11 Apr 2011

إنه الهبل المجنح يا عزيزي وبه الكثيييييييييييير من المبالغات من كل الأطراف وأيضا الفهم الخاطيء...نرجع بقي لوري شويه كده وناخدها واحده واحده عشان نفهم الدنيا بيحصل فيها ايه دلوقت

اللي حصل يوم الجمعه كان في مظاهرات في التحرير انتهت باعتصام والجيش فضه بالقوه. المختلف بقي عن كل مره ان المعتصمين كان معاهم ناس لابسه هدوم جيش بتتظاهر من الصبح فكانت طريقه الجيش في فض الاعتصام مختلفه. كان في ضرب نار كثيف في الهوا لتفريق الجموع مش فقط عصيان كهربا وكده زي كل مره. النتيجه انه كان في ضحايا من المدنيين والجيش وظباط الجيش المعتصمين. بس المؤكد بالنسبالي دلوقت بعد فيديوهات شوفتها وشهادات ناس سمعتها ان الجيش مكانش مستهدف المدنيين كان مستهدف الضباط المعتصمين (ودي أهم حاجه بالنسبالي دلوقت: الجيش ماتجننش في مخه وقرر يقتلنا). القوى السياسيه كلها تقريبا لازالت في صف المجلس العسكري لكن تدين سقوط قتلى وتطالب بالتحقيق والقصاص...بينما في ناس خاربه الدنيا صريخ وقالبين علي المجلس الأعلي للقوات المسلحه قلبه سوده.

المجلس الاعلي للقوات المسلحه فعلا ابتدي يتخذ اجراءات وقبض علي ناس من الحزب الوطني أجروا ناس يعملوا فرتيكه. الفرتيكه دي اتكلمت عنها الشروق النهارده ان مأجوري الحزب الوطني دول لطشوا في الجيش. والمجلس قال ان الناس دي كانت منظمه هجومها زي يوم موقعه الجمل....نفس المخطط بأسلحه اخري منها سلاحين آلي ومولوتوف وخلافه.

تحليلي الشخصي للموقف ككل:
أولا بالنسبة للوضع الحالي:
دلوقتي كلنا فاهمين كويس بما فينا المجلس العسكري ان في حاجه اسمها ثورة مضاده شغلتها الشغاله انها تفتق الثوره وتمنع تحقيق اهداف الثوره وترهق الجيش والداخليه عشان تبرطع تفتقنا حتي ولو علي سبيل الانتقام بعمل قلاقل عشان تلهينا عن محاسبه اوساخ العهد الماضي...اللي لسه مش ماضي اوي برده يعني...عايزين ينفدوا بجلدهم...مفهومه يعني. المهم انهم حاولوا يعملوا اشي فتنه طائفيه واشي تحريض علي مظاهرات غير مفهومه واشي تحريض علي تخريب مباني وحرق ملفات وخلافه...وتمت السيطره...مش اوي برده بس الدنيا بقت اهدي من الأول. فطبيعي جدا شعورهم بالتهديد يعلى بالذات بعد ما وقع ناس كتير من نظام مبارك ويصعدوا الأمور لآخر مرحله وهي الوقيعه بين الجيش والشعب بطرق أكثر وساخه من الأول لأن دلوقت خلاص مفاضلش روس كبيره كتير بره بس الباقيين تقال وخايفين علي نفسهم آخر حاجه...عزمي اتحبس...صفوت بيتحقق معاه وسرور الاسبوع القادم...جمال وحسني استدعوهم للتحقيق...يعني آخر أكبر رؤوس هي تحديدا اللي مهدده دلوقت وهتوسخ علي أد ما تقدر عشان تنقذ نفسها ونتيجه ده اننا شوفنا حاجات عجيبه بتحصل اليومين دول من بعد حبس عزمي وتحديد معاد محاسبه سرور...بالرغم من انهم ممكن مايكونوش متورطين بشكل مباشر بس ليهم صباع في الموضوع حتي لو من مواليهم اللي خايفين علي نفسهم من حبس ضهرهم اللي بيحميهم

