9 Jun 2005

استاذ عبدالحميد

من الناس اللي معششين في دماغي لغايه دلوقتي كذكري رائعة من ذكريات الطفوله... كان مدرس اللغه العربيه والمواد الاجتماعيه واحيانا التربيه الدينيه كمان..... افتكر مره جابني انا وبنتين صحباتي في الفصل كنا في سنه خامسه ابتدائي كنا اشطر ٣ بنات في الفصل قالنا انتوا شاطرين وفي ناس متوسطين وناس خايبين انا عايز كل واحده منكم تمسك بنت من الخايبانين دول وتساعدها في المذاكره وتساعده في المذاكره بحيث انها تقدر علي الاقل تعدي السنه دي هم اساسا في الاغلب مش هيكملوا في التعليم اكتر من ابتدائي فعلي الاقل نساعدهم يعرفوا بس يقروا كويس ويكتبوا..... كان بيستأذن من مدرس الاعاب عشان نلطلع الفصل نذاكر للبنات وساعات كنا نقعد معاهم بعد وقت الدراسه والحصص الفاضيه..... البنات فعلا مستواهم اتحسن وكنا فرحانين اوي اننا بنعمل حاجه كويسه..... من اروع الاحاسيس في الدنيا انك تعلم حد حاجه وتبذل معاه مجهود وتشوف ثمار مجهودك ده ...... علمنا فعلا يعني ايه إخاء ومحبه ..... البنات دول كانوا ن وسط اجتماعي مفروض انه غير وسطنا ... من الوسط اللي المجتمع بيديه بالجزمه وشايف انه مش من حقه يتعامل كبي ادم وليه حقوق ..... هو بمنتهي البساطه علمنا ازاي نكسر كل قوانين المجتمع الغير معلنه ونتخطاها ونتعامل معاهم كبني ادمين...... مش عشان احنا ربنا حطنا وسط ناس معاهم فلوس اكتر من اللي مع اهالي البنات دول وأسر متعلمه اكتر من اسر البنات دول يبقي احنا احسن منهم بالعكس ده بيخلي ليهم علينا حقوق ولازم نؤديها............ وافتكر انه اول واحد في الدنيا علمنا يعني ايه دعاء........ اول يوم في السنه قالنا انا عايز اعلمكم دعاء تبتدو بيه يومكم كل يوم الصبح او علي الاقل تبتدوا بيه حصتي.... وقف علي السبوره ومسك تباشيره وكتب دعاء ... بقي ياخد كيمتين من دعاء مأثور علي كلمتين من دعاء تاني وكلمتين من عنده لحد ماعمل دعاء وحفظهولنا.... انا طبعا كنت متضايقه وكنت شايفه ان ده تشويه للادعيه وروحت البيت متضايقه اوي والحقني يا بابا غيرنا الادعيه المأثوره يالهوي يالهوي..... بابا قعد يفهمني ان الادعيه ممكن تتقال بأي طريقه وبأي شكل وأي لغه... باختصار قالي ان الادعيه مش قرآن وان حق كل واحد يدعي باللي عايزه .......وقبل امتحانات اخر السنه في خمسه ابتدائي قالنا كل واحد يذاكر كويس وهاتك يا نصايح وقالنا لو هتغشش حد .... ماتغششوش الامتحان كله غششه بس اللي ينجحه عشان فعلا ممكن يكون عنده ظروف منعته انه يذاكر كويس او يمكن خايف والخوف نساه فمتبقاش انت وظروفه عليه بس اديله اللي ينجحه فقط
يمكن كلامه غلط ويمكن صح بس في الاول وفي الآخر حاول يعلمنا حاجه تنفعنا وحاول يعلمنا ازاي ننفع غيرنا زي مابننفع نفسنا.....عمري ماقابلت ولا هقابل ناس زي مدرسيني في مدرسه الابتدائي... فعلا انا ادين ليهم بفضل كبير اكتر من اي بني ادم تاني بعد ابويا وامي

1 comment:

MoonLightShadow said...

Wish all the schools have a teacher like urs ya AZ.. Wish all primary students learn what u learnt in ur school.. I'm sure if people like Mr. Abd el 7ameed still exist in this world.. many things would have changed.