ودي خطيئه مابعدها خطيئه والحجاج كمان كان بيصلي برده

والنماذج في التاريخ كتير جدا مليان ناس كانت بتصلي وتصوم وترتكب معاصي...ودي مش حاجه تدينهم دنيويا بقدر ماهي بتدينهم عند الله وبينه وبينهم رحمته اللتي وسعت غضبه

وياريت كمان ماننساش ان حسني حج بيت الله وصفوت الشريف كان بيعمل عمره كل سنه تقريبا...فكون ان اعضاء المجلس العسكري بيصلوا دا مايخليهومش بالأساس ناس كويسه عشان حتي نقول انهم حكام كويسين

ملحوظه معرفش بتاخدوا بالكوا منها ولا لأ...الصف الاولاني كلنا عارفين انه الاعلي ثوابا في الجماعه والناس بتتسابق عليه...الصف الاولاني كان محجوز كالمعتاد لأعضاء المجلس العسكري...الكوسه حتى في الصلاه! واخدينها بالدراع حتى الثواب بتاع ربنا...اللي يقبل انه ياخد مكان غيره في صفوف الصلاه الأولي عشان رتبته أعلى دا عندي اوسخ من اللي مابيصليش خالص


اتقوا الله قرفتونا...احنا مابنحبش المجلس العسكري عشان مابيحققش مطالب الثوره وعايز كل حاجه تفضل زي ما هي مش عشان بيصلوا...ملحوظه تانيه انا مسلمه ومحجبه علي فكره

4 comments:

Tareq Mansour said...

خدى رد السلفى ... إنتى كاف.. معلش مش عايز أكملها عشان حرام
خدى رد الإخوانى ... إنتى من الصهاينة
خدى رد الجاهل ... مينفعش تتكلمى على الناس ديه كدة
خدى ردى أنا للأسف الدين بيوجه من جهة كل واحد على حسب وجهة نظره وزى ما هو عايز
إرحمونا بقى وكلمونا من غير دين ... حلوة "من غير دين" ده ممكن واحد يكفرنى فيها لأ يا خفيف لا يا أبو لسان طويل .. أقصد من غير إستغلال الدين

moo said...

لا يا خفيف يا بو لسان بينقط سكر المشكلة فى تسطيحك للامور وتعميمك الجائر وده اللى بتحاول امينة ازالته من طريقة التفكير الشايعة الان ولكنك افسدت من حيث اردت ان تصلح واحب اطمنك يا يا عزيزتى ان حتى ابسط فلاح عارف مين اللى دقنه وخلقه حقيقى مش تيوانى

Mohamed Mahmoud said...

اللي بيقولو اساسا ان المجلس العسكري اخوان وكده مايعرفش انهم اساسا لو شاف بناتهم ولبسهم هيعرف انهم العن مما نتخيل بس هو السلفيين كده بيتمحكو لاي حاكم وبيعرفو من اين تلحس الاحذيه وماشيين بمبدأ كل ماتلحس اكتر فرصتك في الفوز تكتر

real estate egypt said...

المجلس حيسلم البلد قريبا جدا لما نشوف الحكومة حتعمل ايه ربنا يستر