ناس كتير مبقتدرش تفهم ان الواحد ممكن يستمتع بيوم من غير مايخرج ويقابل صحابه... صحيح اه صحابى بيوحشونى لما بقعد فتره مبشوفهمش عشان مسحوله شغل او مفلسه افلاس تام يتعذر معاه فعل اى شىء سوى الذهاب الى الشغل والاياب منه... اكيد ببقى متضايقه وانا مفلسه... بس نظرا لانى بفلس كل شهر وبضطر اقعد فى البيت فترات طويله عشان معيش فلوس اخرج بس مبفهمش ليه بقى انا هعذب نفسى بشعور الضيق من الفلس ماهو اكيد انا مفلستش عشان الطير الأبابيل هبطت وانا نايمه وبلعوا فلوسى مانا مفلسه عشان انا فرتكت فلوسى واستمعت باللى عملته بالفلوس... فزى ماستمتعت بفلوسى نص الشهر اقدر استمتع النص التانى من غير فلوس لان ببساطه ماحدش ضربنى على ايدى عشان افرتك مرتبى فى اسبوعين... هى حسبه بسيطه... اسبوعين فرتكة فلوس، واسبوعين انتخه فى السرير مع حبة افلام... ولو النور قطع بدرى معنديش ادنى مشكله انى انام 17 ساعه واهقوم عامله دماغ اجدع من دماغ الشرابات... واول اسبوعين بتوع الخروج باكل بره واعيش حياتى وتانى اسبوعين بتوع الافلام اديله بقى طبيخ وشوربه ومزااااااااج... الفلوس مجرد وسيله تستمتع بيها... ولو الفلوس مش موجوده هتقتدر تستمتع لو عايز... المشكله ان الناس بتحاول تضحك على نفسها بانها تقنع نفسها انها بتستمتع فقط بالنشاطات اللى بتدفع فيها فلوس كتير... دى كلها خدع... لو الواحد معندوش القدره على الاستمتاع بالحاجات البسيطه عمر عينه ما هتتملى مهما فرتك فلوس فى متع باهظة التكاليف... مالها التمشيه!!! وماله كوز دره من واحده ست غلبانه قاعده تشوى على الرصيف... والله الناس دى بتبقى قعدتهم ممتعه جدا... انا بستمتع بالقعده مع الناس اللى بتشوى الدره دى جدا لدرجه انى ممكن استهبل وكل اما يتشويلى كوز اديه لحد من اللى واقفين عشان امشى انا آخر واحده... الحياه حلوه
