6 Aug 2005

انت مش كبرت على الحاجات دى بقى؟

فجاه تلاقى اهلك اتخذوا قرار جديد بيقول انك كبرت زى مابياخدوا كل القرارات فى الدنيا بدالك عشان انت لسه صغير.. وتلاقى نفسك فجاه عيب تركب عجله عشان كبرت وعيب تركب مرجيحه عشان كبرت وازاى تشوف افلام كارتون عشان انت كبرت.. طيب اما انا كبرت مش تسيبونى بقى اقرر ايه اللى من حقى اعمله وماعملوش.. انا كبرت وعايز اركب مرجيحه وعجله حد شريكى!!!!!!!
من اول ماتحجبت منعونى اركب عجله بس كنت بنزل العب فى الشارع عادى يعنى بعدين منعونى كمان من اللعب فى الشارع... دلوقتى بقى عندى 24 سنه ومحجبه واول مابشوف مرجيحه بنط فيها واتمرجح واما بروح فى اى حته فيها عجل بركب عجل وباكل غزل البنات اما بروح جنينه الحيوانات وعندى مسدس ميه واللعبه اللى فيها ميه وصابون وبتطلع بقاليل وبعرف اعمل بيها اشكال كمان وباكل مصاصه وابص فى المرايه على لسانى احمريكا والا لا.. وبقعد على حجر بابا وخيلانى واعمامى وعماتى واى حد عايزه اقعد على حجره وفى العيد بجيب بومب وصواريخ وبجيب ساعات بلالين وطراطير وعندى فانوس بشمعه " اتكسر من قريب للاسف بس هجيب غيره" وبعض صحابى فى ايدهم واعملهم ساعه وبعمل شعرى زعرورتين وعندى على الكمبيوتر توم اند جيرى وبطوط وافلام كارتون قد كده وبسمع اغانى اطفال لغايه دلوقتى ولسه حافظه ابريق الشاى ابريق الشاى وبقلد كوكى كاك وبحب الناس تحكيلى حواديت .. هى امى اينعم بتشعر بالحسره كل مابتشوفنى ووالدى مقتنع تماما انى كائن فضائى بس هم متقبلين حريتى الشخصيه ومابيتضايقوش اما حد من الجيران يشوفنى وانا بلعب بالبقاليل وبجرى ورى القطه بتاعتى عشان تلعب معايا.. فطظ فيك ايها المجتمع الكابت لطفوله افراده انا عندى 24 سنه اينعم وبشتغل ده صحيح بس مش هكبت رغباتى فى انى امارس حاجات بحبها لمجرد ان المجتمع شايف انها حاجات عيالى.. شايفنى عيله؟؟؟ طظظظظظظظظظظظظظظظظظظ انا عيله وانتوا لاااااااااااااااااااااااااه............ لسانى احمريكا؟؟؟؟؟؟؟؟؟؟؟؟؟؟

17 comments:

Nefsy said...

انتى عيله وانا مكان 60 عيله وبعلن كده معاكى واللى مش عاجبه يبقى زى ما سيادتك قولتى بالظبط

Aladdin said...

يمكن أن نكون أطفال مهما طال بنا العمر، بس بالمعنى الإيجابي أم السلبي؟ هذا هو السؤال.

أنا said...

هههههههههه

أحمد said...

حضرتك أنا عايز اعبر عن اعجابي الشديد بالمدونة لكن الأهم ، اغنية نيللى التحفة اللى بدور عليها بقالى حوالى 14 سنة
جبتيها منين ؟؟؟؟؟؟؟؟؟

ارجوك انا بحب الاغنية دى جدا و مش ممكن كل ما اعوز اسمعها اجى اخش عندك على المدونة ، طبعا مدونتك جميلة بس انا عايز الاغنية

يعععععععععع
اععععععععععع
أأأأأأأأأوووووووو

ارجوك بدل ما انا عمال اعيط

AZ said...

i can email it to you

Omar said...

