23 May 2011

حبيبي يوم ماعرفته كان قطه مغمضاااااااه

حبيبي يا رقه...فاكر ولا لآه؟ طب ان كنت ناسي افكرك...فاكر لما بعتلي اسمهم ايه في التليفزيون عشان يقولولي انهم جايين عشاني وانكوا في خدمة الشعب؟ وفاكر لما من شويه اسمه التاني كلم ريم ماجد علي الهوا عشان يقولنا الناس قالت في الاستفتاء نعم للمجلس؟؟؟ وفاكر لما اسمه ايه ابو شعر علي جنب طلع قالنا في مؤتمر صحفي اننا في الميدان كنا بنعمل حاجات عيب؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ وفاكر لما اسمه ايه التالت طلع مع عمرو اديب وسآل هم عايزين ايه تاني؟؟؟؟ هنكون عايزين ايه تاني؟ هو بالظبط نفس اللي طلبناه اولاني ووعدتنا هتحققه وماتحققش!!!!!!

مش معني اننا عاملين فيها عبط وصابرين عليك عشان ماعندكش خبره في الحياه السياسيه اننا اغبيا أو جهله ومش عارفين اللي فيها...بالك انت انا قابلت سواق تاكسي امبارح...راجل امي...ماوردش علي مدارس...وبيفهم احسن مني...ومن ناس كتير معاها شهادات...ماتستهينش بذكاء حد حتى لو كان جاهل...وماتزعلش مني لما اكلمك باسمك بدون لقبك...سوري انا اصلي بت مدنيه مايصه...وقصيره أوزعه بشوف دبوس الديكوريشن من تحت فمعرفش بيبقي شكله ايه من فوق....مش الديكوريشن دا بيبقي دهب؟ وبفلوسنا؟؟؟ بتاعنا يعني واحنا مدينهولك عشان تاخد بالك مننا وتعملنا اللي احنا عايزينه...ووعدتنا انك هتعمله...هو مش برده العسكري الشاطر مابيرجعش في كلامه؟ بترجع في كلامك ليه بقى؟ قلنالك حسني يتحاكم قلتلنا حاضر...وماحصلش...هو برده مش في عندكوا قانونيين؟ ولا هم مابيتكلموش غير بس عشان يعملولنا قوانين تمنع التظاهرات؟ لكن نقولهم اعملولنا قانون يحاكم الفاسدين سياسيا تقولولنا توء توء...ده كلااااااااام يا عبدالمعطي؟؟؟؟؟؟؟؟؟ بتمسك الشعب من البلوزه بتاعته يا عبدالمعطي؟


مش هكلمك عن الثوره اللي انت بتقول حميتها من اول يوم (ودي برده بعديها بمزاجي واللي نزل الميدان ٢٨ عارف اللي فيها)...ولا اللي دمهم ساح..مش ذنبك؟ ماشي..مش هعترض...مش ذنبك...بس برده مش من حقك تسامح في دمهم...لما قلتلي انا حميت الثوره من اول يوم انا بلعتها بمزاجي...وقت الثوره كان العدو المشترك هو التوريث والقائمين عليه...مكانش عاجبنا ولا عاجبك...طب انت مكانش عاجبك التوريث ليه؟ قلت ماليش دعوه وعملت نفسي عبيطه ومش فاهمه انت مش عاجبك التوريث ليه عشان العدو واحد والهدف مشترك...وانت قلتلي ان الهدف مشترك...ووعدتني هتاخد بالك مني ومن الثوره...بس دلوقتي بقي واضح ان الهدف مش مشترك...علي افضل التخمينات...انت مابقيتش مهتم بطلباتنا اللي حلفت ميت يمين انك هتنفذها...وفعلا نفسي افهم انت مهتم بإيه!!!!!!!

شوف بقي لا هقولك هاتلي فلوسي اللي اتسرقت...ولا صحتي اللي راحت...لأنه مش شغلك...بس شغلك ان القانوني اللي يستعبط في محاكمه عشان يبرأ مجرم انت تلبه علي دماغه...ياتلب الوزير اللي انت معينه علي دماغه...هي مش دي شغلتك برده؟؟؟ رقيب وحسيب؟؟؟ يعني شغلك تحاسب اي وزير مقصر وأي رئيس جهاز حكومي مقصر...وتشوفلي بقي ايه حكايه اكذوبة الاقتصاد المنهار اللي بتتباعلنا تسع مرات في اليوم...وماتنساش تتصرف في موضوع ضباط الداخليه اللي مش راضيين يشتغلوا..وماتقوليش ماليش دعوه....يوم لما حبيتهم ياخدوا بالهم من شغلهم عند سفاره اسرائيل عملت كده وسيبتهم لحد اما افتروا علينا تاني زي زمان...هو ده النظام يعني؟ هي بقت كده؟ يا ناخد بالجزمه ونبوس الارض تحت اقدام الظباط يا مينلزلوش؟؟؟ لو انت عاجبك احنا مش عاجبنا ومش هناخد بالجزمه من حد تاني...اي حد واخد بالك؟
وعلي فكره...انا شغلتي اني احاسبك...لأني ماعنديش مجلس شعب

