13 Jan 2007

سفاح وماشى فى البلاد سفاااااااااح

ناس بتقول اسمر وشعره مفلفل وناس بتقول ملتحى وناس بتقول لابس نقاب وناس بتقول راكب موتسيكل وناس بتقول انه بنى وباستيك من فوق... يبقى ايه؟؟؟
بسم الله الرحمن الرحيم.. الاجابه ان شاء الله تونس

صرح مصدر مسئول بوزارة الداخليه ان وزارة الداخليه قامت باتخاذ اجراءات امنيه -سر طبعا مش عايزين يقولوا عليها- مش فى المعاتشى بس دى فى القاهره الكبرى كلها عشان احنا عارفين طبعا ان السفاح زى اتوبيس سته بيروح كل حته... كما اكد السيد وزير الصناعه انهم بصدد مشروع لتصنيع ملابس داخليه حريمى غير قابله للخدش ومقاومه للرصاص وهتطرح فى عمر افندى باسعار فى مستوى الطالب المتوسط.... وكمان بعتو يستوردوا من كيلفن كلاين و دولسى اند جابانا بنطلونات ستريتش مطاطيه يصعب اختراقها بالآلات الحاده -وبينى وبينكم كده فى اشاعه قويه بتقول ان مدام نظيفه هى اللى هتعمل اعلانات للبنطلونات دى.. والسكينه مابتكدبش-. كما اكد احد المصادر السفحيه ان السفاح بيفكر ينشر مذكرات ليه بعنوان "سفاح ولكن" وانه بيفكر يعمل مدونه... ومفيش داعى طبعا اقولكم ان احد مصانع السمنه هتغير اسمها لسمنة السفاح... واكد المطرب تامر حسنى انه هينزل اغنيه مطلعها بيقول " نويت اصلى سفاح دخلى من الشباك".. وسامى العدل واخواته الاتنين هيعملوا شركه انتاج سينيمائى جديده هيسموها "السفاحين التلاته"...
واتصل بزيرو تسعوميه زيرو تسع تسعات عشان تحصل على رنة السفاح ولوجو السفاح وخش على www.sfa7.com ونزل el safa7 wall-paper and elsafa7 winodows theme والسفاح رينج تون وخد عليهم تيشرت السفاح هديه وتمنه على قد الايد... وقد نمى الى علمى ان بعض الرسائل انتشرت على الهواتف المحموله تدعو بصيام يوم الاربعاء المقبل -لان الاربع اجازة السفاحين- والدعاء على كل السفاحين ساعة الفطار.. وقد نادى بعض المدونين بانشاء مدونه وتصميم بعض البانرات تحمل عبارة " لا للسفح والسفاحين احنا فى القرن العشرين".. وفى حركة مضاده تم انشاء حركة مؤيده للسفح تحت عنوان "سفاحين من اجل التغيير"... ويمكن قريب تلاقوا كتب على الرصيف تحمل عنوان "الحصن الحصين للوقايه من السفاحين".........
والآن نوفر طباعه صورة السفاح على التيشيرتات والمجات والاقلام البيك والفرنساوى.... وابعت اس ام اس على 234 وصوت لسفاحك المفضل التوربينى او سفاح المعادى.. وعلى كل الجرافيك ديزاينرز من البنات الاحتراز يمكن يجيلهم السفاح عايزهم يعملوله كروت ورجاء والنبى اى واحده تقابل عمو السفاح تمضيلى منه اوتوجراف وتقوله انىمعجبه جدا بتسريحة شعره وعملته جروب على الياهو اسمه "السفاح المعجزه" وممكن لاى حد من محبى السفاح انه يشترك فيه...........
مولد جديد وهيتنصب.. مولد سيدى السفاح... وبرده مش هنعرف الحقيقه فين كالمعتاد وهتنطلق العديد من نظريات المؤامره اللى بتقول ان الحكومه عامله كده عشان تطلع السفاح ملتحى ويخنقوا على الاسلاميين ونظرية مؤامره تانيه هتقول ان دى مؤامره مدبرها الاسلاميين عشان يساعدوا على نشر الحجاب... بس اللى انا متاكده منه انهم بعد مايقبضوا على المشتبه فيه هيطلع طبعا مختل عقليا

16 comments:

ماشى الطريق said...

السفاح ده حبيبى من زمان
أعرفه من أيام ماكنا بنلبس شورتات كت فى الحضانة
بس الحكومة قبضت على أبوه علشان كان إخوان
و قبضت على أمه مع الشيوعين
بس المعلومة اللى إنتى بتقوليها إنه بنى و بلاستيك من فوق معلومة صحيحة فعلاً
أنا مستغرب إنتى عرفتيها إزاى؟؟

smraa alnil said...

يا لهوي
دة انا اتعميت من اللون اللي انتي حاطاه دة
بجد انا اتحولت
بس موضوع جميل والله وفطسني من الضحك
انتي عسولة والله

محمد عبد الغفار said...

اختى حبيبتى
فطستينى من الضحك ، امال انت فى البيت دمك مش خفيف كده ليه هاهاهاها
بس حاسبى بقى انا عندى السبق اول كلام فى المدونات على السفاح كان عندى

على فكره مفيش فائده مش هنعرف يعنى مش هنعرف هزرنا اتكلمنا جد بردو مش هنعرف

وبعدين الغى الورد بطيخيشن ده كما تدين تدان

Dananeer said...

