7 Jul 2007

انا مالبلد دي... دي ارض ابويا وجد جد

طول عمري عارفه اني مواطنه مصريه صميمه قلبا وقالبا عشان في تمثال شبهي في المتحف المصري وكمان ملامح اهلي مصريه صميمه وحتي لوني قمحي لون خيرك يا مصر... ودلوقتي... الوطن اعترف بيه كقطعه من ارضه... نلت الشهاده السامية يوم الخميس وانا مروحه.... كنت معديه قدام دار الدفاع الجوي وانا كلي فخر واعزاز بالشبشب الاحمر ابو صباع (صنع في الصين علي فكره احنا ناس مرفهه لسه هنصنع شباشب!!! مش مقامنا شباشب احنا) وبابا حسني كان رايح هناك (تقريبا كان عنده فرح حد معرفه) وقالوا لاحد خدام الوطن يرش ارصفة الوطن من اول رصيف الوطن اللي قدام بيت خادم الوطن الأعظم ولحد رصيف الوطن اللي قدام دار الدافع الجوي... وتراب الوطن كمان اللي قدام ارصفة الوطن المعنيه واسفلت شوارع الوطن اللي تحت تراب االوطن الي قدام ارصفة الوطن المذكوره آنفه... المهم بقي قوم ايه، خادم الوطن الموكل اليه مهمة رش الأشياء السالف ذكرها وهو بيرش بكل ذمة وافتخار (طبعا حبا في الوطن) ارصفة الوطن وتراب الوطن (يرشه احسن مايسفّه) واسفلت شوارع الوطن رشني معاهم باعتباري قطعة من ارض الوطن... عشان انا من تراب الوطن... ولوني بقي لون اسفلت الوطن من هباب مصانع الوطن وعوادم سيارات مواطني الوطن...
وعليه... وللاسباب الموضحه اعلاه قد نلت الشهادة الساميه ودلوقتي اقدر اغني بنفس... انا مالبلد ديييييييييييي... انا مالبلد ديييي.... دي ارض ابوياااا وجد جدييييي... دي ارض ابويا وولادي بعديييي (ده اذا مكنتش لسه قطعت الخلف بفعل ملوثات هواء وماء وغذاء الوطن)..... واطلع لساني لاي سخس ماترشش واسال بكل ثقه وتبجّح وصفاقة الفخووور... ماطفحتش من نيلها؟؟؟؟ ماتسممتش ببطيخها (طرح السنه اللي فاتت كان بيجيب نزلة معويه)؟؟؟؟؟... ماتهببتش بعوادم سياراتها؟؟؟..... ماترشيتش بمية مجاريها؟؟؟... ماسففوفكش ترابها في شوارعها وحواريهااااا؟؟؟؟؟
تبقي ميش من موستاوايااااااا