24 Jan 2007

سته وعشرين سنه يا دنيااااااااا

على سبيل التغيير قلت السنه دى اقضى يوم عيد ميلادى مع اصدقائى لانى مش هنفع احتفل بيه فى البيت مع الفاموليا لظروف سفر والدتى... اتفقت مع بنتين صحباتى نخرج وقولت لكام واحده صحباتى كمان وجيبتلهم تورته... اتضحلى فى الاخر انهم كانوا متفقين عليه من ورايا هىهىهىى جم يعملولى سيربرايز بارتى انتهى الامر بانى انا اللى عملتلهم سيربرايز بارتى هع هع هع... بس فى ناس جم كنت زعلانه انهم مش جايين عشان ماردوش عليه لما كلمتهم بعدي اتضح فى الاخر انه كان فيلم عاملينه عليه عشان معرفش انهم فاكرين عيد ميلادى... هو مش ده الغريب.. الغريب فى الامر ان السنه دى اول مره حد من صحابى يفكر فى كده مع انى اعرفهم من سنين.... فى ناس غريبه اوى افتكرت عيد ميلادى السنه دى!!!! بجد انا مندهشه... جالى كمية رسايل على الموبايل وايميلات بالهبل!! اكتر من اى سنه فى الحياه... يمكن عشان السنه دى بالذات اول سنه محتفلش بعيد ميلادى مع الفاموليا زى كل سنه لانى مش بعمل عيد ميلاد ولا بشوف اى حد غير افراد الاسره يوم عيد ميلادى.. كل سنه بقضيه فى وسط البلد اتمشى واكل شاورمه و ايس كريم واجيب جاتوه واشترى لنفسى هديه واروح للفاموليا نطفى الشمعه ونظرا لانه كان دايما بييجى فى اجازه نص السنه فمش متعوده انى اعمل حاجه فى اليوم ده غير الانتخه فمن ساعه ما اتخرجت وانا يوم عيد ميلادى باخده اجازه... وطبعا الامر لا يخل من التريقه المنزليه والدعاء بالشفاء العاجل من الهبل المزمن عشان موضوع الاجازه ده احم احم احم :)..وبالمناسبه صحيح انا جيبت السنه دى لنفسى زحلفه وسميتها زيزا
كان وقت ممتع جدا الحقيقه وانبسطت ان صحابى كانوا مبسوطين لان معظمهم كانوا ناس الشىء الوحيد المشترك بينهم انهم صحابى.. فى ناس مكنتش تعرف بعض خالص وناس تعرف بعض طشاش فانبسطت اوى انهم اندمجوا مع بعض... بجد كان هيبقى يوم كئيب اوى لو مطفيتش شمعه زى كل سنه.. و صحيح كمان يحيى الفخرانى كان متواجد فى المكان وجه قطع معانا التورته واتصور معانا بس للأسف نسيت اسأله هو كان جاى يعزى والا جاى يهرج :( .... والعيال بقى جابولى هديه قيمه جداااااااااااا... جابولى كارت كده من مكتبه ديوان اروح اشترى بيه حاجات من ديوان ببلاش نياهاهاهاهاهاااااااااااااااااااااااااااااااااااااااا.. انا مبسوطاااااااااااااااااااااااااااه.. وانا بحيى الحبه دول.. والحبه دوله والحبه دول.. والله بفكر اعملى كام عيد ميلاد كده كل سنه احسن الموضوع طلع مسلى جدا
---------------
البت شيماء قالتلى افتح التعليقات فى هازوها المودوع وانا مقدرش أأخر لشوشو تلب

30 comments:

Anonymous said...

az صديكتي العظيظه

ميغسي كتير انك سمعتي الكلام وهتسبينا نكومنت ونبعبر عن انشكاحنا بهذا العيد ميلاد

كل سنه وانتي طيبه بقي
وعقبال 50 سنه كمان

Anonymous said...