مسخره كالعاده يا az
الاقيش

واحد
كابيتشينو فلافور السفاح خفيف

بس لو حنتكلم جد الموضوع مرعب و كل اصحابى اللى شغلهم فى المعادى مرعوبين
الحيوان ده بهدل اتنين اطفال11 و 17

و بعدين ايه ده انتوا اخوات بجد

ألِف said...

أصوت لخروج صدام حسين من مسابقة سفاح أكاديمي لصالح سفاح المعادي، و أحب أشوف فقرة من برنامج سافاهاة ونفري ال استضافت فيها سفاحة القلوب.


ريم على القاع...

AZ said...

ماشى الطريق:
هو انا بلعب يابنى!!! انا بلقى بنفسى فى النار من اجل البحث عن الحكيكه
---
سمراء النيل:
معلش عندى انا البيبسى ده بصى هى الالوان نبيتى للخلفيه وسمنى للكتابه لو مش بانين عندككده يبقى اظبطى الشاشه بتاعتك عشن الكاليبراشن بتاعها مش مظبوط ظبطى ال
contrast, saturation & brightness
وادعيلى.. فوتى علينا بعد اسبوع خدى الاشعه
---
محمد عبدالغفار:
اخويا شئيئي...عشان تبقى عارف انا فاكهة الاسره وبونبوناية العائله بس انت اللى متعرفش حتى اسأل ام سعيد :p
هو المضحك فى الامر ان الناس سموا الراجل سفاح مع انه مسفحش ولا واحده.. لغاية دلوقتى مفيش خبر اكيد ان فى واحده حتى ماتت هم 4 بنات بجروح غير عميقه.. والناس عماله تفتى فتى مالوش حل بقى ... اييييييييييه انه السوفااااااااااااااااح
---
دنانير:
الحكومة قالت مفيش دجاعى للقلق وانا بحذرك انتى وصحابك لو قلقتوا هيسبوا السفاح ويجى يبحثوا عنكوا انتوا حرين بقى وقد اعذر من انذر..
الحقيقه مفيش كابوتشينو سفاح فلافور فى سفاحينا من عند فرغلى تنفع؟؟
اما الشاب الوسيم اللى فوق ده فهو فعلا احد افراد عائله البشر اللى استضافونى عندهم اول ما المركبه الفضائيه اللى جيت فيها اتحرقت
---
الف:
صدام.. هو انا جيبت الا صدام.. ده نسمه.. بلسم..... ايييه الله يرحمه بقى... وسورى معندناش حلقات سفاهه وينفرى.. اصل فى معلومات طبيه بتقول ان الفرجه على حلقاتها بتجيب الحِرحِر
---

AZ said...

احم اولا معلش بس تشيلى اسمى لاسباب سخسيه يا اختشى والنبى
ثانيا معلش اعذرينى انا مخى سايح هو انتى شوفتينى اولانى يا ياسمين(انا اسففففففففففففف لو كان حصل انا عندى زهايمر اسامى))

AZ said...

استنى استنى.. هو انا قابلتك يوم مهرجان الافلام القصيره فى التاون هاوس؟؟؟؟؟؟؟؟؟؟؟

أسوور said...

بجد بوست يضحك

بس أنا بقول لو زاد الكلام على سفاح المعادى ممكن يقرر انه يهرب ومش هيلاقى قدامه حتة أحسن من المقطم

وساعتها هأبقى من ضحايا السفاح

ممكن حد يوز السفاح انه بلاهة بقى معادى ويخش على المقطم

AZ said...

اسكتى مش طلعوا اتنين سفاحين واحد معايا فى الشغل ساكن فى المعادى امبارح الساعه 6 الصبح السفاح طلع على بنت 17 سنه نازله المدرسه الساعه 6 الصبح وضربها بالمشرط فى وشه بس ده ابيض ومنغير شنب وفى واحده تانيه عورها برده من كام يوم واحد اسمر وبشنب شكلهم شلة اصدقاء سفاحين

أسوور said...

طب كويس مش هنعطله كدة عن حاجة ما دام طلعوا كتير طب ما يبعتوا لى واحد منهم

حد يقوله ان انا عاوزاه فى جريمة

موتينى من الضحك

عوليس said...

يخرب عقلك
سفاح وماشى فى البلاد سفاح
حلوه ههههههه

AZ said...

ياسمين:
يافندم احنا تحت ام معاليكى بس للاسف السفاح مش فاضى اليومين دول بيقولك يمكن على الصيف القادم بس مش وعد عشان جايله عقد عمل بره ويمن يسافر.. لو مزنوقه فى الجريمه اوى يعنى احنا برده اخوات انا ممكن البس طقم السفاحين بتاعى واجى اخلصلك الليله... اى خناقه؟
---------
عوليس:
منور يا حاج... ده بس من ذوقك :)

كائن العزلة الكئيب said...

أنا عايز أعلق على البلوج اللى فوق بس مش عارف و بما أنى هنا و خلاص أحب أقولك
أمبارح كان عمرى عشرين

Anonymous said...

hi there... i love dis post a lot ...nice n hight sense of humour :D
keep it gurl
ciao \m/

الحصان الأسود said...

هههههههه

لا بجد برافووو عليكي

بوست هايل و مبتكر ويفطس من الضحك

اسلوبك رائع

تحياتي