دلوقتي ظباط الجيش المقلوبين علي الجيش اعلنوا تهديدهم قبل كده انه هيعملوا حركات شديده ويشقلبوا سنطاوي من علي الكرسي يوم ١٥ مارس وماحصلش... نيجي بقي نلاقي الجمعه اللي فاتت (هذه الجمعه تقع بين حبس عزمي ومحاسبه ولي العهد وفصوت ابو شنب) ظباط الجيش المنشقين يظهروا في الميدان---> اعتصام بالليل---> تلطيش للركب...تش تش تش انننننننننننن خناقااااااااااااااه والناس تقعد تشتم في المجلس
مع فرض حسن النوايا وفرضنا ان ظباط الجيش المنشقين اختارو اليوم بحسن نيه... ده لا يعني ان ماحدش استغل وجودهم وعمل شغب علي حسهم عشان يولع الدنيا في بعضها والمدنيين يقعوا في الجيش وتبقي مليطه وتحقق الثوره المضاده (او آخرين ليهم مصالح) هدفها الرئيسي دلوقت. مين بقي ممكن يكون استغل الوضع ده عشان يقلبها حريقه بينا وبين المجلس؟ بواقي النظام طبعا واضحه بس برده ماننساش ان في ناس تانيه ليهم مصالح...زي مثلا السعوديه اللي قالبه علينا عشان علاقتنا بإيران اتعدلت...واسرائيل وأمريكا ليهم مصالح خايفين عليها...ونظرا لأن السعوديه ماعندهاش جيش...وموضوع السلفيين فكس بشكل واضح ماعادش باقي عندهم غير الوساخه لأن الضغوط اللي بيمارسوها برده فكست....والله أعلم بلاد إيه تاني اللي متضرره من الثوره ونفسها الثورة تفكس

يعني نعمل حسابنا بقي ان الفتره الجايه فيها خوازيق للركب مدعومه دوليا هتدق بينا وبين المجلس الأعلي للقوات المسلحه عشان مش عارفين يضغطوا علي المجلس يعملهم اللي هم عايزينه زي مثلا يشيلوا نبيل العربي من وزاره الخارجيه. الخوازيق دي واضحة جدا في محاولات فرهدة الجيش والداخليه زي مثلا كل يوم والتاني تلاقي مكان بيقولك فيه قنبله اقربها امبارح الجيش اتسحل في إخلاء محكمه مصر الجديده بيدور علي قنبله اتبلغوا انها موجوده هناك...معرفش لقوها ولا لأ بس الفكره ان كان في خبر عن بومبه برده في حاجه تابعه لوزاره التضامن من فتره ومش عارفه فين في اسكندريه اتكرر الموقف ومرتين كمان سمعت عنهم برده بومبه متواجده وخش يا جيش اخلي وفتش...ده بعد ما موضوع المظاهرات والاعتصامات الفئويه ما عملش قلبان كفايه في البلد ولا وقع بين الجيش والشعب بشكل يخلي الشعب يثور علي الجيش فعليا...تطلع الحاجات دي مدعومه من جوا أو بره الله أعلم...بس مدعومه بشكل ما...وده برده مش معناه ان كل المظاهرات والاعتصامات الفئويه مدانه او مشينه

لو رجعنا تاني ليوم الجمعه هنلاقي الجيش تواجد بكثافه عدديه كبيره عشان يفض الاعتصام...وكانوا بيضربوا نار في الهوا بالعبيط عشان يفرقوا المدنيين ويستفردوا بظباط الجيش المتواجدين في الكعكه الحجريه...وعملوا حاجات تانيه تتسم بالغباوه ماحدش ينكرها بس مش دي القضيه دلوقت...هي الفكره كلها ان في ناس كتير اتخضت واعتبرت ان المجلس كده اعلن الحرب علي ثوره وعاااااا الحقو الثوراااااااااا يادهوتيييييييييييي...دا ببساطه فسا ثلاثي الأبعاد...لأن تعداد الجيش مقابل لتعداد المعتصمين وتمركز وحدات الجيش في مداخل الميدان بيقول ان لو المجلس الاعلي كان منزل الظباط دول بهدف قتل المعتصمين كانوا أفنوهم عن بكرة أبيهم مكانش بقي منهم واحد علي قيد الحياه يحكيلنا اي حاجه اساسا...ودي كده حسبه بالمنطق للوضع في الميدان بشكل بصري حتي بدون سماع شهادات شهود...الصور لوحدها بتفسر النقطه دي تحديدا

