أنا عايشه لوحدي واخواتي الاتنين الأكبر مني أولاد ومتزوجين...يوم ٢٥ يناير خلصت شغلي ونزلت علي وسط البلد أشارك...معرفتش ادخل الميدان فروحت اتطوع في مركز حقوقي أعمل أي حاجه....وفضلت علي هذا الحال لحد يوم الخميس...أخلص شغلي واطلع علي هناك...أمي لما كانت بتكلمني كنت بقولها متاخفيش الدنيا هنا في مدينه نصر نايمه آخر حاجه هخلص شغلي وأروح...ولما كنت بكلم اخواتي واسألهم انتوا بتنزلوا؟ بيقولولي احنا مالنا ومال الكلام ده...اتنفخت منهم جدا...إزاي أنا البنت وانا الصغيره وأنزل وهم لأ...يوم جمعة الغضب نزلت في مظاهره ومشيت لما رجلي ورمت ونمت في وسط القنابل والرصاص وقومت تاني عشان أكمل المشوار...وفضلت مخنوقه من اخواتي وماربدش علي أمي في التليفون غير وانا في البيت لما ببقي رايحه استحمي واغير هدومي...بعدها بكام يوم لما الانترنت رجعت قفشت أخويا الكبير علي تويتر بيقول انه شارك في المظاهرات....وامبارح اكتشفت ان اخويا الوسطاني كمان نزل...وشوفت جارنا اللي في الشقه اللي جنب شقه أبويا هناك...امبارح كنت مبسوطه جدا...عشان اكتشفت ان اخواتي الاتنين نزلوا سرا...كلنا نزلنا من وري ماما...ولغايه دلوقتي ماما متعرفش حاجه...والله انا حاسه اني كمان اسبوع هكتشف ان ابويا اللي عنده القلب ومعدي الخمسه وسبعين وامي اللي ما بتقدرش تقف علي حيلها ومعديه الخمسه وستين نزلوا المظاهرات...وعظيمه يا مصر
2 comments:
فعلا
25 يناير مش ملك لحد
ملك للشعب المصري كله
سواء اللي نزلوا او اللي وثقوا و نشروا الأحداث على النت
او اللي كان قلبهم معاهم
تحياتي
و الله يا بنتي إنتي أجدع من ناس كثيير ولاد و بنات و والله لولا إني برة مصر (أستراليا) كنت نزلت الثورة، أنا كنت قاعد متسلسل قدام التلفزيون و بدعي و مش عارف أعمل حاجة ، مظاهرات قدام السفارة و نكلم و كالات إعلانية و شوية نشاطات على الفيسبوك و بس
حاولت أقنع إخواتي الصغيرين إنهم ينزلوا بس رفضوا واحد قال وأنا مالي و التاني قال أنا ضد الثورة أصلاً و في الأخر كل واحد له رأيه
دي كانت أول مرة في حياتي أقول يا ريتني كنت معاهم
Post a Comment