مش هقولك انت و كذا وكذا...انا هقولك بس: انا نازله الميدان ليه: انا نازله الميدان عشان انت ماعملتليش اي حاجه من اللي انا طلبتها...ومش هقولك برده انك مش عايز تعملها...هفترض انك مش عارف تعملها...عشان مش شغلك...انا نازله الجمعه عشان افكرك باللي انت وعدتني هتعمله وماعملتوش...وانت عارف...بيني وبين الميدان فركة كعب...ومبخافش ولا بتهدد عشان ماعنديش اي حاجه اخسرها غير النفس اللي في صدري..ونصيحه من اخت:
never provoke someone that has nothing to lose

انا نازله الميدان عشان اقولك فاضلك زلطه وتطلع بره...ونفسي ده مايحلصش بس انت اللي بتزقنا للاتجاه ده بسلبيتك وغموضك ونفس التعتيم اللي كان بيحصل زمان ونزلنا نقول مش عايزينه...لا قبلناه من حسني ولا هنقبله من غيره...احنا بنسكت بمزاجنا والله وبندي فرص كتير...بس انا فعلا انا ماعادش عندي قدره علي احتمال ده اكتر من كده...يا تشد حيلك يا تسلمها لاللي يقدر عليها...السياسه وقياده المجتمع المدني مش منطقتك وده مش وقت تتعلم فيه فينا...احنا في وقت الغلطه فيه بفوره وانا ماعنديش استعداد اضحي بتماسك مؤسستي العسكريه عشان بلدي ماتنهارش...ارحمنا بقي! لقد هرمنا ومن بعد ماجيت ورمنا..ياتمشيها عدل يا تسيبها بدل ما هتتقلب غم علي دماغنا كلنا دي حاجه لا انا ولا انت ولا اي حد عايزها تحصل..كالا خبيبي؟ كابيتش؟ تشوف شغلك كويس وتنفذ وعودك...ولو مش عاجبك كلامي بقي انا معرفش بصراحه انا قولتلك علي اللي فيها واللي مضايق البشريه الساخطه من امثالي انت مش عايز تسمع بقي انت حر...والناس احرار وجابوك تحققلهم الحريه دي...وانت مش عايز...مستني الناس يكون رد فعلها ايه بقي؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

6 comments:

Unknown said...

كلام لا اختلاف عليه
الدكتور عصام شرف وعد بسياده القانون
لماذا لم يعاقب الشرطي الذي لم يقوم بواجبه
المسئول الذي يقصر في عمله
لماذ
هل هذا صعب التحقيق

Unknown said...

وبالسبه للمجلس العسكري
لماذا لم يحاكم القتله والفاسدين
اتقوا الله في الشعب

Mohamed kharoub said...

حلو الكلام

new said...

تشرفت برؤية حضرتك أمس في التحرير

اسمحي لي أن أنسخ تعليقا كتبته ردا على أحد المعلقين على الفيس بوك، يتعلق بأهم تهمة وجهت بخصوص مظاهرة جمعة 27 مايو
وهي: الانقلاب على الديمقراطية والاستفتاء

بالنسبة للي بيتكلموا على الدستور والاستفتاء
كل كلامكم - بما فيهم الاخوة السلفيين - يدل أنكم إما تعيشون خارج مصر فلكم عذركم
او لا تعرفون القراءة وتعيشون في كهوف في الجبال فلكم عذركم
او تقرؤون ووتابعون تطورات مصر التاريخية، لكن عندكم خلل في الذاكرة او عمى مؤقت..فلكم برضه عذركم

يا سادة .. يا من تفهمون اللغة العربية
الجيش هو الذي "لم يحترم الديمقراطية" ولا الاستفتاء
وقام من نفسه بإصدار إعلان دستوري مختلف عما استفتى الناس عليه
وكل القوى السياسية الـ ******** لم تعترض ولم تنزل التحرير اعقاب هذا الاعلان
وكأنه كان اعلان عن شيكولاته او اي حاجة!!!

