عيد ميلادى قرب... اول مره يبقى عندى شعور فظيع بالاجهاد لهذه الدرجه... يمكن عشان سنى بيكبر... مش عارفه... بس متاكده جدا ان عيد ميلادى السنه دى لازم اتدلع فيه لدرجة الإفساد... يعنى اروح مركز تجميل مثلا... طول اليوم معملش اى حاجه غير انى استرخى... حمام طمى.. على ساونا... ومساج... وتكييس.. وتدليك... وتسليك... وتوليع... وحمامات كريم لشعرى... واصبغ شعرى... ومانيكير وباديكير... كل الحاجات اللى ممكن تتعمل فى الدنيا... المهم انى معملش اى حاجه بنفسى لنفسى... ولو حبيت اهرش حد يتولى المهمه بالنيابه عنى... واجيب طقم هدوم جديد واخرج مع صحابى المقربين... اكل اكله طعمه فى مكان بحبه مع ناس تفتح النفس... واقضى وقت ظريف... والاهم من كل ده اليوم ينتهى نهايه حلوه... ماحدش ينكد عليا... ولا يتخانق معايا... ولا يخنقنى... وياسلام لو مايجيليش مكالمات على الموبايل... مسدجات حلوه بس هىهىهى... طبعا كل ده ممكن يتحقق ما عدى موضوع النهايه الحلوه دى... عشان كل الحاجات دى ممكن ادفع فلوسها... وصحابى المقربين مش هيتأخروا عنى فيوم زى ده... والتليفون ممكن اقفله... لكن النهايه الحلوه دايما مش مضمونه ولا ينفعش تتشرى... بس مش مهم بقى مانا هكون اتدلعت طول اليوم... بعدين انا بقتنع اكتر باتالنهايات القذره... بحسها واقعيه اكتر معادتش بتدهشنى...