7 May 2011

المجلس الوطني: مؤتمر البررم الأول



مبدئيا كده أنا حزينة فحت...انا ماكنتش متفائلة اوي يعني بالمؤتمر بتاع المجلس الوطني دا...مكنتش حاطه في اعتباري انه هيغير وجه العالم ولا حاجه...بس كنت مبسوطه بيه الي حد كبير...وكنت رايحه من باب الفضول...لحد أما روحت وحسيت اني فجأه قاعده في مؤتمر لحزب اليسار المصري مثلا ولا مؤتمر في تيارالتجديد الاشتراكي..ما لا يقل عن ٥٠٪ من القائمين علي المؤتمر يساريين! بالنسبه لإنه كان مفروض مؤتمر يضم كافة الأطايف السياسيه؟ ممدوح حمزة كان عازمهم يسقفوا يعني ولا إيه الحكايه انا مش فاهمه! انا شخصيا ماعنديش مشكله مع الفكر الاشتراكي أو اليساري.....مساحة الاتفاق بينا واسعه...وليا اصدقاء كتير يساريين اشتراكيين...يكفي اني حتي يوم ٢٨ طلعت مظاهره مع يساريين والهتّيف بتاع المظاهره كان خالد السيد عضو بتيار التجديد الاشتراكي وبينوب عنه في الإئتلاف بتاع الثورة.

الأطروحات النهارده كانت يساريه! مع انو سبحانك يارب في يساريين متضايقين من الاطروحات "مكانتش يسارية كفايه"! طب لما هو من الأول مؤتمر يساري الاتجاه ماحدش قالنا ليه؟ ليه بيشتغلوا البشريه؟ جايبين ناس من شرقها لغربها ومن شمالها لجنوبها عشان يقولولهم امين علي فكر يساري وينتخبوا ١٥ واحد ولا مش عارفه كام يطلعوا المجلس الوطني بتاع الجندي اللي بتشرف عليه الوزاره عشان تاخد منه توصيه! لما اليساريين عايزين يدخلوا المجلس الوطني دا ما يدخلوه كيساريين ممثلين عن الفكر اليساري! ليه يلموا المواطنين الغير مسيسين من بيوتهم ويكتسبوا منهم شرعيه شعبيه مع انه مؤتمر يساري الاتجاه بشكل واضح! الفكر اليساري كان واضح فحت اللعنه يعني هو انا هبله يا جدعان! انا مابحبش حد يستعبطني! ماتقولوا من الأول مؤتمر يساري ولا اشتراكي ومفتوح للمواطنين للنقاش وكنت هحضر برده! لكن ماتقوليش كافه التيارات السياسيه مشاركه واخش الاقي اتنين ليبراليين واربعه خمسه مالهمش اتجاه سياسي والباقي يساريين بالثلث! والقائمين علي التنظيم فوق ال ٧٠٪ منهم يساريين! اللعنه! بجد اللعنه! ليه كده! انا مصدومه صدمه عمري في اليساريين! افهمها من الإخوان....واخدين علي حركاتهم الدنيئة دي! لكن اليساريين! يخربيت كده! دانا كنت بحترمهم فحت! وقعوا من نظري النهاردة لأسفل سافلين!

ماهو ربنا عرفوه بالعقل! لما ٣ بني آدمين من اتجاه فكري واحد يقعدوا يفكروا في خطه تنميه تفتكروا هيحطوا خطه بفكر ناس تانيه مثلا! اللعنه يعني هو ليه كده! بعدين اساسا انا مش فاهمه يعني ايه مؤتمر حوار وطني يتقدم فيه خطط تنميه اقتصاديه واطروحات دستوريه! نعم؟ افندم؟ هو مش المفروض المؤتمر ده دوره يقدم توصيات ترفع للجهات التشريعية؟ أفكار يا معلّم....مش شيل قانون وحط قانون وخطط تنمية واعمل الدستووووووووووووور... هو مش ده هدفه الحفاظ علي الثوره؟ كرامة، حرية، عدالة إجتماعيه؟ يعني مفروض نحدد النقاط اللي محتاجينها عشان نوصل للأهداف دي والجهات التشريعيه هي اللي تعملنا الخطط والقوانين! هو انا خريجة فنون تطبيقيه اللي هقولك امين علي خطة تنمية اقتصادية ولا تشريعات دستوريه؟ انا ايش فهم اهلي! انا اعرف اقولك حقي ايه كبني آدم ومواطن في بلد...اقولك اهتم بالتعليم...اقولك محتاجه مرافق في المناطق النائية...أقولك الدستور لازم يوفرلي حقوق مدنية...أقولك الدستور لازم يكفلي حرية ممارسة العقيدة والشعائر الدينيه...أقولك قانون الأحوال الشخصيه محتاج يتطور...أقولك محتاجه هيئة تراقبلي علي القضاء ولا الشرطه...أقولك محتاجه الشرطه تبقي هيئة مدنيه زي ماهو المفروض مش بتاخد حديده علي كتافها بتصريح من الجيش كل سنه...اقولك انا عايزه كليه الشرطه تاخد مجموع عالي ويدرسوا فيها حقوق انسان...الخ. وارفعها للجهات التشريعيه تعملي خطط وقوانين للكلام ده وتديني جدول زمني لتنفيذ الحاجات دي