اليوم كان روعة...انبسطت جدا بجد
كل سنة و انتى طيبة و عقبال 100 سنة بس نسيتى تقولى حاجة يا جميل...يا جماعة أول مرة أشوف حد بيعمل عيد ميلاده و بيجيب للناس هدايا
جابتلنا كلنا هداياaz
فيا ريت فعلا يتعمل كذا مرة فى السنة بس زودى الهدايا المرة الجاية عشان أكيد العدد هيزيد:):)

AZ said...

شيماء
انشكحى براحتشيك يا اختشى
---------
روضه...
ماتلقيش جيب السبع مايخلاش.. الواحد طول السنه عايش لنفسه.. يحترم نفسه يوم بقى ويعيش لغيره ويخليهم مبسوطين

سهر الليالى said...

كل سنة وانتى طيبة
ويا رب يجعل كل ايامك سعادة

باسم شرف said...

كل سنة وانتي طيبة يا امينة
وكل عام اجمل من السابق له
وتحقيقين كل ما تتمنيه

قشطة

Anonymous said...

زحلفة؟ الله عليكي :-) كل سنة وانتي جميلة ومبهجة وضاربة الدنيا صرمة، يا بنتي انتي مثال يحتذى والنعمة..
زحلفة؟ اللـــــــه

abdallah ahmed , عبدالله احمد said...

كل سنة و انتي طيبة

Ayat said...

كان يوم يجنن .. و الصحبة كانت تجنن .. وحتى لو ماكناش اندمجنا مع بعض .. كفاية ان انتى كنتى معانا...كل سنة وانتى طيبة يا
أحلى و أجدع بنوتة فى الدنيا .. و ياريت تنفذى حكاية أكتر من عيد ميلاد دى . انا معاكى فيها ... وربنا يسعد أيامك كلها ياااارب
حبى وقبلاتشى

أُكتب بالرصاص said...

من زماان وانا باحاول اترك تعليقات هنا.. لكن ..الكومنتات بتبقى مغلقة للتحسينات

فدي فرصة كويسة نقول كل سنة وانت طيبة ..
واشكر
life
me
آيات
اللي عزمتني على العيد ميلاد
قصدي على قرائة بوست عيد الميلاد :)

محمد عبد الغفار said...

سعيد انك سعيده ، وسعيده بقى

Eve said...

happy birthday, 3a2bel el miyyeh w tnein :)

Ghada said...

لازم طبعا تفتحي التعليقات.. أمال نقول لك كل سنة وإنت طيبة إزاي، ونطالب بحقنا الدستوري في التورتة والغير دستوري في كارت ديوان.. احم
ماتتبنيني الفترة الجاية !

كل سنة وإنت محافظة على روحك يا az
:)

Lasto-adri *Blue* said...

كنتى على بالى والريس بيفتتح معرض الكتاب يا مينة... ولما اتأخرت وطلع امتحان كفتة ومش ولا بد
قلت اكيد دة
amina's effect
(neyahahahaaa)

كل سنة والزحلفة طيبة يا رب

فلة said...

كل سنة وانتي طيبة يا حبيبتشي

KareemFromEgypt said...

happy birthday ya AZ

and bardo a7eb astaghel hazoha el forsa el 3azeema dih we o7ayeeky 3ala the following:
hazoha el mawdoo3, nyaaahahaa, otobees setta elly beyroo7 kol 7etta, in general i love your writting style and i think you are one of the best underrated bloggers, thanks for keeping us in fresh smiles, kol sana wenti tayeba ya AZ

AZ said...

