إنه الهبل المجنح يا عزيزي وبه الكثيييييييييييير من المبالغات من كل الأطراف وأيضا الفهم الخاطيء...نرجع بقي لوري شويه كده وناخدها واحده واحده عشان نفهم الدنيا بيحصل فيها ايه دلوقت

اللي حصل يوم الجمعه كان في مظاهرات في التحرير انتهت باعتصام والجيش فضه بالقوه. المختلف بقي عن كل مره ان المعتصمين كان معاهم ناس لابسه هدوم جيش بتتظاهر من الصبح فكانت طريقه الجيش في فض الاعتصام مختلفه. كان في ضرب نار كثيف في الهوا لتفريق الجموع مش فقط عصيان كهربا وكده زي كل مره. النتيجه انه كان في ضحايا من المدنيين والجيش وظباط الجيش المعتصمين. بس المؤكد بالنسبالي دلوقت بعد فيديوهات شوفتها وشهادات ناس سمعتها ان الجيش مكانش مستهدف المدنيين كان مستهدف الضباط المعتصمين (ودي أهم حاجه بالنسبالي دلوقت: الجيش ماتجننش في مخه وقرر يقتلنا). القوى السياسيه كلها تقريبا لازالت في صف المجلس العسكري لكن تدين سقوط قتلى وتطالب بالتحقيق والقصاص...بينما في ناس خاربه الدنيا صريخ وقالبين علي المجلس الأعلي للقوات المسلحه قلبه سوده.

المجلس الاعلي للقوات المسلحه فعلا ابتدي يتخذ اجراءات وقبض علي ناس من الحزب الوطني أجروا ناس يعملوا فرتيكه. الفرتيكه دي اتكلمت عنها الشروق النهارده ان مأجوري الحزب الوطني دول لطشوا في الجيش. والمجلس قال ان الناس دي كانت منظمه هجومها زي يوم موقعه الجمل....نفس المخطط بأسلحه اخري منها سلاحين آلي ومولوتوف وخلافه.

تحليلي الشخصي للموقف ككل:
أولا بالنسبة للوضع الحالي:
دلوقتي كلنا فاهمين كويس بما فينا المجلس العسكري ان في حاجه اسمها ثورة مضاده شغلتها الشغاله انها تفتق الثوره وتمنع تحقيق اهداف الثوره وترهق الجيش والداخليه عشان تبرطع تفتقنا حتي ولو علي سبيل الانتقام بعمل قلاقل عشان تلهينا عن محاسبه اوساخ العهد الماضي...اللي لسه مش ماضي اوي برده يعني...عايزين ينفدوا بجلدهم...مفهومه يعني. المهم انهم حاولوا يعملوا اشي فتنه طائفيه واشي تحريض علي مظاهرات غير مفهومه واشي تحريض علي تخريب مباني وحرق ملفات وخلافه...وتمت السيطره...مش اوي برده بس الدنيا بقت اهدي من الأول. فطبيعي جدا شعورهم بالتهديد يعلى بالذات بعد ما وقع ناس كتير من نظام مبارك ويصعدوا الأمور لآخر مرحله وهي الوقيعه بين الجيش والشعب بطرق أكثر وساخه من الأول لأن دلوقت خلاص مفاضلش روس كبيره كتير بره بس الباقيين تقال وخايفين علي نفسهم آخر حاجه...عزمي اتحبس...صفوت بيتحقق معاه وسرور الاسبوع القادم...جمال وحسني استدعوهم للتحقيق...يعني آخر أكبر رؤوس هي تحديدا اللي مهدده دلوقت وهتوسخ علي أد ما تقدر عشان تنقذ نفسها ونتيجه ده اننا شوفنا حاجات عجيبه بتحصل اليومين دول من بعد حبس عزمي وتحديد معاد محاسبه سرور...بالرغم من انهم ممكن مايكونوش متورطين بشكل مباشر بس ليهم صباع في الموضوع حتي لو من مواليهم اللي خايفين علي نفسهم من حبس ضهرهم اللي بيحميهم