هذا الاعلان الذي يتنافى مع كل الاديان
ويعطي صلاحيات الهية مطلقة للمجلس العسكري
فهو من له حق: التشريع - حق الهي - وحق وضع الموازنة وحق مراقبتها وحق المحاكمة بدون دفاع ولا يحزنون ﻷنها محاكمات ظالمة عسكرية وحق العفو عن العقوبة ..يعني ما فيش قضاء

لو كنت ترضى بهذا الاعلان،
سلفي .. اخواني ..مسيحي .. لا ديني .. من أي ملة او معتقد
وترضى ان استفتاءك تم استغلاله لوضع هذا الاعلان الذي سلب منك "كل" شيء، وسلب من الشعب "كل" شيء
فانت **** اوصف نفسك
لسه برضه هاتقولي دستور ومادة تانية وتالتة؟
طيب يا عقلاء مصر، ويا سلفيون محبون لدينكم وتموتون من اجل تطبيقه:
هل ينفع اعبد الهك ساعة وتعبد الهي ساعة؟
هل ينفع احط في المادة التانية الشريعة الاسلامية،
والغيها تماما في المواد التالية وأستأثر أنا بسلطة الشريعة والتشريع والقضاء والعفو عن العقوبة؟
يا عالم يا هوه!! هو ده شرع وللا دين؟

new said...

يا عبد الرحمن محاسبة الشرطة معناها محاكمتهم عسكريا
ولما يضربوا - قال يعني هما مش مضربين دلوقت!-.. واللجان الشعبية متنيلة نايمة..يبقى البلد مش هاتبقى مستقرة..يعني ده الكلام اللي ممكن يتقال..رغم ان البلد بتستقر اكتر لما اللجان الشعبية بتمسكها زي اسكندرية دلوقت

الشعب يريد مراقبة الأقسام
لابد من وضع كاميرات مراقبة داخل الأقسام
مش اروح قسم العمرانية ألاقيهم برضه زي زمان مافيش فايدة: لامين الموبايلات من الناس قدام امين شرطة

لابد من وضع لوحة أمام كل بني ادم يعمل هناك:
الشرطة في خدمة الشعب
يرجى الانتباه إلى أن جميع المعاملات مسجلة لضمان جودة الخدمة الشرطية

الثورة قامت أساسا ضد الشرطة وامن الدولة، والامن المركزي، وحرقت لهم مراكزهم فسقط النظام اللي كان مسنود عليهم
المفروض والطبيعي انهم يوضعوا تحت المراقبة .. مش احنا اللي نبقى تحت المراقبة وكانك يابوزيد!!

مش معقول يرجعوا تاني بسهولة كده..وباشاوات وبيصادروا الموبايلات

اخيي عليكي يا ثورة..اتدهورتي ورجعتي ورا

وائل جلال said...

حلمت بالتغيير وقد جاء قد جاء الله اعلم !؟
ولكن التغيير الذي اتمناه اساسه الحرية والعدالة والكرامة
لاتغير فساد بفساد لاتغير ظلم بظلم لاتغير مهانه بمهانه لاتغير لابواق فاسده باخرى لم اكن يوماً من محبي التبجح ولا التشفي ولا القاء التهم بدون بينة وحكم ، لم اكن يوماً تهمني الاشخاص ولكن يهمني الدور الذي تؤديه تلك الاشخاص بصفتهم ومسؤولياتهم ، فرحت بتنحي الرئيس وبداية انهيار من افسدوا البلاد كلاً في مكانه وانتظر محاسبة كل من اهمل وافسد ومحاسبتهم عن ادائهم لادوارهم المنوطة لهم واخر
هذه المحاسبات التي انتظرها هي المحاسبات المالية ، ولكن فوجئت يوم امس ما صرح به اعضاء من المجلس العسكري من تصريحات ان القانون الحالي لا يعاقب على الفساد.
وللموضوع بقية في مدونة الأفق.
وده اللنك بتعها
http://elofouk.blogspot.com/2011/04/blog-post_13.html
اذا كان هذا هو اعتقاد المجلس ليه مستنيين منه محاكمات
لو حد عنده رد على سؤالي الموجود في المقوقع يا ريت يجاوبني عشان انا بدور على الاجابه من يوم 13 ابريل