23 Jun 2011

كلمة السر: س٢٨ نيابات عسكريه

شوف يا عم المواطن منك ليه….مافيش حاجه تجيب ذعر لضابط في الجمهوريه البهلوانيه بتاعتنا دي زي س ٢٨ نيابات عسكريه..ليه يا عزيزي؟ عشان دول ما بيرحموش ولا يعرفوش ابوهم…دول كده البعبع بتاعهم

لو احنا في بلد محترمه مش هتحتاج تروح تشتكي حد من الداخليه كتير…بس لأننا لسه بنضف الزباله القديمه وهنفضل ننضف كتير يبقي لازم نتعب شويه…اشتكي فرد الداخليه اللي عمل فيك اي حاجه في النيابه العسكريه…ولو س ٢٨ نيابات يكون افضل

يعني ظابط شرشحلك…أمين شرطه تنح عليك…عسكري قلب الجرشينات اللي في جيبك تاخد بعضك وتعمل حاجتين: محضر في النيابه العسكرية…وشكوى في مديرية الأمن

ولو مش مصدقين خدوا عندكوا تجربتي الشخصيه:

شوفوا يا ساده…انا حتة بت مفعوصه أكاد لا أبين من الرصيف…طولي ١٥٤ سم ووزني ٣٦ كيلو ولما بقول انا تخينه ببقى كجم٣٨…ملامحي هبله كده وشكلي ما بيديش اكتر من ١٥ سنه…يعني لا طول وعرض ولا بت برستيج حد يحسبني عندي واسطه ولا ليا ضهر…هفيّه كده زيي زي نص الشعب يعني

يوم الاستفتاء حصل مشكله والمستشار اللي ماسك اللجنه قالي روحي اعمل محضر اثبات حاله في القسم اللي اللجنه تابع ليه.

روحت القسم قلتلهم عايزه اعمل محضر اثبات حاله…راحم حادفيني على المأمور…ليه اروح للمأمور عشان اعمل محضر انا مش عارفه! بس سمعت الكلام…اول مره اخش قسم بقى وكده…اه صحيح انا عندي ٣٠ سنه…المهم المأمور قالي ما ليش فيه ومش عامل محاضر روحي دار القضاء القاضي هناك يعملك المحضر :D … شوفت فيكي يا بلد كتير وقليل انما قاضي بيعمل محضر دي ماوردتش عليا وربنا! قلتله ماليش فيه انا عايزه اعمل محضر محكمه ايه اللي اروح اعمل فيها محضر! انا عايزه اعمل محضر اثبات حاله ودي شغله القسم ومستشار اللجنه قاللي اعمل المحضر هنا يبقي هعمله هنا ماليش دعوه…يمين في شمال…الراجل وقف يزعقلي ويشرشحلي في وسط القسم…طبعا انا لقيت المواضيع دخلت في شرشحه في قلب القسم خوفت علي حياتي الصراحه وخدت بعضي ومشيت

اسكت؟ ماسكتش طبعا! الهدف دلوقتي بقي حاجتين…اعمل المحضر…واشتكي المأمور…انا مواطن ماحدش يزعقله! وكمان من الداخليه! يا دهوتي! وقفت قدام مدرعه الشرطه العسكريه اللي واقفه قدام القسم…فين اتخن رتبه فيكوا؟ قالي انا…قلتله مافيش رتبه اعلى منك؟ قالي لأ…قلتله انا عايزه اشتكي الجدع ده…قالي اتكلي علي س٢٨ نيابات ماحدش هيعملك حاجه مع الداخليه غيرهم…المهم انا فجأه صعبت عليا نفسي وجاتلي لوثه وعملت فضيحه قدام القسم لميت عليا الشارع وكل الرتب اللي في القسم خرجت وشافتني وانا بدعي علي الداخليه في وضح النهار في عرض الطريق

خدت بعضي وروحت النيابه العسكريه قلتلهم عايزه اشتكي مأمور لاقسم…بمنتهى اللطافه دخلوني لعقيد حكيتله اللي حصل…مابقاش مصدق! يقولي انتي متأكده انه المأمور اللي قالك كده؟ قلتله والله انا مش مصدقه ان مأمور قسم يقولي قاضي بيعمل محاضر بس سألتهم بتاع سبع مرات قالولي المأمور هم ادري بقى! الراجل بقى يضرب كف علي كف ومش مصدق…خد بياناتي ووعمل المحضر وقالي هبعته للقسم ماتقلقيش خلاص كده

خرجت بقي وكده خلاص الدوله اخدت حقها…بس انا حقي فين كمواطن متهزأ من مأمور قسم بطيخه مش فاهم حاجه في شغله!؟؟؟؟؟؟؟؟؟؟؟؟؟؟؟؟؟؟؟؟ اسأل هنا واسأل هنا ولاد الحلال قالولي تروحي مديريه الأمن ترزعيه شكوى…نزلت اسأل ظابط اللجنه تطلع فين دي ومافيش حاجه تانيه قريبه اشتكي فيها بما اني مطبقه وعلي كعوب رجليا من ٨ الصبح…قال يماتتعبيش حالك عميد مفتش وزاره الداخليه بتاع قطاع شرق قاعد مع المستشار المسئول عن لجان قطاع شرق في المحكمه اللي في الناصيه اللي ورانا روحيلهم وهم هيعملوا اللازم…اخدت بعضي وطلعت عليهم…عايزه اقابل الناس دي…انتي مين؟ مواطنه مصريه عندي شكوى…دخلوني…حكيتلهم اللي حصل وبعتوني تاني القسم اعمل المحضر

اخش يا مواطن القسم الاقي جوز سكموزات من النيابه العسكريه قاعدين مع المأمور بيشطفوه :D هع هع هع هع هعععععععععع

الراجل كذب وقالي انا مازعتلكيش وماقلتلكيش اعملي المحضر عند القاضي! قلتله حضرتك بتكذب علي فكره واسأل اي عابر سبيل من القسم يقولك كان صوتك جايب لحد فين وقولت ايه…راح وقف يشلقلي تاني ويقولي الناس دي كلها بتشتغل عندي! قلتله اه يا سلام…امين الشرطه حمار…ومستشار لجان قطاع شرق حمار…وعميد الداخليه بتاع تفتيش قطاع شرق حمار….كلهم مابيفهموش قانون والمفروض اكدبهم واصدق حضرتك! وازاي عميد الداخليه اللي شغله يفتش علي حضرتك بيشتغل عندك! انا عايزه اعمل المحضر!