المجلس بعدها بعت واحد عمل مؤتمر صحفي قعد حبه حلوين قال كلام كتير لفت نظري انا فيه التالي...المجلس اعترف أخيرا وآمن وصدق بوساخة فلول النظام...ودي حاجه إيجابية...وكمان في اقل من ٢٤ ساعه كان قبض علي ٤ من المتورطين في المليطه اللي حصلت في الميدان....في فيديوهات موجوده وشهادات بتأكد ان في مدنيين اعتدوا علي ظباط جيش...ده بخلاف طبعا تحقيق صحفي موجود في رنان الشروق النهارده بيوضح دور بلطجيه فلول النظام في ضرب كرسي في الكلوب بين الجيش والشعب يوم الجمعه...ودي حاجه هايله بالرغم من كل الخسائر حتي في الأرواح...الله يرحمهم جميعا...بس دلوقتي زنقة الجيش في وضع اتهام هتخليه يتحرك بشكل اسرع وهيطلع بوز اي حد من جوا الجيش يتغابي علي مواطن بعد النهارده وهيتعقب بشكل فعال المتورطين في اي حاجه بعد كده وده ظهر واضح في قبضه علي ٣ منهم نائب حزب وطني متورطين في مليطة يوم الجمعه

الخلاصة في نقاط:
الثوره المضاده بعد ما فشلت في تحقيق اهدافها بالكامل بتلعب دلوقتي علي آخر هدف وبتستميت في ذلك ألا وهو الوقيعه بين الجيش والشعب
الثوره المضاده بتلفظ آخر انفاسها وبتلوش جامد
المجلس الأعلي للقوات المسلحه مزنوق في وضع اتهام‎
القوي السياسية ابتدت توحد صفوفها وتحدد موقفها من المجلس الأعلي للقوات المسلحه‎
في جهات مجهوله بتحاول توجه غضب الميدان في اتجاه يصب في مصلحتها الشخصيه ‎
الناس انقسمت جبهتين مالهمش تالت...معارض شديد للمجلس الأعلي ومؤيد له والجبهتين عندهم الكثير من المخاوف وشكوك في المجلس الأعلي للقوات المسلحه حتي لو انكر ذلك الطرف المؤيد للمجلس. وماحدش فاهم المجلس بيعمل ايه وبيفكر ازاي ولا حتي المؤيدين للمجلس. ‎
المجلس الأعلي للقوات المسلحه ما قلبش علي الثوار القوي السياسية ابتدت تتوحد

الشكوك والاتهامات الموجهه للمجلس الأعلي للقوات المسلحه:
التباطوء في اتخاذ مجموعه من القرارات ومحاسبه الفاسدين‎
تجاوزات فض الاعتصام من قبل الشرطه العسكريه ومؤخرا تجاوزات الجمعه اللي فاتت اللتي سقط علي إثرها ضحايا مدنيين وعسكريين‎
المحاكمات العسكريه للمدنيين ‎
الكلام المنيل بستين نيله اللي قاله حسني مبارك امبارح علي قناه العربيه حسس الناس انه لسه بيحكم البلد وانه مش هيتحاكم وان المجلس متواطيء معاه

