5 Aug 2005

ماما نجوى يا مام انجوى.. نعمين يا عيون ماما نجوى

زمان واحنا صغيرين كانت برامج الاطفال اسلوبها كوميدى اوى كان بيثير ضحكى كطفله.. ماما ساميه وماما نجوى دول كانوا بيستخدموا عرايس عشان يعلمونا الكخ والدح طبعا ماما ساميه معاها كرمبه وماما نجوى معاها بقلظ.. وكل حلقه اقعد استنى اسمع المصيبه اللى عملها بقلظ واللى عملتها كرمبه عشان اقعد اضحك على ماما ساميه وماما نجوى وهم مكبوسين.. كنت دايما بشوف دى برامج كوميديه مش عشان اتعلم منه احاجه فقط عشان اشوف فيها توم وجيرى وفقره السيرك وا لاحاجه..... ... كان فى بقى برنامجين تانيين كنت بحترمهم اوى سينيما الاطفال بتاع ماما عفاف وبرنامج بابا ماجد كانوا بيكلمونا كاننا ناس بتفهم، ماما عفاف كانت بتجيب افلام حلوه جدا ... كل اما بسمع شريط لعمرو خالد بضحك وبفتكر بقلظ وماما نجوى واللى يفطس من الضحك ان لسه الناس بيعجبها الطريقه دى اعتقد عشان اتعودوا عليها منذ الطفوله... وعلى راى صفاء ابو السعود" ياصحابى وصحباتى هنا ومحلك سر.. بصوا وشوفوا حاجاتى انما ايه فى السررررررررر ... عندى صابونه شقيه.. مكاره ولعبيه .. اما بغسل ايدى بتزفلط فى الميه.. واما بغسل وشى.. بتشعوطلى عينيه.. اه منك يا صابونه يا شقيه يا مجنونه.. بتقلى وتقلى ام اهتبقى ملى"..

20 comments:

Ahmed Suleiman said...

:)

R said...

أسجّل اعتراضي!

ماما نجوى لا يمكن مقارنتها بماما سامية أبداً. كانت-رغم السذاجة-أخف ظلّ، وكان بقلظ (السيّد عزمي) من أظرف العرايس.
أمّا ماما سامية، فلولا كرمبة كانت راحت في البمبة. وماما نجوى كمان أقدم وأكثر تنوّعاً، كان فيه دبدوب وأرنوب وناس كتير غير بقلظ.

أتفّق معك أنّ الاستهانة بالأطفال كانت في معظم البرامج، وطبعاً سينما الأطفال كان راقي، بسّ ليه يصحّونا بدري يوم الجمعة؟

بس كان دمّ ماما عفاف وبابا ماجد تقيل شويّتين. ما رأيك في زهور من نور وأجمل الزهور لماما نجوى مع الأطفال الكثيرين؟ كان فعلاً حول ومافيهوش استخفاف.
ـ

Zeryab said...

اغنية نيللى تحفة

Guevara said...

انا طول عمري بكره برامج الأطفال دي حتى من و انا صغير
:(

كنت بحس انها برامج عشان شوية عيال مرفهين و متشيكين و سهل انهم يطلعوا في التليفزيون .. لما كبرت فهمت ان ده كان حقد مبكر

AZ said...

رامى ماهو عنوان البوست من ماما نجوى يا ماما ننجوى .. نعمين يا عيون ماما نجوى. لو تسحمى اقطف ورده؟... الورده دى زيك حلوه ليه تقطفيها وتجرحيها ...
وبعدين بابا ماجد كان دمه تقيل شويه اوك بس انا عن نفسى كنت بحبه وكان بيجيب مسلسل عرايس كده جميل اوى كنت بقعد استناه وبعدين كان بيقول كلام مفيد وكان ساعات يقعد نشرح حاجات نعملها بنفسنا كده اللى بقيه البرامج بعد كده سرقوها وعملوها فقره سخيفه اسمها فقره القص بايدينا

S H E B A K said...