الصدمه التانيه بقي في اليساريين اني مش فاهمه ازاي يحطوا ايدهم في ايد تهاني الجبالي وممدوح حمزة! اللعنه١ تهاني الجبالي اللي كانت بتشتغل في جامعة طنطا مستشار قانوني وعمرها ما قعدت علي منصة قضاء تحكم في نزاع بين اتنين علي حلة محشي وتتحول فجأه علي ايدين ماما سوزان لنائب رئيس المحكمة الدستورية العليا! مش تهاني الجبالي دي برده اللي كانت مع مني ذو الفقار عضوه في حركة سوزان مبارك لنهضة المرأة واتنقلت بقدره قادر من محاميه نص لبه لنائب رئيس المحكمه الدستورية العليا؟

والصدمة التالته انهم يحطوا ايدهم في ايد ممدوح حمزة استشاري جامعة اسكندريه واسم شركته سونهيتا-حمزة محفور علي يافطة مكتبه اسكندريه وبسلامته استشاري هيئة مواني البحر الأحمر - العين السخنه...ولا هو التاريخ فجأه اتنسى!


وبعدين أحب افهم بقي الأطروحات اللي اخدوا عليها آمين النهارده دي مانزلتش ليه علي الموقع الاليكتروني من بدري نلحق نقراها ونروح نتناقش فيها! الا يخربيت كده! يعني ايه تهاني الجبالي تقعد تقرالي الورقتين في خمسه واربعين دقيقه تقريبا و٤٣٠٠ مواطن مطلوب منهم ينتقدوا الكلام ده في ٣٠ دقيقه واللي يلحق اساسا يتكلم بيكون قدامه دقيقه ونص! إنه حقا مؤتمر البررم الوطني! والضحك انو الناس كانت قاعده بتسقف! وأم الزيطه بقي! اللي يقوم يهتف لعبد الناصر! واللي يهتف ضد اسرائيل! واللي جاتله لوثه عقليه في وسط القاعه فجأة وقعد يصرخ: دين محمد قبل كل شيء...دين محمد...الإسلااااااام...قبل كل شيييييييييء....

أم الهذي اللي حصل دا غير مقبول علي الإطلاق وانا بريئة منه من أوله لآخره! دا كل موضوع اتناقش واتاخد عليه آمين وطلعوا منه بتوصيات كان عايزله اسبوع بحث ودراسه وبعدين نتناقش فيه تاني عشان نوصل لمسوده تتبيض وناخد عليها تصويت! أم السلق! انا عايزه افهم لمصلحة مين الهبل اللي حصل ده؟ ايه الكروته دي؟؟؟؟؟؟؟؟؟؟؟؟؟؟


شيء مقزز لأبعد الحدود...وحقيقي مصدومه في التيار السياسي الوحيد اللي كنت بستنضفه في البلد دي بغض النظر عن مدي اتفاقي أو اختلافي معاه بس عمري ماكان عندي شك في نزاهته...وصحيح ان اللي حصل ده بيصب في مصلحة اليسار بشكل واضح...بس برده مش شايفه انه ليهم فيه مصلحة شخصيه ولكن مصلحة فكريه ليستأثروا برسم ملامح الفتره الجايه بفكرهم ودا شيء أنا ضده تماما حتي لو انا مع الفكر الاشتراكي او اليساري او غيره...ارفض ان تيار سياسي او فكري ما يحصل علي تأييد شعبي بالحيلة...بجد ماعنديش حاجه اقولها غير اخص عليكوا...مكانش العشم تيجي منكوا

ولو الإخوة الأناركيين عاجبهم اللي حصل ده يبقي انا والحمد لله وصلت للبوست أناركزم والحمد لله واشوفلي معزه بقي اسرح بيها علي الحدود بلا قلبة دماغ

8 comments:

Sharifa said...