رأيي الشخصي في الاتهامات دي:
اتفق مع اتهامين فيهم بس وهما تجاوزات الشرطه العسكريه والمحاكمات العسكريه للمدنيين...دول حاجتين انا مش شايفه ليهم اي مبرر في الوجود ولا قادره ابلعهم ولا يحقلنا نبلعهم اساسا ومش لازم نسكت عليهم.
اما بالنسبه لبقية الاتهامات فأحب أقول ان التباطوء مش تواطوء ولا حاجه في الوضع اللي احنا فيه ده..علما بإن ده مش تباطوء اساسا..و احنا ناسيين بطء القضاء بتاعنا ولا لسه حاجه جديده علينا؟ مقارنه بالطبيعي احنا كده ماشيين بسرعه الصاروخ في موضوع المحاكمات القضائيه
. ممدوح شاهين وضح قبل كده ان اي حد هيتحبس من النظام لازم يكون بطريقه قانونيه مش اجري واقفش واعتقل عمياني...وانا مع وجهة النظر دي تماما...اولا الناس اللي سارقين فلوس زي حسني وهربوها بره دول اي حكم قضائي يطلع من خارج القضاء المدني هيضيع علينا فلوسنا المسروقه كلها لأن محاكم العالم مش هتعترف بيه ويبقي مانابناش حاجه. ولو لاحظنا كمان ان الظباط الصغيرين في كل المحافظات بيتم اخلاء سبيلهم من النيابات مش عارفين يدخلوهم محاكمات بتهمه قتل المتظاهرين لعدم كفايه الأدله مره ولتضارب اقوال الشهود مره تانيه...في حين ان حبيب العادلي وعز وجرانه وآخرين اللي بدايه محاكماتهم اتأخرت شويه اللي بيقع منهم مابيطلعش بره السجن...يعني لابسين لابسين لأن القضيه متظبطه تمام...ومش شغل المجلس ولا الجيش انهم ينزلوا يدوروا علي ادله...دي شغلة الداخليه ولجان تقصي الحقائق والفصل للنيابه والقضاء فمينفعش الوم الجيش ان في حد لسه ماتحاسبش...اللي ماتحاسبش ماحدش جه جنبه عشان مش متقدم ضده بلاغات بأدله تقيم دعائم قضيه

بالنسبه لموضوع حسني بقي ده كان بالنسبالي صك براءه المجلس الأعلي للقوات المسلحه من تهمة التواطوء مع حسني...لأن ببساطه واضح جدا النعره اللي بيتكلم بيها حسني ولا كأنه لسه بيحكم البلد ومالي ايده علي الآخر...يعني بيقولنا انا فوق المجلس حتي لو مش في الحكم...واعتقد ان المجلس الأعلي للقوات المسلحة مش برياله عشان يطلع حسني يقول بيان بيوحي بتواطوء المجلس مع حسني...ده بخلاف ان كل اللي قاله أساسا فسا قانوني بحت...النائب العام مالوش دعوه بأي حاجه بعد ما حول المتهم بقضيه..يعني باختصار حسني كان طالع هو كمان بيدق اسفين بينا وبين المجلس عشان نقفش عليهم...حاجه كمان احب اوضحها ان الإقامه الجبريه مش بتشترط بالضروره قطع الاتصالات...وده كان ملف صوت سهل جدا يتبعت حتي علي الانترنت...واحنا عارفين ان قناه العربيه سعوديه ولسه قايلالكم من شويه السعوديه مقلوبه علينا ونفسها تفتك بالثوره عشان تحمي مصالحها الشخصيه

الخلاصه:
الوضع العام بالرغم من لخبطته الشديده يدعو للتفاؤل والثقه في المجلس الأعلي للقوات المسلحه بالرغم من المآخذ عليهم. واعتقد المجلس الأعلي يقدر يحل الأزمه اللي عماله بتكبر وتصغر كل شوي بأنه يخلق قناه اتصال مع الشعب يوضح فيها إجابات الأسئله دي... عامة في النهارد حلقه مع المجلس الاعلي ويسري فوده الساعه تسعه هيكون فيها كلام مهم المفروض علي حسب كلام قناه اون تي في...حتي لو طلعت قلش فهي بدايه طيبه اعتقد هنفهم منها حاجات كتير...والحلقه دي في حد ذاتها تعني ان المجلس ادرك انه محتاج يشرح نفسه للشعب ودي حاجه تدعو للتفاؤل بالذات لم نحط جنبها ان عصام شرف هيقول بان كل اسبوع يفهمنا ايه اللي بتعمله الحكومه...انا متفائله :)

30 comments:

Asmaa said...

