5 Mar 2012

الغضب المطلق

بعد فتره طويله من فقدان الشعور وفقدان القدره على الكتابة أول حاجة بحس بيها تكون الغضب! شيء عجيب! زي مايكون في ماسورة ادرينالين انفجرت في جتتي دلوقت حالا! غضب بشع قادر علي سحق العالم في عشر دقايق علي الأكثر!

بقالي يومين بحاول افهم انا غضبانه من إيه مافهمتش غير دلوقت...انا غضبانه في المطلق من كل اجة وأي حاجة وكل حد وأي حد...عايزه ادمر شيء ما...ومش جماد...مش عايزه ادغدغ كوبايات ولا عايزه اضرب دماغي في الحيط اعور نفسي...عايزه اضرب حاجة قادره على رد الفعل...بني آدم...إنسان...بالقليل ساند باج حلّوفه عشان لما اخبطها خبطه جامده ترد فيا تاني اخبطها تاني لحد مافرهد يا هي تتفرتك فإيدي

أول مره افهم ليه ادوارد نورتون فشخ الولد الأشفر في فيلم فايت كلاب! عشان اول مره دلقت احس اني فعلا عايزه اعمل كده! ادمر حاجة حلوة أو جميلة...وتكون قادره علي رد الفعل...واشوفها بعد كده وهي متدمره...بس مش حد طيب...مش عايزه ادمر حد طيب او بس حلو...عيزه ادمر حاجة سخيفه وشكلها حلو...حد يكون متدعي مثلا...حد من المجلس العسكري...حد من مجلس الشعب../حد من القوي السياسيه المتخاذله...حد يستحق الغضب عليه...حد يكون ببدلة ميري....أو حد من اللي شعرهم ابيض وهاريينا تنظير عاللي جابونا بعد ما دفنوا راسهم في الرمل سنين واحنا الل بندفع تمن صمتهم وتقاعسهم عن فعل أي شيء ما من شأنه إيقاف المهزلة اللي كانت ولازالت شغاله من سنين!

كانوا فين العالم دي من زمان!!!!! جايين دلوقت يفوقوا ان في بلد خربانه ومحتاحة تتصلح وكل واحد فيهم يلمع قرعته ويركب طقم السنان ويتجعص ويقولنا نعمل إيه عشان يبقي عندنا بلد كويسه؟؟؟؟؟ كنت بتعمل إيه لما كنت أدّي يا جدو؟؟؟؟ على رأي واحد صديقنا: قنابل الغاز انتاج سنه تسعين اللي بنشمها دي مكانتش معموله لينا بس احنا اللي بنشمها بدالهم!!!!
 
مانزلوش ليه يشموا قنابل الغاز بتاعتهم اللي احنا بنطفحها دلوقت؟ وبأمارة إيه جايين دلوقت يتكلموا وينظّروا علي ميتين أهالينا! كنتوا فييييييييييييييييين؟؟؟؟؟؟؟؟؟؟؟؟؟؟؟؟؟ وبتفتحوا بقكوا دلوقت ليه؟؟؟؟؟؟ 

قرفتونا الله يلعنكم حلّوا عن سما ربّي بقى!!!! عايزين مننا ايه بعد ماتخرستوا سنين بتطفحوا الدردي وتقولوا اديني أكتر؟؟؟؟؟ احنا اللي نزلنا نعترض ونتكلم ونطالب بحقوق الخلق المهضومه بقالها سنين...وموتنا في سبيل ده...ولسه عندنا استعداد يموت مننا ناس تاني...ماحدش فينا طلب حاجة لنفسه....وماحدش فينا طلب حاجة مش من حقه...انتوا بتطلبوا حاجات مش من حقكوا...مش ذنبي انك اتولدت في الدنيا قبليا....لكن ذنبك انك عيشت أخرس عشان تربي العيال وخوفت تشم غاز وتتحبس وتموت...احنا ماعملناش ده عشان نفسنا...ولا عملناه عشانك...احنا عملنا كده عشان الناس اللي جايه...عشان العيال الصغيره اللي عندها عشر سنين وسبع سنين لزن ده واجبنا ناحيتهم...لكن انت اللي اهدرت حقك بنفسك ماتجيش دلوقت تتكلم وتقرر بالنيابه عننا وعن الكتاكيت دول وترسملنا حياتنا!

جتكوا القرف! داهيه تاخدكوا! قبر يلمكوا ويريحنا من انفاسكم المعطّنه...وأفكاركم المعطّنه...وكلامكم الفارغ...وتنظيركم الأجوف! انتوا ماعيشتوش! ومش عايزينا احنا نعيش! واحنا ماعندناش استعداد نعيش محبوسين في أحلامكم الضيقه! عشان إحنا احلامنا أكبر من عمركم الكبير أوييييييي اللي رميتوه في الزباله بمحض ارادتكم الكامله! أيوه بإرادتكم لأنكم ماحاولتوش تعترضوا...ماحاولتوش تحققوا أحلامكوا...وماحاولتوش تطالبوا بحقكوا! عايزين إيه دلوقت وانتوا علي حافة القبر! انتوا اللي اتخليتكوا عن حقوقكم...خلاص! مالكوش حاجة تطالبوا بيها واحنا نزلنا نطالب بحقنا عشان اللي بعدينا ياخدوا حقوقهم! انتوا بره اللعبه والحسبه وبره كل حاجة بس للأسف لسه رجلكوا في الدنيا! لكن اذا ربنا سايبكم عايشين ده مايديكوش الحق انكم تسمموا حياتنا! غوروا!

6 comments:

fateimad said...

عندك حق كل الحق دفعتوا كتير كتيييييييييييير ولسه بتدفعوا والكبار مستنيين يحصلوا اللي دفعتوه عمرك شفتي أوحش من كده اتكتمنا خوف واتحججنا بخوفنا عليكم وفي الآخر بنجني تعبكم وعاملين ناصحين وانتوا الانصح والاقوي خبطي ارزعي اكسري بس اوعك تكسري حد حلو خلي بالك عل امينه قوي اصلها حلوه وخلي بالك علي بوررورم ابن سكوته ده بيسمع ويعلم كتيييييييييييير واتهروا وانسحقوا في ميدان التحرير

Anonymous said...

تعرفي مشكلتك ايه؟ انك كتلة حقد ونفسنة وعمرك ما هتدهدي ولا هتنبسطي في حياتك! عقدك اللي بتطلعيها ملهاش تفسير منطقي. عموماً بكره الزمن يعلمك لأن رؤية واحدة في التلاثينات مختلفة تماماً عن رؤية واحدة في الخمسينات. مبروك عليكي انك فشيتي غلك في جيل مفروض يكون له رأي برضه حتى لو مكانش عاجب امثالك

أمضاء،
عبد من عبيد مصر - وكاره لثورة الخراب

Anonymous said...

هي الناس دي لها عين تتكلم وتقول إن لها رأي .. مشكلة الجيل ده إنه معندوش استقبال .. مش قادرين يشوفوا نفسهم ولا يحسوا بمصيبتهم .. الزمن تخطاهم .. الجيل ده هو إللي خرب مصر .. وهو أسوأ جيل في تاريخ مصر بالكامل .. شافوا البلد بتتباع قدام عينيهم ولا حد فيهم نطق .. ودلوقتي يقولوا لينا حق نتكلم .. جاتكم كسر حقكم

أحمد زكي

AZ said...

سيبهم يتسلوا يابو حميد :D

الصحيفة الصادقة said...

جميلة جدا جدااااااااا

Hawk said...
This comment has been removed by a blog administrator.