أمانى
وانتشى تشيبه يا اختشى وعقبال عندك للولوللىىىىىىى
-------
باسم شرف
مشكرين يافندم :)
-------
عمر
ربونا يخليك يافندم.. زيزا (الزحلفه) بتسلم عليك وبتقول متشكرين السؤال
---------
عبدالله احمد
وانت بالصحه والسلامه.... او ل مره اعرف انك بتيجى هنا.. منور المنتشئه :) ودى فرصه انى اقولك حاول تتصرف فى قفا الراجل اللى حاطه عندك ده.. رقبته (قفاه) عريضه اوى احم لامؤاخذه يعنى
----------
ME
حبيبة قلبى.. عصفورة فؤادى...... وانتى عارفه الباقى بقى
----------
اكتب بالرصاص
يالله انا قلت بقى اوكازيون بمناسبه عيد مولدى المجيد
-----------
اخويا شئيئى
شوفت نسيت اقول ليحيى الفخرانى يكتشفنى.. السنه الجايه بقى يمكن اقابل على بدرخان والا هو مات؟؟ يالله نيازى مصطفى موجود
------------
ايف
منوره ياست الكل وحشانى.. دايما مشغوله انتى مش مصدقه نفسى والله :) وحشانى
--------------
غاده
لاااااااااااااا يا ماما سورى ده انتى كده هتخلينى اعلن مقاطعتى لكل سوس الكتب لحد ماصرف الشيك ولا اعرفك.. ممكن ابقى اسيبلك الظرف اللى فيه الكارت :p
-----------
لستوووووو
هى هى شوفتى انا سرى باتع ازاى.. اى خدمه هو انا عندى اعز منك الغيله امتحانات.. قولى بس انت يا جزر هتلاقينى قدامك
----------
فله
وانتشى طيبه.. وحنينه يا اختشى
------------
كريم اوف ايجيبت
مشكرين يافندم.. احد دواعى سرورى رسم بسمه على وجوه الخرين بمبارابارم بمبم.. مش بالذمه انفع اطلع فى التليفزيون ارخم عالمشاهدين... اشمعنى انا يعنى :(

abdallah ahmed , عبدالله احمد said...

يا بنت عيب

قصدك ايه
انا كده مدي قفايا للدنيا و ببص لها بقرف

ماشي
اوكيه
مسيرنا نتقابل

بس برضه كل سنه و انتي عسولة

mitar2a3 said...

happy birthday 2 u :)

AZ said...

عبدالله
احم هو الله المشكله مش فى حموقف معاليك من الحياه هو بس الخط الخلفى للقفا لو يتظبط هتبقى الصوره فله
ومتشكرين على اهتمام سعادتك يافندم داحنا زارنا النبى لولولوللىىىىىىىىىىى
-----------
مطرقع
توشكر يا زووووووووووووووق

abdallah ahmed , عبدالله احمد said...

برضة كل سنة و انتي جميلة

AZ said...

عبدالله
ثوكلان

wa7ed mn masr said...

يا ست إيه.زى هل هلالك ، أنا طبعاً قبل ما أقولك كل سنة و إنت طيبة ، لازم نظهر سعادتنا البالغة بأنك فتحت التعليقات و إندمجت بقوى الشعب العاملة اللى هيشيلوها من الدستور ، عموماً يا ستى كل سنة و إنت طيبة و بتعرفى ترسمى لوحات و شخصيات كارتون ..بالكلمات
عقبال 100 سنة

تحياتى

AZ said...

واحد من مصر
تشكرات افانظيم.. خسلنا السرف

أسوور said...

يا بنتى افتحى التعليقات بقى

زهقتينى

الكلام محشور فى عقلى ونفسى أعلق على كتاباتك ومش عارفة

انتى أكيد قاصدة تعذبينى

المدونة حلوة .. بس كدة مش حلو

هو الواحد ما يعرفش يقول رايه فى البلد دى ولا ايه

AZ said...

هههههههههههههههههههههههههه
bezret_eldor@hotmail.com
email me اى تعليق عندك برده ميخلصنيش الكلما يتحشر فى زورك

mitar2a3 said...

mish momkin el posts di bashi3a!!
i love this blog .. commenting on the latest posts .. 3shan el afla elli enti 3amlahalna di !!

Memo said...

البلوج ده من اجمل البلوجات الي دخلتها في حياتي بجد
و مش عرافه ليه حسيت انك طيبه قوي و غلبانه قوي برضه
مدونه رائعه
تحياتي

AZ said...

مطرقع
كشطرين يا حاج :)
-----------
ميمو
والنبى ابقى قولى لامى احسن مش راضيه تقتنع انى طيبه وغلبانه خالث نياهاهاها

AZ said...

لامؤاخذه قصدى مشكرين يا حاج صرم يل نفيسه كتبت غلط احم احم

Bassma said...

كل سنة وانتي جميلة اوي يا بنوتة