دلوقتي ظباط الجيش المقلوبين علي الجيش اعلنوا تهديدهم قبل كده انه هيعملوا حركات شديده ويشقلبوا سنطاوي من علي الكرسي يوم ١٥ مارس وماحصلش... نيجي بقي نلاقي الجمعه اللي فاتت (هذه الجمعه تقع بين حبس عزمي ومحاسبه ولي العهد وفصوت ابو شنب) ظباط الجيش المنشقين يظهروا في الميدان---> اعتصام بالليل---> تلطيش للركب...تش تش تش انننننننننننن خناقااااااااااااااه والناس تقعد تشتم في المجلس
مع فرض حسن النوايا وفرضنا ان ظباط الجيش المنشقين اختارو اليوم بحسن نيه... ده لا يعني ان ماحدش استغل وجودهم وعمل شغب علي حسهم عشان يولع الدنيا في بعضها والمدنيين يقعوا في الجيش وتبقي مليطه وتحقق الثوره المضاده (او آخرين ليهم مصالح) هدفها الرئيسي دلوقت. مين بقي ممكن يكون استغل الوضع ده عشان يقلبها حريقه بينا وبين المجلس؟ بواقي النظام طبعا واضحه بس برده ماننساش ان في ناس تانيه ليهم مصالح...زي مثلا السعوديه اللي قالبه علينا عشان علاقتنا بإيران اتعدلت...واسرائيل وأمريكا ليهم مصالح خايفين عليها...ونظرا لأن السعوديه ماعندهاش جيش...وموضوع السلفيين فكس بشكل واضح ماعادش باقي عندهم غير الوساخه لأن الضغوط اللي بيمارسوها برده فكست....والله أعلم بلاد إيه تاني اللي متضرره من الثوره ونفسها الثورة تفكس

يعني نعمل حسابنا بقي ان الفتره الجايه فيها خوازيق للركب مدعومه دوليا هتدق بينا وبين المجلس الأعلي للقوات المسلحه عشان مش عارفين يضغطوا علي المجلس يعملهم اللي هم عايزينه زي مثلا يشيلوا نبيل العربي من وزاره الخارجيه. الخوازيق دي واضحة جدا في محاولات فرهدة الجيش والداخليه زي مثلا كل يوم والتاني تلاقي مكان بيقولك فيه قنبله اقربها امبارح الجيش اتسحل في إخلاء محكمه مصر الجديده بيدور علي قنبله اتبلغوا انها موجوده هناك...معرفش لقوها ولا لأ بس الفكره ان كان في خبر عن بومبه برده في حاجه تابعه لوزاره التضامن من فتره ومش عارفه فين في اسكندريه اتكرر الموقف ومرتين كمان سمعت عنهم برده بومبه متواجده وخش يا جيش اخلي وفتش...ده بعد ما موضوع المظاهرات والاعتصامات الفئويه ما عملش قلبان كفايه في البلد ولا وقع بين الجيش والشعب بشكل يخلي الشعب يثور علي الجيش فعليا...تطلع الحاجات دي مدعومه من جوا أو بره الله أعلم...بس مدعومه بشكل ما...وده برده مش معناه ان كل المظاهرات والاعتصامات الفئويه مدانه او مشينه

لو رجعنا تاني ليوم الجمعه هنلاقي الجيش تواجد بكثافه عدديه كبيره عشان يفض الاعتصام...وكانوا بيضربوا نار في الهوا بالعبيط عشان يفرقوا المدنيين ويستفردوا بظباط الجيش المتواجدين في الكعكه الحجريه...وعملوا حاجات تانيه تتسم بالغباوه ماحدش ينكرها بس مش دي القضيه دلوقت...هي الفكره كلها ان في ناس كتير اتخضت واعتبرت ان المجلس كده اعلن الحرب علي ثوره وعاااااا الحقو الثوراااااااااا يادهوتيييييييييييي...دا ببساطه فسا ثلاثي الأبعاد...لأن تعداد الجيش مقابل لتعداد المعتصمين وتمركز وحدات الجيش في مداخل الميدان بيقول ان لو المجلس الاعلي كان منزل الظباط دول بهدف قتل المعتصمين كانوا أفنوهم عن بكرة أبيهم مكانش بقي منهم واحد علي قيد الحياه يحكيلنا اي حاجه اساسا...ودي كده حسبه بالمنطق للوضع في الميدان بشكل بصري حتي بدون سماع شهادات شهود...الصور لوحدها بتفسر النقطه دي تحديدا

