10 Aug 2005

عجلاتيه اف اخص عليك والنبى يا حزمبل

نجوم اف ام.. هم مسميين نفسهم كده لكنهم فعلا لا يعدوا كونهم حفنه من العجلاتيه مش فاهمين اساسا يعنى ايه راديو ولا يعنى ايه مذيعين راديو... فى احد البرامج الاتسفزازيه دلوقتى شغال على المحطه العجيبه دى بت هبله وواد ممرقع .. غايه فى المرقعه مستضيفين ولامؤاخذه مطربه جميله جدا الفنانه العظيمه النيمه كونيمه اللى اسمها لطيفها.. ولولولولىىىىىىىىىىىىىىىى باركيلى يامه ... الفنانه الجميله.. لطيفه حد جميل اوى من جوه وكل الناس بتموت فيها وفى اغانيها.. يعنى ياخى **** ايه العار ده.. ان اطول عمرى بحب اسمع لطيفه.. بس انا مال اهلى انا بابن اختها اللى بيدرس سلوك الكائنات الفضائيه فى جامعه بامريكا القمح.. الفنانه لطيفه اللى بتسعد ملايين.. يعنى طيب الكلام ده بنسمعه على الفنانين وانصاف الفنانين واشباه الفنانين واللى مالهمش علاقه بالفن كلهم وعمو تانت واونكل بمنيا القمح وخالتو وجدو وستو واحمد ومحسن وعمرو ونوسه ولوزه وتختخ والمغامرين الخمسه والشياطين التلاتاشر بالمعادى.. انا ايه يسعدنى فى لطيفه والا غيرها اساسا؟.. عملت ايه انا مهبب فى عيشتى عشان اقعد اسمع ناس طالعه تتمرقع وعمالين يأنثوا المذكر ويذكروا المؤنث... كلنا دلوقتى ممكن نسمع مشعارف ايه على السايت بتاعت لطيفه" جايز السايت بتاعها خنثى فبيتكلموا عنه بصيغه المؤنث",,, ولطيفه حد مقلوظ اوى " طيب لطيفه مؤنث تبقى حد ليه؟".. ربنا لا تؤاخذنا بما فعل مذيعين نجوم اف ام منا وفينا وعلينا وفى لغتنا العربيه ولهجتنا العاميه وغطينى يامه وصوتى .. نجوم اف اخص دى حد تفقع المراره جدا ( يعنى برده نكلمهم بلغتهم او تقدروا تقولوا تقليد اعمى ).. يعنى انا حد كانت بتحب لطيفه جدا بعد ماسمعت الحلقه دى بقيت حدايه ونفسى اخطف كتاكيت اف ام.. الحلقه عباره عن دعايه لجمعيه لطيفه الخيريه وللسايت بتاع لطيفه هانم كعب الغزال.. بنت قنصل الوز سايبه بلدهم وجايه تعمل جمعيه خيريه لجعانين مصر.. ياويلك يا بلد.. وسالوها ليه بقى عملتى الحركه الجامده ده يا لطيفه.. قالتلهم اصلى غيرت من ريكى مارتن وريتشارد جير عشان بيعملوا اعمال خيريه قلت بقى احنا مش هستنى بقى اما الم الفنانين وتعالوا يا جماعه نعمل راوند والا نعمل عمل خيري بقى فقلت اعمل انا جمعيه لطيفه الخيريه.. وحصلت لطيفه على بتاع سبع القاب فى اقل من نص ساعه.. لطيفه المطربه الخيريه.. ولطيفه مطربه البطيخ الاولى وحاجات كده بقى اللى بيحفظوها للمذيعين ....

17 comments:

santakarim said...

al7amdlelah, finall i found someone hate it as much as i do, ngoom al af af de 7aga basha3a, bagd , asma3eha nos sa3a wenty ta3rfy alwaksa alsoda aly albald fiha, al3yal de lo fi ay bald tanya kan zman al 10 manhom be arsh, ya rait mat2olish 3alihom 3aglatea, al3glatya nas sany3ya bardo we mo7trmeen, mosh sho3'lohm al haifa...

Netr said...

"If you make a mistake and get all tangled up, you just tango on"
caramel cheesecake crunch recipe

Lasto-adri *Blue* said...

هههههههههههههه
يخرب عقلك يا بنت..
أنا بكره الزفتة نجوم قرع مباشر دى من أول مرة سمعتها فيها أصلا.. دى معمولة أساسا للهجس والهجاسين ودمتم يا حضرات

لأ بجد.. حتى يا بنتى برنامج أسامة قرف دة إلى بيوجعوا بيه دماغ العيال اللى مش فاهمة حاجة..
آل إزاى إحنا عيشين من غير حب وهبل..
نفسى أقلهم فى وشهم.... طظ وبالبنط العريض كدة عشان أطلع كل اللى عندى مرة واحدة..

