26 Jun 2006

انا العفريت

وانت صغير دايما يخوفوك من ابو رجل مسلوخه... وامنا الغولة.. واوعى حد يقولك تعالى اوديك لبابا وتروح معاه... اوعى حد يديك شوكالاته ويخطفك... اوعى... اوعى.. اوعى... وطبعا بعقلك الطفولى بتبتدى تخترع حاجات من دماغك تخاف منها.. العفريت اللى عايش ورى كنبة الانتريه؟؟؟ والعفريت اللى تحت ترابيزة السفرة... ده غير اشباح ماقبل النوم طبعا... والوحش اللى مستنيك فى الحمام.... بعد كده بتكتشف الخدعه.. ان ماعفريت الا بنى ادم... وتنسى بقى عفاريت الحمام والسفرة والانتريه وابو رجل مسلوخه والحدايه اللى هتخطف حمامتك وانت نايم عشان مابتتشطفش بعد ماتعمل بيبى... ويبتدى يتزرعلك بقى مخاوف تانيه... تكش من الناس الغريبه احسن يطلعوا مخبرين.. وتكش من الناس اللى بتتصاحب عليك احسن يطلعوا عصافير امن دولة.. ولو حد دخل عندك البلوج وزكتبلك كلمتين ولاد ناس.. بسسسس ده عايز يستدرجنى لتنظيم سياسى... بس اللى بيفضل موجود... العفاريت.. اما بتكتبر بتكتشف انهم بجد.. وانهم من لحم ودم.. وانهم مش دايما بيلبسوا اسود... وانهم مقامات واصناف واشكال والوان.. ابو نجمة.. وابو دبورة.. وابو نجمة ودبورة.. وابو ايد طَرشَه... وانهم فعلا بيطلعوا فى الضلمه... وانهم بيخطفوا بس من غير مايدوك شوكالاته ولا يقولولك هنوديك لبابا... بيخطفوك من سكات... بيخطفوك عشان انت الورث بتاع ابوهم... اللى اشتراك اول ماتولدت واداك ليهم هدية بمناسبة عيد ميلاده... عيد الام.. عيدد اى حاجه اهو اتبرعلهم بيك والسلام وبقيت زى العروسه يعملوا فيك اللى هم عايزينه.. ينيموك نوم العازب وتعجن عجين الفلاحة... والى اب... ارمى القرش على ودن القرد يلعب.. وممكن برده ياخدوا حمامتك وانت نايم... زى الحداية... بس مش عشان مابتتشطفش كويس بعد البيبى لكن عشان انت غلطت فى العفريت الكبير.... وتعيش عمرك كله خوفك بيزيد... وتلاقى كلامك من الخوف همس.. واعتراضك صمت... ولا اب بينفع ولا خال بيشفع.. وطريقك مسدود مسدود مسدووووود يا والدى..... عشان انت من غير امل... العبيد بتتحرر... لكن التركة بتتورث الى ابد الآبدين... طول مانت عايش وبتتنفس هتفضل خايف..... توب علينا يارب... هم ليه واحنا صغيرين ماكانوش بيخوفونا من العفاريت اللى بجد؟؟؟؟؟؟؟؟