المجلس بعدها بعت واحد عمل مؤتمر صحفي قعد حبه حلوين قال كلام كتير لفت نظري انا فيه التالي...المجلس اعترف أخيرا وآمن وصدق بوساخة فلول النظام...ودي حاجه إيجابية...وكمان في اقل من ٢٤ ساعه كان قبض علي ٤ من المتورطين في المليطه اللي حصلت في الميدان....في فيديوهات موجوده وشهادات بتأكد ان في مدنيين اعتدوا علي ظباط جيش...ده بخلاف طبعا تحقيق صحفي موجود في رنان الشروق النهارده بيوضح دور بلطجيه فلول النظام في ضرب كرسي في الكلوب بين الجيش والشعب يوم الجمعه...ودي حاجه هايله بالرغم من كل الخسائر حتي في الأرواح...الله يرحمهم جميعا...بس دلوقتي زنقة الجيش في وضع اتهام هتخليه يتحرك بشكل اسرع وهيطلع بوز اي حد من جوا الجيش يتغابي علي مواطن بعد النهارده وهيتعقب بشكل فعال المتورطين في اي حاجه بعد كده وده ظهر واضح في قبضه علي ٣ منهم نائب حزب وطني متورطين في مليطة يوم الجمعه

الخلاصة في نقاط:
الثوره المضاده بعد ما فشلت في تحقيق اهدافها بالكامل بتلعب دلوقتي علي آخر هدف وبتستميت في ذلك ألا وهو الوقيعه بين الجيش والشعب
الثوره المضاده بتلفظ آخر انفاسها وبتلوش جامد
المجلس الأعلي للقوات المسلحه مزنوق في وضع اتهام‎
القوي السياسية ابتدت توحد صفوفها وتحدد موقفها من المجلس الأعلي للقوات المسلحه‎
في جهات مجهوله بتحاول توجه غضب الميدان في اتجاه يصب في مصلحتها الشخصيه ‎
الناس انقسمت جبهتين مالهمش تالت...معارض شديد للمجلس الأعلي ومؤيد له والجبهتين عندهم الكثير من المخاوف وشكوك في المجلس الأعلي للقوات المسلحه حتي لو انكر ذلك الطرف المؤيد للمجلس. وماحدش فاهم المجلس بيعمل ايه وبيفكر ازاي ولا حتي المؤيدين للمجلس. ‎
المجلس الأعلي للقوات المسلحه ما قلبش علي الثوار القوي السياسية ابتدت تتوحد

الشكوك والاتهامات الموجهه للمجلس الأعلي للقوات المسلحه:
التباطوء في اتخاذ مجموعه من القرارات ومحاسبه الفاسدين‎
تجاوزات فض الاعتصام من قبل الشرطه العسكريه ومؤخرا تجاوزات الجمعه اللي فاتت اللتي سقط علي إثرها ضحايا مدنيين وعسكريين‎
المحاكمات العسكريه للمدنيين ‎
الكلام المنيل بستين نيله اللي قاله حسني مبارك امبارح علي قناه العربيه حسس الناس انه لسه بيحكم البلد وانه مش هيتحاكم وان المجلس متواطيء معاه