بجد انتي لخصتي الدنيا بشكل سلس وسهل وواضح .. وتقريبا قفلت كل الثغرات التي تدور في اذهاننا .. لكي كل الشكر والتقدير يا صديقتي واختي العزيزة .. تسلم ايديكي بجد

Mohamed Elesawy said...

تشخيص واقعي جدا جدا

شريف said...

لولا ان الكلام داخل النخاشيش ومسنتح في النافوخ .. مكنتش كملته ... بجد خلفية البلوج الحمرا دي بشعه

3ezzoo said...

Change the red background :)

lo2lo2a said...

طيب ماشي .. انتي حسستيني ان الحياة لونها بامبي والأمن مستت

بس متهيألي انك شايفة الصورة صح
ومن خلالك فهمت حاجات كتير

وهحاول اتفاءل زيك أما أشوف المجلس العسكري هيعمل ايه

ويارب اللي يفرق بينا وبين الجيش يطأ يموت ويريحنا

Aly BuTch said...

fein el mo7akamaat el seyaseya. 2nty 2olty no2ta mohema gedan "ento 3arfeen el kanoon el masry" ma7na 3arfeeno 2no kolo ma7'aareg we 2arraf we beyaa7'od seneen!!! we cant wait seneen !! for me 7'etaab mubara ( we da ra2y naas keteer i think ) 2no bey2oool 2na sateft wara2y we hato a7'erkoo!!

الخوجة said...

ساتفاعل معكم ونبتعد عن نظرية المؤامرة واوفقك الرأى انه بمناسبه تشريف موافى سيتبرع اعوانه بالخوازيق شىء مش جديد عليهم وننتظر المزيد

مهندس مصري said...

ما ردوش على أي سؤال في الحلقة
كل كلامهم لف و دوران

mido said...

البوست كله مبنى على براءة ونزاهة المجلس العسكرى؟!؟

Anonymous said...

law hoa da ele inta shofto men el videos , tebqa inta a3ma saik zai elhomara ele ismaha nawara nigm

m said...

لست مصرية وانا مسلمة احمل هموم امتي من بلاد الحرمين (المملكة العربية السعودية ) دعائي الخالص لاهلي في مصر ان ينصرهم الله نصرا مؤزرا ويرفع عنهم الغمه ويصرف عنهم الشر كله ويكتب لهم فيما عملوا الخير والصلاح
وجهة نظر : اذا لم يصدر من السعودية اي تأييد للثورة فليس معنى ذلك انها تريد الخلاص منها ولكن هناك اعتبارات سياسية قد تكون سبب صمتها ولكن ثقتي بالله ثم بحكومتي ثم بشعبنا في المملكة اننا قلبا وقالبا معكم ونتمنى ان يتولى امركم خياركم

Anonymous said...

Excellent analysis indicating deep thinking and longterm awareness. couldn't agree with you more and wish everybody could read this.

حبيبة said...

عارفين حسنى وعصابته فكرونى بمين ؟؟؟ فكرونى باللى راح يبطل مفعول قنبلة راح مسرعها وانفجرت فى وشه
كان واضح جدااا ان اللى حصل يوم الجمعة كان مؤامرة عشان يخبط الجيش مع الشعب وده اللى قالوا الدكتور صفوت حجازى لما حكى عن الظابط اللى بكى قدامه وقالو خد الناس دى وامشوا من هنا الجيش هيضيع

hayat ank said...

المجلس الاعلى مضبط مع النايم العام زى المخلوع وحضرته خايف يظلم المخلوع اكتر من خوفه من انه بيقتل الناس وبيحاكم الناس باحكام عسكريه المجلس الموقر بيقول انه مافيش ضغوط وواضح انه مش حقيقى المجلس افتكس حكايه البلطجيه واعمال الشغب وده مش حقيقى والى اتهموهمطلعوا اهم ناس عاديه تصادف انها كانت قاعده على القهوه بس يومبهاالمجلس الاعلى بيتكلم زى الحزب الوطنى بيحاول يسوقلنا الغلط علشان نبلعه ويبقى صح ومش ها ومش هامه الناس الى ماتت فى العراقواستضاف حد يسقفلوا ولم يستضيف ناصر امين علشان محايد واختار حد زى العوا من الحرس القديم

jawdat said...

