31 Oct 2006

كنت في البلوج بتاع طارق امام وقريت الكلمتين دول
"منذ أيام قابلني صديق قديم , و بعد نصف قال لي : انت اتغيرت قوي ! أجبته بعبارات محفوظة هازلا , غير أن عبارته التالية كانت حاسمة . : انت كبرت"
لما قريتهم اتخرست.... عمري ما حد قالي كده... دايما النا اللي بقالي كتير ماشوفتهمش لما بيقابلوني بيقولولي "يااااااااه... انتي لسه زي مانتي ماتغيرتيش"..... لغايه دلوقتي اما مدرسيني من ايام المدارس بيشوفوني بيقولولي شكلك زي ماهو.. مدرسيني من ابتدائي واعدادي... وانا دلوقتي متخرجه بقالي ٣ سنين... يمكن عشان كده بطلت ابص في المرايه ومبحبش اتصور... عشان مبحسش باي فرق غير في مناخيري بس..بتكبر...... نفس الغمازه اليتيمه اللي في مكان مبيطلعش فيه غمازات لحد.. نفس الابتسامه اللي بتتعوج علي جنب ساعات... نفس لون الشعر ونفس الوان الطرح.... مفيش حاجه بتتغير الا المناخير اللي بتكبر والنضاره اللي بتتغير اما بتتكسر.... نفس الحركات الكتير... نفس العصبيه.. نفس الكلام اللي بيطلع بسرعه... نفس السنين اللي بتعدي وبتزيد علي الورق بس.... نفس الدماغ الناشفه والانفصال عن الموجودات اللي حواليه... نفس عدم القدره علي التعود علي شيء او الانتماء لشيء.. نفس الاحلام الي لسه بسعي وراها... نفس الخطط طويلة المدي.... حتي نفس الكلام اللي بسمعه "انتي غريبه اوي"........"انتي عنديه وصوتك من دماغك".... "انتي مش هتتغيري ابدا يا بت انتي!!!!!!"
المضحك في الامر ان الكلمتين بتوع طارق جم في الوقت ده بالذات... الوقت اللي انافيه بفكر هو ليه كل حاجه بتتغير وانا لسه زي مانا.... مع اني مش حاسه بان عدم القدرة علي التغير ده مشكله لكني لازلت بتسائل