طول عمرى وانا مقتنعه تماما ان ماحدش هيحبنى زى اهلى... وزمان وانا صغيره كان عندى قناعه تامه ان العيله اللى ان اعايشه معاها دول مش اهلى مش عارفه ليه مع انى انا تقريبا الوحيده فى صحابى اللى ليهم اخوات اكبر منهم اللى ماتقاليش انهم لقونى على باب البيت او الجامع وما الى ذلك من مقالب الاخوة الاكبر... بس كنت مقتنعه تماما انى فى آخر الفيلم هطلع من عيلة تانية مع انى كنت متدلعه اوى وانا صغيره... وكنت اقعد بقى اتطقس واتتبع الكلام بتاع اهلى كويس يمكن يغلطوا مره والحقيقه تفلت من لسانهم... بعد كده انتقلت الى قناعه اخرى الا وهى انى انا بنت خالتى الوسطانيه بعدين لما كبرت شويه لقيت انه مستحيل عشان خالتى دى اتوفت وامى لسه مكانتش حامل فى اخويا الكبير... ولما كل المواضيع دى طلعت فشنك انصرف ذهنى الى خاطر اخر كنت فالقه امى بيه الا وهو انى انا ليا اخت توأم والممرضه اخدتها من ورى ماما قبل ما ماما تفوق من البنج وكنت هاريه امى اسئله لحد اما الست زهقت منى وسلّمت -زهقا منى- فى النهايه بانه يستحيل نعرف اذا كان ليه اخت توأم اتخطفت ساعة الولاده ولا لأ ومش هنعرف غير يوم القيامه... اعتقد ان الحاجه الوحيده اللى خلت امى متقوليش روحى دورى عليها -عشان اغور من وشها هىهىهى- انها خافت لو قالتلى كده كنت هتسحب من البيت بالليل واروح ادور عليها فعلا... وعدت الايام وكبرت واكتشفت انى بتحول لشكل امى وهى فى سنى فابتديت اقتنع ان دول اهلى... ولفت الايام ودارت وبابا صارحنى بالحقيقه... قالى انى كائن فضائى... كنت وقتها فى الجامعه... بس لغاية دلوقتى معرفتش ليه اهلى الفضائيين خطفوا بنت الناس الطيبين دول وحطونى انا مكانها... يكونوش مركبين اجهزة تجسس فى مخى وبيراقبوا كوكب الارض من خلالى... نفسى اعرف الحكيكة وراء ارسالى الى هذا الكوكب المجنون...
hoooooooooooooome... az phone home