انا مش مصري .. بس من يوم قامت الثورة في مصر و انا عندي احساس ان الثورة هاي بتهمتي و بتهم كل انسان بيحب العدالة و المساواة في الحقوق ..الله معكم و ربنا يوفقكم

الدرويش المرووش said...

سلمت يمناكى يا هانم و الله

Salah said...

الله يفتح عليمي وينورلك عقلك كمان وكمان إحنا في النهاية كالناس غير قواتنا المسلحة العظيمة وهي مؤسسة محترمة وإذا ذكرت الوطنية فهي مؤسستنا العسكرية

Anonymous said...

شاطرة يا امينة ... انت جبتي من الاخر ... انت عارفة ان انا كنت في الجيش وعارف ايه المآخذ اللي عليه كلها ولكن ده لا يبرر اطلاقا ان نكسر العكاز اللي ماشيين عليه .. لو كنا حننضف البلد من الفساد يبقي اخر مكان ننضفه هو الجيش ... letoubib درديري

القرية العربية said...

شكراً جزيلاً

Nehad said...

الله ينور عليكى يا أمينة , انا لسه متابع برنامج يسرى فودة معاكم و بصراحه شديده أنتى فاهمه كويس الدنيا ماشيه ازاى , بجد بجد ثمبس اب و برافو عليكى و ربنا معاكى و معانا و مع مصر

Ibrahim said...

بسم الله ما شاء الله ،، حتي لما كنتي بتكلمي مع يسري فودة ، الوحيدة اللي حسيت إنها بتكلم بصدق و افكار مرتبة و منطقية ،، أنا بقيت أكره كل اللي اسموهم نشطاء

arabian_faithful said...

السلام عليكم و رحمة الله و بركاته

أولاً أنتى بتتكلمى حلو أووووووووووووووووى
بس كتير أوى :)
بس أنتى بتفكرينى بنوارة بس من غير شتيمة ياريت توصى نوارة علينا تقلل الشتيمة علشان مهبدلانا على الأخر
ثانياً أنا فعلاً محظوظ لأنى قريت كلامك و سمعتك النهارده و الله ما هى مجاملة حضرتك متعرفيش السعادة اللى سببتهالى و ربنا يجازيكى خير يا رب لأنك أول حد أحس أنه مننا و صادق و ذكى و مش فرحان بقى بأنه طلع فى التليفزيون وعاملنا فيها المناضل الثورى محرر العبيد و يقول أزاى الجيش يجرأ ياخد قرار من غير ما يرجعلى منهم لله المنافقين اللى ذلينا معاهم دول
ثالثاً أنا كنت شفتك أتكلمتى عن الأخوان أنا مش أخوان و معرفشى عنهم حاجة بس فعلاً أنا بأحترمهم بشدة و بمشيئة الله تعالى ناوى أنضم لحزبهم و شايف أنهم أفضل الموجودين حالياً على الساحة بلا مجاملة و أصدقهم و أخلصهم نية و كفاية أنهم الوحيدون الذين لم يدعوا البطولة على الرغم من دورهم والله العظيم و أنا أشهد لهم على دورهم فياريت بقى لو شايفاهم وحشين تقوليلى ليه و إلا ذنبى فى رقبتك بقى:)
رابعاً أنا عندى 3 أسئلة معلشى
يوم الجمعة القادم بمشيئة الله عز و جل حيحصل أيه الناس حتنزل الميدان ولا حترحمنا لو جه الله و ليه محدش بيتكلم خالص من أى حته يوضح موقفه؟
الناس بقى اللى حينزلوا يوم الجمعة عاوزين أيه ولا هما نفسهم يوصلوا لحاجة عارفين أنهم مش حيطولوها من الناس فحيحاولوا يطولوها من الجيش؟
أخيراً بقى أنا والله العظيم عندى سؤال حيعبطنى هوا النزول لميدان التحرير ده ضغط على الجيش و لا ضغط على الدولة؟

أسف على الرغى بس يا ريت تجاوبنى على سؤالاتى و متعملشى زى نوارة
سلام الله عليكم

arabian_faithful said...

