12 Mar 2007

آخر نكته

ديك النهار دى الشابه بتقولى- الله يحظها فطستنى من الضحك المضروبه- ان اللى بيحب حد بيتغير عشانه
الحقيقه انا تنحت ومعرفتش ارد.... هو المفروض يعنى انه حب من طرف واحد فيقوم يتغير عشان يعجبه؟؟؟ طب لو فرضنا ان الاتنين بيحبوا بعض يعملوا ايه؟؟ يتغيروا هم الاتنين ويصحوا الصبح يلاقوا نفسهم يقم اتنين تانيين فيكرهوا بعض؟؟ طب لما واحد فيهم شايف ان التانى لازم يتغير اومال يبقى حبه ازاى؟؟؟ هو حب والا هو بريال ونقى زى الخضريه؟؟ يعنى انا ايه يجبرنى انى اتغير عشان بحب واحد طب اشمعنى مايتغيرش هو؟؟ ولما احنا مش عاجبين بعض كنا بنحب بعض ليه اساسا من الاول؟؟ والا هى فراغة عين والسلام؟؟ والحقى قطر الجواز قبل مايفوتك يا نفيسه ده الوحده مره؟؟؟ طب مانا اروح احب واحد بيحبنى زى مانا واحبه زى ماهو ليه نقرف بعض يعنى؟؟ هو الناس بتاخد ناس يحبوهم ولا يربوهم؟
الدروس المستفاده.. من حبنا حبناه وصار متاعنا متاعه.. ومن كرهنا كرهناه ويحرم علينا اجتماعه.. واللى عاجبه الكحل.. يتكحل.. واللى مش عاجبه يترحل.. والمركب اللى تودى؟؟؟ احسن من المركب اللى تجيييييييييب.. الله ينور عليك يا نمس
--------------
هذا البوست مفتوح للتعليق.. مهم جدا تعلقوا

18 comments:

أُكتب بالرصاص said...

صباح الخير

انت بتقولي الكلام ده وانت على البر
إنما لما تنزلي البحر...
هتلاقي افكار تانية خالص

ومش بس هتغيري من شخصيتك

ده مش بعيد تغيري دمك كل يوم كمان

واللي بيحب ..
بيحب بجد
لازم يتغير

AZ said...

ادينى كلام منطقى افهمه لكن كلام روايات يوسف السباعى ده عمره ما اكل معايا الصراحه

Ayat said...

ماهو عشان كده مابقاش فيه حب بيطول ولا بيستمر زى ماهو .. لأنه مبنى على أنانية .. إزاى أبقى بحب حد و أشوف عيوبه أصلاً لأ و كمان أطلب من يتغير .. طيب لما انا مش طايقاه للدرجة دى حبيته ليه؟ و بعدين الناس لما بتتغير و تتخلص من عيوبها دى عشان اللى بيحبوه، بيكوت الطرف التانى ده هو أول حد يشتكى إن حبيبه إتغير .. أنا فاهماكى جداً و متفقة معاكى ..

Anonymous said...

اللي بيحب بجد بيحب الآخر زي ما هو , مش هاقول بعيوبه و مميزاته لأنه غالبا مش بيكون شايفها عيوب كلها مميزات

اللي عايز تغيير دا مش بيحب , دا عايز يفصل شريك مناسب من وجهة نظره زي ما بيفصل هدوم على مقاسه

يجوز تكون الحجياة المشتركة بتغير في الانسان حاجات عن حياته لوحده لكن تغيير تلقائي مش متعمد و من الطرفين و مش في حاجات أساسية

انما وضع التغيير كمبدأ للحب غريب جدا
جدا

محض روح said...

بصى يا ستو انا
هقولك كلمتين ابرك من عشره
انتى لما بتحبى بتحبى الى ادمك كله حاله متكامله مميزاته وعيوبه ومبتكنيش وخده بالك من العيوب ديه اصلا ما مرايه الحب عميه بعيد عنك
بس مع العشره المرايه
بتوضح شويه بشويه
وبتخدى بالك من الحجات الى كانت محجوبه
بسبب انبهارك بحاله الحب
وبصفتك خلاص وقعتى فى الزبون
يبقى مفيش ادامك حل غير انك تحولى تصلحى العيوب الى ظهرت ليكى من حيث لا تعلمى

بس تعرفى في المجمل الواحد بيصعب عليه
لما يحس ان الى بيحبه رافض حاجه فيه
وتحياتشى ياختشى

ألِف said...

أنا رأيي من رأي البنات

عمرو عزت said...

أكيد مش تغيير كامل
لكن يمكن تغيير أساسي و أحيانا جوهري


يمكن أن يكون عند الطرفين جوانب و مشروعات و خطط تعوق ارتباطهما أو حياتهما المشتركة أو تصعب ذلك

التنازلات المتبادلة أحيانا تتضمن تغييرا دائما في سلوك الشخصية

أنا عندي أنتريه "أحمر " وانا طول عمري عايش بخمس الوان هم الوان ثيمة مدونتي
مضاف لهم الابيض و الاسود

و فيه جدول متعلق علي الثلاجة فيه أيام غسل الصحون و و تحضير العشا بتاعتي

رغم اني من بيت ذكوري عريق و ممكن " يجتلوني " في البلد لو شافوا الجدول ده

مش تغيير ده ؟

AZ said...

