10 Jan 2011

وآدي البوست بتاع كل سنه...بوست اقتراب عيد ميلادي...بس السنه دي في فرق كبيييييير قــــــــــــــــــد كدهوه...ألا وهو اني هكمل تلاتين سنه....تش تش أنننننننن... رقم درامي جدا... الناس قعدت تقولي حاجات كتير هتتغير لما تكملي واحد وعشرين سنه وطلع الكلام بلح....وقعدوا يقولولي مفيش حاجه هتتغير لما تكملي تلاتين سنه وطلع الكلام بلح برده... دولقتي وانا علي وش تلاتين أهه خلاص فاضل اسبوعين...

فعلا أنا حاسه بحاجات كتير بتتغير... مع اني ممكن أكون أنا شخصيا ماتغيرتش...لسه عصبيه وخلقي ضيق ولساني طويل...ولسه بالي طويل... بس صبري زاد عن الأول... دلوقتي لما بقول ان مافيش حاجه مستاهله وجع قلب بقولها من غير انفعال.... بقولها زي مابقول ان الشمس بتطلع بالنهار... وده شيء مهم جدا...ان الفكرة نفسها بقت حقيقة....مخي بيتعامل معاها علي انها حقيقه من حقائق الحياه... وده في حد ذاته مريح للأعصاب جدااااااااااااااااااااااااااااااا

قررت اني ادي لنفسي فرصه تانيه أعيش فيها الحياه بشكل مختلف....أعيد ترتيب أولوياتي...لأني اكتشفت اني عمري ما حبيت نفسي كفايه...ناس كتير كانت بتقولي كده بس مكنتش فاهمه قصدهم إيه....وناس كتير كانت بتقولي اني بستقوي علي نفسي...دلوقتي بس فهمت يعني إيه...وفعلا معاهم حق... أنا عمري ما حطيت نفسي رقم واحد في حياتي... كان دايما عندي كل حاجه أهم من حاجتي... وكل الناس أهم مني... كانت كل حاجه في الدنيا بتيجي قبل راحتي وصحتي وأي حاجه بتنتهي بياء الملكية... وده شيء قذر جدا... انا مش الأم تيريزا...وماخلفتش سكان ارض الكوكب ونسيتهم... ومانيش المرأة الخارقه ولا سوبر مان... دلوقتي لأ...الأمور اختلفت... أنام الأول بعدين أشوف الناس عايزه إيه... آكل الأول بعدين اشتغل... لو حاجه في جسمي وجعتني أروح للدكتور ماستناش لما تروح وحدها...كفاية بلح بقي

وقررت برده ادي لكل الناس فرصه تانيه انها تعيد تعريف نفسها في حياتي بشكل مختلف...اللي عايز يقعد يخليه واللي عايز يمشي مع السلامه... واللي مشي وعايز يرجع تاني برده أهلا وسهلا... لأني بعدت عن الناس كلها لفتره طويله فأكيد وضعي اختلف في حياتهم...وأهمية وجودي في حياتهم اختلفت...ودي حاجه طبيعيه...وبما اني اتغيرت في الفتره دي معرفش الناس هتستقبل ده ازاي...فأقدر أقول كده ان عام ٢٠١١ هو عام الفرص الثانية...الفرصه التانيه ليا اني اقدر الناس اللي مكانش عندي وقت أقولهم اني بحبهم... وفرصه تانيه للناس اللي كانت حطاني في اماكن غلط في حياتها انها تحطني في المكان الصح...وفعلا فعلا فعلا شيء مرهق نفسيا بشكل فظيع ان حد يحطني في حياته في مكان مش بتاعي....لانه بالتبعيه بيخيب امله فيا لما مش بديله اللي هو مستنيه...لاني انا اساسا مش مكاني هنا ولا دوري اني اعمل الحاجات دي...حتى لو ده هيحطني في مرتبه ادني عند ناس كتير برده هيكون افضل ليا وليهم...اما تزيد المسافه بينا ويفضل الود موجود وبينا علاقه شكلها مريحنا احنا الاتنين ده أفضل ألف مره من ان حد يحطني في مكان مش بتاعي ويفضل يلومني طول الوقت اني مش بأدي دوري في حياته بشكل مناسب...وبرده انا كمان هعيد وضع الناس اللي في حياتي في اماكنهم الصح عشان متصيبنيش خيبه الأمل...اتهام الآخرين بالتقصير برده حاجه مرهقه نفسيا جدا