معلشى أخر حاجة

بجد بجد بجد حرام عليكى اللون الأحمر الرهيب ده أنا لابس نضارة من غير حاجة و أنت كده حتتسبب أنى أقلع النضارة و أمسك عصاية

حسن السيسى said...

السلام عليكم ورحمة الله
اولا : لازم نفهم ان الجيش او بمعنى اصح المؤسسة العسكرية خط احمر لا يمكن عبوره وانا وجدت جملة فى حوار الاستاذة امينة فى التلفزيون وهى بتقول فى فرق بين الجيش وبين المجلس العسكرى وطبعا هذا كلام غلط شكلا وموضوعا لان الجيش هو المجلس العسكرى ببساطة لاننا كنا بنقول الحكومة لا تمثل الشعب لانها كانت فاسدة لكن الجيش هو المجلس العسكرى وعلشان يكون التعليق صغير ان هااقتبس بعض الجمل من مقالات سابقة لى حتى تتضح الامور والمقالات الاصلية موجودة فى مدونتى ومنشورة قبل الثورة بشهور فى صحف مصرية وعربية

""
سوف ابدا هذه المقالة بمقولة الدكتور أوسكار ليفي اليهودى الشهير الذى قال "" نحن اليهود لسنا إلا سادة العالم ومفسديه ومحركي الفتن فيه وجلاديه "" … ولقد حدثت نبؤتى فى المقالة السابقة ان رجال الجيش المصرى و رجال المخابرات المصرية لن يسمحوا بفوضى داخلية فى مصر … ولقد قتل الجيش المصرى الفتنة والفوضى الخلاقة التى اراد ان ينشرها الغرب وفقا لخطة صهيونية "" قديمة "" مكتوبة فى بروتوكولاتهم الشهيرة … لانه لولا حكمة رجال الجيش المصرى لتحول الامر فى احداث 25 ينايرالى مذبحة داخلية مصرية يعقبها فوضى لا حصر لها … وانا اعتقد ان الخطر مازال قائما وهم مازالوا يحاولون حتى الان نشر الفتنة فى مصر وسيظلوا يحاولون … لذا لابد ان ينتبه الشعب المصرى والمؤسسة العسكرية ولابد ان يعلموا ان الثورة بدات ولكنها لم تنتهى ولم تنجح حتى الان …
""
===================
""
العديد من المعلقين على صفحات الفيس بوك و على صفحات الجرائد المصرية ليسوا مصريين اصلا … ولكنهم بيدخلوا ليعلقوا لبث الفتنة … لانهم يريدون التقليل من شان مصر ونشر الفتنة فى كل مكان ... ويريدون نشر الاحباط و الياس وعدم الثقة فى كل ما هو مصرى وفى الشرطة و فى الجيش و فى المخابرات المصرية ...!!
""
===========
اما بخصوص سؤال العزيزة امينة حول لماذا قلنا نعم للتعديلات فسوف تجد مقالة كاملة حول هذا الامر فى مدونتى وكل سنة وانت طيبة
وشكرااااااااااا

arabian_faithful said...

