17 Jun 2005

دقايق

كان فى مره فى روايه او فيلم.. حاجه كده من ذكريات الطفوله يعنى... بيقولك ان 5 دقايق تغير مصير شعب وتنهى حيه بنى ادم وكلام كتير كده كنت اسمعه اقول يا سلااااااام اهو وقت وبيعدى بلا قلبة دماغ....... من كام يوم زيه زى اى يوم عمل عادى جدا انا وكريم " زميلى فى الاوده" كان عندنا شغل أخرنا شويه وساعدته فى عمل ماكيت لخريطتين وبعد ما خلصنا قلتله مش عاجبنى واحد فيهم تيجى نعيده قالى لا... ولاول مره بسمع كلام كريم منغير مناقشه لدرجه ان هو نفسه علق على الموضوع ده تانى يوم ... قفلنا المكتب ومشينا....... بعد مانزلنا بما يقدر ب 15 دقيقه احترقت الغرفه بتاعتنا بالكامل والشقه كلها اتهببت وكل البيبان اتحرقت...... من الأوده مافضلش منها غير فرده خلخال كنت معلقاها على حديده بارزه من الحيطه وقلم رصاص التحرق كل اللى على يمينه وشماله وهو ماجرالوش حاجه وعلبه الكروت
الشخصيه بتاعتى علبتها البلاستيك ساحت عليها والكروت ماتحرقتش... بقى شكلها عامل زى الصابونه بتاعه
fight club
.... وشويه حاجات تانيه..... معرفش ليه كتير بحس ان كل شء مترتب فى الكون عشانى انا شخصياكان السما فيها ربنا والارض فيها انا وكل حاجه تانيه معموله عشانى... ولو انى عارفه انه اى كلام بس حسن ترتيب ربنا للامور بيخلينى احس كده... رحمه ربنا واسعه

3 comments:

أحمد said...

انا عندى سؤال غريب شوية
هو أنت من الصدمة بتتعامل مع الموضوع ببرود؟؟
و لا انت مش مهتم

AZ said...

برود!!!!
اكيد مش بتعامل مع الموقف ببرود....... انا فعلا حاسه انى فقد كل قدره على الكلام او التعبير من يومها... عايشه خالة بله غير عاديه

AZ said...

انت شككتنى فى نفسى!!!!!!
هل من البرود انى احمد ربنا انه انقذنى من الحريقه بفارق 10 دقايق؟؟؟؟؟؟؟