10 Aug 2005

معانى

لابد و انك اردت يوما ان تسجد لصوتها..
ده تعبير قريته على بلوج... بغض النظر عن البلوج والبوست عن ايه وعن اى حاجه فى الحياه.. الجمله دى لفتت نظرى جدا.. لسبب بسيط.. لخبطتنى.. هو السجود احتياج؟ رغبه؟ والا اراده؟؟؟؟؟؟؟؟؟؟؟؟؟؟؟؟؟؟.... يعنى هل احنا بنحتاج نسجد؟ والا بنعوز نسجد والا بنختار نسجد؟
انا عن نفسى اعتقد ان السجود التلاته مع بعض لان فى حاجات نفسه جوا البنى ادم لا يشبعها سوى السجود وده اللى بيخلى السجود احتياج لانه بيلبى حاجات مباشره وبمرور الوقت بيتحول لرغبه.. حاجه بنعوزها اوى وبنشتاقلها يمكن الناس تقول مفيش فرق بين الحاجه والرغبه لكن بالنسبالى انا فى... الرغبه اقل عقلانيه ومنطقيه من الحاجه وبتعتمد اكتر على التفضيل الشخصى للافراد.. الواحد بيحتاج ياكل وبيحتاج يشرب " دى الحاجه" لكن بنعوز ملوخيه مش بسله وبنعوز حاجه حلوه وبنعوز حاجه حادقه" دى الرغبه"...... دى تعريفاتى الخاصه ليهم.... والاختيار مش محتاج شرح.. انك تختار تعمل او ماتعملش تختار انك تلبى الحاجه دى او لا.. عشان كده السجود التلاته مع بعض.. حاجه ورغبه واختيار..... بتحتاج تسجد لربنا عشان ترتاح وانت حاسس بنفسك عند اقدامه.. فى السجود بتبقى جوه نفسك اوى متكعور على نفسك زى الجنين فى بطن امه وبتبقى عينيك قريبه اوى من الارض بصوره يصعب معاها التركيز فى اى تفاصيل فيها وبتبقى قريب اوى من صوت انفاسك وداقت قلبك فبتسمع نفسك اوى فبيتضاعف احساسك بالتوحد وعلى قد صفا قلبك بقى على قد مابتحس بربنا قدامك.. عمرك مره سجدت وخفت ترفع راسك احسن تلاقى ربنا قدامك؟؟؟؟؟؟؟؟..... السجود فى حد ذاته رغبه فى التوحد مع الارض، لان وضع السجود جنينى اوى.. شبه وضع الجنين فى بطن امه وبتحس برطوبه الارض او جفافها.. بصلابتها او نداوتها.. على حسب الارض اللى انت ساجد عليها... عشان كده بترتاح.. بتحس انك رجعت لاصلك.. توحدت تانى مع الارض.. .. الحلقه الناقصه بتكتمل.. مابتحسش انك بطولك منغير سند.. لا بتحس انك اتلميت على بقيتك ورجعت تانى حته واحده..

9 comments:

Mr-Biboooo said...

ليه بيكون العبد اقرب لربنا و هو ساجد
اعتقد لان من المنطقى ان الانسان بيكون اقرب لربنا لما بيبعد عن احساسة بعظمتة الشخصية و يحط راسة على الارض و كأنة بيقول لربنا انت خلقتنى من تراب و انا بسجدلك ع التراب
السجود بيدى نوع من الانغلاق على النفس ووضع يسهل عملية اخراج كل ما بداخلك دون قلق

Pianist said...

انا عجبتني اوي جملة:
عمرك مرة سجدت وخفت ترفع راسك احسن تلاقي ربنا قدامك؟
اعتقد انك في الجملة دي لخصت الموضوع كله

Lasto-adri *Blue* said...

الله عليكى يا إيه إزى... دا أحلى تعليق قرأته لحد دلوقتى عن علاقة السجود بالإنسان..
ويمكن لإننا إتعودنا على روتين الصلاة من تكرارها المستمر، فمحدش بقى مهتم يفسر سر الراحة من ملامسة جبينا للأرض وإنقطاع الأصوات من حولنا فجأة وإحنا بننطق "سبحان ربى الأعلى"..

وأرجع وأقول الجملة الأولى: السجود لصوتها..
أيا كان المقصود منها، فهى رائعة فى حد ذاتها..
رغم إنها لو كان "رغبت" بدل "أردت" لكانت أوقع وأجمل

لـيـلـيـت said...

تعريفك للحاجة والرغبة مظبوط ...الحاجة بتبقي لاشباع احتاياجات الإنسان الأولية .. الرغبة بتبقي لجلب احساس باللذة أو المتعة

....
كلامك حلو ... رجع احساس كان غايب من مدة ...بجد

AZ said...

:)

Nefsy said...

ياااااااااااااااااه ... ارفع راسى الاقى ربنا قدامى ... يااااااااه كلامك حلو اوى اوى

AZ said...

moity enty mehs online on msn leh????????????

Shex said...

BlueLue...

"ان تريد" تشمل الحاجة و الرغبة في نفس الوقت.. انت محتاج تسجد لاشباع حاجه جواك.. و بكل ارادتك بتختار انك تسجد مش تأدية لفرض او واجب عليك

A.Z....
Brilliant as always my dear

AZ said...

eh dh shiko basha begalalet adro mest3barny be comment be7alo :D za3'rto ya 3eyal lololololiiiiiiiiiiii