22 Aug 2010

يلعن أبو الفيس بوك

يلعن أبو الفيس بوك... وحشتني الكتابه هنا والنعمه حيث الكتابه الغير موجهه تطرح للعابرين... أما عني وعن أخباري فأنا حاليا بقيت حاجه كده زي رئيس تحرير علي جرافيك ديزاينر.... مطحونه بس متسليه -مش هكدب... شيء ممتع جدا اني بقي عندي منتج بتاعي... هو مش بتاعي اوي... ويمكن مش بتاعي خالص... بس لو بتاعي مش هبذل فيه مجهود أكتر من كده... بقالي زمان اوي ماكتبتش هنا... حتي آخر كام بوست هنا هم نوتس كتبتها علي الفيس بوك ونقلتها هنا... بس فعلا وحشتني الكتابه هنا... فعلا الكتابه علي البلوج ليها طعم تاني... سب في المطلق وحب في المطلق... مشاعر غير موجهه... بتكلم وانا مش عامله حساب ان حد هيقرا وياخد الكلام علي نفسه او هيحسبه عليا بشكل أو بآخر

ونرجع للهرتله بقي... الدنيا وحشتني.. وحشتني جدا... وحشتني حياتي اللي انقطعت عنها سته شهور بالتمام والكمال لأسباب تتعلق بالشغل... ودلوقتي رجعت تاني... للجيمز بتاعتي... والبلوج بتاعتي... مع اني كان بقالي فتره طويله مبكتبش هنا... بس النهارده فعلا ادركت انا ليه بقالي فتره مش عارفه اكتب اي حاجه علي الفيس بوك من اللي كنت بكتبها علي البلوج... عشان الفيس بوك بشكل أو بآخر الواحد لازم يسمي الناس اللي بيحكي عنهم معرفش ليه... ولو ماسميتش بالأسامي تحس انك بتداري حاجه عن الناس وانا مبحبش كده... ولو سميت هتقوم خناقات... وسميت أو ما سميتش هتلاقي ألف مين يفسر الكلام علي كيفه... ده بيحصل في البلوج برده... بس هنا الميزه ان الناس اللي بتفسر علي كيفها ليها حق تفسر علي كيفها لأنهم ميعرفونيش... لكن علي الفيس بوك معظم الناس عارفاني بشكل سطحي وبتفسر علي كيفها وده شيء نفيخ جدا... يعني لو كتبت اربعين ستاتس في اليوم كل واحد هيشوف نفسه في اي ستاتس منهم هيزعل مني مع انها ممكن متكونش موجهه أساسا لحد علي الاطلاق

لسبب أو اخر انا حزينه... يمكن بدون سبب ويمكن بسبب انا مش فاهماه... بس فعلا حزينه وحاسه نفسي تقلانه جدا... لا عايزه اشتغل ولا أعمل اي حاجه... عايزه بس اقعد ارغي في المطلق كده كأني بهذي قدام المرايه واسمع وجيه عزيز... بس كده مش اكتر ولا أقل... مش عايزه حتي ألعب جيمز ولا أجتر ذكريات أيام راحت ولا أفكر في بكره... الأيام كلها علي الله... هو الواحد ليه ايه في الدنيا غير كلمته اللي بتطلع منه وضحكه ودموعه... وكما قال الشاعر المجهول... اللي ملك ضحكته ودمعته ملك الدنيا وما فيها... حاجات كتير بترن في دماغي... كلام قديم وكلام جديد... وكله مالوش معني مباشر او واضح... مجرد كلام بيدور ويلف في جتتي واخد السكه من نافوخي لرجلي ومن رجلي لنافوخي...

ساعات بحس اني تعبت من الكلام واسأل نفسي... هو الكلام كمان بيزهق مننا زي مابنزهق منه ولا لأ؟؟؟

5 comments:

Lasto adri *Blue* said...

ماتطوليش الغيبة علينا بقى!
أنا بستناكي من السنة للسنة

Sam Sh said...

عود أحمد :)

Borsa said...

بلاك بيري
البلاك بيري
يوتيوب
يوتوب
اخبار مصر
اخبار الرياضة
العاب بنات
اسعار الذهب
الذهب
فودافون
فودا فون
Internet Marketing Strategies

اخبار طريفة said...

وانا اكره الفيس بوك ايضا لاني لا احب ان يطمئن علي احد كل دقيقة

دردشة عراقنا said...

شكرااا