وواحد بقي من النيابه العسكريه طلع يجري ورانا وهو مسخسخ ضحك وبيتفرج…يا اخي بتوع الجيش دول ما بيطيقوش الداخليه ابدا ابدا ابدا :D

المهم قلتله اوكيه كده المحضر وهيتعمل….حضرتك بيشتكوك فين بقى؟ انا كنت داخله لحضرتك اشتكي من نائب المأمور يقوم يطلع نائب المأمور هو المأمور…المأمور بيشتكوه فين؟ يقولي اشتكيني مطرح ما يعجبك…قلتله يعني اروح قسم تاني اقولهم عايزه اشتكي حضرتك! مافيش حاجه اسمها كده في اختراع اسمه تدرج وظيفي كل رتبه بيشتكوا للرتبه اللي فوقيها…مين اللي فوق حضرتك؟

قعد يزعألي تاني ويقولي انتي بتستفزيني! قلتله لا مش بستفزك حقي اشتكيك وحقي تقولي اشتكيك فين عامه انا كده كده هشتكيك في مديريه الأمن ووزاره الداخليه

دخلت عملت المحضر…ووانا بستلم رقم المحضر قلتلهم علي فكره ابقو قولو للمأمور بتاعكوا اني اشتكيته في النيابه العسكريه وبكره هشتكيه في مديريه الأمن ووزاره الداخليه…ومشيت

رجعت تاني للقاضي والعميد اشعر بالاهانه عشان وقف يزعألي تاني…اديتهم اللي فيه القسمه…وسألتهم يعني لما انا مواطن داخل بيعمل محضر لصالح الدوله اساسا مش داخله بقوله عايزه اعمل محضر لواحده شدت شعري وعمل معايا كده وكلمني كده اومال ده لو كنت داخلاله متهمه كان عمل فيا ايه! ودب ودب دب كلمتين بقي من هنا علي من هنا قلتلهم انا ذنبي ايه انه بقاله ٣ ايام مانامش! هو بيعاقبني علي طبيعه شغله! مش قد الشغلانه يقلع البدله والف من يلبسها لكن مايعملش كده في الناس هو في ايه! مانا بقالي ٣ ايام مانمتش انا كمان اخش اطيح في القسم يعني ولا امشي اتخانق مع الناس في الشوارع! ما هو ده شغله انا مالي مايروح يشتكي لمديره مش انا اللي ادفع التمن! هو انا بطفح الدم شغل ١٦ ساعه في اليوم عشان البسه بدله ونيشان عشان يهزأني! وطاخ طيخ طوخ واديت للقاضي رقم المحضر وقلتله حضرتك بقي وضميرك عايز تتابع المحضر او متابعوش انا ماليش دعوه انا عملت اللي عليا ومش داخله المزبله دي تاني لحد ما تتصلح..هي دي الداخليه اللي انصلح حالها! حسبي الله ونعم الوكيل…شيء مقزز!

المهم ماكدبتش خبر…قدمت في الراجل شكوى في المديريه عبر الموقع بتاعهم بتاع الشكاوى….وقفلت في الآخر ان الراجل أخد جزا واحتمال يطلع معاش مبكر في حركه التغييرات الجايه…ههع هع هع هعععععع

دي قصه من الواقع…يعني من أبو آخر كده اللي هيدفع رشوه تاني لأمين شرطه ولا يسكت لضابط ارتكب معاه مخالفه حتي لو كلمه بطريقه وحشه يبقي حقي انط في كرش المواطن قبل رتبه الداخليه….اشتكي هتاخد حقك تالت ومتلت…عشان لو سكت انا كده مش بتضيع حقك لوحدك…انت بتضيع حق بقيه الشعب معاك…الداليه ماوصلش الافترا بيها للدرجه دي الا عشان احنا كنا بنسكت ومابنشتكيش…القانون صريح يا ساده..البني آدم ماحدش ينتهك كرامته واللي مش مصدق يقرا الاعلان الدستوري ولا يقرا الكتيب بتاع حقوق المواطن لالي بتوزعه الداخليه

الا قد بلغت اللهم فاشهد

6 comments:

mohamed kharoub said...

طيب حلو الكلام ... فين كتاب حقوق المواطن اللي بتوزعه الداخليه ده

alienzero said...

http://is.gd/OmDWg1

keblawy said...

و س 28 دى موجوده ف القاهره بس ؟

يعنى الاقيها فين دى ؟

alienzero said...

علي حد علمي ان في كذا نيابه عسكريه كل واحده ليها رقم...اللي في الحي العاشر مدي نصر س٢٨...دور في المحافظه بتاعتك هتلاقي اكيد نيابه عسكريه

Ahmed El Sayed‏ said...

bgd adlobk koes we mo3br gdan bl tofek :egyptianfree.blogspot.com

real estate egypt said...

حد يعرفنا مين س 28