أل لطيفة ونيلة آل.. بلا قرف.. مليتوا البلد

Aladdin said...

You've touched on one of the shittiest radio programs ever. I'm sorry to say that their 'shittiness' is just a reflection of the Great Shittiness latent in the Egyptians of today.

sydalany-وش مكرمش said...

جميل
و عندي ملحوظة صغيرة
يا خي*** تلات نجوم بس مش أربعة
:0p

AZ said...

الرابعه للتمويه يعنى مش تخليك واعى امال;) [img]http://users.pandora.be/eforum/emoticons4u/happy/010.gif[/img]

G said...

أهه انا مش بيخنقنقي و يجيبلي حساسية و افضل اهرش من الغيظ غير كلمة (حد) دي:

حد جميل
حد حقيقي
حد بيفهم
حد ـ قد إيه ـ طيب
حد قاري
حد طويل
حد رفيع
حد الموسى
حد يحوشني

Nefsy said...

دول شويه عيال عملين فيها عيال برده عشان يعملوا دمهم خفيف فبيطلعوا فى الاخر عيال هبل بس اكتر حاجه بتخلينى اعيط من كتر الضحك برنامج انا والنجوم وهوااااك هم دول يفهموا ايه عن الحب ال ابو حبيبى منعه عنى لغايت ما يخلص ثانويه عامه نيها ها ها ها واعمل ايه يا اسامه دبرنى... بلا كلام فارغ
مع انى فى غايه الاحراج والخزى عشان بقول كلمه حد دى مكنتش اعرف انها مزعلاكم اوى كده بس عزائى الوحيد انها كلمه جديده عليا لسه من كام شهر كده بقولها بس

AZ said...

والله هي مش بتضايق اما تستخدم في موضعها<< حد بتستخدم للكلا عن شخص مجهول<< يعني ايه اللي عوج الترابيزه؟ لازم حد خبط فيها
لكن واحده اعدفهاا اقول عليها حد ليه؟ واحد قاعد معانا نقول علهية حد ليه؟

أنا said...

وهو يا جماعة الواحد سعات بيبقي عايز اي تفاهة...حاجة كده تستفزه تنكد عليه
هو وموده

Aladdin said...

هما متهأيلي بيقولوا ان المرقعة والمياصة من مسوغات التعيين في هذه الوظيفة!

يعني من الآخر نفسنا نشوف السيرة الذاتية بتاعت الصيع دول هاتلاقيها مثلا بتاعت البنت تقولك انها تقدر تتمايص بمقدار 90 بالمائة وممكن نشوفلهم مقياس جديد للمياصة والمرقعة وربنا يرحم عمنا نجيب سرور!

ساحر الصحراء said...

ايه الحلاوه دى انتى حد بيفهم

أحمد said...

شريكى في السكن ، استيقظت ذات يوم لأجده قد لصق ورقة على الراديو كتب عليها
((نجوم .اف.ام ... تسبب سرطان البروستاتا .. و انتفاخ البيضان

cok said...

طيب وإيه ذنب العجلاتيه، ما هي مهنة محترمة، واللى حنفضل برضه نبص من فوق، عشان بنعرف نقرالنا كلمتين

Anonymous said...

انتو فى ايه يا جماعه ايه عيال دى والله كل كاست نجوم اف ام بيشتغل بجد و بعدين دى محطه ترفيهيه عارف يعنى ايه لو مش عارف اعرفك عادى بس هما مش عملو حاجه غلط يعنى عشان تتريق عليهم او كدة وبعدين الحمد لله لو مش بيشتغلو بجد مش كان ناس كتيير حب نجوم اف ام او سمعها ومش كانت المحطه كبرت

Anonymous said...

وبعدين بصراحه كدة مسمحلكش تقول عليهم صيع ماشى يعنى هما مش عملولك حاجه عشان تغلط فيهم يعنى انت مش عاوز تسمعهم مش تسمعهم بمزاجك لكن مش تشتمهم بئه لان كدة مش زوق بصراحه من غير زعل كدة قله زوق دة شغلهم وانت متعرفش حاجه فى شغل ازاعه ترفيهيه من طول كلام فى ميثاق شرف اذاعى و لو مش تعرفه اسال اى حد فى اعلام هيعرفهولك لان الميثاق دة فيه شروط الاذاعى و الاعلامى و انه لازم يحترم راى وكرامه الجمهور وبيتهيالى هما مش بيغلطو فيك غير ان ساعات احيانا بيتكلمو فى حاجات و مشاكل حاصله فعلا بس ة مش معناه ان يبقى الاذاعه كلها يكو مش وراها غير القضايا والمشاكل لان زى ما قلتلك دى ازاعه ترفيهيه

Anonymous said...

وكل واحد حر فى رأيه