رأيي الشخصي في الاتهامات دي:
اتفق مع اتهامين فيهم بس وهما تجاوزات الشرطه العسكريه والمحاكمات العسكريه للمدنيين...دول حاجتين انا مش شايفه ليهم اي مبرر في الوجود ولا قادره ابلعهم ولا يحقلنا نبلعهم اساسا ومش لازم نسكت عليهم.
اما بالنسبه لبقية الاتهامات فأحب أقول ان التباطوء مش تواطوء ولا حاجه في الوضع اللي احنا فيه ده..علما بإن ده مش تباطوء اساسا..و احنا ناسيين بطء القضاء بتاعنا ولا لسه حاجه جديده علينا؟ مقارنه بالطبيعي احنا كده ماشيين بسرعه الصاروخ في موضوع المحاكمات القضائيه
. ممدوح شاهين وضح قبل كده ان اي حد هيتحبس من النظام لازم يكون بطريقه قانونيه مش اجري واقفش واعتقل عمياني...وانا مع وجهة النظر دي تماما...اولا الناس اللي سارقين فلوس زي حسني وهربوها بره دول اي حكم قضائي يطلع من خارج القضاء المدني هيضيع علينا فلوسنا المسروقه كلها لأن محاكم العالم مش هتعترف بيه ويبقي مانابناش حاجه. ولو لاحظنا كمان ان الظباط الصغيرين في كل المحافظات بيتم اخلاء سبيلهم من النيابات مش عارفين يدخلوهم محاكمات بتهمه قتل المتظاهرين لعدم كفايه الأدله مره ولتضارب اقوال الشهود مره تانيه...في حين ان حبيب العادلي وعز وجرانه وآخرين اللي بدايه محاكماتهم اتأخرت شويه اللي بيقع منهم مابيطلعش بره السجن...يعني لابسين لابسين لأن القضيه متظبطه تمام...ومش شغل المجلس ولا الجيش انهم ينزلوا يدوروا علي ادله...دي شغلة الداخليه ولجان تقصي الحقائق والفصل للنيابه والقضاء فمينفعش الوم الجيش ان في حد لسه ماتحاسبش...اللي ماتحاسبش ماحدش جه جنبه عشان مش متقدم ضده بلاغات بأدله تقيم دعائم قضيه

بالنسبه لموضوع حسني بقي ده كان بالنسبالي صك براءه المجلس الأعلي للقوات المسلحه من تهمة التواطوء مع حسني...لأن ببساطه واضح جدا النعره اللي بيتكلم بيها حسني ولا كأنه لسه بيحكم البلد ومالي ايده علي الآخر...يعني بيقولنا انا فوق المجلس حتي لو مش في الحكم...واعتقد ان المجلس الأعلي للقوات المسلحة مش برياله عشان يطلع حسني يقول بيان بيوحي بتواطوء المجلس مع حسني...ده بخلاف ان كل اللي قاله أساسا فسا قانوني بحت...النائب العام مالوش دعوه بأي حاجه بعد ما حول المتهم بقضيه..يعني باختصار حسني كان طالع هو كمان بيدق اسفين بينا وبين المجلس عشان نقفش عليهم...حاجه كمان احب اوضحها ان الإقامه الجبريه مش بتشترط بالضروره قطع الاتصالات...وده كان ملف صوت سهل جدا يتبعت حتي علي الانترنت...واحنا عارفين ان قناه العربيه سعوديه ولسه قايلالكم من شويه السعوديه مقلوبه علينا ونفسها تفتك بالثوره عشان تحمي مصالحها الشخصيه

الخلاصه:
الوضع العام بالرغم من لخبطته الشديده يدعو للتفاؤل والثقه في المجلس الأعلي للقوات المسلحه بالرغم من المآخذ عليهم. واعتقد المجلس الأعلي يقدر يحل الأزمه اللي عماله بتكبر وتصغر كل شوي بأنه يخلق قناه اتصال مع الشعب يوضح فيها إجابات الأسئله دي... عامة في النهارد حلقه مع المجلس الاعلي ويسري فوده الساعه تسعه هيكون فيها كلام مهم المفروض علي حسب كلام قناه اون تي في...حتي لو طلعت قلش فهي بدايه طيبه اعتقد هنفهم منها حاجات كتير...والحلقه دي في حد ذاتها تعني ان المجلس ادرك انه محتاج يشرح نفسه للشعب ودي حاجه تدعو للتفاؤل بالذات لم نحط جنبها ان عصام شرف هيقول بان كل اسبوع يفهمنا ايه اللي بتعمله الحكومه...انا متفائله :)