وعقول ماليها الأسئلة
وقلوب ماليها المعيلة
يا بخت دي قلوب

S H E B A K said...

llllooooooooooolllllllll
كل ده كويس بس لما تعضى صحابك كده انتى مش عيله انتى
عضاضة
:-P
اغنية الست هدى سلطان حلوة اوى

Nefsy said...

انا كمان عايزه الاغنية دى دى احلى اغنيه بحبها فى حياتى

G said...

انا عايز أعلق على عماد .. عشان تقريباً فيه مشكلة في السوفت وير بتاع دماغه بيخليه يدخل الأغاني في بعض لدرجة انه مش قادر يفرق بين هدى سلطان و شهرزاد !! المهم..افتكر كل بني آدم عنده عيل صغير بيحب يعمل حاجات عبيطة كدة .. انا لحد دلوقت ممكن اخش فيلم كرتون في السينيما ..عااااادي جداً .. بس اعض صحابي؟ لأ كدة كانيباليزم مش معيلة

Ghada said...

انتي سكررررر

ابليس: وأنا كمان كل ما أقفل البلوج أدخله تاني عشان أسمع الأغنية
ابعتيها لي أنا كماااانAz

حد يعرف ألحان وكلمات مين الأغنية دي؟

جيفارا: مالها أفلام الكرتون؟؟؟ حد هنا بيحب أفلام ميازاكي اليابانية؟؟ هي كرتون بس مش كرتون. حاجه كده غريبة رهيبة

AZ said...

gimme ur emails both of u wana ab3thlko amma arw7 :)

S H E B A K said...

بعد ازنك يا فندم , انا ممكن أقول لغادة كل المعلومات الممكنة عن الأغنية
الأغنية للست هدى سلطان من فيلم سلامة بطولة الأستاذ فريد شوقى و أحمد عز و اخراج سعيد حامد
كلماتها للشاعر احمد عبد المعطى حجازى و ألحان خالد الذكر سيد درويش
بس كدة .. أظن محدش متوفر عندة كل المعلومات دى عن الأغنية ... أى خدمة
:-P
قال شهرزاد قال

Zeryab said...

me too plz

AZ said...

ana b3taha le zeryab el ba2yeen emsh m3aya their emails ay 7ad plz 3yz el song email me plz
bezret_eldor@hotmail.com

Zeryab said...

متشكرين يا باشا المعلوم وصل .....

sydalany-وش مكرمش said...

إيه

موضوع عن المعيلة و ما أشوفوش غير بعد 15 كومنت

ليييه

أنا للأسف مضطر أكبت الطفولة اللي يمكن تكونوا شفتوا حبة منها في موضوعاتي
و الإضطرار ده إني حستغرب نفسي قدام الناس
و الأهم
مافيش أبدا مرجيحة تشيلني
ضخم جدا
مش ضرفة دولاب ..لأ
الدولاب نفسه

لكن بيني و بين نفسي في البيت باقعد أتفرج 24 ساعة على الكرتون في ديزني شانل و سباس تون بس سباس تون أقل
و ببص لنفسي في المرا....إيه
كفاية كده
أرجع ألبس الوش تاني لحد يقول عليا عبيط ...ولا أقولك
طظظظظظظظظظظظظظظظظظظظظظظظظظظظظظظ

H said...

سلااااااااامو عليكوووووووووووووو زى مانتوا قاعدين والله .. احب ابدى اعجابى وموافقتى على كل كلمه قالتها صاحبة هذه المدونات واتفاقى التام معاها ومن الاخر عشان الانجاز يعنى كنت عاوز اغنية او لينك لاغنية او هى تنزل اغنية ابريق الشاى لو كانت عندها عالصفحه دى عشان من الاخر طلع عينى وعين اهلى من الالف للياء بحثا عليها وكنت بدور عليها فى النت لحد ما اتكعبلت فى الخن الغريب العجيب ده .. حد والنبى يجيبللى الاغنيه وهاخللى امى تدعيلوه بعد الفجر