me
ماشى كلام الحريم
----------------
الورده الزرقا
انا برده شايفه ان التغير الاجبارى طلب سخيف واللى بيستجيب ليه فى الاغلب بيزهق بعد فتره وبيرجع زى ماكان عشان مش مقتنع
----------------
محض
حياتشى... مفيش حاجه اسمها حد يحب بالبركه وبعدين يبتدى يستكشف.. مفهموش الحب ده
----------------
عمرو عزت
السؤال بقى.. هل انت غيرت سلوكياتك دى بمزاجك والا المودام قالتلك " لو بتحبنى صحيح لازم تتغير عشانى يا سنسن "
دى الفكره كلها... احتكاك اى اتنين بنى ادمين ببعض بغض النظر عن اللى مكتوب عندهم فى البطاقه فى خانة النوع بيغير من طبايعهم كتير ده شىء طبيعى فمابالك بقى اما يبقوا تحت سقف واحد.. فى فرق بين ان اتنين بيحبوا بعض يتفقوا على طريقة لتمشية حياتهم وبين ان واحد فيهم يقول للتانى احنا هنعيش بالطريقة الفلانيه ولو التانى اعترض يبقى ملزم انه يتغير عشان بيحب الأولانى... الحاله التانيه دى انا اشوفها طلب غير منطقى وغير مبرر.. والا ايه؟؟؟

AZ said...

ألف
اجدع ناس

عمرو عزت said...

لا
ما كانش فيه سنسن خالص
التغييرات السياسية دي بتحصل بشكل أعنف بكثير
(:

لكن انا معاكي في سخافة الشكل اللي تقصديه

و ما اعتقدش انه بيحصل مع حالة توافق حقيقية
بتبقي رغبة في التملك أكثر

AZ said...

هىهىهىهى اه طبعا اكيد مفيش سنسن انت اسمك عمرو هتقولك سنسن بآمارة ايه
:P
اه والله هى بتبقى حاله غبيه وبتبقى عايز تولع فى الاتنين
سلاماتى للمودام احسن انا مشوفتهاش من ايام مهرجان الافلام القصير فى التاون هاوس.. :)

monBYH said...

اللي بيحب حد بيقبله علي بعضه ..وبيحبه زي ما شافه وقت ما حبه ..مش حبه وبعدين حط خطة معا من اجل التغيير
ويتفهم منه كل اللي ناس تانية مش راضيه عنه
..
كمان عشانه هايقبل كل عيوب الباقيين

زي ماقال زمان:مفيش في الأغاني كده ومش كده..

Ana mosh sa3eed. said...

what is love anyway !?

Anonymous said...

hey sisi how are ya??
you've been tagged :)
tc n bzw
about that relation thing , u r absolutely right..if u wanna change or do somthn then change n do it for urself not for anyone .
tc sisi
ciao

ahmedthatsit said...

i totally agree with u, eli yeshrina neshtreeh, weli yeb3na nebeee3 ahlo :)

Me2nour said...

My dear azoza
I'm the only one in here who can tell you that love makes anyone crazy enough to do the impossible just to saty in love & keep being with his/her lover
you'll be surprised how far you'll go & how much you'll change
that doesn't mean that you'll be asked to do so
or you (must) do that
but it's in our nature
specially in women
حكاية اللي بيحي بيحب اللي قدامه بعيوبه و مميزاته
ده كلام أفلاطوني قوي و البنات أكتر المؤمنين بيه
بس الحقيقة إنه يمكن بيكون الكلام ده حقيقي في الأول في مرحلة الإنبهار
لكن بعد كده العيوب بتبان و تلاقي كل طرف شايف عيوب اللي قدامه و يتمنى تتغير
من واحد للتاني بتختلف بس الرغبة الداخلية واحدة... فيه اللي بيوصل لمرحلة الكلام و المحاولة و فيه اللي بيتمنى التغيير في سره
ولول قلتي مادام شفنا العيوب نفترق أحسن هتلاقيه بردو كلام غير واقعي
لأنك عمرك ما هتلاقي الإنسان اللي في بالك بالشكل ده
كل واحد منا مليان عيوب و لو الطرفين متجاوبوش مع التغييرات و حاولوا يتغيروا (بقدر الإمكان) والجرء الأكبر بيقع على الست بالأخص مش لانها ست أو انثى بل علشان الست عندها القدرة على التغيير أكتر من الراجل بطبيعتها اللي خلها عليها ربنا مش علشان المجتمع (الذكوري) كما يقول القائلون
الغيرة دي طبيعة الست و الراجل بدرجات متفاوتة
فيه ناس بتتغير بعد ما تحب و تحس بالغيرة و ناس تانية بتفضل زي ما هي
الخلاصة مفيش قواعد ثابتة بس أحوال الأغلبية بتعتبر القاعدة

tona said...

اكيد لو كل طرف حاطط في دماغه انه هيغيير التاني قالعلاقه دي هتفشل بعد شوية تضييع وقت جامد ..

بس في المقابل التغيير الممكن اللي اعرفه اني لو في تصرف معين بيضايق اللي بحبه والموضوع دا مبفرقش معايا فمعتديش مانع اني اغيره او بمعني تاني اخد بالي منه عشان اراعي مشاعر الشخص دا , ودا بيبقي في حاجات صغيره مش جوهريه يعني ..

علي فكره مبسوطه انك فتختي التعليقات وعايزه اقول لك انك السبب في معرفتي بالتدوين و ودخولي فيه

Anonymous said...

في المثل بيقول
إذا أردت شيئأ بقوة فأطلق سراحه
وان عاد إليك فهو ملك لك إلى الأبد
وان لم يعد إليك فهو لم يكن لك منذ البداية