إلى هنا... بغير قيد أو شرط أكتب... بلا عيون متلصصة... بلا زملاء عمل أو أصدقاء.... حيث الكل أغراب... ربما انتم تعرفونني... أو هكذا تظنون... لكني هنا لا أعرف أحد سواي


رزعت موبايلي في الحيطه... ماتكسرش بس معادش فاهم الشريحه... مع إنه مش من طبعي إني لما أغضب أكسر حاجات... بس بقيت أعمل كده مؤخرا عشان مامدش إيدي علي البشر ولا أصرخ في وش حد... أنا غضبي بشع والناس مستفزه ومش عارفين هم ممكن يواجهوا إيه لو أثاروني لدرجه فقدان التحكم في أعصابي... ومش فاهمين برده انهم ممكن يستفزوني ومفقدش أعصابي وابتدي ارقدلهم وألبس اجعص جعيص في أنشف حيطه... وكله قانوني.... مفيش حاجه تفتأ أي حد قد نظام من دقنه وآفتلّه... هو أنا كام مره هقول اني بلقط نقط الضعف في الناس أول حاجه؟؟؟؟ ولحد إمتي هقول إني ممكن أوقع أي حد في الغلط بسهولة السهوله؟؟؟ ولحد إمتي هقول اني واخده علي نظام شد وانا اشد واللي يزهق نسلخ وشه... ولحد امتي هقول اني مبزهقش؟؟؟... ماقالولكوا كل قصير مكير ما تنتبهوا لروحكوا وتسمعوا الكلام... وكمان بينسوا إني بنت... وربنا قال ان كيدهن عظيم وقال وكان كيد الشيطان ضعيفا... يعني ابليس يقول لأتفه حرمه يا تانت... وبرده بينسوا اني تربيه رجاله... يعني ممكن أجيبهم وأوديهم وأشقلبهم وأعدلهم بصباع رجلي الصغير وعلي كل لون يا باتيستا... فعلا ماحدش عايز يتقي غضبي... انا مش ربنا... ربنا رحمته وسعت غضبه... لكن أنا بني آدمه وليا طاقه... وقربت فعلا أجيب آخري... اللمض الحمرا كلها ابتدت تنور... زهقت من الخناق وتعبت من النكد والغباوه بتاعه الناس... وصبري يا ناس له آخر... محدش فاهم الفرق بين اللي بيخريه وبين اللي بيوضيه كما يقول السيد الوالد... وكله بيحدف أي كلام زي الطوبجي الأعمي كما يقول الوالد برده.... بحاول أقاوم وأقوّم غضبي... بس الناس فعلا بقت بشعه... الناس تقولها يا جدعان مشاكلكوا في الشغل كذا وكذا يقولك انتي كذا وكذا.. ياناس مانتوا فيكوا وانا مابتكلمش وعارفه انو أنا فيا وفيا... بس علي الأقل انا مهما غضبت وحتي لو فقدت السيطره ماببقاش قلية الأدب... آخري صوتي بيعلى لدرجات مبالغ فيها... والشغل مفهوش عواطف... شيل وشيل وهات وخد واعمل وسوّي... هو أنا لازم يعني أتأمر علي الخلق وأمشي أمهمز يمين وشمال عشان يحترموا نفسهم؟؟؟؟... أنا لا عايزه أربي حد ولا هقبل إن حد يمشيني علي كيفه... طبعي شديد؟ مختلفناش... بتكلم ناشف؟؟؟ مختلفناش... لكن ده الطبيعي مع ناس مش فاهمه شغلها وبتعطلني عن شغلي وكمان ماتاخدش منهم غير طولة لسان وقلة أدب وخره بالكسبره... طولة اللسان سهلة.. جداااااااااا... وقواميس أَبّح نصها من تأليفي... ونظام صبح وأَبّح برده سهل جداااااااا... بس ليه؟؟؟ هو انتوا فاهمين اني لو فتحت موتوروليوز لساني علي حد هيعرف يرد؟؟؟؟ يا ناس والنعمه ده سريع الطلقات وخزنته بتعبي من بلاعة... ودي مش حاجه أفتخر بيها بس ليها وقتها... ويوم لما يبقي مفيش حاجه تانيه هتحوش عني الضرر غير طولة لساني هفتح عالرابع وعليا وعلى أعدائي يارب... يا ناس بطلوا تستعدوني أنا عدو حقير لأبعد الحدود... ولو حطيت حد في دماغي مش هسيبه غير علي الأرض... وبالطريقه... والدكر اللي جاي من ضهر أبوه في الحلال وراضع من صدر أمه الطاهر يمسك عليا غلطه