:-)
ايه ياجماعة ,ازاى فاكرين الحاجات دى ؟!
يمكن فاكر شوية ماما نجوى و سينما الأطفال لكن بابا ماجد ده مش فاكره خالص
الظاهر الزهايمر لحس دماغى خلاص

Pianist said...

wlhy ya a.z fakrteny be ayam zaman mama nagwa ana kont ba7ebo gedan bas mama samya kont 3aref enaha habla, amma cinema el a2tfal kan gamed ana faker film "el7osan wa7ed el karn" we "eltor al a7mar el nary" kan film gamed awy we baba maged kan 7elw awy, 3'er tab3an kabten maged we mazengar we el 7agat deh kanet raheba kont ba7ebaha awy.

sydalany-وش مكرمش said...

أنا مش حقول ما كنتش باحب ماما سامية
أنا كنت باكرهها لكن كنت باتفرج عليها

عفاف الهلاوي ليها زكريات حلوة"سينما الأطفال سينما ..سينما الأطفال سينما..دي أحلى حقيقة و أحلى خيال"

و ماما نجوى"النوم سلطان مملكته حرير ...."كان البرنامج إسمه مساء الخير
و حاجات تانية كتير و زكريات حلوة كتير كنت كاتبلها موضوع بس حأجل نشره شوية

S H E B A K said...

اه نسيت ... اغنية شريهان حلوة اوى

AZ said...

شريهان مين دى نيللى يا عماد

S H E B A K said...

أنا قصدى على أغنية
ياصحابى وصحباتى هنا ومحلك سر
:-P

AZ said...

ياصحابى وصحباتى دى بتاعه صفاء ابو السعود يا فاضحنا

MoonLightShadow said...

When I was a kid, I've always tried my best not to miss mama Nagwa, or cinema el atfal. They were my favorites. Plus another nice one called hwayat.. I used to like it as well.

ابن مصر said...

بابا ماجد ده حكايته حكاية معايه امي كانت بتهددني بيه ...حتاكل ولا اكلم بابا ماجد ويزعل منك وطبعا اجري اطفح علشان مايزعلش مني المشكلة انها قعدت تقولي كدة لغاية اما كان عندي 24 سنه
lol:)

Anonymous said...

ايه اللخبطه دي :)
كرمبه كانت مع ماما فاطمة مش ماما سامية....زهور من نور و اجمل الزهور كانوا حلوين اوي...و سينما الأطفال مكنش ينفع تتفوت :)

راضى said...

مين بابا ماجد ده يا جدعان؟؟؟

نسيتوا الكلبة لاسى يا غداريين



أغنية نيللى عظيمة

Anonymous said...

ana 2a3tared fi 7aga en koromba kanet bet2ademo el mozei3a el shahera fatma salem law teftekro elly kanet bet2adem kaman bernameg 3an el anbeya we ra2y en heya kanet bet2adem 7agat mofeeda mesh zay 3arosty wel 7agat di.we heya delwa2ty ta2reeban bete3mel bernameg deeny 3ala el ta3lemeya
plz reply

Anonymous said...

شفولكو حل ! عايزين البرامج دي ترجع تانى
نعمل ايه
اللي يلاقيها يا ريت يبعتها او يقول فين

ahmedthatsit said...

yes, Kornba, kanet ma3a mama Fatma youm el sabt el sob7, we mama samaya kanet a7la 7aga betfkarny biha en esmaha Samya Sharaby:)
bardo kan fe memories tanya, let me remind u with Abla Fadila from the Radio, we were not raised to listen to her much coz we are TV Generation not a Radio generation but still i remember her and she was the most tender all over the last 50 yrs by the approve of all ppl in this 50 yrs and the most famous and last thing i remember she was a guest with Mona elhussieny fel 3ashira masa2an.
Last thing to say to "anonymous" en mesh el baramg hya el tergaa3, e7na eli nerga3, nerga3 le ayam lama kona innocent begad and not mind and soul polluted like now

Anonymous said...

لا مش عاجبنى الكلام ده
برنامج بقلظ و ماما نجوى ده كان جميل جدا .. كنت باستناه كل خميس و فاكره كويس اد ايه زعلت لما مابقاش ييجى.

و بردو البرنامج بتاع كرمبه ده كان يضحك اوى و ظريف.. و البرنامجين مناسبين لسن معين من 5 الى 7 سنين مثلا او حاجه كده .. فبلاش تقولو عليهم كلام وحش عشان هزعل
http://www.youtube.com/watch?v=a2SnLsXAJrg