في حاجات لسه ماوصلتش فيها لحلول ولا فاهماها اساسا.... يعني لسه برده مش فاهمه انا ليه بكسل عن حاجتي اللي انا عايزاها؟ ليه لما بيبقي في دماغي فكره مش بنفذها؟ ليه بطلت اتعلم ايطالي وألماني؟ وليه بطلت أشوف أفلام جديدة؟ وليه بطلت اشتغل كروشه؟...وليه حاجات كتير اوي كان نفسي اعملها ومش بعملها... في الأغلب بسبب اني ارهقت نفسي في الشغل زياده عن اللزوم الفتره اللي فات...بس خلاص دلوقتي جه الوقت بقي اللي اريح فيه عشان الشغل وقف علي حيله والحمد لله...وابتدي افكر في رغباتي انا الخاصه شويه

متفائله بالثلاثينات من عمري...وبما ان ده السن اللي بنعث عليه يوم الدين عشان ده بيبقي احلي هيئة لينا....قررت اني ابقي مزه...عشان لما اخش الجنه اخشها مزه...حتي لو شبر ونص...هبقي مزه شبر ونص..مش ناويه اغمقها علي نفسي دنيا وآخره الصراحه

7 comments:

بنت القمر said...

وقررت برده ادي لكل الناس فرصه تانيه انها تعيد تعريف نفسها في حياتي بشكل مختلف...اللي عايز يقعد يخليه واللي عايز يمشي مع السلامه... واللي مشي وعايز يرجع تاني برده أهلا وسهلا
:)))

Mrs-Dallawy said...

كل سنه و انتى طيبه و اتمنى نكون اصحاب اكتر فى السنه الجديده بتاعتك عشان ده يشرفنى

AZ said...

thnx girls ;)

سعدية said...

انا بحب مدونتك من زمان علشان هى جميلة زيك
مع ان لونها الاحمر متعب جدا فى القراءة:)
كل سنة وانت طيبة
:)

زهراء الفاطمية said...

اولا كل سنة و انتي طيبة يا قمر
ثانيا
من المهم انك تهتمي بنفسك و تبقي رقم واحد في اولوياتك
لكن انا مش شايفة ان حاجة واحشة ان الواحد يهتم بالناس اكتر ما يهتم بنفسه
انا بعمل كدة
اه مقصرة في حق نفسي جدا
بس انا ببقي سعيدة لما اعرف اعمل خدمة لحد و يبقي سعيد
بغض النظر ان محدش بيشكر
و بقي شئ اساسي او كنوع من الفرض اني اعمل الخدمة دي
كأنها من مسؤلياتي
بس برضه سعيدة
ثالثا
اكدي علي إعادة ترتيب الناس في حياتك
لان الموضوع دا مهم جدا و بينرفز جدا لما يخيب ظنك في حد
رابعا
نصيحة مني
طظ في الكل و اللي عاجبه شخصيتك و اسلوبك اهلا وسهلا
و اللي مش عاجبه الباب يفوت جمل
انتي مش هتمشي علي مزاج الاخرين
بس حاولي ترجعي لحياتك الاشخاص المهمين اللي بيفرقوا في شخصيتك و في مزاجك و ليهم نصيحة جيدة
اخرا
انا بستناكي تكتبي من زمان
ماتبقيش تغيبي

نصيحة
الكروشيه هيفرق كتير في حياتك
هيديكي فرصة تفكري و تريحي اعصابك
و كمان كنوع من التنفيس عن الغضب
كل سنة و انتي بخير

admin said...

الاف المقالات الحصرية والمجانيةللجميع
محتوى متميز لموقعك وحصرى وبدون تعب
فقط سجل ليصلك كل يوم 3 مقالات جديدة وحصرية يمكن اضافتها فى موقعك
لتربح منة بازن الله تعالى فقط سجل وادعيلى بظاهر الغيب
http://ocean-1.blogspot.com/
مدونة الحب اقوى مدونة تتكلم عن الحب
بانواعة وصفاتة الحسن فية والسىء تخصصنا فتميزنا
كل سنة وانتم احباء وطيبين
زورونا تسعدو بازن اللة
اترك سؤال لتجد اجابة من متخصص فى الحب
مدونة الحب
http://first-love1.blogspot.com/
وبالانجلش كمان
love
http://love1-eng.blogspot.com/
فيديو حصرى لن تجدة سوى عندنا فقط
ادعمنا بزيارتك
اقوى الفيديوهات المتميزة
http://www.flixya.com/user/rana0107546165
اقوى صور سطح المكتب
http://www.flixya.com/user/rana0107546165
اقوى المقالات المجانيه
http://www.flixya.com/user/rana010754616

mimo said...

انا بس عايز اقولك ان دي أعراض الطبيعية لتغيير فئة العشرات في عمرك
خاصة العقد الثالث ده بيبقى غلس وتقيل على القلب بس التغييرات النفسية بتبقى مريحة و بتزيد الإهتمام بالصحة
اننا نسير الآن في النصف الثاني من أعمارنا
ربنا يديكي الصحة وطولة العمر لو فيها خير غن شاء الله