28 Aug 2007

واحد سأل جحا ايه اللى معاك فى الكيس ده ؟؟
جحا: كده
الراجل: ؟؟؟ يطلع ايه ال(كده) ده؟؟
جحا: مانا لو قلتلك جوافه هتقولى هات واحده هقولك لأ هتقولى ليه هقولك كده
-------------
شىء خنيق جدا انك تشقى خمس سنين علام فى الكليه وتطفح الدم اربع سنين شغل وتطلع خبرتك فى حاجه فى شغلك وييجى بعد كده واحد مش فاهم اى حاجه فى الليله من الأساس ويسألك وبراءة الأطفال فى عينيه "ليه؟؟؟"... فى الحاله دى اختيارات الردود الديبلوماسيه شبه معدوم وفى الاغلب اقل كمية من الوقاحه أو الغتاته كفيله بقتل السؤال وقتل الرغبه فى الطرف الآخر فى طرح اية اسئلة مشابهه فى المستقبل... ولو قررت ماتردش فى الحالة دى ادعاء الجنون عن طريق تصويب نظرة فى منتهى البلاهة الى عينى السائل كما لو انه يحدثك بلسان العرب بينما انت قادم فى التوّ واللحظة من بلاد تركب الافيال فمش فاهم هو بيقول ايه، يعقبها ضحك هستيرى متخلف
-------------
مابحاولش اشرح لحد ليه امى لازم تفطرنى بسطرمة بالبيض لانى انا نفسى مش فاهمه... لكن فى نفس الوقت مابحاولش اسالها هى ليه بتفطرنى بسطرمة بالبيض عشان انا معنديش ادنى استعداد اشرحلها انا ليه بفطر رز وخضار باللحمة المفرومة
-------------
فى شغلى الجديد هروح بالكارتونه المعتاده اللى فيها الحاجات اللى بلزقها على الحيطه... والبلى الملون... والبتاعة بتاعة البقاليل... وسجادة الصلاه... ومقتنياتى الخاصه اللى بحطها على المكتب فيما يعرف لدى الآخرين باسم (الزباله اللى على المكتب)... ونفيسة (الزرعة بتاعتى)... وهسمى الكمبيوتر مسعد... وفرشى والوانى وكشكول الشخبطه بتاعى...
اللى هيختلف المرة دى انى هاخد معايا ورق ابيض اكتب عليه بقلم ماركر واعلقه على الحيطه... ورقة منهم هكتب عليها (الصبر مفتاح ستة) وورقه تانيه هكتب عليها (رابش إن رابش آوت) يعنى هتيدنى زباله اشتغل بيها هيطلع الشغل زباله... وورقة تالته هكتب عليها (حسبى الله ونعم الوكيل)... وورقة رابعه عليها الارقام من 1 لحد 10 وتحتها عبارة (انما الأعمال بالنيات)... وورقة كمان هعلقها فاضيه يمكن احب اكتب حاجه تانى بعدين...
-------------
كالمعتاد بابا كل يوم هيسالنى السؤال الأزلى (ها عاملين معاكى ايه فى الشغل الجديد؟؟؟) وارد عليه الرد المعتاد برده (عادى يابابا اكيد كويس ماحنا لسه فى شهر العسل)... وبعد شهر العسل مايخلص هرجع كالمعتاد برده شايطه ومغلوله واخش اصرخ (يا باااااباااااااا شوفت الناس ولاد الكلب عملوا ايه!!!! حاجه وسخة والمصحف) او اخش مسخسخه من الضحك (بابا.. نياهاهاها شوفت ولاد الهبله عملوا ايه؟)... وكالمعتاد برده بعد كام يوم هيبتدوا يخترعولى اسماء حركية متخيلين انى معرفش انهم بيقولوها عليه (المجنونه... المهروشه... المعقده... الخ الخ الخ)
-------------
طبعا فى الأول انا هحاول اسمع مزيكتى بصوت واطى وهلتزم بفيروز وبعض القطع الموسيقية الهادئة... لحد ماتضطرنى طبيعة المواضيع بتاعة التصميمات اللى بعملها انى اسمع ميتاليكا او زياد رحبنى وبقية الاشياء المعتادة بالنسبالى واللى طبعا معظمها بيسببلهم صدمة حضارية عنيفة خاصة وانى اليومين دول بسمع اغنية (الفار السندوء) كتير
-------------
وفى الاول برده صاحب الشغل هيسيبنى اشتغل بالبرامج اللى بشتغل بيها... وبعد شويه هيبتدى يقنعنى انى اشتغل ببرنامج مختلف عشان هو ميعرفش غيره ومقتنع انه احسن برنامج فى تاريخ البشريه... يمكن المرة دى مش هحاول افهمه ان زى الارض مابتتكلم العربى الملفات والمكن بيتكلموا بوست سكريبت وان البوست سكريبت اللى عاملاه شركة ادوب فمن الحمق انى اشتغل ببرامج تانيه... بس فى الاغلب هقوله ان الادوب الاستريتور اجمد برنامج بيعمل جرادينت ودروب شادو وميعملوش مشاكل فى الطباعة... وطبعا هو هيحاول يقنعنى ان الادوب الاستريتور كخة والانديزاين بدعة وإن الكوريل او الفرى هاند هم بتوع وات يو سى از وات يو جيت... وساعتها هزعل اوى على لحمية انفى اللى اتشال منها حته زيادة ومش هقدر اعمل حاجه غير انى اضحك واهز راسى فى يأس او ابص للورقة اللى مكتوب عليها حسبى الله ونعم الوكيل وبعدين الورقة اللى مكتوب عليها الصبر مفتاح ستة بعدين الورقة اللى عليها الارقام من واحد لعشره ومكتوب تحتهم انما الاعمال بالنيات واضحك فى خبث شديد زى ميكى (اهى اهى اهى) ويمكن ساعتها افكر جديا انى اعلق ورقة جديدة اكتب عليها (اشعة الفوتووووووووووووووووووووووووووون) ويافطة كمان مكتوب عليها (الشعاااااااااع السااااااااااااحق)... وفى الاغلب هتطن فى ودانى عبارة افروديت الشهيرة (ابتعد عنى ايها الوحش الشرير)...
-------------
مشعارفه امتى بالظبط هيبتدوا يستوعبوا انهم مايخشوش يكلمونى غير وهم معاهم ورقة مكتوب عليها (ارحمنى يا أبا الغضب)...