اللعنة... حت الحزينة تفرح ما لقتلهاش مطرح. عبث و هراء..

حلم بيعافر said...

كله كده

Hassan Elsisi said...

انا ملاحظ ان ناس كتيرة مش فاهمة اللى حصل فى مصر من 25 يناير لحد النهاردة فحبيت اشارك افكارى معاكى يا امينة وانا لخصت الثورة فى هذه المقالة والتعليقات اللى اسفل المقالة وهاانتظر رايك

http://creative76.blogspot.com/2011/04/blog-post_15.html

مهندس // حسن السيسى

arabian_faithful said...

السلام عليكم
أنا فرحااااااااااان أنك كتبت تانى مش عارف فرحت خالص لما لقيتك كاتب حاجة جديدة فكرتنى و أنا صغير لما كنت بأفرح لما أشترى قصة جديدة هههههههه طبعاً ده مش معناه أن كلامك معجبنيشى بس فى نقطتين أول حاجة بلاش اللعن ده حرام و مصيبته مصيبة أنا لما عرفت خفت والله و نصحتك أهه أنت حر بعد كده بقى
ثانياً اللى كانوا منظمين المؤتمر كانوا مفترضين موافقة الجميع على كل مقترحاتكم يعنى أنتم كان رأيكم تحصيل حاصل يعنى فمتزعلشى عادى خالص والله كله كدا
أخيراً الأخوان حلوين خالص بقى أنا كل ما أحضر معاهم حاجة أتبسط منها و كلامهم كويس و معتدلين و ده رأيى أنا حر ماليش دعوة لو ليك رأى تانى




سامعك ياللى بتشتم :)

Mahmoud said...

عندي بس ملحوظة بخصوص ممدوح حمزة مش هاتكلم فيها على فكر الراجل ولا عن رؤيته ولا عن معارضته للنظام ﻷن كل الحاجات دي ممكن تلاقيها مرطرطة على النت بغطس في جوجل تقبي بيها
ممدوح حمزة كان في الميدان معانا وساعة الاعتصام بتاع مجلس الشعب وساعة الخطاب بتاع 10 فبراير وغيره وغيره عبارة عن دينامو لا يهدأ حركة ودعم وحاجات تانية كتير شفتها بنفسي وعاونته في بعضها.. ده باختصار شديد
فالراجل يعني -فيما أرى- مش محل نقد فيما يتعلق بحرصه على بذل جهد وطني

بس خلاص

بنت القمر said...

ا! مش تهاني الجبالي دي برده اللي كانت مع مني ذو الفقار عضوه في حركة سوزان مبارك لنهضة المرأة واتنقلت بقدره قادر من محاميه نص لبه لنائب رئيس المحكمه الدستورية العليا؟
-----------------
اه واعتراضها عالتعديلات انها الفيمينزم الوحيدة في مجال القضاء التي يتم تهمي
لو كانوا اختاروها كانت عجبتها التعديلات
الي اتحطت في المكان ده لولائها الاكيدة للهانم ما تفرقش عن عيشةعبهادي

Anonymous said...

معلش اسماحيلي أنا نفسي أسألك سؤال عن مدونتك :
ما فائدة المدونه هذه في حياتك:
1هل لتضييع الوقت
2 هل لتسجيل الاحداث يوم بعد يوم
3للشهرة و يبقي ليكي اراء تقوليها بمنتهي الحرية
4الهروب من الواقع و الحياة الكأيبة اللي حواليكي
5تحفظي كل ما هو جديد و ثمين بالنسبة لك في المدونة
6للتواصل مع الناس اللي علي النت لان اصحابك مش كثير مثلا"يعني
شكرا" لك .. أنا فقط أحب أعرف رأيك عن المدونات عموما" قبل أن أبدأ في صناعة مدونة لنفسي لان واضح انك قديمة قوي في المدونات و خبرة
لو عايزة تردي عليا : bbcbbc204@gmail.com
thanks :)
sry 4 interruption

جيجى said...

مدونه ممتازه