أنا حأطبعلك كلام حضرتك كنتى كاتباه



سنوه وحشه يا جمييييييييييييل
عام قبيح مضى وعام جديد اظهر وجها أكثر قبحا... فساد وكساد وحرب وأشياء أخرى... سنه جديده داخله بقفاها (خليك مؤدب ومشيها راس القرد)... وطبعا إحنا... زييييييي ماحنا.... ولا حاجه اتغيرت... الشباب البلاستيك والرجاله الورق وبنات ماركة عروسة المولد... وعيش يا برنس... اسمع مزيكا واتفرج علي أفلام... اللي يجوع يولع... واللي يتعري يولع... واللي مش لاقي الدوا برده يولع... المهم الشباب ينبسط... ويتدرمغ أكتر... بس بعد الضيق فرج.... ان ماجاش النهارده هيجي بكره... وان ماجاش بكره ييجي بعده... ان ماشوفتوش انا يشوفه ولادي.. او احفادي.. او اي حد من نسلي... بس الفرج هيجي...
ضاقت فلما استحكمت حلقاتها فرجت، وكنت أظنها لا تفرج
---------
كتنا القرف


عارفه المفروض دلوقتى نفتكر قول الله الحق فى كتابه الكريم

و كان فضل الله عليك عظيماً

صدق الله العظيم

اللهم لك الحمد حمداً كثيراً طيباً كما يليق بجلال وجهك و جزيل فضلك و عظيم سلطانك

أنا عندى سؤال أحنا ليه مش فرحانين
لو مفرحناش دلوقتى نبقى معندناش دم بصراحة

Mr esl@m said...

تصدقى بالله انت بنت لكن ب100 راجل
شكرا

mahmoud said...

أحترم كلامك جدا وانا متابع جديد لمدونتك بعد ما شوفت حوارك امبارح في اون تي في ..وفعلا لازم يستمر الضغط على المجلس لتنفيذ جميع الطلبات ونقد المجلس على تجاوزاته واعتداءاته على متظاهرين وحساب المسؤولين عنهاوالغاء المحاكمات العسكرية للمدنيين...لكل كل ده بدون إهانة وشتيمة قي المجلس أو افتعال انقسامات في الجيش لأن ده مش مطلوب نهائيا وحتى لو المؤسسة العسكرية فيها فساد ومحسوبيات كلنا عارفينها زي كل مؤسسات الدولة في النظام السابق ...فده مش وقت التصادم مع الجيش أبدا لكن أكيد هييجي الوقت المناسب فيمابعد لتطهير المؤسسه العسكرية فيه

EMA KALL said...

ارجو انضمام الاخت امينة زكي الى صفحتنا على فيس بوك (من اجل مصر - تعالوا نبدأ بأنفسنا) http://www.facebook.com/start.with.yourselves للاستفادة من وجهة نظرها التى اراها وجهة نظر معتدلة واستوحيت ذلك من ارائها التى سمعتها بالامس من خلال برنامج اخر كلام

arabian_faithful said...

هوا أنت يتكتب كتيييييييييييير
يمتكتبشى خالص

الله

وائل جلال said...

احترم كلامك وتوجهاتك
وعجبني اسلوبك وطريفة كلامك مع يسري في البرنامج
ياريب ياجمعة ناخذ بلنا انه اللي حصل لسه مش ثورة في اعتقادي لانه الثورة لازم يكون كل الشعب مؤمن بيها ده لسه محصلش ولازم نفهم السبب والدليل 77% بتاعة الاستفتاء
لازم يكون عندنا رؤيه عامة مش الحالية مجرد مطالب آنية يعني لازم نعرف انه في ناس او قوى كتير يهمها انه يفضل الناس في حالة من عدم الوعي الكافي لانه لو عامة الشعب امن بالثورة ده مش في صالح هذه القوي
وعشان نغير ده لازم نمشي في كذا اتجاه في نفس الوقت
1- نحاول رفع مستوى الوعي السياسي لدي جموع الشعب في جميع المحافظات
2- نحاول نقضي على الامية
3- نحاول بقدر المستطاع القضاء على الفساد بكافة انواعة (السياسي - الاقتصادي - الاخلاقي )
4- نطالب بالمهم للمستقبل زي
- حريات الجامعات
- قانون النقابات
- حرية جمعيات المجتمع المدني
- قانون الاحزام
- الاعلام الحر المستنير

لانه دي الجهات او الضمانة الحقيقة للرقابة على عمل سواء مجلس الشعب او الرئيس القادم وده ممكن يخليها بجد ثورة
http://elofouk.blogspot.com/