فى سواق مكروباص هنفترض اسمه سين... الاسطى سين اول ما دور العربيه شغل شريط لمحمد حسين يعقوب بتاع الموت.... الاسطى سين بيسمع ومتأثر اوى بالكلام... الاسطى سين اجرته الرسميه من الموقف جنيه وتلاتين قرش... الاسطى سين قرر ان الاجره تزيد عشرين قرش -سرقة بالإكراه واللى مش عاجبه ينزل يتلطع فى الموقف فى هذا البرد المريع لحد اما يلاقى مكروباص يرضى يخش (يعنى يمكن القيامه تقوم ولسه مفيش مكروباصات جت عشان كلهم تقريبا بيحملوا من بره الموقف عشان يلعبوا فى الاجره براحتهم)- الاسطى سين بياخد عشرين قرش زياده من كل سخس يركب معاه بالليل-غصب واقتدار- وفى نفس الوقت هو بيسمع محمد حسين يعقوب عمال يقوله العمل الصالح والعمل الطالح والجنه والنار... السؤال اللى بيطرح نفسه هو ليه بيسمع محمد حسين يعقوب؟؟؟ لا صوته حلو ولا مسلى ولا بيقول حاجات مبهجه وفى نفس الوقت بيسمع كلامه من هنا وبيطلعه من الناحيه التانيه يبقى بيسمعه ليه؟؟؟... ايه السبب اللى بيخلى الاسطى سين والاسطى صاد والاسطى عين... الخ... يشغلوا شرايط بتوعظ فيهم وهم بيسرقوا الناس... مش يشغلوا اغانى مشخلعه احسن... يعنى هو انا ادفع فلوس زياده -اتسرق يعنى- وكمان اسمع واحد ينكد عاللى جابونى ويقعد يزعقلى طول السكه... خد تعالى قولى... انت مابتصليش لييييييييييه... ناقصك ايييييييييييه... مكسووووووووف تمسح على الجزمه.... ربنا بيحبك يا اخى المسلم وعشان كده بيسر عليك..... الخ
