13 Mar 2013

مسودّه ماكتملتش

النهارده طول اليوم في مشهد كان لازق قصاد عيني
المكان: مابين رمسيس ووسط البلد
الزمان: مابين ١٢ بالليل وأذان الفجر
الأحداث: الجيش والداخلية بيقتحموا الميدان لأسباب مجهولة
كنت وقتها بشتغل في كول سنتر وكان عندي شيفت يخلص الساعه ١٢ وفي ضرب في ميدان التحرير...الوضع كان بشع والناس بتتويت "أشهد أن لا إله إلا الله وأشهد أن محمد رسول الله"...معظم الناس اللي تخصّني ويعنيني أمرهم متحاصرين في أماكن مختلفه مابين ميدان عبد المنعم رياض ومدخل الميدان من عند القصر العيني

قابلت ناس زمايلي في قهوه عند آخر ساعه عشان نشوف هنعمل إيه...بعد نقاش طويل قررنا زي كل مره اننا هنروح...وزي كل مره اتفقنا كل واحد هيروح لوحده...وزي كل مره اتدورنا ورجعنا تاني من غير مانقول لبعض..أو أنا علي الأقل عملت كده...سيبتهم يروحوا وقعدت...اديتهم وقت يبعدوا عن اول الشارع عشان مايشوفونيش متجهه لفين وانا خارجه...جيت اخرج لقيت مخبر عند اول الممر ومخبر عند آخره...اتجهت لمنتصف المربع لقيت اتنين مخبرين اضافيين عند التقاطع...كل ما اتحرك في اي اتجاه المخبر اللي في الطرف المعاكس بيمشي ورايا...عملت نفسي بتكلم في التليفون ورجعت تاني القهوة...ساعتين متحاصره هناك لوحدي في القهوه مش عارفه اتحرك...وزمايلنا في ميدان طلعت حرب بيحذرونا ان في مخبرين كتير بيقبضوا على اي حد ماشي لوحده في اي شارع مؤدي للميدان

اتنين زمايلي جم أخدوني واتجهنا للميدان...الوضع كان مزري...الضرب هدي...وريحة الغاز لسه عالقه في الجو...قابلت اظن سلمى سعيد ولبني على المدخل....سيبت الناس وابتديت اتحرك لوحدي ادور على صحابي اللي جوا....

1 comment:

Mohamed Hassan said...

i this call center still exists?