لسببب او لاخر قامت الست صاحبة الشغل بمنع الماسنجر خلسة من خلف ظهورنا بالتعاون مع جاسوس من زملائنا فى العمل... وده فى الحقيقة الشىء اللى نرفزنى.... يعنى الست مجتش بمنتهى البساطة وقالت ممنوع المسنجر على الاجهزة.. فعلا مكنش حد هيستخدمه... لكن اننا نيجى الصبح نلاقى المسنجر مابيشتغلش... وانا بالذات الاقى الانترنت اكسبلورر كمان مش شغال ( اصل الواد اللى منع الماسنجر من السيرفر اتخانقت معاه حوالى 4 مرات لغاية دلوقت--- ولو انها يعنى هى مش فارقة لانى بستخدم موزيلا فاير فوكس اساسا هىهىهىهى) دى اللى انا بسميها قلة الادب... فى الاول اعتقدت ان الامر لا يعدو كونه خلل ما فى شىء ما وبالطبع غير مقصود او متعمّد... لحد ما من شويه لقيتى رئيستى بتسالنى هو الماسنجر شغال عندك قلتلها لا واكتشفنا ان الناس كلها نفس الشىء.... خدونى على جمب وفهمونى ان فى الاغلب صاحبة الشغل عملت كده من ورانا بالتعاون مع ديلها (زميلنا بتاع ال IT - اللى المفروض انه زميلنا)... فى زميل تانى اى تى برده بس ماجاش النهارده... ده نزيه والتانى عميل.... انا عن نفسى مفرقش معايا ان الماسنجر مش شغال لان كده كده انا كنت بقرأ خريف الغضب بتاع هيكل... بس اتخنقت اوى من موضوع انى متاخده على خوانه... احنا مش اطفال عشان يعملوا معانا كده.. وحتى لو اطفال مايصحش يستهينوا بينا بالمنظر ده... وعنها..... ودخلنا على جهاز السيرفر شغلنا الماسنجر لقيناه شغال... قلنا بسسسسسسس يبقى هى زومبه رومبه واتقفل من على اجهزتنا.. وكان القرار منى بانى لاول مره فى حياتى استخدم الويب ماسنجر.... وقد كان....... والناس كلها فى المكتب عندنا شغالين بالويب مازنجر نياهاهاهاهاها... ولو قفلوه فى سايت تانى.. ولو قفلوه فى سايت تالت.. وفى الجوجل تشات اللى بيبقى فى صفحة المايل نفسها ومبيتقفلش بال pop up blocker.... وممكن اوقعلهم السيرفر بتاع المكتب اساسا انا مبيفرقش معايا انا دماغى وسخة ومبحبش حد يستغفلنى.... ليها خمسين حل... كل حاجه بتتعمل ممكن جدا حلّها خصوصا فى عملية اختراق المحظورات دى.. اللى عايز حاجه يطلبها لكن يصيع عليه هنشف ريق اهله... واخونا العصفوره ماشى ورايا فى كل المكتب عشان يعرف انا بعمل ايه فى كمبيوترات زمايلى التانين... شغلتلهم كلهم الويب ماسنجر... نفسى بقى صاحبة المكتب تخش على الماسنجر وتلاقينا كلنا اونلاين ... هنبسط اوى.. واشوفها بقى كده وهى جاية بتلف على مكاتبنا وهى مش قادرة تسألنا احنا على الماسنجر ازاى مع انه معموله بلوك هىهىهىهىهىهىهى ادفع نص عمرى واشوف المنظر ده عشان كده معملتلهاش بلوك من الليسته بتاعتى وبدعى ربنا انها تخش اونلاين خاصة وانى عاملالها Nick Name مخصوص عشان خاطرها هع هع هع هع هع ... عملت اسمى (Kaydahom).... ولو انى مابحبش الانتقام... بس مبحبش حد يصيع عليه... اهو ظروف الحياة بتضطر الانسان احيانا لانه يقرص الناس من ودنهم عشان يعرفوا حدودهم... واعتقد انه جه الوقت انهم يعرفوا ان سلطان كبر واتعلم ازاى يدوس على الزيناد... كلمة واحده هرد بيها على كل اللى انت عملته فيّه.. طاخ طاخ طاخ..... اهو اخونا العصفورة لسه معدى من جمبى عايز يعرف انا بكتب ايه.. حوري..... اؤكلى بعضك يا حورية.... تحيا جمهورية مصر العربية
