قالك دفع عجلة الإنتاج من أجل إنقاذ الاقتصاد…معلش ولامؤاخذه اقتصاد مين يا سعادة البيه؟ وتطلع ايه عجله الانتاج دي؟ ما اقتصادنا طول عمره خربان خربان خربان يا والدي….وماحناش اساسا دوله منتجه عشان تقولي عجله الانتاج… قالك بقي ايه…اصل تدفق الاستثمارات الأجنبيه يساوي صفر…بطلوا مظاهرات حرام عليكووووووووووووووووووو

طب اهلا وسهلا…الناس بتتظاهر أيام الجمعه…مش ده اجازه برده؟ والناس اللي اعرفها كلها بتنزل شغلها كل يوم عادي جدا…ياريت بقي حد يقولي ايه المطلوب أكتر من كده عشان ندفع عجله الانتاج الخفيه بتاعتكوا دي؟

قالك اصل الاضرابات والاعتصامات بتعمل أزمه…طب ازمه فين وحياه والدك؟ واشعمني مابيعملوش ازمه غير في مصر؟ طيب بالنسبه لفرنسا (علي سبيل المثال لا الحصر)؟ دول بيضربوا اكتر ما بيشتغلوا…بالذات بتوع المطارات والنقل العام…حياتهم عباره عن اضرابات يتخللها فواصل…ولا ياخويه فرنسا اقتصادها باظ ولا حد قالهم عجله انتاج ولا استثمارات اجنبيه سابتهم وطلعت تجري…حكمتك يا رب….طب أقولك حاجه سر؟ انتاجيه المصانع في مصر انتاجها بيزيد وقت الاعتصامات العماليه…عشان العمال بيبقوا قاعدين طول النهار والليل في المصنع وبيشتغلوا كتير عشان بيبقوا عايزين يثبتوا انهم بيعملوا اللي عليهم عشان ياخدوا اللي بيطالبوا بيه…مش مصدقني؟ هز طولك وانزل اسأل ولا حتي اقرا وسيبك من كلام الجرايد والتليفزيونات والمجالس والحكومات

قالك اصل مش عارف عندنا عجز كام في الموازنه فاحنا بقي هنجووووووووووووع…شوف ازاااااااااي! الأكل اللي كان موجود لحد شهر ٩ والفلوس اللي جايه في السكه وقرض من البنك الدولي وياحرام احنا مش هنلاقي ناكل بكره الصبح! طب الأكل المتخزن راح فين؟

وبعدين احنا بنستورد كل حاجه تقريبا…انتاج ايه! واقتصاد ايه! انا بسمع الكلمتين دول بيطلعلي في مخي :

syntax error

مخي مش بيقبل الكلمتين دول…مش بيستوعبهم يا ناس مش بيقبل التخريف اعمل ايه!

واللي يفقع بدني بقي اللي يقولي سيبك من الميدان وروحي ابني البلد! ابن البلد دا اللي هو ازاي ولامؤاخذه؟ دانا حتى لو شيلت قصعه علي كتفي عشان ابني مش عارفه هروح بيها فين وابني ايه…طب بذمه أبوك انت فاهم الكلام اللي انت بتقوله ده اساسا؟ طب قولي كده البلدان بتتبني ازاي؟ مش برده بإن الطاقه البشريه بتاعتها تبقي قوة عاملة ومنتجه عشان تعمل اقتصاد قوي؟ طب انا مالي بقي ان الطاقه البشريه بتاعتي قاعده علي القهاوي؟ هو انا بنزل الميدان ليه؟ مش عشان الطاقه البشريه اللي بتشتغل تاخد حقها عشان انتاجيتها تزيد؟ ومش برده انا بنزل الميدان بطالب بمنظومه عادله تحكم البلد عشان كل صاحب حق ياخد حقه والعامل ينتج وصاحب راس المال يكسب من غير ما يمص دمي ودمك وكمان عشان الدوله تاخد حقها عشان تصرف علي المرافق والخدمات؟ هو انا مش بنزل الميدان عشان اطالب بحاكم وحكومه يعملولي مشاريع عشان مابقاش مذلوله للاستثمار الأجنبي؟

يبقي مين اللي بيبني البلد؟ اللي بينزل يطالب بإصلاح حال البلد ولا اللي قاعد في بيتهم بيتضحك عليه بكلام اهبل عشان ما بيشغل مخه ويفكر ويحفظ الكلام ويطرشه في وش اللي عايز يصلح!

مش عايز تنزل الميدان ماتنزلش…مش عايز تصلح ماتصلحش…بس ماتخربش…وماتيأسنيش….عندك حاجه تانيه افضل تعملها عشان تعدل المايله…اتفضل…احنا ٨٨ مليون…وزي مانا ووشويه ناس بنعمل اللي شايفينه صح انت كمان شوف مين زيك ونفذوا مقترحاتكم البناءه اللي انا معرفهاش…بس اعمل حاجه…اي حاجه غير انك توجعلي بطني بكلام مقرف…شفيتم